I Lecția 6
Ce speranța si andal mule?
1. Ce vestea lași si andal mule?
Cana o Isus arăzlo andi Betania, pașoa Ierusalimo, lesco amal o Lazăr sas mulo de ștar ghies. O Isus gălo-l mormântoste le Lazărosco ande-ch than lesche pheianța i Marta thai Maria. Ande hanțî timpo chidile but manuș. Imaginisar-tuche chichi bucuria simțosarde i Marta thai Maria cana o Isus jiuvindisardea le Lazăros! — Citisar Ioan 11:21-24, 38-44.
I Marta jianelas deja i vestea lași andal mule. Voi jianelas că o Iehova va anela pale viațate codolen cai mule thai că von va daștina te train pale pi phuv. — Citisar Iov 14:14, 15.
2. Savi si i starea le mulenghi?
O Del phendeas le Adamosche: „Phuv san thai andi phuv va risaoia-tu” (GENEZA 3:19).
O manuș silo cherdo andai phuv (Geneza 2:7; 3:19). Les siles iech corpo masăsco, ande leste nai iech sufleto cai ci merel. Anda codoia, cana merel, chanci anda leste ci așel jiuvindo. Mai but, lesco creiero ci mai cherel buchi deci manai-les gânduri thai ci mai simțol chanci. Anda codoia, o Lazăr ci povestisardea chanci andoa timpo chichi sas mulo. — Citisar Eclesiasto 9:5, 6, 10.
Chinuil o Del le manușen andi iag paloa merimos? I Biblia phenel că-l mule ci mai jianen chanci. Cadea că, o sicaimos andoa iado si iech hohaimos thai iech jignirea andini le Devlesche, cai urâl chiar i ideea te chinuil le manușen andi iag. — Citisar Ieremia 7:31.
Dich o materialo video Savi si i starea le mulenghi?
3. Daștin le mule te den-amenghe duma?
Le mule ci den duma thai ci așunen (o Psalmo 115:17). Tha si niște îngeri nasul cai daștin te den duma le manușenghe, cărindoi te pachian că den duma-l mule (2 Petru 2:4). O Iehova ci mecăl-ame ci te zumaoas te das duma le mulența. — Citisar O Deuteronomo 18:10, 11.
4. Con va jiuvindila?
Milioanea manușenghe cai acana sile andel mormintea va avena pale viațate pi phuv. Chiar vi unii manuș cai ci prinjiande le Devles thai cherde buchia nasul va avena jiuvindime. — Citisar Luca 23:43; Le Fapte 24:15.
Le jiuvindime va daștina te sichion o ciacimos andoa Del thai te sicaven pachiamos ando Isus ascultindoi lestar (Revelația 20:11-13). Te cherena buchia lașe, va bucurina-pe viațatar veșnico pi phuv. — Citisar Ioan 5:28, 29.
5. O jiuvindimos, so sicavel-amenghe andoa Iehova?
O jiuvindimos si posibilo pentru că o Del bișealdea pesche Șiaves te merel anda-mende. Cadea, o jiuvindimos sicavel i iubirea thai o lașimos nemeritime le Iehovasco. Cas cameias cel mai but te diches cana va avela o jiuvindimos? — Citisar Ioan 3:16; Romani 6:23.