Pușimata catar amare cititori
Cana o Isus cărdea I Cina le Raieschi, cai sas le coaver 70 discipoli cai bișaldea-len te phenen i vestea lași? Mechle-les corcoro?
Numai anda codoia că le 70 discipoli ci sas-le le Isusosa cana cărdea i Cina le Raieschi na-i sostar te pachias că von mechle le Isusos corcoro sau că vo ci mai camlea te aven lesche discipoli. Ande codo ghies o Isus camlea te avel numai pesche apostolența.
Le 12 apostoli hai vi le 70 discipoli sas-len i aprobarea le Isusoschi. Mai anglal, o Isus alosardea 12 murșa anda pesche but discipoli, anda save phendea că bușion apostoli. (Luca 6:12-16) Vo sas-lo andi Galileea cana „achardea le deșudui apostolen” hai „bișaldea-len te den duma pa o Regato le Devlesco hai te sastiaren le nasfalen” (Luca 9:1-6) Pala codoia, cana sas-lo andi Iudeea, o Isus „alosardea aver 70 discipoli hai bișaldea-le dui po dui”. (Luca 9:51; 10:1) Cadea că, le Isusos sas-les manușa cai phenenas i vestea lași andel thana cai sas predichime mai anglal.
Le evrei cai cărdile discipoli le Isusosche daștile-pe că încărde mai dur i patraghi penghe familiența. (Ex. 12:17-20) Țâra timposa angla so te merel o Isus, gălea ande iech than pesche apostolența co Ierusalimo. Tha vo ci camlea te încărel i patraghi sea pesche discipolența – anda Iudeea, andai Galileea hai andai Pereea. Vo camlea ciaces ande codo ghies te avel numai pesche apostolența. O Isus phendea lenghe: „Camlem but te hav tumența cado haben anda i Patraghi angla so te nachav prin bare ducha.” (Luca 22:15)
Le Isusos sas-les ciaces sostar te cherel cadaia. Ande țâra timpo vo avelas te merel sar ‘Bacrișo le Devlesco cai chosel o păcato la lumeaco’. (Ioan 1:29) Cadai buchi avelas te întâmplol-pe ando Ierusalimo ando than cai de but bărșa anenas-pe jertfe le Devlesche. O bacrișo anda i patraghi anelas amintea le evreienghe că o Iehova ajutisardea-len te jian avri anda o Egipto. Tha prin o merimos le Isusosco, avelas te anel iech eliberarea but mai bari, vo avelas te chosel o pacato hai o merimos. (1 Cor. 5:7, 8) Le Isusosco merimos cărdea le Deșuduien te aven I temelia la congregațiachi creștino. (Ef. 2:20-22) Trebul te dichas că o Ierusalimo anda o cerii si cărdo pe le „12 bara anda i temelia” pe save sas scriime „le 12 anava le 12 apostolenghe le Bacrișesche.” (Rev. 21:10-14) Le apostoli fideli, avenas te cheren iech buchi zurales importanto anda o scopo le Devlesco. Cadea că hachiaras sostar o Isus camlea ca le apostoli te aven lesa andi cadai palutni patraghi hai ca i cina le Raieschi cai deande codo ghies phendea te încăras-la.
Le 70 hai le coaver discipoli ci sas-le le Isusosa ande codoi riat. Cu sea cadala, sea le discipoli fideli avenas-len but miștimata pala so o Isus cărdea i Cina le Raieschi. Sea codola cai cărdile creștini machle ando timpo, avenas te jian ando ‘legământo anda iech regato’, anda savo o Isus dea duma ande codoi riat. (Luca 22:29, 30)