Trebulas te na mai tradav i mașina?

Naches vi tu prin cadaia? Dacă da, so daștil te ajutil tut te alosares dacă te mai trades i mașina?

Ande chichiva thema, le șoferea mai phure trebun te cheren iech testo medicalo angla te neviaren pengo permiso. Cadea, o doctoro daștil te phenel dacă o șoferii daștil te tradel mai dur i mașina. Le creștini anda cadal thema trebun te len-pe pala cadal legi. (Rom. 13:1) Tha, chiar cana ande chio them na-i cadal legi, si chichiva buchia cai daștin te ajutin tut te diches dacă daștis te trades i mașina mai dur andi siguranța.

DICH DACĂ DAȘTIS TE TRADES I MAȘINA MAI DUR ANDI SIGURANȚA

Iech organizația anda le manușa phure, andal State Unite, phenel so pușimata daisaras te șioas amenghe:

• Si manghe pharo te dichav le indicatoarea rutiero sau te dichav mișto pi riat?

• Si manghe pharo te mișchiv man caște dichav andel onglinzi sau te risarav mânro șăro caște dichav mai mișto so si palal?

• Si manghe pharo te mișchiv man sigo, sar exemplo, te lav o pânro pa i accelerația hai te șioav-les pi frâna?

• Si pharo le coavere mașinenghe anda codoia că me tradav prea locăs?

• Somas mai butivar pașă te cherav iech accidento la mașinasa sau dem dab mânra mașinasa ande aver buchia?

• Oprisardea man i poliția anda codoia că ci tradem mișto?

• Întămplosardea-pe manghe te sovav co volano?

• Lav vareso draba cai daștinas te cheren man te na mai tradav andi siguranța?

• Phende manghe mânri familia sau mânre amala că daran anda mande anda codoia că dichle sar tradav?

Dacă anda tute o răspunso ca iech sau dui anda cadal pușimata sas da, avelas mișto te cheres chichiva paruimata. Sar exemplo, daștis te na mai trades cadea de but timpo, hai pi riat te trades vi mai țâra. Puș tut mai butivar dacă trades mișto i mașina. Daștis te pușes ieche jenes anda chi familia sau ieche amales dacă trades mișto. Sa cadea, daștis te cheres iech curso caște sichios sar te trades andi siguranța. Tha, dacă ca mai but pușimata de opral o răspunso sas da, daștil-pe că avelas goghiaver te na mai trades i mașina.a

SAR DAȘTIL TE AJUTIL TUT I BIBLIA TE CHERES LAȘE ALOSARIMATA?

Daștil-pe că si tuche pharo te diches că ci mai san iech șoferii cadea de lașio sar sanas mai anglal. Hai daștil-pe că san perado cana gândis tut că ci mai daștis te trades. Tha sar daștil te ajutil tut i Biblia te diches mișto le buchia hai te alosares goghiaver? Te dichas dui sicaimata.

Av umilo. (Prov. 11:2) Cana phurioas, ci mai dichas hai ci mai așunas cadea de mișto hai ci mai mișchisaras amen cadea sar daisardeam mai anglal. Sar exemplo, but ci mai cheren chichiva sporturi pala so phurion, anda codoia că hachiaren că si risco mai baro te cheren iech accidento. Sa cadea si vi cana tradas i mașina. Iech manuș umilo ci mai tradel cana dichel că ci mai daștil te tradel andi siguranța. (Prov. 22:3) Hai iech manuș umilo va așunela cana aver phenen lesche că si mai mișto te na mai tradel hai va lela-pe pala lenghe sfaturi (Dich vi 2 Samuel 21:15-17.)

Na an opral tute i doș rateschi. (Deut. 22:8) Dacă varecon ci mai tradel mișto daștil te cherel nasulimos le coaverenghe sau chiar te mudarel-len. Iech manuș cai ci mai tradel andi siguranța, șiol ando pericolo peschi viața hai vi i viața le coaverenghi. Hai dacă cherel iech accidento cai varecon merel, anel opral peste i doș rateschi.

Cana trebul te alosares dacă te mai trades i mașina sau nici, na gândisar tut că le coaver ci va mai dichena tut cuci. O Iehova iubil tut anda che șucar calități, vi anda chi umilința hai anda codoia că les sama averendar. Vo promitil tuche că va avela pașa tute. (Is. 46:4) O Iehova ci va mechela tut niciechdata corcoro. Cadea că, mang le Iehovas te del tut goghiaverimos hai sfaturi lașe andai Biblia caște alosares dacă te mai trades i mașina sau nici.