1925 – Acana iech șăl bărș

LE MANUȘA LE DEVLESCHE TREBUN TE MAI AJUCĂREN

Ande 1925, but Studenți andai Biblia pachianas că i phuv va avela cărdi iech Paradiso. O phral Albert Schroeder, cai pala codoia slujisardea ando Corpo de Guvernare phendea: „Amen pachiaiam că ande 1925 le creștini machle va jiana ando cerii hai le murșa loialo andal purane ghiesa, sar o Avraam hai o David, va avena andine parpale viațate sar prinți caște rain pi phuv sar partea anda o Regato le Devlesco”. Tha, cana o bărș nachlea hai ci întâmplosardea-pe chanci, chichiva phrala hai pheia sas-le zurales perade. (Prov. 13:12)

Chiar cana sas-le perade, le mai but Studenți andai Biblia predichisarde mai dur. Von hachiarde că i mai importanto buchi si te sicaven averen anda o Iehova. Mai dur, va avela te dichas sar folosisarde o radio caște predichin chichi mai bute manușenghe.

CHEREN-PE MAI BUT STAȚII RADIO

Ande 1924 but manușa așunde o posto de radio WBBR. Cadea că, ande 1925 le phrala cărde aver stația de radio, pașa o Chicago, Illinois. Cado posto bușiolas WORD (cai însemnol „O CUVÂNTO”). O Ralph Leffler, iech inginero cai cărdea buchi ca i stația, phenel: „Andel rachia șudre le ivendesche, le programea WORD sas așunde ji dur”. Sar exemplo, iech familia cai beșelas cam 5 000 kilometrea dur cathar o Chicago, ando Pilot Station, Alaska, așundea ca amaro posto, iech anda le dintune programea. Pala so așunde o programo, i familia scriisardea iech lilorro caring o posto de radio ande savo mulțumilas codolenghe cai cherenas buchi code anda codoia că cado programo zuriardea lengo pachiamos.

O Turno de veghe anda 1 decembria 1925 phendea sostar i stația anda o radio daștilas te avel așundi ande cadichi de but thana: „O WORD si iech anda le mai lașe stații de radio andal Statele Unite, anda codoia că sila iech zuralimos de 5 000 wați. Le manușa daștin te așunen-les pi coasta cathar o Atlantico, tha vi ando Pacifico, andi Cuba hai ando nordo le themesco, andi Alaska. But manușa cai așunde i vestea lași ca amaro posto camle te sichion mai but buchia anda o ciacimos”.

Ande sa codo timpo, le Studenți andai Biblia denas penghi zor te phenen mai dur i vestea lași prin o radio vi andi Canada. Ande 1924, sas cărdi i iechto stația radio CHUC ando Saskatoon, Saskatchewan. Sas iech anda le dintune posturi radio andai Canada cai denas duma anda o Del. Ande 1925, le phrala trebunas te arachen iech than mai baro anda i stația radio. Cadea că, i Societatea Watch Tower lea i stația hai muchisardea le studiouri ando Regent Building, iech purano teatro anda o Saskatoon, cai chinde-les hai lașiarde-les anda cadaia.

Prin cado posto radio, but manușa cai beșenas andel țâne forurea hai andel gava anda Saskatchewan așunde i iechto data i vestea lași. Sar exemplo, pala so așundea i emisiunea, iech jiuvli cai bușiolas Graham, cai beșelas ande iech țâno foro, cărdea iech lilorro ande savo manglea publicații biblico. O phral George Naish phendea: „Voi scriisardea amenghe: «Sicaven amen!». Hachiardeam că sas-la bari nevoia ajutorostar, cadea că bișaldeam lache sea i seria Studii andal Scripturi”. Na pa but timpo, i Graham astardea te phenel vi averenghe anda codo than i vestea lași.

IECH CIACIMOS IMPORTANTO

Ando Turno de veghe anda 1 martia 1925, sas iech articolo zurales importanto, cai bușiolas „I nașterea iecha națiuneachi”. Sostar sas cadea de importanto cado articolo? Le Studenți andai Biblia hachiarde că le Satanos siles iech organizația. Vo rail opral le demoni hai opral o sistemo comercialo hai politico pa i phuv. Tha prin cado articolo, o „sclavo fidelo hai prevăzătorii” ajutisardea le phralen te hachiaren că vi le Iehovas siles iech organizația. Cadai organizația așel dur la lumeatar le Satanoschi hai cherel sea so daștil caște ujiarel o anav le Iehovasco. (Mat. 24:45) Mai but, o sclavo phendea că o Regato le Devlesco astardea te rail ande 1914. Ande codo bărș, pala o războio anda o cerii, o Satan hai lesche demoni sas-le șiudine anda o cerii hai acana silen zuralimos numai pi phuv. (Rev. 12:7-9)

Anda chichiva Studenți andai Biblia ci sas ușoro te hachiaren cadaia. Caște ajutin-len, le phrala dine-len iech lașio sfato prin cado articolo: „Dacă chichiva cai citin o Turno de veghe ci camen te len-pe pala so phenel-pe cade, mangas tumen te ajucăren le Raies pherde răbdarea hai te slujin le Iehovasche mai dur ieche ilesa ujo”.

Cu sea cadala, o Tom Eyre, iech colportorii (sau pioniero, sar si prinjiando ande amare ghiesa) anda Marea Britanie, phendea sar simțosarde-pe le mai but Studenți andai Biblia pala so citisarde cado articolo: „Le phrala sas-le zurales bucurime pala so citisarde sar trebulas hachiardo o capitolo 12 anda Revelația. Pala so hachiardeam că o Regato le Devlesco astardea te rail ando cerii, camleam vi mai but te phenas le manușenghe cadai vestea lași. Cadaia zuriardea amen te jias mai but andi predicarea hai dichleam sar o Iehova pregătil pesche manușen anda buchia vi mai bare ando viitorii”.

MARTORI ANDA O IEHOVA

Aghies, le Martori le Iehovasche prinjianen mișto le dumes anda Isaia 43:10. Cade phenel-pe: „«Tumen san mânre martori», phenel o Iehova, «da, mânro slujitorii cas alosardem-les»”. Angla o bărș 1925, ci delas-pe duma prea but anda cado verseto. Tha cadai buchi parudea-pe. Ando bărș 1925, ando Turno de veghe dea-pe duma andal versetea anda Isaia 43:10 hai 12 ande 11 numerea anda cadai revista.

Co sfârșito le șionesco augusto 1925, le Studenți andai Biblia încărde iech congreso andi Indianapolis, Indiana. O phral Joseph Rutherford scriisardea cado mesajo po programo le congresosco: „Avileam ca cado congreso caște primisaras . . . zuralimos amare Raiestar, hai cana risaras amen chăre, te camas vi mai but te avas lesche martori”. Ande le ohto ghiesa co congreso, le phrala sas-le zuriarde te sicaven le manușen anda o Iehova oricana daștinas.

Savatone, 29 augusto, o phral Rutherford încărdea iech cuvântarea cai bușiolas „Zuriarav tumen te sicaven averen anda o Iehova”. Vo sicadea sostar i predicarea si cadea de importanto: „O Iehova phenel pesche manușenghe: «Tumen san mânre martori, . . . hai me som o Del». Atunci vo phendea lenghe cadal dumes zurale: «Vazden iech semno anda le popoarea!». Le corcore manușa cai daștin te sicaven averen anda o Iehova, si lesche manușa. Vo del-len pesco spirito hai ajutil-len, anda codoia că von si lesche martori”. (Is. 43:12; 62:10)

Pala i cuvântarea le phraleschi Rutherford, vo citisardea iech documento cai bușiolas „Iech mesajo anda speranța”. Sea le manușen ciailea-len cado mesajo, cai sicavelas că numai prin o Regato le Devlesco daisaras te bucurisaras amen „paceatar, viațatar hai sastimastar anda sea o timpo”. Pala codoia, cado documento sas traducime ande mai but șiba hai sas-lo folosime andi predicarea. Cărde-pe cam 40 milioanea lilorre.

Le Studenți andai Biblia parude pengo anav ande „Martori le Iehovasche” pala chichiva bărșa. Tha țâra po țâra, von astarde te hachiaren chichi de importanto si anda lende te sicaven averen anda o Iehova.

LE STUDENȚI ANDAI BIBLIA ASTARDE TE JIAN PARPALE LE MANUȘENDE CAI CAMLE TE SICHION MAI BUT

Anda codoia că sas cadichi de but Studenți andai Biblia, le phrala zuriarde-len te jian parpale le manușende hai na numai te den-len publicații. Pala so sas i campania ande savi delas-pe o lilorro Mesajo anda speranța, andi publicația Buletina phendea-pe cadaia: „Den tumari zor te jian parpale codolende cai sas lenghe mechlo o liloro Mesajo anda speranța, chiar cana ci mechlean aver publicații”.

Andi ediția anda ianuaria 1925 andai publicația Buletin, iech Studento andai Biblia anda o Plano, Texas phendea: „Sam bucurime te dichas că cana jias parpale andel thana ande save predichisardeam mai anglal, le manușa camen te așunen amen mai but sar andel neve thana. Sar exemplo, andel palutne 10 bărșa, predichisardea-pe panji var ande iech țâno foro. . . . Na de but timpo, i phei Hendrix hai mânri dei predichisarde pale ande cado foro hai mechle mai but lila sar oricana”.

Iech colportorii cai slujisardea andi Panama scriisardea: „But manușa cai phende manghe te tiliarav cathar lengo udar, camle te așunen man cana risailem lende i duito sau i trinto var. Ande cado bărș so cărdem o mai but andi predicarea, sas te jiav pale le manușende savența dem duma hai sas man but șucar experiențea”.

SO VA AVELA ANDO VIITORII

Co sfârșito le bărșesco 1925 o phral Rutherford scriisardea le pionierenghe iech lil hai phendea lenghe so cărdea-pe andi predicarea ande codo bărș hai so trebunas te cheren mai dur. Vo phendea: „Ando bărș cai nachlea, sas tumen i bari buchi te zuriaren o ilo bute manușengo duchade. Cadai buchi pherdea tumare ile bucuriasa. . . . Ando bărș cai avel va daștina te sicaven le manușen anda o Del hai anda lesco Regato hai te sicaven con si lesche ciace slujitori. . . . Ande iech than, te așaras mai dur le Devles hai amare Reges”.

Co sfârșito le bărșesco 1925, le phrala cărde planuri te cheren mai baro o Betelo anda o Brooklyn. Ande 1926, i organizația avelas te astarel o mai baro proiecto andal construcții cai sas ji atunci.