O Iehova si amari „mai bari bucuria”

1, 2. (a) Sar simțon-pe but manușa aghies? b) So va avela te dichas ande cado articolo?

BUT manușa andai lumea nașen pala i fericirea, tha von ci arachen i ciaci fericirea. Dichas că oriso cheren, but mașcar lende sile perade hai pachian că le buchia ci va avena niciechdata mai mișto anda lende. Vi le manușa le Iehovasche daștin te simțon-pe sa cadea. Anda codoia că traisaras andel „palutne ghiesa”, daștil-pe că nachas prin bare pharimata cai cheren amen te avas perade. (2 Tim. 3:1)

² Ande cado articolo, va avela te dichas chichiva buchia cai daștin te cioren amari bucuria hai so daisaras te cheras caște avas pale bucurime. Tha mai anglal, te dichas con daștil te ajutil amen te avas ciaces fericime.

CON DAȘTIL TE AJUTIL AMEN TE AVAS CIACES FERICIME

3. So sichioas anda o Iehova anda le buchia cai vo cărdea-len? (Dich vi le imagini.)

³ O Iehova sas-lo sea o timpo fericime. Vo camel ca vi amen te avas fericime. O Iehova cărdea but buchia cai cheren amen fericime. Sar exemplo, sam bucurime cana dichas amari șucar phuv cai si pherdi culori, ciaiol amen te dichas le animalea sar chelen-pe hai sam fericime cana has iech lașio haben. O Del iubil amen ciaces hai camel te bucurisaras amen viațatar!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. a) Sostar daștil o Iehova te avel bucurime vi cana dichel le pharimata le manușenghe? b) So cadouo dea amen o Iehova? (Psalmo 16:11)

⁴ O Iehova dichel i duch sea le manușenghi hai duchal-les but cana dichel lengo pharimos. Tha i Biblia phenel că o Iehova si ‘o fericime Del’. (1 Tim. 1:11) Sostar si fericime o Iehova? Anda codoia că vo alosardea deja iech ghies cana va chosela anda sea o timpo le pharimata hai i duch. Tha ji atunci, o Iehova hachiarel prin so nachas hai camel te ajutil amen. Sar cherel vo cadaia? Vo dea amen iech șucar cadouo: i bucuria. (Citisar Psalmo 16:11.) Te dichas sar dea vo cado cadouo pesche Șiavesche, le Isusosche.

5, 6. Sostar si o Isus bucurime?

⁵ O Isus si o mai bucurime jeno anda sea i creația. Sostar? Te gândisaras amen ca dui buchia. 1) „Vo si o chipo le Devlesco nedichlo” hai sicavel ande iech modo perfecto le calități lesche Dadesche ande orisavi buchi. (Col. 1:15; 1 Tim. 6:15) 2) O Isus beșlea pașa o Iehova, castar avel i ciaci bucuria, mai but timpo sar orisavo jeno.

⁶ O Isus simțosardea sea o timpo bucuria anda codoia că cărdea so phendea lesche lesco Dad. (Prov. 8:30, 31; Ioan 8:29) Mai but, anda codoia că vo si loialo, o Iehova del-pe baro lesa. (Mat. 3:17).

7. Sar daisaras te arachas i ciaci bucuria?

⁷ Vi amen daisaras te avas ciaces fericime, cana pașioas le Iehovastar mai but. Cana sichioas mai but anda o Iehova, so simțol hai sar gândil vo, daisaras te las amen mai mișto pala leste. Cadaia anel amenghe i ciaci bucuria. Sa cadea, cana cheras so manghel amendar o Iehova, sam fericime, anda codoia că jianas că vo dichel amen lașe iachența.a (Ps. 33:12) Tha cana hasaras amari bucuria anda iech țâra timpo sau mai but, însemnol că o Iehova ci mai dichel amen lașe iachența? Nici. O Iehova hachiarel că sam imperfecți, hai că poiechdata nachas prin bare pharimata, că sam perade hai duchade sau că si amen depresia. (Ps. 103:14) Mai dur va dichasa so daștil te ciorel amari bucuria hai so daisaras te cheras caște avas pale bucurime.

NA MECH NICIECH BUCHI TE CIOREL CHI BUCURIA

8. Sar daștil-pe că simțosaras amen cana nachas prin le pharimata la viațache?

⁸ O cior 1: Le pharimata la viațache. San duchado anda codoia că le manușa așen tuche contra, naches prin iech dezastro naturalo sau ciorâmos? Si tuche pharo anda codoia că phurilean sau san nasfalo? Le pharimata daștin te peraven amen hai te cioren amari bucuria. Si vi mai pharo cana ci daisaras te cheras chanci caște paruvas le buchia. I Biblia phenel claro că „i duch le ileschi phagărel o spirito”. (Prov. 15:13) O Babis, iech phuro de congregație cai hasardea ando merimos pesche phrales, pesche dades hai pesca deia ande ștar bărșa, phenel: „Simțosardem man corcoro hai pachiaiem că chonic ci daștil te ajutil man. Poiechdata somas perado, că ci daisardem te beșav mai but timpo lența angla so te meren, anda codoia că sas man but buchia te cherav”. Ciaces, poiechdata le pharimata daștin te chiniaren amen hai te peraven amen.

9. So daștil te ajutil amen te avas pale bucurime? (Ieremia 29:4-7, 10)

⁹ So daisaras te cheras caște avas pale bucurime? Dacă ci gândisaras amen prea but le buchiande cai ci daisaras te paruvas-len, hai dichas mai but le lașe buchia cai si amen, daisaras te avas pale bucurime. I lumea phenel că trebul amen iech viața perfecto caște avas fericime. Tha cadaia na-i ciaces. Sar exemplo, o Iehova phendea le evreienghe îngărde zorasa ando Babilono te na hasaren penghi bucuria hai te cheren sea so daștin ande codo nevo them, chiar cana sas lenghe pharo. (Citisar Ieremia 29:4-7, 10.) So sichioas amen cathar? Av mulțumime le buchianța cai si tut hai bucurisar tut lendar. Na bâstăr că o Iehova silo pașa tute hai ci mechel tut corcoro! (Ps. 63:7; 146:5) I Effie, cai așilea paralizime pala iech accidento, phenel: „Primisardem but ajutorii le Iehovastar, mânra familiatar hai mânre phralendar andai congregația. Anda codoia simțosardem că ci trebul te mechav man peradi. Cadea că, camav te sicavav chichi de but mulțumiv le Iehovasche hai mânre amalenghe anda lengo baro ajutorii”.

10. Sostar daisaras te avas bucurime chiar cana nachas prin pharimata?

¹⁰ Daisaras te avas bucurime chiar cana amari viața na-i perfecto sau cana amen sau amari familia nachas prin bare pharimata.b (Ps. 126:5) Sostar pachias cadaia? Anda codoia că na amari situația cherel amen fericime. I Maria, iech pioniera, phenel: „Te așes bucurime, chiar cana naches prin pharimata, ci însemnol că garaves so simțos. Tha însemnol, te avel tut sea o timpo andi goghi le promisiuni le Iehovasche. Amaro Dad o Iehova va ajutila amen te așas bucurime”. Na bâstăr că orichichi de phare si le situații prin save naches acana, le pharimata ci așen anda sea o timpo. Si sar le urmea andi chișai cai sile chosle cathar le valuri la mareache. Pa țâra timpo, vi amare pharimata va avena chosle cu sea, sar cana ci sas-le niciechdata.

11. Sar zuriarel tut o exemplo le Pavelosco?

¹¹ Poiechdata, cana nachas prin pharimata daisaras te pachias că o Iehova ci mai dichel amen lașe iachența. So daștil te ajutil amen? Te gândisaras amen ca aver slujitori loialo le Iehovasche, cai nachle vi von prin but pharimata. Te dichas so cărdea o Pavel. Vo sas alosardo chiar le Isusostar te îngărel i vestea lași „le manușenghe, cai ci slujin le Devlesche hai vi ca le regi hai le israeliți”. (Fap. 9:15) O Isus dea le Pavelos iech bari buchi! Cu sea cadala, leschi viața ci sas ușoro. (2 Cor. 11:23-27) Tha sicavenas le pharimata prin save nachlea o Pavel, că o Iehova ci dichelas-les lașe iachența? Nici, anda codoia că o Pavel daisardea te așel zuralo andel pharimata, numai le ajutorosa le Iehovasco. (Rom. 5:3-5) Gândisar tut acana vi tute. Vi tu slujis le Iehovasche mai dur pherdo pachiamos, chiar cana naches prin pharimata. Cadea că, daștis te pachias anda sea o ilo că o Iehova iubil tut hai silo pașa tute.

12. So daștilas te întâmplol-pe cana camas te cheras mai but anda o Iehova tha ci daisaras?

¹² O cior 2: Cana ci daisaras te cheras so camas andi buchi le Iehovaschi. (Prov. 13:12) Amen iubisaras le Iehovas hai mulțumisaras lesche anda sea so del amen. Anda codoia vi amen gândisaras amen sar te das mai but le Iehovas. Tha, cana camas te cheras vareso hai amari situația ci mechel amen daisaras te avas perade. (Prov. 17:22) Iech pioniera cai bușiol Holly phenel: „Camlem te cherav i Școala anda le Evanghelizatori le Regatosche, te predichiv ande aver them sau te cherav buchi ca le construcții co nevo proiecto co Ramapo. Tha, mânri situația parudea-pe hai ci daisardem te cherav niciech anda cadal buchia. Somas ciaces peradi. Si pharo cana cames te cheres chichiva buchia, tha des chi sama că ci daștis”. But manușa le Iehovasche nachen prin cadaia.

13. Save si chichiva buchia cai daisaras te cheras-len vi cana amari situația ci mechel amen te cheras mai but?

¹³ So daisaras te cheras caște avas pale bucurime? O Iehova ci phiravel-pe nasul amența. Te na bâstras că o Iehova ci manghel amendar mai but sar amen daisaras te cheras. Vo dichel amen cuci chiar cana ci daisaras te cheras sea so cheren aver. O Iehova camel te avas manușa umilo hai te slujisaras lesche loialo. (Mica 6:8; 1 Cor. 4:2) Anda leste si mai importanto sar sam amen na so cheras. Cadea că, ci trebul te mangas mai but amendar sar manghel o Iehova. Cana chi situația ci mechel tut te cheres sea so cames anda o Iehova, gândisar tut ca le buchia cai daștis te cheres-len. Daștis te zuriares le tărnen sau te ajutis codolen mai phure? Daștis te zuriares varecas hai te jias leste chăre, te des-les iech telefono sau iech mesajo? O Iehova si bucurime cana dichel că des chi zor te cheres sea so daștis hai va ajutila tut te aves bucurime. Hai te na bâstres ca pa țâra timpo, andi lumea nevi va avela te slujisaras le Iehovasche ande diferime feluri, cadea sar ci gândisardeam amen niciechdata. I Holly, anda savi deam duma mai anglal phenel: „Poiechdata așav po than hai phenav manghe: «Ajucărel man i viața veșnico». Hai le ajutorosa le Iehovasco, andi lumea nevi va avela te cherav sea so camav ande leschi buchi”.

14. So mai daștil te ciorel amari bucuria?

¹⁴ O cior 3: Cana cheras numai so ciaiol amare iles. Po interneto daștil-pe că dichas manușen cai fal-pe că sile fericime anda codoia că silen so camel lengo ilo. Daisaras te pachias că dacă cheras so camel amaro ilo, te chinas amenghe so camas hai te jias andel vacanțe va avela te avas ciaces fericime. Na-i nasul te cheras so ciaiol amen. O Iehova camel te bucurisaras amen le șucar buchiandar cai vo cărdea-len anda amende. Tha, but manușa dichle că so pachianas von că anelas lenghe fericirea, ciordea lenghi fericirea. Iech pioniera cai bușiol Eva phendea: „Cana rodes numai le buchia cai camel-len chio ilo, chanci ci arăsăl tuche”. Cana nașas numai pala cadal buchia va avela te avas perade hai ci va avela te arachas i ciaci bucuria.

15. So sichioas le regestar Solomon?

¹⁵ O rege Solomon dichlea pe peschi morci că cana rodes numai le buchia cai camel-len chio ilo ci san ciaces fericime. Vo rodea i fericirea prin mai but buchia, sar avelas vo bucurisardea-pe lașie habenestar, șucar ghileandar hai sas-les le mai cuci buchia anda lesco timpo. Cu sea cadala, ci sas fericime. Vo phendea: „I iach ci ciailiol sosa dichel hai o can ci pherel-pe sosa așunel”. (Ecl. 1:8; 2:1-11) But manușa pachian că dacă silen love hai sea so camen va avena fericime. Tha cado si iech baro hohaimos. Cadal buchia ci daștin niciechdata te cheren amen ciaces fericime.

16. Sostar sam mai fericime cana ajutisaras averen? (Dich vi le imagini.)

¹⁶ So daisaras te cheras caște avas pale bucurime? O Isus sicadea amen că „si mai but fericirea te des sar te primis”. (Fap. 20:35) Iech phuro de congregație cai bușiol Alekos phenel: „Dav mânri zor te cherav țâne buchia caște ajutiv averen. Cana ajutiv averen ci mai gândiv man cadea de but mande hai som mai fericime”. So daștis te cheres vi tu caște ajutis averen? Dacă diches că varecon nachel prin iech pharimos, daștis te zuriares-les. Daștil-pe că ci daștis te duriares lesco pharimos, tha daștis te ajutis-les cana așunes-les atento hai des chi zor te hachiares so si ande lesco ilo. Daștis vi te anes lesche amintea te phenel le Iehovasche sar simțol-pe anda codoia că Les duchal-les lestar. (Ps. 55:22; 68:19) Sa cadea, daștis te ajutis-les te hachiarel că o Iehova ci mechlea-les. (Ps. 37:28; Is. 59:1) Mai daștis te ajutis-les vi avere buchianța, sar exemplo, te cheres lesche iech haben sau te jian avri ande iech than. Daștis te jias lesa andi predicarea, anda codoia că cana phenas i vestea lași sam mai fericime. Mech le Iehovas te cherel buchi tusa caște zuriarel averen! Cana cheras amenghe timpo caște ajutisaras averen, va avela te avas ciaces fericime. (Prov. 11:25)

17. So trebul te cheras dacă camas te avas ciaces fericime? (Psalmo 43:4)

¹⁷ Daisaras te avas ciaces bucurime cana pașioas sea mai but amare Dadestar cerisco. I Biblia phenel amenghe că o Iehova si ‘amari mai bari bucuria’. (Citisar Psalmo 43:4.) Cadea că, vi cana nachas prin pharimata ci trebul te daras. Dacă o Iehova si amaro mai lașio amal, vo daștil te ajutil amen te avas fericime anda sea o timpo! (Ps. 144:15)