PUȘIMOS 7
Sar daștiv te așiav contra le presiuni te aven-ma relații sexualo?
SO CHEREIAS TU?
Imaginisar tuche i situația cai avel: I Heather prinjianel le Mikes de numai dui șiona, tha simțosarel că prinjianen-pe de cana si i lumea. Traden penghe sea o timpo mesajea, den duma but timpo co telefono hai gândin ande iech felo le dui! Tha acana, o Mike camel mai but sar te den duma.
De dui șiona, von numai încărde-pe vastendar hai dine penghe țâne ciumidipe. I Heather ci camel te jial mai dur, tha nici te hasarel le Mikes. Ji acana, chonic ci cărdea-la te simțol-pe cadea de șucar, cadea de specialo. „Ji la urmă”, phenel pesche voi, „iubisaras-ame . . .”
Dacă aveias cadea de maturo caște des tuche întâlniri hai aveias ande laco than, so chereias?
BEȘ IECH ȚÂRA HAI GÂNDISAR-TU!
Le relații sexualo sile iech daro dino le Devlestar numai codolenghe cai sile căsătorime. Le relații sexualo angla te aves căsătorime ci sicaven respecto caring cado daro. Si sar cana leias iech gad șucar savo dea-les tuche varecon hai cheraias anda leste iech cârpa anda ujimos
Dacă ci încăres conto de iech legea fizico, sar exemplo i legea gravitației, suportis le urmări. Sa cadea întâmplol-pe vi cana ci încăres conto de iech legea moralo, cai phenel: „Te na cheren curvia”. (1 Tesaloniceni 4:3)
Save si le urmări cana ci respectisaras cadai porunca? I Biblia phenel: „Con practichil i curvia cherel păcato contra pesco corpo”. (1 Corinteni 6:18) Ande ce senso?
Le cercetări sicaven că but andal tărne cai sas-le relații sexualo angla te aven căsătorime, suportisarde iech sau mai but anda le urmări cai aven.
SENTIMENTEA DOȘALE. Le mai but tărne cai sas-le relații sexualo angla te aven căsătorime phenen că, pala codoia, falea lenghe pharo.
BI PACHIAMOS. Pala so cheren sexo, fiesavo pușel-pe ande peste: „Casa mai cărdea vo/voi sexo?”.
DEZAMĂGIREA. Ande pengo sufleto, but tărne șeia camen te aven ocrotime, na folosime. Hai but tărne șiave phenen că ci mai placea-le iecha șeiatar casa cărde sexo.
Ji la urmă: Dacă cheres sexo angla i căsatoria, anes pe tute lajiav hai hasares vareso cuci. (Romani 1:24) Chio corpo silo prea cuci caște des-les pe chanceste!
Sicav că situ zuralimos caște ‘na cheres curvia’. (1 Tesaloniceni 4:3) Tha cana avela te căsătoris-tu, va daștia te aven-tu relații sexualo. Atunci va avela te bucuris-tu lendar, bi te aves îngrijorime, bi te fal tuche pharo hai bi te daras, cadea sar simțon-pe codola cai încăren relații sexualo angla te aven căsătorime. (Proverbe 7:22, 23; 1 Corinteni 7:3)
TU SO PHENES?
Varecon cai iubil-tu ciaces, va șiola ando pericolo chio sastimos fizico hai emoționalo?
Varecon cai iubil-tu ciaces, va cherela-tu te rimosares chi relația le Devleia? (Evrei 13:4)