Te na bâstras te mangas amen anda le coaver

1. Cathar jianas că amare manglimata sile importanto anda o Iehova?

O MANGLIMOS si iech șucar daro. Te gândisaras amen: o Iehova dea le îngerenghe te cheren chichiva buchia. (Ps. 91:11) Hai dea vi pesche Șiavesche te cherel buchia importanto. (Mat. 28:18) Tha, ci șiutea chanicas te așunel amare manglimata. O Iehova camel ca vo te așunel amare manglimata. Anda codoia andi Biblia phenel-pe că o Iehova si ‘Codo cai așunel o manglimos’. (Ps. 65:2)

2. So daisaras te sichioas anda le manglimata le Pavelosche?

² Daisaras te das duma le Iehovasa anda sea so si amen po ilo tha, si importanto te das duma lesa ando manglimos vi anda le coaver. O apostolo Pavel cărdea cadai buchi. Sar exemplo, vo scriisardea la congregațiache anda Efes: ‘Anav manghe amintea tumendar sea o timpo ande mânre manglimata’. (Ef. 1:16) Tha vo ci manglea-pe numai anda grupuri manușenghe tha vi anda fiesavo jeno po anav. Sar exemplo, vo phendea le Timoteiosche: „Mulțumisarav le Devlesche . . . hai ghies hai riat anav manghe amintea tutar sea o timpo ande mânre manglimata”. (2 Tim. 1:3) Cadea sar jianas, le Pavelos sas-les but pharimata anda save daștilas te manghel-pe le Iehovasche. (2 Cor. 11:23; 12:7, 8) Tha, vo cărdea pesche timpo te manghel-pe vi anda aver.

3. Sostar daștil-pe că bâstras te mangas amen anda aver?

³ Poiechdata bâstras te mangas amen anda aver. Sostar? Iech phei cai bușiol Sabrinaa phenel: „Ande cadai lumea, o timpo nachel sigo. Daștil-pe că gândisaras amen cadea de but ca amare pharimata, că mangas amen numai anda amende”. Întâmplosardea-pe vi tuche cadaia? Dacă da, cado articolo va ajutila tut. Va avela te dichas: 1) sostar si importanto te mangas amen anda aver hai 2) sar daisaras te cheras cadaia.

SOSTAR SI IMPORTANTO TE MANGAS AMEN ANDA AVER?

4, 5. Sostar le manglimata anda aver silen „baro zuralimos”? (Iacov 5:16)

⁴ Le manglimata anda aver silen „baro zuralimos”. (Citisar Iacov 5:16.) Daștil-pe că pușias amen dacă amare manglimata daștin te paruven i situația varecaschi. Sar te na! Anda codoia că o Isus jianglea că o Petru avelas te phenel că ci prinjianel-les, o Isus phendea lesche: „Me manglem man but anda tute, te na covliol chio pachiamos”. (Luca 22:32) Vi o Pavel jianglea că le manglimata daștin te paruven i situația varecaschi. Cana sas-lo phandado andi Roma, vo scriisardea le Filimonosche: „Ajucărav ca prin tumare manglimata, te avav dino parpale tumenghe”. (Filim. 22) Hai chiar cadea întâmplosardea-pe. Pa țâra timpo o Pavel sas-lo dino drom anda o phandaimos hai daisardea te jial pale andi predicarea.

⁵ Tha, cana mangas amen ci trebul te ajucăras ca o Iehova te cherel so phendeam lesche amen. Vo dichel chichi de but camen lesche manușa iech buchi hai poiechdata alosarel te cherel so manghen von lestar. Cana jianas cadaia, daisaras te mangas amen anda sea o ilo le Iehovasche hai pala codoia pherde pachiamos te mechas le buchia ande lesche vasta. (Ps. 37:5; 2 Cor. 1:11)

6. So miștimata si amen cana mangas amen anda aver? (1 Petru 3:8)

⁶ Le manglimata cai phenas-len anda aver ajutin amen te sicavas lenghe „mila”. (Citisar 1 Petru 3:8.) Cana si amenghe mila averendar na numai că dichas le pharimata prin save nachen, tha vi camas te ajutisaras-len. (Mar. 1:40, 41) O Michael, iech phuro de congregație, phenel: „Cana dav duma le Iehovasa anda le pharimata prin save nachen le phrala, hachiarav mai mișto sar simțon-pe hai cadaia ajutil man te iubiv-len mai but. Daștil-pe că le phrala ci jianen că mangav man anda lende, tha prin cadal manglimata pașioav mai but lendar”. Iech phuro cai bușiol Richard phenel vi aver miștimos cai si amen cana mangas amen anda aver: „Cana phenas le Iehovasche prin so pharimata nachen aver, camas vi mai but te ajutisaras-len”. Vo mai phenel: „Cana ajutisaras-len si sar cana o Iehova del răspunso ca o manglimos cai phendeam-les anda lende”.

7. Sar ajutin amen le manglimata cărde anda aver te na gândisaras amen numai ca amare pharimata? (Filipeni 2:3, 4) (Dich vi le imagini.)

⁷ Le manglimata cărde anda aver ajutin amen te dichas amare pharimata cadea sar trebul. (Citisar Filipeni 2:3, 4.) Fiesavo mașcar amende nachel prin pharimata, anda codoia că traisaras ande iech lumea cai si tela o vast le Benghesco. (1 Ioan 5:19; Rev. 12:12) Cana mangas amen sea o timpo anda le coaver, anas amenghe amintea că „sea le phrala andai lumea nachen prin sea codola ducha”. (1 Pet. 5:9) Iech pioniera cai bușiol Katherine phenel: „Cana mangav man anda aver, anav manghe amintea că ci som i corcori cai nachel prin pharimata. Cadaia ajutil man te na gândiv man prea but mande”.

LE PHRALEN SILEN NEVOIA TE MANGAS AMEN ANDA LENDE

8. Anda caste daisaras te mangas amen?

⁸ Anda caste daisaras te mangas amen? Daisaras te mangas amen anda grupuri manușenghe. Sar exemplo, anda codola cai sile nasfale sau anda amare phrala cai si lenghe pharo anda codoia că phurile. Sau anda le tărne cai sile prasade hai lenghe colegi cathar i școala athaven-len te cheren vareso nasul. Bute phralenghe na-i lenghe ușoro anda codoia că lenghi familia sau le guvernea așen lenghe contra. (Mat. 10:18, 36; Fap. 12:5) Chichiva chiar trebuisarde te nașen chăral anda codoia că code cai beșen von si marimata. Aver sile duchade anda le dezastrea naturalo. Chiar cana ci prinjianas cadale phralen, cana mangas amen anda lende sicavas că las amen pala so phendea o Isus, te ‘iubisaras amen iech averes’. (Ioan 13:34)

9. Sostar trebul te mangas amen anda codola cai sile angla amende hai anda lenghe rromnia?

⁹ Camas te mangas amen vi anda codola cai sile angla amende. Sar exemplo, daisaras te mangas amen anda le phrala anda o Corpo de Guvernare hai anda lenghe asistenți, anda le phrala cathar le comitetea andai filiala, anda le phrala cai len sama cathar le departamentea anda o Betelo, anda le phrala cai vizitin le congregații, anda le phure hai anda le slujitori cai ajutin le phuren. Chiar cana but anda lende nachen prin pharimata, von cheren vi mai dur phares buchi anda amende. (2 Cor. 12:15) Sar exemplo, iech phral cai vizitil le congregații cai bușiol Mark phenel: „Anda mande si pharo te jianav că som dur mânre dadestar hai deiatar, cai sile phure hai nasfale. Chiar cana mânri phei hai mânro cumnato len sama lendar, duchal man te jianav că me ci daștiv te cherav mai but anda lende”. Daștil-pe că ci jianas sea le pharimata prin save nachen amare phrala cai cheren phares buchi, tha si importanto te mangas amen anda lende. (1 Tes. 5:12, 13) Sa cadea, camas te mangas amen vi anda lenghe rromnia cai ajutin anda sea o ilo penghe rromen caște cheren mai dur buchi anda i congregația.

10, 11. Ciaion le Iehovas le manglimata cai phenas-len anda mai but phrala hai pheia? Explichin.

¹⁰ Cadea sar dichleam, daisaras te mangas amen anda grupuri phralenghe hai pheianghe. Sar exemplo, chiar cana ci gândisaras amen ca iech phral sau phei, daisaras te mangas le Iehovas te ajutil codolen phandade anda pengo pachiamos sau te machel o ilo codolengo cai hasarde varecas ando merimos. Iech phuro cai bușiol Donald phenel: „Si cadichi de but phrala cai nachen prin pharimata, că poiechdata cheras iech baro manglimos anda savore cai sile duchade”.

¹¹ Tha ciaion le Iehovas cadal manglimata? Sar te na! Amen ci jianas prin so pharimata nachen sea amare phrala hai so trebun-len. Cadea că, si șucar te mangas amen anda savore hai te gândisaras amen ca chichiva grupuri phralenghe hai pheianghe. (Ioan 17:20; Ef. 6:18) Cadal manglimata sicaven că ‘iubisaras sea le phralen’. (1 Pet. 2:17)

CANA MANGAS AMEN ANDA FIESAVO JENO PO ANAV

12. Sostar cana sam atento daisaras te mangas amen mai but anda amare phrala?

¹² Av iech manuș atento. Si șucar te mangas amen anda grupuri phralenghe hai pheianghe, tha si importanto te mangas amen vi anda fiesavo jeno po anav. Si ande chi congregația varecon cai siles iech pharo nasfalimos sau iech tărno cai silo perado anda codoia că lesche colegi cathar i școala camen te athaven-les te cherel vareso nasul? Sau si tut andi congregația iech dad sau dei cai sile corcore hai si lenghe pharo te bariaren penghe șiaven „cadea sar camel o Iehova pala lesco sicaimos”? (Ef. 6:4) Dacă san iech manuș atento, va avela te iubis mai but cadale phralen hai cadaia va cherela tut te manghes tut anda lende.b (Rom. 12:15)

13. Sar daisaras te mangas amen anda codola cai ci prinjianas-len?

¹³ Phen lengo anav cana manghes tut. Daisaras te mangas amen anda aver, chiar cana ci prinjianas-len. Sar exemplo, chichiva phrala sile phandade anda pengo pachiamos andi Crimeea, Eritreea, Rusia, Singapore, tha vi ande aver thana la phuveache. Po site-o jw.org, arachas le anava cadale phralenghe.c Iech phral cai vizitil le congregații cai bușiol Brian phenel: „Cana citiv anda iech phral cai si phandado anda pesco pachiamos scriiv manghe lesco anav hai phenav-les voceasa zurali. Cadea, anav manghe mai ușoro amintea lesche anavestar cana mangav man”.

14, 15. Sar daisaras te mangas amen anda le buchia cai si nevoia le phralen?

¹⁴ Cana manghes tut gândisar tut so si nevoia le phralen. O Michael, anda savo dea-pe duma mai anglal, phenel: „Cana citiv prin so nachen amare phrala cai sile ando phandaimos, gândisarav man sar avelas te simțosarav man me ande lengo than. Jianav ciaces că avelas te gândiv man but mânra rromniate hai avelas te camav te jianav că si mișto. Cadai buchi ajutil man te mangav man anda le buchia cai si nevoia le phralen phandade cai sile căsătorime”. (Evr. 13:3)

¹⁵ Cana gândisaras amen sar si i viața amare phralenghi phandade daisaras te arachas neve buchia anda save te mangas amen anda lende. Sar exemplo, daisaras te mangas amen ca le gardieni te phiraven-pe lașimasa lența sau codola cai silen autoritatea te mechen amare phralen te anen închinarea le Iehovasche. (1 Tim. 2:1, 2) Daisaras te mangas amen anda i congregația anda savi si o phral phandado, ca le phrala de cothar te aven zuriarde prin lesco exemplo. Sa cadea, daisaras te mangas amen ca codola cai nai-le Martori te dichen lesco șucar phiraimos hai te camen te așunen so phenel i Biblia. (1 Pet. 2:12) Daisaras te cheras sa cadea vi cana mangas amen anda le phrala hai pheia cai nachen prin aver pharimata. Dacă sam manușa atento, phenas o anav le phralengo ande amare manglimata hai gândisaras amen ca so silen nevoia, daisaras te sicavas „iech bari iubirea iech caring aver”. (1 Tes. 3:12)

TE DICHAS LE MANGLIMATA CADEA SAR TREBUL

16. Sar daisaras te dichas le manglimata cadea sar trebul? (Matei 6:8)

¹⁶ Cadea sar dichleam, amare manglimata silen iech baro zuralimos hai daștin poiechdata te lașiaren le buchia. Cu sea cadala, si mișto te dichas le manglimata cadea sar trebul. Cana mangas amen ci phenas le Iehovasche varesco cai ci jianel. Hai ci trebul te phenas lesche amen sar te cherel le buchia. O Iehova jianel mișto so trebul lesche manușen, chiar angla ca von te jianen. (Citisar Matei 6:8.) Atunci sostar trebul te mai mangas amen anda aver? Prin amare manglimata sicavas chichi de but iubisaras le coaveren. I iubirea zuriarel amen te mangas amen iech anda aver, hai o Iehova bucuril-pe te dichel că lesche manușa len-pe pala leschi iubirea.

17, 18. Phenen iech exemplo cai sicavel sostar mangas amen anda aver.

¹⁷ Chiar cana fal-pe că amare manglimata ci paruven chanci, von sicaven i iubirea cai si amen caring amare phrala hai pheia. Le Iehovasco ilo bariol cana mangas amen anda aver. Caște hachiaras mai mișto cadaia, te gândisaras amen ca iech exemplo. Te phenas că iecha familia sila dui șiave, iech șiavo hai șei. Ande iech ghies, o șiavo si nasfalo hai i șeiorri phenel pesche dadesche te lel sama lache phralestar. O dad iubil pesche șiaves, lel sama lestar hai jianel sar te cherel sea le buchia. Cu sea cadala, cana așunel pesca șeia că phenel cadaia, lesco ilo bariol, anda codoia că cadaia sicavel chichi de but iubil voi pesche phrales.

¹⁸ Cadai buchi manghel vi o Iehova amendar: te iubisaras ciaces amare phralen hai te mangas amen anda lende. O Iehova si bucurime cana dichel că gândisaras amen averende hai cana dichel chichi de bari si amari iubirea anda le coaver. (2 Tes. 1:3; Evr. 6:10) Mai but, cadea sar dichleam, amare manglimata daștin te ajutin varecas ciaces. Cadea că, te na bâstras niciechdata te mangas amen anda aver!