Sar daștiv me te sicavav recunoștința le Iehovasche că dea pesche Șiaves anda amende?

1, 2. So trebulas ‘te oblighil’ amen te cheras o merimos le Isusosco hai sostar? (2 Corinteni 5:14, 15) (Dich vi i imaginea.)

GÂNDISAR TUT că iech chăr perel hai tu san code astardo tela le barra hai varecon ajutil tut te încles de cothar. So simțos caring codo manuș cai salvisardea chi viața? Ande chio ilo si iech bari recunoștința, cames te mulțumis le manușesche anda so cărdea anda tute hai te phenes lesche că ci va avela te bâstres niciechdata cadaia.

² Cadea sar dichleam ando articolo cai nachlea, le manușen sas-len nevoia varecastar cai te salvil-len anda o păcato hai anda o merimos. Cadaia cărdea o Iehova. Vo dea pesche Șiaves anda amende caște daștil: 1) te iertil amare păcatea, 2) te del amen i speranța te avas perfecți hai 3) te avel amen iech amalimos chidino Lesa. Cadea că si amen i speranța te traisaras anda sea o timpo andi lumea nevi cai promitisardea-la amenghe o Iehova. O Isus iubisardea le manușen bute timposa angla te avel pi phuv hai sicadea peschi bari iubirea anda le manușa cana dea peschi viața anda lende. (Prov. 8:30, 31) O apostolo Pavel scriisardea că „i iubirea le Cristososchi oblighil amen”. (Citisar 2 Corinteni 5:14, 15.) Cadaia însemnol că trebul te sicavas amari recunoștința anda i iubirea le Isusoschi hai te na bâstras niciechdata so cărdea vo anda amende.

3. Sostar daștil-pe că o modo ande savo sicavas amari recunoștința anda o merimos le Isusosco si diferime?

³ Tu sar va avela te sicaves chi recunoștința anda o merimos le Isusosco? O modo ande savo alosares te cheres cadaia, daștil-pe că silo diferime cathar so cheren aver. Sostar? Te cheras iech exemplo. Gândisar tut că trin manușa camen te arăsăn ande sa codo than, tha fiesavo anda lende tiliarel anda aver foro. Cadea că, fiesavesco drom si diferime. Sa cadea, vi tu jias pe iech drom hai cames te arăsăs te sicaves recunoștința anda o merimos le Isusosco. Hai o modo ande savo cheres cadaia si phanglo le thanestar cathar aves, adică sar si acana chio amalimos le Iehovasa. Ande cado articolo va avela te dichas sar 1) codola cai sichion andai Biblia, 2) le creștini bolde hai 3) codola cai duriarde-pe la congregațiatar daștin te sicaven penghi recunoștința anda o merimos le Isusosco.

CODOLA CAI SICHION ANDAI BIBLIA

4. So dichel o Iehova codolende cai sichion andai Biblia?

⁴ Dacă sichios andai Biblia, gândisar tut cadale buchiande: tu cames te sichios anda o Iehova hai anda lesche sicaimata. Cadai buchi sicavel că o Iehova camel te aves lesco amal hai că ajutil tut te cheres cadaia. (Ioan 6:44; Fap. 13:48) I Biblia phenel că o Iehova si codo cai „rodel so si andel ile”. Cadai buchi însemnol că o Iehova dichel că des chi zor te sichios anda leste hai bucuril-pe te dichel că cheres paruimata caște aves mișto dichlo lestar. (Prov. 17:3; 27:11) Te na bâstres niciechdata că daștis te aves amal le Iehovasa anda codoia că Vo dea pesche Șiaves anda tute. (Rom. 5:10, 11)

5. Sar daștin codola cai sichion andai Biblia te len-pe pala so phenel-pe ando Filipeni 3:16?

⁵ Dacă sichios andai Biblia, sar daștis te sicaves chi recunoștința anda codoia că o Iehova dea pesche Șiaves anda tute? Iech buchi cai daștis te cheres-la si te les tut pala so phendea o Pavel caring le filipeni: „Sar ji acana barileam ando pachiamos, te phiras vi mai dur ande iech modo orta pe sa cado drom”. (Filip. 3:16) Aver traducerea la Bibliachi phendea cado verseto cadea: „Trebul te phiras mai dur po drom pe savo astardeam te jias”. Cadea că, na mech te așiavel tut chonic hai chanci te phires mai dur po drom cai îngărel viațate. (Mat. 7:14; Luca 9:62)

6. So daștin te cheren codola cai sichion andai Biblia dacă si lenghe pharo te cheren paruimata? (Deuteronomo 30:11-14) (Dich vi i imaginea.)

⁶ So daștis te cheres cana si tuche pharo te pachias iech sicaimos cai sichilean-les de țâra timpo andai Biblia? Rode te hachiares mai mișto cado sicaimos hai mang le Iehovas te ajutil tut. (Ps. 86:11) Dacă încă ci hachiares-les, na dara. Sichio mai dur andai Biblia hai mai târzio daștil-pe că va avela te hachiares-les. Tha, dacă si tuche pharo te na mai cheres vareso cai ci ciaiol le Iehovas? Na bâstăr că oriso manghel amendar o Iehova te cheras, na-i niciechdata prea pharo. Daștis te trais chi viața cadea sar vo camel. (Citisar Deuteronomo 30:11-14.) Hai vo promitil tuche că va ajutila tut. (Is. 41:10, 13; 1 Cor. 10:13) Cadea că, na mech tut! Na gândisar tut prea but le buchiande cai si phare anda tute. De chi zor te gândis tut le buchiande șucar cai o Iehova cărdea-len anda tute, sar avelas că bișialdea pesche Șiaves te merel anda tute. Cana arăsăs te iubis le Iehovas sea mai but, va avela te hachiares mai mișto că „lesche porunci nai-le phare”. (1 Ioan 5:3)a

7. Ca so daștin te gândin-pe le tărne cai barile ando ciacimos?

⁷ Tha, dacă san iech tărno cai barilea ando ciacimos? Vi tu san mașcar codola cai sichion andai Biblia. Mai but, tu san o mai importanto jeno savesa sichiol chio dad hai chi dei andai Biblia. I Biblia phenel: „Pașion le Devlestar, hai vo va pașiola tumendar”. (Iac. 4:8; 1 Cron. 28:9) Cana tu cheres o iechto paso te pașios le Iehovastar, vi vo va pașiola tutar. O Del ci dichel caring tute anda codoia că barilean ande iech familia Martorenghi. Vo dichel caring tute, anda codoia că vo camel ca tu te aves lesco amal. So cărdea o Iehova caște avel tut iech amalimos chidino lesa? Vo dea pesche Șiaves anda tute. Na bâstăr niciechdata cado sumnacuno daro cai vo dea-les tuche. (Rom. 5:1, 2) Cadea că, angla te jias ca i Comemorarea anda cado bărș, beș hai gândisar tut so cărde o Iehova hai o Isus anda tute. Pala codoia, gândisar tut sar cames te trais chi viața hai so cames te cheres mai dur caște sicaves chi recunoștința anda o Iehova cai dea pesche Șiaves te merel anda amende.b

LE CREȘTINI BOLDE

8. Sar sicade deja le creștini bolde penghi recunoștința anda so cărdea o Iehova anda lende cana dea pesche Șiaves?

⁸ Dacă san iech creștino boldo, sicadean deja prin but buchia recunoștința anda so cărde o Iehova hai o Isus anda tute. Sar exemplo, parudean chi viața caște cheres so si mișto andel iacha le Iehovasche hai te aves amal lesa. Phendean i vestea lași hai sicadean averen anda o Iehova hai o Isus. Dean chi viața le Iehovasche hai boldean tut. Daștil-pe că aver așile tuche contra hai camle te așiaven tut te slujis le Iehovasche. (2 Tim. 3:12) Tha, tu slujisardean mai dur le Iehovasche pherdo pachiamos hai cadaia sicavel că iubis-les but hai că san lesche recunoscătorii anda codoia că dea pesche Șiaves anda tute. (Evr. 12:2, 3)

9. Ca so pericolo trebun te len sama le creștini bolde?

⁹ Chiar dacă sam bolde de but timpo, trebul te las sama cathar iech pericolo. Daștil-pe că le timposa bâstras chichi de importanto si o merimos le Isusosco ande amari viața. Sar daștilas te întâmplol-pe cadaia? Te gândisaras amen ca le creștini anda o Efes. Von așile zurale andel pharimata hai o Isus așardea-len anda cadaia. Cu sea cadala, vo phendea lenghe: „Ita so si man contra tuche: hasardean i iubirea cai sas tut mai anglal”. (Rev. 2:3, 4) Cadea sar sicaven le dumes le Isusosche, iech creștino daștilas te astarel te slujil le Devlesche dipaș ilesa. Vo daștilas te manghel-pe le Iehovasche, te jial ca le întruniri hai te jial andi predicarea, tha bi te țârdel-les lesco ilo. Cadea că, ci mai slujil le Iehovasche iubireasa. So daisaras te cheras cana simțosaras că amari iubirea anda o Iehova ci mai si cadea de bari sar sas co începuto?

10. Sar daștis te les tut pala so phendea o Pavel le Timoteiosche te cherel? (1 Timotei 4:13, 15)

¹⁰ O apostolo Pavel phendea le Timoteiosche te lel sama sea o timpo sar slujil le Devlesche hai te cherel sea so daștil ande Leschi buchi. (Citisar 1 Timotei 4:13, 15.) Daștis vi tu te gândis tut so te cheres caște slujis mai dur le Iehovasche iagasa ando ilo. (Rom. 12:11) Sar exemplo, daștil-pe că va avela tuche mai ușoro te aves atento ca le întruniri dacă cheres tuche timpo te pregătis tut anda lende. Sau daștil-pe că va avela te araches mai but bucuria cana sichios corcoro anda o Iehova, dacă jias ande iech than cai daștis te aves liniștime hai te gândis tut ca so sichios. Cadea sar trebul te șios mai dur cașta ande iech iag caște thabol zurales, sa cadea vi tu trebul te des mai dur chi zor te cheres cadal buchia caște zuriares chi recunoștința anda o merimos le Isusosco hai ande sea le coaver buchia cai cărdea-len o Iehova anda tute. Sa cadea, andel curche angla i Comemorarea daștis te gândis tut ca sea le șucar buchia cai si tut ande chi viața anda codoia că san iech Martoro le Iehovasco. Cadaia va ajutila tut te bariares chi recunoștința anda o merimos le Isusosco, prin savo daștis te avel tut iech amalimos chidino le Iehovasa.

11, 12. Dacă ci mai si tut sa codoi iag ando ilo te slujis le Iehovasche sar mai anglal, însemnol că Vo ci mai del tut pesco spirito sfânto? Explichin. (Dich vi i imaginea.)

¹¹ Dacă ci mai si tut sa codoi iag ando ilo te slujis le Iehovasche sar mai anglal, cadaia ci însemnol că Vo ci mai del tut pesco spirito sfânto. Na bâstăr că o apostolo Pavel phendea caring le corinteni că vi vo poiechdata predichisardea bi te țârdel-les o ilo. Tha cărdea cadaia mai dur anda codoia că jianelas că sas lesche dini te cherel cadai buchi. (1 Cor. 9:17) So camlea te phenel vo?

¹² Poiechdata, vi le Pavelos sar manuș imperfecto, ci mai țârdelas-les lesco ilo te predichil. Cu sea cadala, vo sas hotărâme te predichil mai dur, chiar cana lesco ilo ci țârdelas-les te cherel cadaia ande codol ghiesa. Vi tu daștis te les tut pala o Pavel. Av hotărâme te cheres so si mișto, chiar cana ci țârdel tut chio ilo! Mang tut le Iehovasche te ajutil tut te cames hai vi te del tut o zuralimos te cheres so trebul. (Filip. 2:13) Cher mai dur le buchia cai ajutin tut te așes pașa o Iehova. Daștis te pachias ciaces că pala iech timpo chi iubirea anda o Iehova va avela pale zurali hai i iag anda chio ilo va thabola pale zurales.

13. Sar daisaras te dichas dacă sam „ando pachiamos”?

¹³ Si mișto ca poiechdata te gândisaras amen sar traisaras amari viața, cadea sar phendea vi o Pavel ando 2 Corinteni 13:5: „Dichen sea o timpo dacă san ando pachiamos, sicaven sea o timpo so san tumen”. Sar exemplo, daisaras te pușias amen: „Șioav o Regato po iechto than ande mânri viața? (Mat. 6:33) Sicaven le buchia cai dichav-len sau cherav-len ande mânro timpo libero că urâv o nasulimos? (Ps. 97:10) Prin so phenav hai cherav ajutiv ca le phrala te aven chidine hai te avel pacea mașcar lende? (Ef. 4:2, 3)”. I Comemorarea si iech lașio momento caște gândisaras amen cadale buchiande. Cana gândisaras amen ca so cărde o Iehova hai o Isus anda amende, va avela te camas anda sea o ilo te sicavas amari recunoștința anda o Iehova hai te sicavas că traisaras anda o Cristos, na anda amende, cadea sar phendea o Pavel.

CODOLA CAI DURIARDE-PE LA CONGREGAȚIATAR

14. Sostar chichiva phrala hai pheia duriarde-pe la congregațiatar?

¹⁴ Chichiva phrala hai pheia ci mai aven ca le întruniri chiar cana mai anglal slujisarde loialo le Iehovasche but bărșa. Sostar? Chichiva anda lende mechle-pe perade cathar ‘le pharimata la viațache’. (Luca 21:34) Aver holiarde-pe cana iech phral sau iech phei phendea sau cărdea lenghe vareso. (Iac. 3:2) Aver cărde iech baro păcato hai si lenghe lajiav sau ci camen te manghen ajutorii. Orisavo avelas o motivo, so daștis te cheres dacă duriardean tut la congregațiatar? Cana gândis tut co merimos le Isusosco, hai ca i iubirea cai si le Iehovas hai le Isusos anda tute, so simțos că trebul te cheres tu?

15. Sar sicavel o Iehova că duchal-les le bacreandar cai duriarde-pe la congregațiatar? (Ezechiel 34:11, 12, 16)

¹⁵ Gândisar tut so simțol o Iehova anda codola cai duriarde-pe la congregațiatar. Vo ci si holiardo pe lende hai na bâstrel-len. Mai but, vo rodel pesche bacrean hasarde, del-len te han hai ajutil-len te aven parpale leste. (Citisar Ezechiel 34:11, 12, 16.) Cherel o Iehova sa cadea vi anda tute? Sar te na! Tu citis cado articolo hai cadaia sicavel că chio ilo încă iubil o ciacimos. Dacă o Iehova dichlea chio ilo hai țârdea tut co ciacimos, ci daștilas vo te țârdel tut acana pale leste?

16. So daștil te ajutil codolen cai duriarde-pe la congregațiatar te aven parpale co Iehova? (Dich vi i imaginea.)

¹⁶ Mangas tumen te gândin tumen ca so phenel-pe ando lil Av parpale co Iehova. Le dumes cai aven mai dur daștin te zuriaren tumen: „Daștis te pachias anda sea ilo că o Iehova va ajutila tut ande sea so cheres caște aves parpale leste. Vo va dela tut o zuralimos cai trebul tut caște naches părdal le pharimata. Va ajutila tut vi te na mai aves holiardo anda so cărdea tuche varecon andai congregația. Hai vo va iertila tut hai va dela tut pacea ando ilo. Sea cadal buchia va zuriarena tut te slujis le Iehovasche pale ande iech than che phralența hai pheianța”. Sa cadea na bâstăr că le phure de congregație abia ajucăren te ajutin tut. Von va avena sar „iech garaimos contra i barval hai sar iech garaimos contra o baro brâșând”. (Is. 32:2) Jianas că diches zurales cuci o merimos le Isusosco hai că cames te sicaves le Iehovasche cadaia. Cadea că, daștis te pușes tut: „So daștiv te cherav acana caște avav pale o amal le Iehovasco?”. (Is. 1:18; 1 Pet. 2:25) Sar exemplo, daștis te jias ca iech întrunirea ca i sala le Regatoschi? Daștis te phenes ieche phuresche de congregație că si tut nevoia ajutorostar caște aves parpale co Iehova? Le phure daștinas te alosaren ieche phrales sau iecha pheia te sichiol tusa andai Biblia iech timpo. Daștis te pachias ciaces că o Iehova va dela tut miștimata anda sea so cheres caște aves parpale leste hai te sicaves chi recunoștința anda o merimos lesche Șiavesco.

SAR VA AVELA TE SICAVES CHI RECUNOȘTINȚA ANDA CODOIA CĂ O IEHOVA DEA PESCHE ȘIAVES ANDA AMENDE?

17, 18. Sar daisaras te folosisaras mișto amaro timpo angla i Comemorarea anda cado bărș?

¹⁷ O Isus phendea că o Iehova bișialdea-les caște del peschi viața anda le manușa „ca oricon sicavel pachiamos ande leste te na merel, tha te avel-les viața veșnico”. (Ioan 3:16) Anda codoia că o Isus mulea anda amende, o Iehova daștil te salvil amen anda o păcato hai anda o merimos. Si ciaces, ci camas te hasaras niciechdata amari recunoștința anda so cărdea o Iehova hai o Isus anda amende. (Rom. 3:23, 24; 2 Cor. 6:1) Le ghiesa angla i Comemorarea ajutin amen te gândisaras amen ca i bari iubirea cai sicadea-la amenghe o Iehova hai o Isus, hai cadai iubirea va zuriarela amen te sicavas amari recunoștința.

¹⁸ Tu sar va avela te sicaves că si cuci anda tute i jertfa le Isusoschi? O răspunso cai tu des-les daștil te avel diferime cathar so phenel aver manuș. Daștis te pachias anda sea o ilo că o Iehova va pochinela tut anda sea so cheres caște sicaves chi recunoștința! Vo bucuril-pe te dichel că milioanea phrala hai pheia pa sea i phuv ci mai train „anda pende, tha anda codo cai mulea anda lende”. (2 Cor. 5:15)