2 Cronici
34 O Iosia sas-lo ohto bărșengo cana cărdilo rege hai lesco raimos încărdea 31 bărșa ando Ierusalimo. 2 Vo cărdea so si orta andel iacha le Iehovasche hai phirdea po drom lesche phuresco, o David. Ci risailo nici ca i ciaci rig, nici ca i stângo rig. 3 Ando 8-to bărș lesche raimasco, cana sas-lo încă iech șiavo, astardea te rodel le Devles pesche phuresco, o David, hai ando 12-to bărș lesche raimasco astardea te ujiarel i Iuda hai o Ierusalimo catar le thana uce, le cașta sacro, catar le chipuri cioplite hai le statui anda sastr. 9 Von avile co Hilchia, o baro rașai, hai dine lesche le love cai sas-le andine co chăr le Devlesco, save le leviți cai slujinas co udara chidine-le catar o Manase hai o Efraim hai catar sea le coaver anda Israelo, catar sea i Iuda hai o Beniamin hai catar sea le manușa cai beșenas ando Ierusalimo. 10 Dine-le codolenghe cai sas-le șiute te cheren i buchi co chăr le Iehovasco, hai codola cai cherenas buchi co chăr le Iehovasco folosisarde-le caște lașiaren hai te vazden pale o chăr. 11 Cadea că, dine le love codolenghe cai cherenas buchi hai codolenghe cai vazdenas o chăr, caște chinen bara șinde hai cașt andal suporturi cai încăren opre o chăr, hai caște șion le grinzi ca le clădiri save le regi anda Iuda mechle-le perade. 14 Ando timpo so încalavenas-pe le love cai sas-le andine ando chăr le Iehovasco, o rașai Hilchia arachlea o lil andai Legea le Iehovaschi, cai sas dini prin o Moise. 18 O secretaro Șafan mai phendea le regesche: „O rașai Hilchia dea-man iech lil”. Pala codoia, o Șafan astardea te citil anda leste angla o rege. 19 Cana așundea le dumes andai Legea, o rege șindea pesche hureaimata. 20 Pala codoia o rege phendea caring o Hilchia, caring o Ahicam, o șiavo le Șafanosco, caring o Abdon, o șiav le Micasco, caring o Șafan, o secretaro hai caring o Asaia, o slujitoro le regesco: 21 „Jian hai pușen le Iehovas anda mande hai anda codola cai așile ando Israelo hai andi Iuda anda le dumes cai phenen-pe ando lil cai sas-lo arachlo; că bari si i holi le Iehovaschi cai va avela opral amende, anda codoia că amare phure ci așunde catar le dumes le Iehovasche hai ci încărde sea so si scriime ande cado lil”.