Rode mai dur te zuriares chio amalimos le Iehovasa!

1. Save si chichiva buchia cai trebun le manușen? (Matei 5:3)

O IEHOVA jianel so trebun le manușen. Sar exemplo, trebul amen haben, hureaimata hai iech than cai te beșas. Dacă na-i amen iech anda cadal buchia, vi numai anda iech țâra timpo, amari viața avelas zurales phari. Tha, o Iehova jianel că le manușen trebul-len vi aver vareso. Vo cărdea amen te camas te prinjianas-les hai te șioas amaro pachiamos ande leste că vo daștil te sicavel amenghe o drom pe savo te jias. (Citisar Matei 5:3.) Caște avas ciaces fericime, trebul te hachiaras că si amen nevoia te avel amen iech amalimos chidino lesa hai te pachias amen ande leste mai dur.

2. So însemnol te jianas că si amen nevoia te prinjianas le Devles? Cheren iech exemplo.

² Tha so însemnol te ‘jianas că si amen nevoia te prinjianas le Devles’? Le dumes cai sas folosime andi șib originalo, anenas andi goghi varecaschi, iech manuș cai manghelas zurales ajutorii. Gândisaren tumen ca iech manuș zurales cioro cai manghel. Lesche hureaimata si șinde hai beșel chidino ande iech colțo pi strada. Les nai-les zuralimos anda codoia că nai-les so te hal. Ando timpo le ghiesesco thabarel-les o cham hai andi riat izdral șâlestar. Le manușa nici na camen te dichen caring leste hai duriaren-pe lestar. Anda codoia vo silo chino hai perado. Codo manuș cai manghel, jianel că siles nevoia ajutorostar caște avel zuralo hai te trail. Sa cadea, codo cai jianel că trebul te zuriarel pesco amalimos le Devlesa, jianel vi că trebul te manghel lesco ajutorii. Cadea că, vo bucuril-pe te lel-pe pala sea le îndrumări le Iehovasche cai ajutin codolen cai iubin-les.

3. So va avela te dichas ande cado articolo?

³ Ande cado articolo va avela te dichas mai anglal so daisaras te sichioas anda o exemplo la jiuvliaco andai Fenicia, cai manglea o ajutoro le Isusosco. Ande cadai relatarea va avela te dichas trin calități cai trebun te sicaven-len codola cai jianen că trebun te zuriaren pengo amalimos le Devlesa. Pala codoia, va avela te dichas o exemplo le apostolengo Petru hai Pavel hai vi le Davidosco, cai șiute pengo pachiamos ando Iehova.

TRIN CALITĂȚI IMPORTANTO CAI TREBUN AMEN

4. So manglea i jiuvli andai Fenicia le Isusostar?

⁴ Ande iech ghies, iech jiuvli andai Fenicia avilea co Isus te manghel lestar vareso. Lachi șei sas-la ‘iech demono ande late hai sas zurales duchadi’. (Mat. 15:21-28) I jiuvli dea cianga angla o Isus hai manglea-les te ajutil-la. Voi sicadea chichiva calități zurales șucar cana dea duma le Isusosa. Te dichas trin anda lende.

5. So calități sicadea i jiuvli feniciano hai so cărdea o Isus? (Dich vi i imaginea.)

⁵ I jiuvli andai Fenicia sicadea iech ciaci umilința. Sostar daisaras te phenas cadaia? Anda codoia că voi ci sas holiardi cana o Isus cărdea iech ilustrarea hai phendea anda late că si sar iech țâno jucăl. Daștil-pe că vo dea duma anda iech animalo cai codola cai ci sas evrei încărenas-les ando chăr. Tu sar avelas te simțos tut dacă o Isus phenelas tuche cadaia? Avelas te holiares tut hai te na mai manghes o ajutorii le Isusosco? I jiuvli feniciano ci cărdea cadaia. Pașa i umilința, voi sicadea vi aver calitatea. Voi ci mechlea-pe anda codoia că manglea mai dur le Isusostar te ajutil-la. Sostar cărdea voi cadaia? Anda codoia că la sas-la pachiamos ando Isus. Hai cana o Isus dichlea o baro pachiamos cadala jiuvleaco, vo cărdea iech bari buchi. Chiar cana phendea mai anglal că vo sas-lo bișialdo „numai ca le bacrea hasarde anda o chăr le Israelosco”, vo încaladea o demono andai șei la jiuvleachi.

6. So sichioas la jiuvleatar andai Fenicia?

⁶ Caște zuriaras amaro amalimos le Iehovasa, si importanto te bariaras vi amen le calități cai sas la jiuvlea andai Fenicia. Trebul te sicavas umilința, te na mechas amen hai te avel amen iech pachiamos zuralo. Numai iech manuș umilo ci va mechela-pe hai va manghela mai dur o ajutorii le Devlesco. Sa cadea, trebul te avel amen iech pachiamos zuralo ando Isus Cristos hai ande codola cai vo șiutea-len angla amende. (Mat. 24:45-47) O Iehova hai o Isus sile bucurime cana sam umilo, mangas lengo ajutorii hai si amen pachiamos. Cana cheras cadaia, von va ajutina amen hai va sicavena amenghe o drom pe savo te phiras. (Dich vi Iacov 1:5-7.) Mai dur va avela te dichas sar o Iehova sicavel amenghe so trebul te cheras hai del amen so trebul amen caște avas fericime. Va avela te dichas sar daisaras te țârdas miștimata anda so cherel o Iehova anda amende cana las amen pala o Petru, o Pavel hai o rege David.

LE TUT PALA O PETRU – SICHIO MAI DUR ANDA O LIL LE DEVLESCO

7. So phendea o Isus le Petrosche te cherel hai so mai trebulas te cherel vo? Explichin. (Evrei 5:14–6:1)

⁷ Te gândisaras amen ca o exemplo le Petrosco. Vo sas mașcar le dintune evrei cai hachiarde că o Isus si o Mesia. Vo hachiardea că o Iehova folosilas le Isusos caște sicavel le manușen anda i viața veșnico. (Ioan 6:66-68) Angla ca o Isus te jial co cerii, vo phendea le Petrosche: „Le sama mânre bacriorrendar!”. (Ioan 21:17) O Petru cărdea so phendea lesche o Isus hai sicadea le phralen andel congregații. Hai o Iehova chiar folosisardea-les caște scriil dui andal lila cai cheren partea anda Lesco Lil. Tha vi le Petros sas-les nevoia te sichiol mai dur anda o Lil le Devlesco. Sar cărdea vo cadaia? Sar exemplo, vo sichilea anda le lila cai sas scriime le Pavelostar. O Petru phendea că chichiva buchia anda save dea duma o Pavel ande lesche lila sas „phare hachiarimasco”. (2 Pet. 3:15, 16) Tha, o Petru sichilea mai dur cadal buchia hai sas-les pachiamos că o Iehova va ajutila-les te hachiarel-len hai te cherel so sichilea. (Citisar Evrei 5:14–6:1.)

8. So cărdea o Petru cana primisardea iech nevo hachiarimos le Iehovastar?

⁸ Anda codoia că le Petros sas-les iech pachiamos zuralo ando Iehova, vo așunelas so phenelas lesche Vo. Sar exemplo, ande iech ghies, o Petru dichlea ande iech viziunea ieche îngeros cai phendea lesche te hal animalea cai pala i Legea sas neuje. O Petru sas iudeo sea leschi viața hai anda leste so phendea lesche o îngero te cherel sas iech buchi greșime. Mai anglal, o Petru phendea: „Na-i sar, Raia, anda codoia că niciechdata ci halem vareso melalo hai neujo!”. Tha o îngero phendea lesche: „Na mai phen că si melale le buchia cai o Del ujiardea-len!”. (Fap. 10:9-15) O Petru hachiardea hai lea-pe pala so phendea lesche o îngero. Cathar jianas cadaia? Ca țâra timpo pala so dichlea i viziunea, le Petroste avile trin murșa cai bișialdea-len o Corneliu, cai ci sas evreo. Von acharde-les te avel te del duma lenghe stăpânosa. Angla te dichel i viziunea, o Petru ci avelas niciechdata te del andre ando chăr ieche manușesco cai ci sas evreo. Le evrei dichenas neuje codolen anda aver națiuni. (Fap. 10:28, 29) Tha o Petru lea-pe sigo pala o nevo hachiarimos cai sicadea lesche o Iehova. (Prov. 4:18) Vo phendea i vestea lași le Corneliosche hai sea codolenghe anda lesco chăr. Savore sicade pachiamos ando Isus, primisarde o spirito sfânto hai bolde-pe. (Fap. 10:44-48)

9. So miștimata si amen cana ciaiol amen te hachiaras mai mișto vi le sicaimata mai phare?

⁹ Cadea sar o Petru, si importanto te citisaras mai butivar anda o Lil le Devlesco. Butivar citisaras buchia cai si ușoro hachiarimasco. Tha trebul te ciaiol amen te hachiaras mai mișto vi le sicaimata mai phare. Trebul te cheras amenghe timpo te rodas atento andi Biblia. Si importanto vi te das amari zor te hachiaras le buchia cai mai anglal ci hachiardeam-len mișto. So miștimata si amen cana cheras cadaia? 1) Va avela te sichioas buchia anda o Iehova cai va bariarena vi mai but amari iubirea hai amari pachiv caring leste hai 2) va avela te camas mai but te das duma averența anda so șucar buchia sichileam anda amaro Dad cerisco. (Rom. 11:33; Rev. 4:11) Anda o exemplo le Petrosco mai sichioas iech șucar buchi: Cana aven neve hachiarimata anda o Lil le Devlesco, si importanto te cheras sigo paruimata ande amari gândirea hai ande amaro phiraimos. Numai cana cheras cadaia, va avela te așias zurale ando pachiamos hai o Iehova va folosila amen mai dur.

LE TUT PALA O PAVEL – SICAV CALITĂȚI CAI CIAION LE DEVLES

10. Cadea sar phenel-pe ando Coloseni 3:8-10, so trebul te cheras, caște bucurisaras le Iehovas?

¹⁰ Dacă camas te avas fericime hai te mechas le Iehovas te sicavel amen, va trebula te sicavas calități cai ciaion-les. O Iehova sicavel amenghe sar te avel amen cadal calități. (Citește Coloseni 3:8-10.) Si amen nevoia timpostar hai trebul te das amari zor caște paruvas amaro phiraimos. Te gândisaras amen co Pavel. De cana sas tărno, vo dea sea peschi zor te avel dichlo lașe iachența le Iehovastar. (Gal. 1:14; Filip. 3:4, 5) Tha, vo ci hachiardea ciaces sar camel o Del te anel lesche închinarea. Anda codoia că ci jianelas o ciacimos anda o Isus hai sas baricano, vo arăslea te avel ‘iech prasaitorii’, cai phiradea-pe nasul. (1 Tim. 1:13)

11. So pharo paruimos trebulas te cherel o Pavel? Explichin.

¹¹ Angla so te avel creștino, o Pavel holiarelas-pe zurales sigo. Anda o lil Fapte sichioas că „ande lesco ilo thabolas iech bari ura anda le discipoli le Raiesche hai daravelas-len că mudarel-le”. (Fap. 9:1) Tha, pala so cărdilea creștino, o Pavel trebulas te del sea peschi zor te mechel parpale cadai buchi anda lesco purano phiraimos. (Ef. 4:22, 31) Cu sea cadala, cana vo ci hachiardea-pe iech data le Barnabasa, o Pavel holiardea-pe zurales hai mașcar lende „astardea-pe iech bari holi”. (Fap. 15:37-39) Ande codo momento, o Pavel ci phiradea-pe cadea sar camlea o Del. Cu sea cadala, vo dea mai dur peschi zor te cherel paruimata hai te avel dichlo lașe iachența le Iehovastar. (1 Cor. 9:27)

12. So ajutisardea le Pavelos te cherel mai dur paruimata ande pesco phiraimos?

¹² O Pavel daisardea te paruvel pesco purano phiraimos anda codoia că sas umilo. (Filip. 4:13) Cadea sar o Petru, o Pavel șiutea pesco pachiamos ando Iehova caște ajutil-les te cherel cadal paruimata. (1 Pet. 4:11) Poiechdata, o Pavel cărdea greșeli hai simțosardea-pe perado. Tha, cana simțosardea-pe cadea, andea pesche amintea sea le buchia cai cărdea-len o Iehova anda leste. Cadaia ajutisardea-les te na mechel-pe. (Rom. 7:21-25)

13. Sar daisaras te las amen pala o Pavel?

¹³ Chiar cana sam de but bărșa co ciacimos daisaras te las amen pala o Pavel, cana das amari zor mai dur te paruvas amaro phiraimos hai te cheras so phenel amenghe o Iehova. Si ciaces, poiechdata va avela te greșisaras. Sar exemplo, daisaras te holiaras amen sau te das duma varecasa bi lașimasco. Cana întâmplol-pe cadaia ci trebul te pachias că o Iehova ci va dichela amen niciechdata lașe iachența. Mai but, trebul te das amari zor te cheras mai dur paruimata ande amari gândirea hai ande amaro phiraimos. (Rom. 12:1, 2; Ef. 4:24) Tha, trebul te anas amenghe amintea iech buchi importanto: cana camas te cheras paruimata ande amaro phiraimos, trebul te mechas le Iehovas te sicavel amen hai te prinjianas-les mai mișto.

LE TUT PALA O DAVID – MECH LE IEHOVAS TE FERIL TUT

14, 15. Sar feril o Iehova pesche manușen? (Psalmo 27:5) (Dich vi i imaginea.)

¹⁴ Caște avas ciaces fericime si amen nevoia vi le Iehovastar caște feril amen. Sar feril amen o Iehova? Hai so daisaras te cheras caște mechas le Iehovas te feril amen?

¹⁵ O Rege David jianelas ciaces că o Iehova va ferila-les cana va nachela prin pharimata. (Citisar Psalmo 27:5.) Sar feril o Iehova pesche manușen aghies? Vo feril amen orisave manușestar hai orisavea buchiatar cai daștilas te duriarel amen lestar. Vo promitil amenghe că ‘niciech arma vazdini contra amenghe, ci va daștila te cherel amenghe chanci nasul’. (Ps. 34:7; Is. 54:17) O Satan, le demoni hai le manușa cai așen amenghe contra sile zurale. Tha o Iehova silo but mai zuralo sar von. Chiar dacă avenas te mudaren amen, o Iehova va uștiavela amen parpale viațate. (1 Cor. 15:55-57; Rev. 21:3, 4) O Iehova ajutil amen te slujisaras lesche mai dur vi cana sam zurales darade. (Prov. 12:25; Mat. 6:27-29) Mai but, amaro lașio Dad del amen phrala hai pheia cai zuriaren amen hai cai vazden amen cana nachas prin pharimata. Vo del amen vi phure de congregație cai sicaven amen hai cai ajutin amen te așias zurale ando pachiamos. (Is. 32:1, 2) Hai cana jias ca le întruniri sichioas vi aver buchia prin save mechas le Iehovas te ajutil amen hai te feril amen. (Evr. 10:24, 25)

16. Sar ferisardea o Iehova le Davidos?

¹⁶ Cana o David așundea le Iehovastar, Vo ajutisardea-les te cherel alosarimata goghiaver hai o David sas fericime. Cadea, o Iehova ferisardea le Davidos. (Dich vi Proverbe 5:1, 2.) Tha, cana o David ci așundea le Iehovastar, sas-lo duchado anda codoia că cărdea alosarimata nasul. O Iehova ci duriardea le Davidostar le pharimata cai vo trebulas te țârdel-len anda peschi doș. (2 Sam. 12:9, 10) Tha, aver data o David sas duchado anda codoia că aver phirade-pe nasul lesa. Cana întâmplosardea-pe cadaia, o David phendea le Iehovasche sea so daravelas lesco ilo hai o Iehova ferisardea-les. Sar cărdea o Iehova cadaia? Vo machlea o ilo le Davidosco cana phendea lesche că iubil-les zurales but hai că va lela sama lestar. (Ps. 23:1-6)

17. Sar daisaras te las amen pala o exemplo le Davidosco?

¹⁷ Cana cheras alosarimata, daisaras te las amen pala o exemplo le Davidosco, dacă mangas amen le Iehovasche hai rodas lesco sfato. Sa cadea, si importanto te hachiaras că dacă ci așunas le Iehovastar, vo ci va duriarela anda amari viața le buchia nasul cai daștin te aven, anda codoia că ci alosardeam goghiaver. (Gal. 6:7, 8) Hai, cana nachas prin pharimata bi te avas doșale, daisaras te șioras amaro ilo angla o Iehova hai te mangas lesco ajutorii. Jianas că vo va machela amaro ilo hai va sicavela amenghe peschi iubirea. (Filip. 4:6, 7)

RODE MAI DUR LE SICAIMATA LE IEHOVASCHE

18. So pachian but manușa andai lumea anda o Del hai lesche sfaturi hai so trebul te cheras caște mechas amen mai dur sicade le Devlestar? (Dich vi le imagini.)

¹⁸ O texto le bărșesco 2026 si: „Fericime sile codola cai jianen că silen nevoia te prinjianen le Devles”. Cadal dumes sile mai ciace aghies sar oricana. Sostar? Anda codoia că but manușa aghies ci hachiaren că silen nevoia le Devlestar hai lesche ajutorostar. But manușa cai pachian ando Del, alosaren te anen lesche închinarea cadea sar camen von. Aver jene len-pe pala so sicaven-len aver manușa. Cadaia ci anel lenghe fericirea. Amen ci trebul te las amen pala lende. So daștil te ajutil amen? Trebul te sichioas mai dur anda o Lil le Devlesco, te sichioas mai dur sar te sicavas le calități cai ciaion le Iehovas, te așunas lestar hai te mechas-les te feril amen.