I iubirea loialo le Devleschi așel anda sea o timpo

1, 2. Sar daștil-pe că simțon-pe but phrala hai pheia?

GÂNDISAREN tumen sar si iech barca pi marea cana si iech baro brâșând hai phurdel zurales i barval. Le bare valuri spiden i barca anda iech than ande aver. I barca va jiala oricai va îngărena-la le valuri dacă nai-la iech ancora. I ancora încărel i barca ca pesco than hai ci mechel te len-la le valuri.

² Cana naches prin iech pharimos daștil-pe că san sar iech barca ande iech baro brâșând. Che sentimentea daștin te jian hai te aven cadea sar le valuri spiden i barca ande sea le riga. Ande iech ghies pachias că o Iehova iubil tut hai silo pașa tute tha o duito ghies pușes tut dacă vo chiar dichel prin so naches. (Ps. 10:1; 13:1) Pala codoia, iech amal phenel tuche chichiva dumes cai zuriaren tut hai iech vremea simțos tut mai mișto. (Prov. 17:17; 25:11) Tha, pala iech timpo astares pale te pușes tut dacă le Iehovas chiar duchal-les tutar. Cana simțos tut cadea, sar daștis te șios tuche vi tu iech ancora, caște phenas cadea? Adică, so daștis te cheres caște zuriares chio pachiamos că o Iehova iubil tut hai silo pașa tute?

3. So însemnon le dumes „iubirea loialo” hai sostar si o Iehova o mai baro exemplo anda cadaia? (Psalmo 31:7; 136:1) (Dich vi i imaginea.)

³ Iech buchi cai daștil te ajutil vi amen te așias zurale cana nachas prin pharimata, sar cana si amen iech „ancora”, si te gândisaras amen ca i iubirea loialo le Iehovaschi. (Citisar Psalmo 31:7; 136:1.) I „iubirea loialo” si iech iubirea zurali cai si varecas anda aver manuș hai cherel-les te așel loialo pașa codo cas iubil. O Iehova si o mai baro exemplo anda i iubirea loialo. I Biblia chiar phenel anda leste că si „barvalo andi iubirea loialo”. (Ex. 34:6, 7) Sa cadea, ande late phenel-pe că o Iehova si ‘barvalo andi iubirea loialo caring sea codola cai acharen-les’. (Ps. 86:5) Gândisar tut so însemnol cadaia: o Iehova ci mechel niciechdata pesche manușen loialo! Cana jianes că o Iehova si loialo, cadai buchi daștil te avel iech „ancora” anda tute cana naches prin pharimata cai sile ande chi viața sar iech baro brâșând. (Ps. 23:4)

NA BÂSTĂR CĂ I IUBIREA LE IEHOVASCHI SI IECH BARO SICAIMOS ANDAI BIBLIA

4. Save si chichiva bare sicaimata andai Biblia hai sostar pachias zurales ande lende?

⁴ Iech aver buchi cai daștil te ajutil amen te așias zurale cana nachas prin pharimata, sar cana si amen iech „ancora”, si te anas amenghe amintea că i iubirea le Iehovaschi si iech baro sicaimos andai Biblia. So însemnol anda tute „iech baro sicaimos andai Biblia”? Daștil-pe că gândis tut ca le ciacimata cai sichilean-len anda o Lil le Devlesco. Sar exemplo, sichilean că o anav le Devlesco si Iehova, că o Isus si o Șiavo corcoro cărdo le Iehovastar, că le mule ci mai jianen chanci hai că, pa țâra timpo, le manușa va traina ando paradiso pi phuv. (Ps. 83:18; Ecl. 9:5; Ioan 3:16; Rev. 21:3, 4) Pala so arăslean te pachias cadal sicaimata, chonic ci mai daisardea te covliarel chio pachiamos. Sostar? Anda codoia că hachiardean că cadal sicaimata sile ciace. Mai dur va avela te das duma anda sar daștis te diches i iubirea le Iehovaschi sar iech baro sicaimos andai Biblia. Sa cadea, va avela te dichas sar va ajutila tut cado sicaimos te încalaves anda chi goghi o gândo că o Iehova ci dichel prin so naches hai ci duchal-les tutar.

5. Sar daștil iech manuș te duriarel pestar le sicaimata hohamne?

⁵ So ajutisardea tut te duriares tutar le sicaimata hohamne cana astardean te sichios andai Biblia? Daștil-pe că gândisardean tut ca so sichilean ande chi religia hai so sicavel tut o Lil le Devlesco. Te dichas iech exemplo. Daștil-pe că pachiaian că o Isus si o Del. Tha, cana astardean te sichios andai Biblia, pușlean tut: „Si ciacio cado sicaimos?”. Pala so sichilean so phenel i Biblia anda cadai buchi hachiardean că o Isus na-i o Del. Pala codoia, duriardean tutar o sicaimos hohamno hai astardean te pachias so phenel i Biblia anda o Isus, că vo si „o iechto năștime anda sea i creația” hai o Șiavo „corcoro cărdo le Devlestar”. (Col. 1:15; Ioan 3:18) Si ciaces, le sicaimata hohamne daștin te aven „zurales phangle le ilestar” hai daștil te avel pharo te încalavas-len cothar. (2 Cor. 10:4, 5) Tha, cana arăsăs te cheres cadaia, ci mai risares tut niciechdata ca codol sicaimata. (Filip. 3:13)

6. Sostar daștis te pachias că i iubirea loialo le Iehovaschi caring tute încărel anda sea o timpo?

⁶ Sa cadea trebul te cheras vi le bare sicaimasa andai Biblia anda i iubirea le Iehovaschi. Cana nachas prin pharimata hai astaras te gândisaras amen dacă o Iehova iubil amen, daisaras te pușias amen: „Si ciaces so gândiv?”. Cana si tut îndoieli anda i iubirea le Iehovaschi gândisar tut ca le dumes anda o Psalmo 136:1 cai si o verseto pe savo bazol-pe o articolo. Pala codoia puș tut: „Sostar o Iehova phenel că leschi iubirea si „loialo”? Sostar le dumes „leschi iubirea încărel anda sea o timpo” sile șiute 26 var ande cado psalmo?”. Cadea sar dichleam, i iubirea loialo le Iehovaschi anda lesche manușa si iech baro sicaimos andai Biblia, cadea sar si vi le coaver bare sicaimata cai pachias-len. Na-i ciaces că o Iehova ci iubil tut hai ci san cuci ande lesche iacha. Cadea că, duriar tutar cado sicaimos, cadea sar duriardean tutar vi aver sicaimata hohamne!

7. Phenen chichiva versetea cai sicaven că o Iehova iubil amen.

⁷ Prin i Biblia, o Iehova phenel amenghe butivar că iubil amen. Sar exemplo, o Isus phendea pesche discipolenghe: „Tumen san mai cuci sar but țâne ciriclea”. (Mat. 10:31) Hai o Iehova phendea le israelițenghe: „Me va avela te zuriarav tut hai te vazdav tut. Va avela te încărav tut mânre vastesa ciacio le ciacimasco”. (Is. 41:10) Dichas chichi de claro sile cadal versetea. O Isus ci phenel: „Tumen daștinas te aven mai cuci”, hai o Iehova ci phenel: „Daisardemas te vazdav tut”. Tha, von phenen amenghe: „Tumen san mai cuci” hai „Me va avela te vazdav tut”. Cana naches prin iech pharimos hai pușes tut dacă o Iehova chiar iubil tut, versetea sar cadala va ajutina tut na numai te simțosares mai but i iubirea le Iehovaschi, tha vi te prinjianes-la mai mișto hai te pachias anda sea o ilo că vo iubil tut. Si amen sostar te pachias amen ande cadal versetea anda codoia că sile ciace. Dacă va avela te manghes tut le Iehovasche anda so simțos hai va avela te gândisares tut ca cadal versetea, vi tu va avela te phenes sar o apostolo Ioan: „Amen arăsleam te prinjianas i iubirea cai si le Devles anda amende hai te pachias ande late”. (1 Ioan 4:16)a

8. So daștis te cheres cana poiechdata mai pușes tut dacă o Iehova chiar iubil tut?

⁸ Tha so daștis te cheres cana poiechdata mai pușes tut dacă o Iehova chiar iubil tut? Gândisar tut so simțos hai so jianes anda o Iehova. Amare sentimentea daștin te paruven-pe, tha le ciacimata andai Biblia nici. Hai so sicavel amen i Biblia anda i iubirea le Iehovaschi si iech ciacimos cai ci va paruvela-pe niciechdata. Cana ci pachias că o Iehova iubil amen, amen bâstras leschi mai bari calitatea: i iubirea. (1 Ioan 4:8)

GÂNDISAR TUT CA I IUBIREA LE IEHOVASCHI ANDA TUTE

9, 10. Anda so delas duma o Isus cana phendea le dumes: „Chiar o Dad iubil tumen”, anda Ioan 16:26, 27? (Dich vi le imagini.)

⁹ Daisaras te sichioas but buchia anda i iubirea le Iehovaschi dacă gândisaras amen ca so phendea o Isus pesche discipolenghe: „Chiar o Dad iubil tumen”. (Citisar Ioan 16:26, 27.) O Isus ci phendea cadal dumes numai caște cherel-len te simțon-pe mai mișto. Cana citisaras le versetea de mai anglal hachiaras că o Isus ci delas duma anda lenghe sentimentea. Vo delas duma anda aver vareso, anda o manglimos.

¹⁰ O Isus phendea pesche discipolenghe că ci trebunas te manghen-pe lesche, tha prin leste. (Ioan 16:23, 24) Sas importanto ca von te jianen cadai buchi. Pala lesco jiuvindimos lesche discipoli daștinas te pachian că si mișto te manghen-pe le Isusosche. O Isus sas lengo amal. Von daștinas te pachian că anda codoia că o Isus iubil-len, va camela te așunel lenghe manglimata hai te phenel lesche Dadesche te ajutil-len. Tha, prin lesche dumes o Isus sicadea-len că ci trebun te gândin cadea. Vo phendea lenghe: „Chiar o Dad iubil tumen”. Cado si iech anda le mai bare sicaimata andai Biblia anda o manglimos. Gândisar tut so însemnol cado ciacimos anda tute: Cana sichios andai Biblia arăsăs te prinjianes hai te iubis le Isusos. (Ioan 14:21) Tha, cadea sar le discipoli anda o iechto secolo, daștis te manghes tut pherdo pachiamos le Devlesche, anda codoia că jianes că ‘chiar vo iubil tut’. De fiesavi data cana manghes tut le Iehovasche, sicaves că pachias tut ande cadal dumes. (1 Ioan 5:14)

DICH CATHAR AVEN CHE ÎNDOIELI

11. Sostar avelas o Satan bucurime dacă si amen îndoieli anda i iubirea le Iehovaschi?

¹¹ Cathar aven che îndoieli anda i iubirea le Iehovaschi? O Satan daștil te cherel amen te avel amen îndoieli. O Beng ‘rodel te hal amen’ hai bucurilas-pe but dacă arăsas te pușias amen dacă o Iehova chiar iubil amen. (1 Pet. 5:8) Mai but, o Satan camel te pachias că sam prea păcătoși caște meritisaras i jertfa le Isusoschi, cai dea-la o Iehova pherdo iubirea anda amende. (Evr. 2:9) Tha con avelas bucurime dacă si amen îndoieli că o Iehova iubil amen? O Satan. Hai con avelas bucurime dacă sam cadea de perade că ci mai slujisaras le Iehovasche? O Satan. O Satan camel te pachias că o Iehova ci iubil amen, tha o ciacimos si că o Iehova ci iubil-les. Cu sea cadala, iech anda lesche ‘athaimata’ si te cherel amen te pachias că o Iehova ci iubil amen hai că ci sam dichle mișto ande lesche iacha. (Ef. 6:11) Cana hachiaras so camel amaro dușmano te cherel, sam mai hotărâme ‘te așias contra le Benghesche’. (Iac. 4:7)

12, 13. Sar daștil o păcăto te cherel amen te avel amen îndoieli că o Iehova iubil amen?

¹² Aver buchi cai cherel amen te avel amen îndoieli hai te pușias amen dacă o Iehova iubil amen si o păcato cai primisardeam-les le Adamostar. (Ps. 51:5; Rom. 5:12) O păcato rimosardea o amalimos mașcar o Del hai le manușa. Sa cadea, rimosardea amari gândirea, amare sentimentea hai amaro sastimos.

¹³ O păcato daștil te cherel amen te simțosaras amen doșale, neliniștime, darade hai lajiavune. Si amen cadal sentimentea cana cheras iech păcato. Tha, daisaras te simțosaras amen cadea vi cana das amari sama că sam păcătoși, adică, ci sam cadea sar cărdea amen o Del. (Rom. 8:20, 21) Iech mașina bi ieche cauciucosco phuchiardo ci daștil te jial cadea de mișto sar sas cărdi te jial. Sa cadea, nici amen sar manușa imperfecto ci daisaras te cheras le buchia cadea de mișto sar samas cărde te cheras-len. Cadea că, si normalo ca poiechdata te pușias amen dacă o Iehova iubil amen. Ande cadal momentea, si importanto te anas amenghe amintea că o Iehova si ‘o baro Del savestar daras, cai . . . sicavel iubirea loialo caring sea codola cai iubin-les hai așunen lestar’. (Neem. 1:5)

14. Sar ajutil amen o merimos le Isusosco te duriaras amendar o gândo că o Iehova ci iubil amen? (Romani 5:8) (Dich vi o chenarii „Na mechen tumen athade cathar o zuralimos le păcatosco”.)

¹⁴ Poiechdata, daisaras te pachias că ci meritisaras i iubirea le Iehovaschi. Hai, chiar cadea si, ci meritisaras-la. Anda codoia i iubirea le Iehovaschi si cadea de bari. Ci daisaras te cheras chanci caște meritisaras-la. Tha, o Iehova dea pesche șiaves caște iertil amare păcatea anda codoia că iubil amen. (1 Ioan 4:10) Te na bâstras că o Isus avilea pi phuv caște salvil manușen păcătoși, na manușen perfecto. (Citisar Romani 5:8.) Chonic na-i perfecto, hai nici o Iehova ci ajucărel i perfecțiunea amendar. Dacă hachiaras că amari imperfecțiunea daștil te cherel amen te pușias amen dacă o Iehova iubil amen, daisaras te avas hotărâme te na mechas amen perade cathar cadal sentimentea. (Rom. 7:24, 25)

ALOSAR TE AȘES LOIALO LE IEHOVASCHE

15, 16. So daisaras te pachias dacă așias loialo le Iehovasche hai sostar? (2 Samuel 22:26)

¹⁵ O Iehova camel te alosaras mișto hai te ‘încăras amen zurales lestar’. (Deut. 30:19, 20) Dacă cheras cadea, daisaras te pachias ciaces că vi vo va așela amenghe loialo. (Citisar 2 Samuel 22:26.) Hai, cana așias loialo le Iehovasche, daisaras te pachias anda sea o ilo că vo va ajutila amen te nachas prin oriso pharimos ande amari viața.

¹⁶ Cadea sar dichleam si amen sostar te așias zurale cana nachas prin pharimata, sar cana si amen iech „ancora”. Jianas că o Iehova iubil amen hai silo pașa amende. Cadaia sicavel amen i Biblia. Dacă astaras te avel amen îndoieli anda i iubirea le Iehovaschi, te gândisaras amen ca so jianas anda leschi iubirea, na ca so simțosaras amen ande codol momentea. Camas te pachias zurales că i iubirea loialo le Iehovaschi încărel anda sea o timpo, cadea sar phenel i Biblia!