Isaia

3 Tu va avela te feris codolen cai mechen-pe cu sea ande chio vast; va avela te des-len iech pacea cai încărel, anda codoia că șion pengo pachiamos ande tute. 4 Pachian tumen ando Iehova anda sea o timpo, anda codoia că o Iah Iehova si i Stânca cai așel veșnico! 7 O drom codolesco bidoșaco silo orta. Că tu cai san orta, va avela te lașiares o drom codolesco bidoșaco. 8 Cana phiras pe chio drom cai sicavel amenghe che porunci, o, Iehova, șioas amari speranța ande tute. Amaro ilo rovel pala tute hai pala chio anav. 9 Andi riat si manghe doro tutar anda sea o ilo, da, sea mânre zuralimasa rodav tut sea o timpo; că tu cana cheres cris opral i phuv, le manușa cai beșen pe late sichion o ciacimos. 15 Tu cărdean te bariol o poporo, o, Iehova, tu cărdean te bariol o poporo, sicadean so baro san! Bariardean but le granițe le themesche. 19 „Che mule va traina. Le corpuri mule mânre poporosche va vazdena-pe. Ușten hai den cingar bucuriatar, tumen, cai beșen andi phuv! Chi roua si sar i roua de teharin hai i phuv va anela viațate codolen cai sile bi zoraco ando merimos. 20 Jia, mânro poporo, jia andre ande che camere hai phandav le udara pala tute! Garav tut numai iech țâra ji cana va nachela i holi!