Dui neve phrala ando Corpo de Guvernare

ANDE 5 OCTOMBRIA 2024, ca i întrunirea anualo, sas cărdo iech anunțo specialo: le phrala Jody Jedele hai Jacob Rumph sas alosarde te cheren partea anda o Corpo de Guvernare le Martorengo le Iehovasche. Le dui slujin loialo le Iehovasche de but bărșa.

O phral Jedele năștisailo ando Missouri (SUA), ande iech familia Martorenghi. Von beșenas ande iech than cai sas țâra Martori. Anda codoia, daisardea te prinjianel bute phralen hai pheian anda diferime thana cai avenas code, te ajutin andi predicarea. I iubirea hai i unitatea cai dichlea-len ando poporo le Iehovasco zuriardea-les but. Boldea-pe cana sas tărno șiavo, ande 15 octombria 1983. Ciaiolas-les but i predicarea, hai pala so terminisardea o liceo, astardea o pionierato regularo, andi septembria 1989.

Cana o phral Jedele hai leschi phei sas-le țâne, lengo dad hai lenghi dei îngărenas-len te dichen o Betelo. Cadaia zuriardea le șiaven te camen te slujin co Betelo. Hai cana barile chiar cadaia cărde vi le dui. O phral Jedele astardea te cherel buchi co Betelo anda o Wallkill andi septembria 1990. Mai anglal cărdea buchi co ujimos hai pala codoia co Departamento andal servicii medicalo.

Ande codo timpo, sas bari nevoia andel congregații andai șib spaniolo, pașa o Wallkill. O Jedele muchisailea ande iech anda cadal congregații hai astardea te sichiol i șib spaniolo. Pala țâra timpo, prinjiandea iecha pheia cai bușiolas Damaris, iech pioniera anda leschi circumscripția. Pala iech timpo line-pe, hai avilea vi voi ando Betelo.

Ande 2005, von tiliarde anda o Betelo, caște len sama penghe dadendar hai deiandar, cai slujinas loialo le Iehovasche. Tha, von cărde vi mai dur sea so daisarde andi buchi le Iehovaschi hai slujisarde sar pionieri regulari. O phral Jedele sas instructoro ca le Școli anda le Pionieri hai slujisardea ande iech Comiteto anda le spitalea hai ando Comiteto regionalo andal construcții.

Ande 2013, o phral hai i phei Jedele sas-le acharde pale co Betelo, anda o proiecto andal construcții cathar o Warwick. Pala codoia, slujisarde co Patterson hai co Wallkill. O phral Jedele slujisardea ando Departamento localo andal proiectea hai construcții hai cărdea buchi ca le informații sanitaro. Andi martia 2023, astardea te slujil sar asistento ando Comiteto anda o servicio. Cana gândil-pe ca le but repartiții cai sas-les, o phral phenel: „Cana o Iehova del tut iech nevi buchi te cheres, daștil-pe că simțos tut perado. Tha, ande codol momentea ci trebul te bâstres te șios chio pachiamos ando Iehova, anda codoia că vo daștil te ajutil tut te cheres oriso trebul”.

O phral Rumph năștisailo andi California (SUA). Leschi dei sas Martora, tha ci jialas andi predicarea hai ca le întruniri. Cu sea cadala, sicadea-les chichiva ciacimata andai Biblia. Cana sas țâno, o phral Rumph jialas ande fiesavo bărș te dichel pesca mamia, cai slujilas loialo le Iehovasche. Voi ajutisardea-les te camel te jianel mai buchia andai Biblia hai cana sas-les 13 bărșa astardea te sichiol andai Biblia. Ande 27 septembria 1992, cana sas-lo tărno șiavo, boldea-pe. Pala codoia, leschi dei astardea te jial pale andi predicarea hai ca le întruniri hai sea leschi familia boldea-pe.

De cana sas tărno șiavo, o phral Rumph dichlea chichi de fericime sas le pionieri. Anda codoia, pala so terminisardea o liceo, astardea vi vo o pionierato regularo, andi septembria 1995. Ande 2000, muchisailo ando Ecuador caște slujil cai sas mai bari nevoia. Code prinjiandea la pheia Inga, iech pioniera andai Canada hai pala iech timpo line-pe. Slujisarde ande iech than ande iech foro anda o Ecuador hai ajutisarde ande iech țâni grupa. Cadai grupa barilea hai arăslea iech șucar congregația.

Ande cadal bărșa, o phral hai i phei Rumph slujisarde sar pionieri speciali hai vo slujiisardea vi sar phral cai vizitil le congregații. Ande 2011, sas-le acharde ca i 132-to clasa anda i Școla Galaad. Pala so terminisarde i școala, sas-le bișalde ande diferime thana la phuveache hai cărde diferime buchia anda o Iehova. Sar avelas, von slujiisarde co Betelo, sar misionari hai vo sas-lo vi phral cai vizitil le congregații. Sa cadea, o phral Rumph slujisardea vi sar instructoro ca i Școala andal Evanghelizatori le Regatosche.

Cana avilea i pandemia anda COVID-19, o phral hai i phei Rumph risaile parpale andel Statele Unite. Von sas-le acharde co Betelo anda Wallkill, code o phral Rumph sas-lo sicado te cherel buchi co Departamento anda o servicio. Pala iech timpo, sas-le bișalde pale ando Ecuador hai code o phral Rumph slujiisardea ando Comiteto la filialaco. Ande 2023, muchisaile co Betelo anda Warwick, hai andi ianuaria 2024, o phral Rumph sas-lo alosardo te slujil sar asistento anda o Comiteto anda o servicio. Cana gândil-pe ca le but repartiții cai sas-les, vo phenel: „Sichilem că na o than ande savo slujis cherel șucar chi buchi, tha le manușa savența cheres buchi”.

Anda amende si sumnacuni i phari buchi cadale phralenghi hai ‘dichas cuci cadale murșen’. (Filip. 2:29)