Ioan
2 O trinto ghies sas iech abiav andi Cana anda Galileea, hai i dei le Isusoschi sas-li code. 2 O Isus hai lesche discipoli sas-le vi von acharde co abiav. 3 Cana mai sas numai iech țâra mol, i dei le Isusoschi phendea lesche: „Ci mai silen mol”. 4 Tha o Isus phendea lache: „Jiuvlie, sostar te duchal man sau tut anda cadai buchi? Mânro timpo ci avilea încă”. 5 Leschi dei phendea codolenghe cai servinas: „Te cheren sea so phenel tumenghe!”. 6 Code sas șiov vase baresche ande save șiolas-pe o pai, cadea sar manghenas le reguli anda o ujimos le iudeenghe; ande fiesavo anda lende daștilas te șiol-pe dui sau trin măsuri paiesche. 7 O Isus phendea lenghe: „Pheren le vase paieia”. Hai von pherde-le ji opre. 8 Pala codoia phendea lenghe: „Acana, încalaven iech țâra hai îngăren codolesche cai si o șăro cadale abiavesco”. Hai von îngărde lesche. 9 Cana pilea anda o pai cai sas-lo cărdo ande mol, o șăro le abiavesco achardea le jamutres. Bi te jianel catar avelas i mol (chiar cana le servitori cai încalade o pai jianenas), 10 phendea lesche: „Orisavo manuș del mai anglal i lași mol hai, cana le manușa sile iech țâra pile, i mol cai si mai țâra lași. Tha tu încărdean i lași mol ji acana”. 11 Prin so cărdea andi Cana anda Galileea, o Isus astardea te cherel pesche miracolea. Cadea, vo sicadea peschi gloria hai lesche discipoli pachiaie ande leste. 13 I patraghi le iudeenghi sas pașă hai o Isus gălea opre co Ierusalimo. 14 Ando templo, vo arachlea ca lengo than codolen cai bichinenas guruvnea, bacrea hai porumbei hai codolen cai paruvenas le love. 15 Atunci vo cărdea iech bicio anda dorea hai nașadea anda o templo sea codolen cai sas-len bacrea hai guruvnea, șiudinea tele le love codolenghe cai paruvenas-len hai vi lenghi meseli. 16 Hai codolenghe cai bichinenas porumbei phendea: „Len sea cadal buchia catar! Na mai cheren piața anda o chăr mânre Dadesco!” 17 Lesche discipoli ande penghe amintea că si scriime: „I iag cai si ande mânro ilo anda chio chăr va thabarela man”. 25 hai ci sas-les nevoia ca varecon te phenel lesche vareso anda iech manuș, că jianelas so si ande le manușesco ilo.