Marcu

19 Tha vo ci mechlea-les, hai phendea lesche: „Jia chăre ca che neamurea hai phen lenghe sea so cărdea o Iehova anda tute hai sar sicadea tuche lașimos”. 25 Hai sas iech jiuvli cai sas-la iech șiordimos ratesco de 12 bărșa. 26 Voi sas ca but doctori, cai cărde lachi duch vi mai bari, hai dea sea le love cai sas-la, tha ci simțolas-pe mai mișto; voi sas sea mai nasfali. 27 Cana așundea so phenelas-pe anda o Isus, voi gălea pala leste mașcar le manușa, pașilea lestar de palal, hai șiutea o vast pe lesco hureaimos, 28 anda codoia că phenelas pesche: „Numai te șioav o vast pe lesco hureaimos hai va avela te sastiarav-ma”. 29 Pe thaneste, laco șiordimos ratesco așilea; hai simțosardea că sas-li sastiardi catar laco duchado nasfalimos. 30 O Isus dea peschi sama sigo că anda leste înclistea iech zuralimos. Risardea-pe caring le manușa, hai pușlea: „Con șutea o vast pe mânro hureaimos?”. 31 Tha lesche discipoli phende lesche: „Diches mișto că le manușa spiden-pe caring tute hai tu mai pușes: «Con șiutea o vast pe mande?»”. 32 Cu sea cadala, vo dichelas pașa peste caște jianel con cărdea cadai buchi. 33 Atunci i jiuvli cai sas-li daradi hai izdralas că jianelas so întâmplosardea-pe laia, pașilea, pelea tele angla leste hai phendea lesche sea o ciacimos. 34 Vo phendea lache: „Mânri șei, chio pachiamos sastiardea-tu. Jia andi pacea hai av sastiardi catar chio duchado nasfalimos”.