ARTICOLO STUDIOSCHE 49
GHILI 44 O manglimos codolesco le ileia duchado
Sar daștil te ajutil amen o lil Iov cana das sfaturi?
„Tha acana, Iov, mangav tut, așun mânre dumes!” (IOV 33:1)
ANDA SO DAS DUMA
Sar daștil te ajutil amen o lil Iov te das lașe sfaturi.
1, 2. So phari buchi trebun te cheren o Elifaz, o Bildad, o Țofar hai o Elihu?
CANA o Iov cai sas prinjiando anda pesco barvalimos hasardea sea so sas-les, but manușa cai beșenas pașă așunde cadai buchi. Trin murșa cai prinjianenas le Iovos, avile ando them Uț, caște zuriaren-les. Lenghe anava sas Elifaz, Bildad hai Țofar. Tha, von ci sas pregătime anda so avelas te dichen.
2 Te gândisaras amen so dichle. De durial, von dichen ieche manușes perado cai beșel ando uciar. Mai anglal, sas-les sea so camelas lesco ilo, tha acana hasardea sea. Lesche but animalea – bacrea, guruvnea, cămilea hai măgari – sas ciorde sau mudarde. Sea lesche șiave mule hai but anda lesche slujitori sas mudarde. O chăr ande savo mule sea lesche șiave, sas phagărdo. Hai, pala sea cadal nasul buchia, o Iov hasardea vi pesco sastimos. Lesco corpo sas pherdo phugnia, cai duchanas-les zurales. So cheren le trin murșa cana dichen-les? Efta ghiesa, iech pala aver, von beșen pașa leste hai ci phenen chanci, chiar cana dichen că silo duchado. (Iov 2:12, 13) Iech murș mai tărno, cai bușiolas Elihu, avel vi vo te dichel le Iovos hai beșel pașa lende. Ji la urmă, o Iov astarel te del duma, del armai o ghies cana năștisailo hai phenel că camel te merel. (Iov 3:1-3, 11) Le Iovos sas-les nevoia ca lesche amala te zuriaren-les! Prin so va phenena cadal murșa hai prin sar va avela te den duma lesa, va sicavena dacă sile ciace amala hai dacă camen lesco miștimos.
3. So va avela te dichas ande cado articolo?
3 O Iehova folosisardea le Moises caște scriil sea so cărde hai so phende cadal trin amala hohamne hai o Elihu. Daștil-pe că anen tumenghe amintea că o Elihu phendea buchia cai o Iehova șiutea lesche andi goghi. Tha so phendea o Elifaz daștil-pe că avilea cathar iech demono. (Iov 4:12-16; 33:24, 25) Anda codoia, ando lil Iov arachas chichiva anda le mai lașe sfaturi, tha vi chichiva anda le mai nasul sfaturi cai sas dine vroiechdata. Va avela te dichas sar daștil te ajutil amen cado lil, te das lașe sfaturi averenghe. Anda le trin amala hohamne le Iovosche, va avela te sichioas so te na cheras hai so te na phenas. Pala codoia, va avela te sichioas anda o lașio exemplo cai mechlea-les o Elihu. Va avela te dichas sar daisardea te ajutil le israelițen i relatarea anda o Iov hai sar daștil te ajutil vi amen aghies.
SO SFATURI DINE LE TRIN HOHAMNE AMALA LE IOVOS?
4. Sostar ci daisarde o Elifaz, o Bildad hai o Țofar te zuriaren le Iovos? (Dich vi i imaginea.)
4 I Biblia phenel că, pala so așunde anda le pharimata le Iovosche, le trin murșa găle leste te sicaven lesche că falas-len nasul anda leste hai te zuriaren-les. (Iov 2:11) Tha, von ci cărde-les te simțol-pe mai mișto. Sostar? Ando iechto than, von ci cărde penghe timpo te așunen le Iovos hai te hachiaren prin so nachel. Sar exemplo, von pachiaie că o Iehova pedepsil le Iovos, anda codoia că cărdea vareso nasul.a (Iov 4:7; 11:14) Ando duito than, le mai but sfaturi cai dine le Iovos, ci ajutisarde-les, chiar cana fanas-pe că si lașe. (Iov 13:12) Von phenenas vi buchia cai duchavenas lesco ilo. Sar exemplo, o Bildad phendea lesche dui-var că delas duma prea but. (Iov 8:2; 18:2) Hai poiechdata, von sas zurales nasul lesa. O Țofar phendea lesche că silo iech manuș ‘bi goghiaco’. (Iov 11:12) Ando trinto than, daștil-pe că ci dine cingar cana dine duma lesa, tha prin le buchia cai phende-len, hai prin o felo ande savo dine duma, cărde le Iovos te simțol-pe doșalo hai ci sicade iubirea. (Iov 15:7-11) Ando than te vazden-les hai te zuriaren lesco pachiamos, cadal murșa camenas mai but te sicaven că o Iov silo doșalo.
Cana des sfaturi varecas, na cher-les te simțol-pe că tu san mai lașio sar vo. Cher sea so daștis caște ajutis-les (Dich o paragrafo 4)
5. Sar simțosardea-pe o Iov pala so primisardea le sfaturi cathar pesche trin hohamne amala?
5 Cadea că, pala so o Elifaz, o Bildad hai o Țofar dine duma le Iovosa, vo simțosardea-pe mai perado sar mai anglal. (Iov 19:2) Hachiaras sostar vo camlea te sicavel că silo bidoșalo. Anda codoia că camlea te sicavel că silo orta, butivar lesche dumes sas bi goghiaco. (Iov 6:3, 26) Le sfaturi cai le trin murșa dine le Iovos, ci sas pala sar gândil o Iehova. Von ci sicade că duchal-len ciaces lestar. Cadea că, o Satan daisardea te folosil-len caște duchavel le Iovos. (Iov 2:4, 6) Sar daisardea te ajutil cadai relatarea le israelițen andel purane ghiesa hai sar daștil te ajutil vi amen aghies?
6. So daștinas te sichion le phure anda o Israelo anda o exemplo nasul le amalengo hohamne le Iovosche?
6 Sar daștilas te ajutil le israelițen i relatarea anda o Iov? Pala so o Iehova dea le israelițen pesche legi, vo alosardea phuren, cai te judechin le poporos hai te ajutin lesche manușen te len-pe pala cadal legi. (Deut. 1:15-18; 27:1) Von trebunas te așunen atento le manușen angla so te den sfaturi sau te judechin-len. (2 Cron. 19:6) Ando than te pachian că jianen sea le buchia, sas importanto ca von te șion pușimata. (Deut. 19:18) Cadal judecători trebunas te den duma lașimasa codolența cai manghenas lengo ajutorii. Sostar? Anda codoia că, dacă von avenas te den duma nasul lența, le manușa ci mai daștinas te pâtren pengo ilo angla lende. (Ex. 22:22-24) Cadala si chichiva buchia cai le phure anda o Israelo daștinas te sichion-len andai relatarea anda o Iov.
7. So daștinas te sichion le israeliți andai relatarea anda o Iov? (Proverbe 27:9)
7 Na numai le phure alosarde le Iehovastar daisarde te den sfaturi. Orisavo israelito, tărno sau phuro, murș sau jiuvli, daștilas te del iech sfato ieche amalesche caște ajutil-les te pașiol le Iehovastar sau te ortosarel lesco phiraimos. (Ps. 141:5) Le ciace amala den iech averesche sfaturi anda ilo. (Citisar Proverbe 27:9.) O exemplo nasul le trine hohamne amalengo le Iovosche daștilas te ajutil le israelițen te hachiaren so ci trebunas te phenen hai so ci trebunas te cheren atunci cana denas sfaturi.
8. So trin buchia trebul te încăras andi goghi cana das sfaturi averen? (Dich vi le imagini.)
8 Sar daștil te ajutil amen i relatarea anda o Iov? Cana amare phrala hai pheia nachen prin pharimata, camas te ajutisaras-len. Tha, camas te las sama te na cheras so cărde le trin hohamne amala le Iovosche. Ando iechto than, angla te das iech sfato trebul te rodas te jianas sea le buchia. Ando duito than, amare sfaturi trebun te sicaven că las amen pala i Biblia hai ci phenas so pachias amen, cadea sar cărdea butivar o Elifaz. (Iov 4:8; 5:3, 27) Ando trinto than, trebul te las sama te na phenas buchia cai duchaven. Te na bâstras că o Elifaz hai lesche amala phende vi chichiva buchia cai sas ciace. Mai târzio, o apostolo Pavel chiar citisardea chichiva anda lesche dumes. (Iov 5:13; dich vi 1 Corinteni 3:19.) Cu sea cadala, le mai but buchia cai phende-len le trin murșa anda o Del ci sas ciace hai duchade le Iovos. (Iov 42:7, 8) Cadea că, o Iehova phendea că so phende von sas iech hohaimos. Cana das sfaturi averen, trebul te las sama te na cheras-len te simțon-pe sar cana o Iehova ci iubil-len hai că oriso cherenas anda leste, Vo ci avelas mulțumime lendar. Te dichas acana so daisaras te sichioas anda o exemplo le Elihuosco.
Cana des sfaturi: 1) le sama că hachiares sea so întâmplosardea-pe, 2) folosisar i Biblia hai 3) de duma pherdo iubirea (Dich o paragrafo 8)
SAR DEA O ELIHU SFATURI LE IOVOS?
9. Sostar le Iovos mai sas-les nevoia ajutorostar pala so ci mai phende chanci lesche hohamne amala hai sar ajutisardea-les o Iehova?
9 Cana o Iov hai le trin hohamne amala terminisarde te han-pe mașcar pende, daștil-pe că von sas-le zurales holiarde. Von dine duma cadea de but timpo, că lenghe dumes pheren 28 capitolea andai Biblia. Le mai but anda lenghe dumes sicavenas holi. Hachiaras sostar o Iov trebulas mai dur te avel zuriardo hai ortosardo. Sar ajutisardea-les o Iehova? Vo folosisardea le Elihuos caște del-les chichiva sfaturi. Sostar o Elihu ci astardea te del duma mai anglal? Vo phendea: ‘me som tărno hai tumen san mai phure. Anda codoia sicadem pachiv hai încărdem man parpale te dav duma’. (Iov 32:6, 7) Vo hachiardea iech buchi cai hachiaren-la vi but manușa de aghies: codola phure traisarde mai but timpo hai sichile mai but buchia. Cadea că, len silen mai but prinjianimos hai nachle prin mai but buchia ande penghi viața sar le tărne. Tha, pala so așundea pherdo răbdarea le Iovos hai lesche trine hohamne amalen, o Elihu ci mai daisardea te încărel-pe parpale. Vo phendea că ‘le bărșa ci cheren varecas goghiaver hai na numai codola phure hachiaren so si orta’. (Iov 32:9) So phendea o Elihu mai dur hai sar?
10. So cărdea o Elihu angla so te del sfaturi le Iovos? (Iov 33:6, 7)
10 Angla so te del iech sfato le Iovos, o Elihu camlea te cherel-les te simțol-pe mișto hai ca lesco ilo te avel pregătime. Sar cărdea cadaia? Anda codoia că le dumes cai așundea-len mai anglal holiarde-les, vo lea sama te avel liniștime angla so te del duma le Iovosa. (Iov 32:2-5) Cadea că, o Elihu ci phiradea-pe niciechdata bi lașimasco lesa. Mai but, vo sas umilo hai dea duma le Iovosa sar iech ciacio amal. Sar exemplo, vo phendea le Iovosche: „Ita! Angla o ciacio Del som cadea sar tu”. (Citisar Iov 33:6, 7.) Pala codoia, o Elihu așundea-les atento. Angla so te del-les iech sfato, vo chiar phendea încă iech data le mai importanto buchia cai phendea-len o Iov. (Iov 32:11; 33:8-11) O Elihu cărdea mai dur cadai buchi cana trebulas te del vi aver sfaturi le Iovos. (Iov 34:5, 6, 9; 35:1-4)
11. Sar dea o Elihu sfaturi le Iovos? (Iov 33:1)
11 Cana o Elihu dea sfaturi le Iovos, vo sicadea lesche pachiv hai ci cărdea-les te simțol-pe că na-i lașio chancesco. Sar exemplo, vo phendea lesco anav, na sar le trin hohamne amala, cai fal-pe că ci cărde cadaia. (Citisar Iov 33:1.) Mai but, daștil-pe că o Elihu andea pesche amintea chichi de but camlea vi vo te del duma cana o Iov hai lesche hohamne amala hanas-pe. Cadea că, o Elihu mechlea le Iovos te del duma ando timpo so delas-les sfaturi. (Iov 32:4; 33:32) O Elihu phendea le Iovosche vi că chichiva buchia cai phendea-len ci sas lașe hai andea lesche amintea lașimasa că o Iehova silo goghiaver, zuralo, orta hai siles iubirea loialo. (Iov 36:18, 21-26; 37:23, 24) Daștil-pe că o lașio sfato cai dea-les o Elihu, ajutisardea le Iovos te avel pregătime te așunel vi mai but sfaturi, cai avenas le Iehovastar. (Iov 38:1-3) Sar daștilas te ajutil o exemplo le Elihuosco le manușen le Iehovasche andal purane ghiesa hai sar daștil te ajutil vi amen aghies?
12. Sar folosisardea o Iehova le profețen caște ajutil pesche manușen hai sar daisarde le israeliți te țârden miștimata anda o lașio exemplo cai mechlea-les o Elihu?
12 Sar daștilas te ajutil le israelițen i relatarea anda o Iov? O Iehova butivar folosisardea profeți caște sicavel hai te ortosarel le israelițen. Sar exemplo, andel ghiesa cana sas judecători, o Iehova folosisardea la profetesa Debora caște phenel pesche poporosche so trebulas te cherel. Sa cadea, vo folosisardea le Samuelos, chiar cana sas-lo încă tărno, caște sicavel le israelițen. (Jud. 4:4-7; 5:7; 1 Sam. 3:19, 20) Mai târzio, ando timpo le regengo, o Iehova bișialdea profeți iech pala aver, caște zuriarel le israelițen hai te ajutil-len te slujin lesche cadea sar camel vo. Hai cana o poporo ci așunelas lestar, vo bișialelas profeți cai te ortosaren-len. (2 Sam. 12:1-4; Fap. 3:24) Daștil-pe că o lașio exemplo le Elihuosco ajutisardea le jiuvlean hai le murșen fidelo anda o Israelo te jianen so te phenen cana denas sfaturi hai sar te cheren cadai buchi lașimasa.
13. Sar daștin le manușa le Devlesche te zuriaren penghe phralen sau pheian?
13 Sar daștil te ajutil amen i relatarea anda o Iov? Sar manușa le Devlesche, vi amen das duma le manușența anda o mesajo le Devlesco cai silo scriime andi Biblia. Sa cadea, das amari zor te zuriaras amare phralen hai te das duma lența lașimasa. (1 Cor. 14:3) Le phure de congregație trebun te len sama te den duma le phralența pherde iubirea hai lașimasa, chiar cana varecon silo holiardo sau del duma buchia cai ci trebulas te phenel-len. (1 Tes. 5:14; Iov 6:3)
14, 15. Sar daștin le phure te len-pe pala o Elihu cana den sfaturi averen?
14 Te gândisaras amen ca iech exemplo. Iech phuro așunel că iech phei andai congregația sili peradi. Vo, ande iech than avere phralesa, jial late caște zuriarel-la. Ando timpo so den duma, i phei phenel lenghe că chiar cana jial andi predicarea hai ca i sala, voi ci simțol-pe bucurime. So va cherela o phuro de congregație?
15 Daștil-pe că va camela te hachiarel mai anglal lachi situația hai sostar simțol-pe peradi. Caște cherel cadaia, trebul te așunel-la atento. Sostar simțol-pe cadea? Pachial că o Iehova ci iubil-la? Peraven-la le pharimata de fiesavo ghies? (Luca 21:34) Mai dur, o phuro daștil te așarel-la anda le lașe buchia cai cherel-len, anda codoia că voi jial andi predicarea hai avel ca i sala, chiar cana simțol-pe peradi. Pala so o phuro hachiarel so cherel la pheia te simțol-pe peradi, vo daștil te folosil i Biblia caște anel lache amintea că o Del iubil-la. (Gal. 2:20)
SICHIO MAI DUR ANDA O LIL IOV
16. Sar daisaras mai dur te țârdas miștimata anda o lil Iov?
16 Sichileam but buchia anda o lil Iov! Cadea sar dichleam ando articolo cai nachlea, i relatarea anda o Iov sicavel amenghe sostar o Del mechel amen te nachas prin pharimata hai sar daisaras te așias loialo le Iehovasche cana sam perade. Hai, cadea sar dichleam ande cado articolo, savore daisaras te sichioas sar te das sfaturi averen, cana las amen pala o exemplo cai mechlea amenghe o Elihu hai na pala o exemplo le trine hohamne amalengo. Ando viitorii, angla so te des iech sfato, daștis te diches încă iech data so sichios anda o lil Iov. Hai dacă ci citisardean cado șucar lil de mai but timpo, daștis te citis-les încă iech data. Va avela te diches but neve buchia cai daștin te ajutin tut.
GHILI 125 „Fericime si codola cai sicaven mila!”
a Pala sar fal-pe, iech demono cărdea le Elifazos te pachial că o Iehova ci dichel nici ieche manușes orta hai că ci dichel chanicas lașe iachența. O Elifaz pachiaia zurales cadai buchi. Vo phendea cadal buchia nasul, de fiesavi data cana delas duma le Iovosa. (Iov 4:17; 15:15, 16; 22:2)