Ezechiel
7 Acana, șiav le manușesco, alosardem tut te aves paznico anda o chăr le Israelosco. Cana va așunesa iech duma anda mânro mui, te phenes-la lenghe mai dur ande mânro anav. 8 Dacă phenav codolesche nasul: «Manuș nasul, ciaces va avela te meres!», tha tu ci phenes chanci codolesche nasul caște paruvel pesco phiraimos nelașio, vo va merela sar manuș nasul anda peschi doș, tha lesco rat va avela te mangav-les parpale tutar. 11 Phen lenghe: «„Jiuvindo som me”, phenel o Rai Suverano Iehova, „că ci arachav mânri plăcerea ando merimos codolesco nasul, tha vi mai but, camav ca vo te risarel-pe catar lesco drom nasul hai te trail mai dur. Risaren tumen, risaren tumen catar tumare droma nasul! Sostar te meren, chăr le Israelosco?”». 14 Hai, dacă phenav codolesche nasul: „Va avela te meres siguro”, tha vo risarel-pe catar lesco păcato, hai cherel so si mișto hai orta, 15 del parpale i buchi lini sar garanția, del parpale so ciordea hai phirel pala le legi cai îngăren ca i viața hai ci cherel so si nasul, atunci siguro va traila. Ci va merela. 16 Niciech anda le păcatea cai cărdea-le ci va avela ando amintea contra lesche. Anda codoia că cherel so si mișto hai orta, vo siguro va traila». 32 Ita că tu san anda lende sar iech manuș cai siles i vocea șucar hai cai jianel mișto te ghileabal ca iech instrumento cai siles coarde, cai ghileabal ghilea anda i iubirea. Von va așunena chire cuvintea, tha chonic ci va lela sama lendar.