Numerea

12 Atunci i Miriam hai o Aaron astarde te den duma contra o Moise anda codoia că lea pesche sar romni iech jiuvli cușito. 2 Von phenenas: „Numai prin o Moise dea duma o Iehova? Ci dea duma vo vi prin amende?”. Hai o Iehova așunelas. 4 Pe thaneste, o Iehova phendea caring o Moise, o Aaron hai i Miriam: „Jian avri sea le trin ca i țărha andai întâlnirea”. Hai găle sea le trin. 5 Hai o Iehova avilea tele ando stâlpo norosco, beșlea angla i țărha hai phendea te aven o Aaron hai i Miriam. Le dui avile angla leste. 6 Hai vo phendea lenghe: „Mangav tumen, așunen so phenav tumenghe. Dacă avelas mașcar tumende iech profeto le Iehovasco, avelas te cherav man prinjiando lesche ande iech viziunea sau avelas te dav duma lesa ande iech suno. 7 Tha mânre manușesa o Moise, ci cherav cadea! Lesche sas dino sea mânro chăr. 8 Cana dav duma lesa Vo silo angla mande, dav duma lesa pâtărdo, ci garav lestar chanci. Vo dichel sar si o Iehova. Ci sas tumenghe dar te den duma contra mânre manușesche, o Moise?”. 9 Hai o Iehova holiardea-pe zurales pe lende hai tiliardea. 10 O noro vazdea-pe opre catar i țârha hai dichta că i Miriam sas pherdi lepra, sas-li parni sar o iv. Atunci o Aaron risardea-pe ca i Miriam hai dichlea că sas-li pherdi lepra. 11 Sigo o Aaron phendea le Moisesche: „Mangav tut, mânro rai! Mangav tut, băstăr cado păcato. Phiradeam amen sar niște dile tusa! 12 Mangav tut, te na așel i Miriam sar iech șiavorro cai năștisardea-pe mulo, savesco mas si pe dipaș cherno!”. 13 Hai o Moise dea cingar caring o Iehova hai phendea: „O, Devla, mangav tut, sastiar-la! Mangav tut!”. 14 O Iehova phendea le Moisesche: „Dacă laco dad ciungarelas-la ando mui, ci avelas voi cărdi lajiavestar efta ghiesa? Te avel dini avri andai tabara hai te așel corcori efta ghiesa, pala codoia daștil te avel andini parpale.