So daștis te cheres cana aver phiraven-pe nasul tusa sau averența

1, 2. So cheren but jene cana dichen că aver manușa phiraven-pe nasul lența sau averența hai so va avela te dichas mai dur?

AGHIES traisaras ande iech lumea nasul. Le manușa arachen but motivea te phiraven-pe nasul averența. Sar exemplo, von dichen iachența nasul codolen cai sile mai ciore, cai aven anda aver than, cai sile diferime lendar hai cadea mai dur. Aver sile duchade anda codoia că le manușa barvale cai cheren afaceri sau codola ando guverno rimosaren i phuv bi te duchal-len chancestar, numai caște cheren love. Cadal buchia nasul, hai vi aver, duchaven amen savoren.

² Savore camas te traisaras ande iech lumea lași, cai le manușa te phiraven-pe șucar amența. Anda codoia, but jene sile holiarde cana dichen că aver manușa phiraven-pe nasul. Chichiva zumaven te lașiaren corcore cadal probleme: jian te cheren protestea contra le guvernea sau le legi hai jian te alosaren avere manușes andai politica cai phenel că va lașiarela le pharimata. Tha amen sichileam că ci trebul te cheras partea anda cadai lumea hai că trebul te șioas amaro pachiamos ando Regato le Devlesco, cai va chosela sea o nasulimos. (Ioan 17:16) Cu sea cadala, cana dichas că varecon phiravel-pe nasul avere manușesa, si pharo te na avas duchade sau chiar holiarde. Cana nachas prin cadal buchia, daștil-pe că pușias amen: „So trebulas te cherav? Daștiv te cherav vareso acana caște lașiarav me le buchia?”. Mai dur, va avela te arachas o răspunso cadale pușimatande. Tha, mai anglal, te dichas so si ando ilo le Iehovasco hai le Isusosco cana dichen că le manușa sile duchade cana aver phiraven-pe nasul lența.

O IEHOVA HAI O ISUS CI PHIRADE-PE NICIECHDATA NASUL AVERENȚA

3. Sostar si normalo te avas holiarde cana dichas că aver phiraven-pe nasul amența sau averența? (Isaia 5:7)

³ I Biblia sicavel că si normalo te avas holiarde cana dichas că aver phiraven-pe nasul amența sau averența. Voi sicavel că o Iehova cărdea amen pala lesco chipo hai că „vo iubil o ciacimos hai o ortomos”. (Ps. 33:5; Gen. 1:26) Vo ci phiravel-pe niciechdata nasul averența hai camel ca sea le manușa te phiraven-pe șucar iech averesa. (Deut. 32:3, 4; Mica 6:8; Zah. 7:9) Sar exemplo, andel ghiesa cana trailas o profeto Isaia hai chichiva israeliți phiravenas-pe nasul averența, o Iehova așundea o cingar ‘codolengo chinuime’. (Citisar Isaia 5:7.) Anda codoia că cadal manușa ci așunde cathar i Legea hai mai dur phiravenas-pe nasul averența, o Iehova pedepsisardea-len. (Is. 5:5, 13)

4. So si ando ilo le Isusosco cana varecon si duchado anda codoia că aver phiraven-pe nasul lesa? (Dich vi i imaginea.)

⁴ Cadea sar o Iehova, o Isus iubil o ortomos hai urâl o neortomos. Ande iech ghies, cana sas-lo pi phuv, o Isus dichlea ieche manușes nasfalo, cai sas-les iech vast șuco. O Isus camlea te ajutil-les hai sastiardea lesco vast. Tha, cana le bare rașaia dichle cadai buchi, sas-le zurales holiarde. Ando than te ajutin codole duchade manușes, von gândinas-pe mai but sar te cheren le manușen te așunen cathar i legea anda o sabato, pala sar pachianas von că si mișto. So sas ando ilo le Isusosco cana dichlea sar phiravenas-pe cadal manușa? Vo „sas-lo holiardo hai duchado anda codoia că lengo ilo sas-lo barruno”. (Mar. 3:1-6)

5. Sostar ci trebul te așias holiarde cana varecon phiravel-pe nasul amența sau averența?

⁵ Vi o Iehova, hai vi o Isus sile holiarde cana dichen că le manușa phiraven-pe nasul averența. Cadea că, na-i vareso nasul te avas vi amen holiarde. (Ef. 4:26) Tha, chiar cana si amen ciacimos, ci trebul te bâstras că i holi ci va lașiarela o nasulimos cărdo varecastar. Mai but, cana așias holiarde hai ci încăras amen parpale, daisaras te peras zurales nasfale sau chiar te avel amen depresia. (Ps. 37:1, 8; Iac. 1:20) Caște hachiaras so trebul te cheras cana varecon phiravel-pe nasul amența sau averesa, va avela te dichas so cărdea o Isus.

SO CĂRDEA O ISUS CANA DICHLEA CĂ CHICHIVA MANUȘA PHIRADE-PE NASUL AVERENȚA?

6. So buchia nasul dichlea o Isus cana sas-lo pi phuv? (Dich vi i imaginea.)

⁶ Cana sas-lo pi phuv, o Isus dichlea but neortomos. Vo dichlea sar le bare rașaia phiravenas-pe zurales nasul averența. (Mat. 23:2-4) Sa cadea, vo jianglea chichi de nasul phiravenas-pe le autorități romano le manușența. But evrei camenas te na mai aven tela o zuralimos romano. Chichiva anda lende, sar avenas le zeloți, sas-le gata te maren-pe contra o zuralimos romano. Cu sea cadala, o Isus ci cărdea chanci caște paruvel o guverno anda codol ghiesa. Mai but, cana așundea că le manușa camenas te cheren-les rege, vo duriardea-pe lendar. (Ioan 6:15)

7, 8. Sostar ci choslea o Isus o nasulimos cana sas pi phuv? (Ioan 18:36)

⁷ O Isus ci șiutea-pe andi politica caște lașiarel le pharimata cai dichlea-len. Sostar? Vo jianglea că le manușenghe ci sas dino nici o drepto, hai nici o zuralimos te rain opral pende corcore. (Ps. 146:3; Ier. 10:23) Sa cadea, le manușa ci daștin te chosen sea le buchia cai anen o nasulimos pi phuv. I lumea si ando vast le Satanosco, iech îngero zurales nasul. Vo cherel le manușen te len-pe pala leste. (Ioan 8:44; Ef. 2:2) Hai, chiar cana si chichiva manușa lașe, von ci daștin te cheren sea o timpo so si mișto anda codoia că sile imperfecți. (Ecl. 7:20)

⁸ O Isus jianglea că numai o Regato le Devlesco daștil te chosel sea le pharimata hai codolen cai cheren-len. Anda codoia, vo dea sea pesco timpo hai zuralimos caște predichil hai te phenel „i vestea lași anda o Regato le Devlesco”. (Luca 8:1) Vo phendea codolenghe „bochale hai trușale pala o ortomos” că sea o neortomos hai le buchia nasul va avena chosle. (Mat. 5:6; Luca 18:7) Tha cadai buchi ci va avela cărdi le manușendar. O Regato le Devlesco anda o cerii, cai „ci cherel partea anda cadai lumea”, va cherela cadaia. (Citisar Ioan 18:36.)

CANA DICHES MANUȘEN CAI SILE DUCHADE, PACHIA TUT ANDO REGATO LE DEVLESCO, SAR O ISUS

9. Sostar pachias că numai o Regato le Devlesco daștil te chosel sea le pharimata le manușenghe?

⁹ Anda codoia că traisaras andel „palutne ghiesa” cadale lumeache si mai but nasulimos hai pharimos sar andel ghiesa le Isusosche. Tha cadea sar sas atunci, vi aghies o nasulimos avel le Satanostar hai le manușendar imperfecți cai sile tela lesco vast. (2 Tim. 3:1-5, 13; Rev. 12:12) Cadea sar o Isus, vi amen jianas că numai o Regato le Devlesco va chosela o nasulimos hai codolen cai cheren-les. Anda codoia că sam de i rig le Regatoschi le Devlesco, amen ci cheras protestea hai ci pachias că le guvernea daștin te chosen o nasulimos. Te dichas so cărdea iech phei cai bușiol Stacy.a Angla so te prinjianel o ciacimos, i Stacy înclelas butivar po drom caște cherel protestea hai cherelas vi aver buchia caște rodel o ortomos. Tha, pala iech timpo, astardea te pușel-pe dacă si mișto so cherel. I Stacy phenel: „Cana gălem ca le protestea, pușlemas man dacă som de i rig caschi trebul. Tha acana som de i rig le Regatoschi le Devlesco hai jianav mișto că som cai trebul. Jianav că o Iehova daștil te cherel so me ci daisardemas te cherav niciechdata. Vo va chosela sea le pharimata hai sea le ducha le manușenghe”. (Ps. 72:1, 4)

10. Pala sar phenel-pe ando Matei 5:43-48, sostar amen ci zumavas te paruvas le legi sau o guverno? (Dich vi i imaginea.)

¹⁰ But manușa zumaven te paruven o guverno. But anda lende sile holiarde, ci așunen cathar i legea hai duchaven averen. Tha, o Isus ci sicadea amen te cheras cadal buchia. (Ef. 4:31) Iech phral cai bușiol Jeffrey phenel: „Jianav că, chiar cana iech protesto fal-pe că si lașio, ande chichiva secundea daștil te paruvel-pe hai le manușa te astaren te rimosaren le buchia, te cioren hai chiar te maren-pe”. Cu sea cadala, o Isus zuriarel amen te phiravas amen iubireasa sea le manușența, chiar vi codolența cai ci pachian ande so amen pachias sau prasan amen. (Citisar Matei 5:43-48.) Cadea că, amen das sea amari zor te na cheras chanci cai na-i pala sar sicadea amen o Isus.

11. Sostar poiechdata daștil te avel pharo te las amen pala o Isus?

¹¹ Chiar cana jianas că numai o Regato le Devlesco daștil te chosel o nasulimos anda sea o timpo, daștil te avel amenghe pharo te las amen pala o Isus cana aver phiraven-pe nasul amența. Te dichas so cărdea iech phei cai bușiol Janiya. Chichiva manușa phirade-pe nasul lasa anda codoia că sas-li diferime le coaverendar. Voi phenel: „Somas holiardi, simțosardem man duchadi hai camlem ca le manușa cai phiravenas-pe nasul manța te aven pedepsime. Atunci gândisardem man te jiav chichiva manușența cai cherenas protestea contra o rasismo hai i discriminarea. Pachiaiem că cadaia si i mai lași buchi cai daisardemas te cherav-la caște sicavav mânri holi”. Cu sea cadala, ando timpo, i Janiya hachiardea că trebul te cherel chichiva paruimata. Voi phenel: „Mechlem averen te paruven mânro gândimos hai te cheren man te pachiav că le manușa daștin te ajutin man mai but sar o Iehova. Alosardem te na mai jiav codole manușența hai te na mai șioav man ande buchia sar cadala”. Chiar cana si amen sostar te avas holiarde, trebul te las sama te încăras amari holi parpale hai te na cheras partea anda cadai lumea. (Ioan 15:19)

12. Sostar trebul te avas atenți le buchiande cai dichas-len, așunas-len sau citisaras-len?

¹² So daștil te ajutil amen te așias liniștime cana aver phiraven-pe nasul amența sau averența? Iech buchi cai daisaras te cheras-la si te las sama so dichas, so citisaras sau so așunas. Chichiva buchia cai sile phende po interneto sile phende numai caște cheren le manușen te gândin nasul anda o guverno. Butivar, so phenel-pe ca le știri ci întâmplosardea-pe ciaces. Hai, chiar dacă iech buchi si ciaci, ci daisaras te lașiaras iech pharimos cana rodas te dichas mai but so întâmplosardea-pe. Cana beșas but timpo caște așunas hai te dichas cadal buchia, daisaras te avas mai perade hai mai holiarde. (Prov. 24:10) Daisaras te arăsas chiar te bâstras că numai o Regato le Devlesco daștil te chosel cadal pharimata anda sea o timpo.

13. Sar ajutil amen o citimos la Bibliaco anda fiesavo ghies te dichas le buchia cadea sar trebul cana aver phiraven-pe nasul?

¹³ Cana citisaras i Biblia ande fiesavo ghies hai gândisaras amen le buchiande cai citisardeam-len, va avela te hachiaras mai mișto so trebul te cheras cana aver phiraven-pe nasul amența sau averența. Iech phei cai bușiol Alia sas-li zurales duchadi cana dichlea sar le manușa phiravenas-pe codolența de pașa late. Falas-pe că le manușa cai phiravenas-pe nasul ci sas-le pedepsime anda so cherenas. Voi phenel: „Trebulas te așiav hai te pușiav man: «Pachiav ciaces că o Iehova daștil te lașiarel cadal pharimata?». Ande codo timpo, citisardem Iov 34:22-29. Cadal versetea ande manghe amintea că chonic ci daștil te garavel-pe le Iehovastar. Numai vo jianel so si o ciacio ortomos hai numai vo daștil te lașiarel le buchia cu sea”. Chiar cana ajucăras ca o Regato le Devlesco te anel o ciacio ortomos, trebul te așias zurale acana angla le buchia nasul prin save nachas. Sar daisaras te cheras cadaia?

SO DAISARAS TE CHERAS ACANA?

14. Savi si iech buchi cai daisaras te cheras-la ande cadai lumea cai le manușa phiraven-pe nasul? (Coloseni 3:10, 11)

¹⁴ Si ciaces că ci daisaras te paruvas le manușen caște phiraven-pe mai șucar, tha amen daisaras te alosaras sar te phiravas amen averența. Cadea sar dichleam mai anglal, daisaras te las amen pala o Isus cana sicavas iubirea. Cadai iubirea daștil te ajutil amen te sicavas pachiv averenghe, chiar vi codolenghe cai phiraven-pe nasul amența sau averența. (Mat. 7:12; Rom. 12:17) O Iehova bucuril-pe cana phiravas amen lașimasa hai ortomosa savore manușența. (Citisar Coloseni 3:10, 11.)

15. Sar ajutisaras le manușen cana phenas lenghe o ciacimos andai Biblia?

¹⁵ I mai lași buchi cai daisaras te cheras-la caște ajutisaras le manușen si te sicavas-len o ciacimos andai Biblia. Sostar? Anda codoia că, cana le manușa prinjianen le Iehovas, von camen te aven dichle lașe iachența lestar hai paruven penghi viața, sile mai lașe hai sicaven iubirea. (Is. 11:6, 7, 9) Angla te prinjianel o ciacimos, iech murș cai bușiol Jemal cherelas partea anda iech grupo cai marelas-pe contra o guverno, cai von pachianas că silo nasul. Vo phenel: „Ci daștis te paruves le manușen zuralimasa. Me ci parudem man cadea, tha o ciacimos andai Biblia parudea man”. So sichilea o Jemal andai Biblia ajutisardea-les te paruvel-pe hai te na mai marel-pe caște cherel pesche corcoro ciacimos. Chichi mai but manușa va paruvena-pe pala so așunen o ciacimos andai Biblia, cadichi mai țâra va phiravena-pe nasul averența.

16. Sostar cames te phenes averenghe anda o Regato le Devlesco?

¹⁶ Cadea sar o Isus, camas te phenas le manușenghe că numai o Regato le Devlesco daștil te chosel cu sea o nasulimos. Cadai speranța daștil te zuriarel codolen cai sile duchade anda codoia că aver manușa phirade-pe nasul lența. (Ier. 29:11) I Stacy, anda savi deam duma mai anglal, phenel: „Anda codoia că jianav că o Del va chosela i duch, daștiv te așiav liniștime cana varecon phiravel-pe nasul manța sau averența. Le sicaimata le Iehovasche anda i Biblia, zuriaren mânro ilo”. Camas te pregătisaras amen mișto caște phenas le manușenghe o ciacimos andai Biblia că o Del va chosela cu sea o nasulimos. Caște cheras cadaia, trebul te zuriaras amaro pachiamos ande cadal ciacimata andai Biblia cai dichleam-len ande cado articolo. Cadea, va avela te avas pregătime te das duma anda cadaia ca i școala sau ca i buchi.b

17. Sar ajutil amen o Iehova te așias zurale cana aver phiraven-pe nasul amența?

¹⁷ Jianas că, chichi timpo o Satan si „o conducătorii cadala lumeaco”, va trebula te nachas prin nasulimata. Cu sea cadala, ji cana „va avela șiudino avri”, si amen iech ajutorii hai iech speranța. (Ioan 12:31) Andi Biblia, o Iehova phenel amenghe sostar si cadichi de but nasulimos pi phuv. Vo sicavel amenghe vi so si ande lesco ilo cana dichel că sam duchade. (Ps. 34:17-19) Prin pesco Șiavo, o Iehova sicadea amenghe so trebul te cheras cana aver phiraven-pe nasul amența hai so va cherela lesco Regato caște chosel cadal buchia nasul. (2 Pet. 3:13) Cadea că, te predichisaras mai dur iagasa ando ilo i vestea lași anda o Regato, ji cana va avela o ghies cana pi phuv va raina o ciacimos hai o ortomos! (Is. 9:7)