Luca
11 Ca țâra timpo pala codoia, o Isus tiliardea caring iech foro cai bușiolas Nain, hai lesche discipoli hai but manușa jianas leia. 12 Cana pașiolas le udarestar le forosco, ita că sas andino avri iech mulo, o corcoro șiav iecha jiuvliache, cai sas phivli. Laia sas vi iech bari mulțimea anda o foro. 13 Cana o Rai dichlea-la, cărdilea lesche mila latar hai phendea lache: „Na mai rov!”. 14 Pala codoia pașilo hai șiutea o vast pi targa pe savi sas o mulo, hai codola cai îngărenas-la așile po than. Atunci vo phendea: „Tărneia, phenav tuche: Uște!”. 15 Hai o mulo uștilo hai astardea te del duma, hai o Isus dea-les lesca deiache. 22 Hai vo phendea lenghe: „Jian hai phenen le Ioanosche so dichlean hai so așundean: Acana le core dichen, le bange phiren, le leproși sile ujiarde, le cașuche așunen hai le mule sile uștiade, hai le ciorenghe si lenghe phendi i vestea lași. 35 Cu sea cadala, o goghiaverimos prinjianel-pe pala lesche roade.” 37 Hai dich că iech juvli prinjiandi ando foro că păcătuilas, așundea că o Isus halas ando chăr le fariseosco hai andea iech vaso anda alabastro ande savo sas uleio cai chandelas șucar. 38 Voi beșelas palal leste, ca lesche pânre, hai astardea te rovel; chinghiarelas lesche pânre lache asfența hai choselas-len lache balența. Mai but, voi ciumidelas but lesche pânre hai machelas-len uleiosa cai chandelas șucar. 47 Anda codoia phenav tuche că lache păcătea, chiar cana sile but, sile iertime, anda codoia că iubisardea but. Tha, casche iertil-pe țâra iubil țâra”. 48 Pala codoia phendea la jiuvleache: „Che păcatea sile chosle”. 49 Atunci codola cai beșenas lesa ca meseli phenenas iech averesche: „Con si cado manuș cai iertil vi le păcătea?”. 50 Tha vo phendea la jiuvleache: „Chio pachiamos salvisardea tut. Jia andi pacea!”.