Le phrala phure ajutin bute buchianța andi congregația

Daștil-pe că ci mai si tut zor te cheres cadea de but sar cana sanas tărno. Hai daștil-pe că chiar cana jianes că san loialo le Iehovasche de but bărșa, cana gândis tut că ci mai daștis te cheres sea so cărdean anda leste cana sanas tărno, simțos tut perado. So daștil te ajutil tut te așes bucurime?

SO AJUCĂREL TUTAR O IEHOVA?

Puș tut: „So ajucărel mandar o Iehova?”. O verseto anda Deuteronomo 6:5 daștil te zuriarel tut but. Code phenel-pe: „Te iubis le Iehovas, chio Del, sea che ileia, sea che sufletoia hai sea che zuralimaia”.

Cadea că, cado verseto sicavel că o Iehova camel te des-les sea so si tut mai lașio. Cadaia daștil te ajutil tut te na comparis so cheres acana sosa cheren aver sau sosa cărdean cana sanas mai tărno.

Cana sanas mai tărno daștil-pe că cărdean anda o Iehova sea so daisardean pala o zuralimos cai sas tut. Tha acana chi situația parudea-pe, hai cheres vi mai dur sea so daștis, pala chio zuralimos. Cana gândis tut cadala buchiate, va avela te hachiares că acana des le Iehovas so dean-les vi mai anglal. Dean-les so sas tut mai lașio hai vi acana des-les so si tut mai lașio.

SO SICHILEAN ANDE CHI VIAȚA DAȘTIL TE AJUTIL LE COAVEREN

Ando than te gândis tut ca so ci mai daștis te cheres, mai mișto gândisar tut ca sea le but buchia ande save daștis te ajutis le coaveren anda codoia că san mai phuro. Acana că san mai phuro, daștis te cheres chichiva buchia cai ci daisardean te cheres-len cana sanas tărno. Te dichas chichiva anda lende:

Phen averenghe so sichilean ande chi viața. Gândisar tut ca so phenel-pe andi Biblia ande cadal versetea:

O rege David: „Somas tărno hai phurilem, tha ci dichlem niciechdata ca o Del te mechel codoles orta, nici lesche șiaven te manghen pengo manro averendar”. (Ps. 37:25)

O Iosua: „Acana ita! Pa țâra timpo va avela te merav. Tumen jianen mișto anda sea tumaro ilo hai anda sea tumaro ghi că niciech cuvânto anda sea le lașe promisiuni cai cărdea-le tumenghe o Iehova, tumaro Del, ci așilea bi te pherdiol-pe. Sea pherdile. Niciech anda lende ci așilea bi te pherdiol-pe”. (Ios. 23:14)

Daștil-pe că vi tu phendean dumes sar cadala cana sanas mai tărno, caște zuriares le coaveren. Cu sea cadala, anda codoia că o David hai o Iosua traisarde cadal buchia pe penghi morci, len sas-len vi mai but sostar te phenen cadal dumes.

Cana slujis de mai but timpo le Iehovasche, vi tu daștis te phenes sar dichlean lesco vast ande chi viața sau andi viața avere phralenghi. Anes tuche amintea iech momento ande savo o Iehova ajutisardea pesche manușen ande iech modo specialo? Sostar te na phenes cadal șucar experiențe che phralenghe hai pheianghe andai congregația? Daștil-pe că dichlean vi tu, că cadal buchia daștin te zuriaren but le phralen. Cadea că, cana aver așunen chi experiența andi buchi le Iehovaschi, cadaia daștil te vazdel-len but. (Rom. 1:11, 12)

Iech aver buchi prin savi daștis te zuriares le coaveren, si te jias ca i sala le Regatoschi de fiesavi data cana daștis. Cadea va avela te zuriares vi tut, hai vi che phralen hai pheian. I Connie, anda savi deam duma mai anglal phenel: „Le întruniri ajutin man te na hasarav mânri bucuria. Sar daștiv te avav peradi cana si manghe sicadi cadea de but iubirea ca i sala le Regatoschi? Ciaiol man te sicavav mânri recunoștiința andal coaver hai cherav lenghe țâne cadouri. Mai but, dav mânri zor te jiav ca le întruniri hai andi predicarea mânre phralența hai pheianța”.

O IEHOVA DICHEL CUCI SEA SO CHERES ANDA LESTE

Andi Biblia del-pe duma anda but manușa cai o Iehova iubisardea-len, chiar cana ci mai daisarde te cheren cadea de but sar camenas von. Te gândisaras amen co Simeon, iech slujitoro israelito phuro, cai traisardea ando timpo cana năștisailo o Isus. Cana avelas co templo, o Simeon daștil-pe că dichelas le israelițen mai tărne cai cherenas buchia importanto code. Sar daștil-pe că simțolas-pe cado phuro slujitoro le Iehovasco? Daștil-pe că o Simeon pachiaia că ci mai sas cadea de lașio andel iacha le Iehovasche, anda codoia că ci mai daștilas te cherel but anda leste. Tha o Iehova ci dichel cadea le buchia! Vo dichelas le Simeonos sar ‘iech manuș bi doșaco cai pachialas zurales ando Del’. Vo binecuvântisardea-les hai dea-les i bari pachiv te dichel le șiavorres Isus. O Iehova chiar folosisardea le Simeonos caște phenel de mai anglal că o Isus avelas te avel o Mesia! (Luca 2:25-35) O Iehova dichlea mai but sar o corpo phuro le Simeonosco. Vo dichlea iech manuș cai sas-les iech pachiamos zuralo. I Biblia phenel că „o spirito sfânto sas-lo opral leste”.

Vi tu daștis te pachias anda sea o ilo că o Iehova dichel cuci i buchi cai cheres-la anda leste, chiar cana ci daștis te cheres sea so cames. Anda o Iehova chi phari buchi ‘si zurales cuci . . . anda codoia că vo ajucărel ca iech jeno te del pala so siles, na pala so nai-les’. (2 Cor. 8:12)

Cadea că, gândisar tut so daștis te cheres. Sar exemplo, daștis te cheres buchia diferime andi predicarea, chiar cana ci daștis te jias but timpo. Sau daștis te zuriares averen cana des lenghe iech telefono sau scriis lenghe iech lilorro. Le țâne buchia pherde iubirea cai cheres-len anda che phrala hai pheia, daștin te zuriaren-len vi mai but cana aven varecastar cadea sar san tu, cai slujil de but bărșa le Iehovasche.

Chiar cana chio sastimos ci mai mechel tut te cheres sea so cames, daștis vi mai dur te des sea so si tut mai lașio le Iehovasche hai te araches bucuria andi predicarea. I experiența iecha pheiachi andai Africa de Est, cai arachas-la ando chenarii „Salvisardea lachi viața”, sicavel cadai buchi.

Na bâstăr că i loialitatea hai o pachiamos cai sicadean-les ande chi viața daștil te zuriarel le coaveren. San iech șucar exemplo anda codoia că ci mechlean tut hai daștis te pachias ciaces ‘că o Del na-i neorta caște bâstrel chi buchi hai i iubirea cai sicadean-la anda lesco anav cana slujisardean mai dur codolenghe sfinți’. (Evr. 6:10)

CHER SEA SO DAȘTIS CAȘTE AJUTIS LE COAVEREN

Le studii sicaven că but manușa phure silen iech sastimos mai lașio, iech goghi mai lași hai train mai but cana ajutin averen.

Si ciaces, le lașe buchia cai cheras-len anda aver ci daștin te cheren amen te na mai phurioas. Numai o Iehova daștil te cherel cadaia. Prin pesco Regato, vo va chosela o păcato cai anel o phurimos hai o merimos. (Rom. 5:12)

Tha vi acana, i buchi cai cheres-la anda o Iehova hai cana ajutis averen te prinjianen-les, zuriarel chi speranța hai cherel mișto vi che sastimasche. Gule phralale hai pheiale phure, o Iehova dichel cuci sea so cheren anda leste, hai vi i congregația dichel cuci tumaro șucar exemplo pachiamasco!