Isaia
30 „Vai le șiavendar șărale”, phenel o Iehova. „Von cheren planuri cai ci sile mânre, cheren phanglimata, tha na mânre spiritosa, caște șion păcato ca iech aver păcato. 9 Anda codoia că sile iech poporo cai vazdea-pe contra manghe, șiave hohamne, șiave cai ci camen te așunen i legea le Iehovaschi. 15 Că ita so phenel o Rai Suverano Iehova, o Sfânto le Israelosco: „Dacă aven parpale mande hai așen liniștime, va avena salvime. Dacă așen liniștime hai si tumen pachiamos, va avena zurale”. Tha tumen ci camlean. 18 Tha o Iehova ajucărel pherdo răbdarea caște sicavel tumenghe lașimos; vo va vazdela-pe caște sicavel tumenghe îndurarea. Că o Iehova silo iech Del le ortomasco. Fericime sile sea codola cai ajucăren-les! 19 Cana o poporo va beșela ando Siono, ando Ierusalimo, nicisar ci va avela te roves. Vo va sicavela tuche lașimos cana va avela te des cingar pala ajutorii; vo va dela-tu răspunso pe thaneste cana va așunela-tu. 20 Chiar cana va dela-tu necazo sar manro hai asuprirea sar pai, o Iehova, chio Baro Sicaitorii, ci va mai garuvela-pe hai va avela te diches che iachența che Bare Sicaitores. 21 Che cana va așunena iech cuvânto cai va avela pala tute hai va phenela: „Ita o drom! Phiren pe leste!”, dacă camen te jian caring i ciaci sau dacă camen te jian caring i stângo. 23 Vo va dela brâșând anda i sămânța cai șios-la andi phuv, hai o haben cai va dela-les i phuv va avela but hai lașio. Ande codo ghies, che guruvnia va hana pe bare plaia. 24 Le guruvnea hai le măgari cai cheren buchi i phuv va hana haben hamisardo măcrișoia, cai sas-lo ujiardo la lopataia hai la furcaia. 25 Pe orisavo ucio plain hai pe orisavo baro plai va avena paiorre hai paia cai thabden ando ghies cana va avela o baro șinimos, cana va perena le turnuri. 26 O udud catar o șionoto pherdo va avela sar o udud le chamesco, hai o udud le chamesco va avela efta-var mai zuralo, sar o udud efta ghiesengo, ando ghies cana o Iehova va phandela i duch lesche poporoschi hai va sastiarela i bari phugni cai cărdea-la cana dea-les dab.