Sostar sas nevoia ca o Iehova te del pesche Șiaves anda amende?

1, 2. Sostar si amen nevoia varecastar cai te salvil amen? (Romani 7:22-24) (Dich vi i imaginea.)

GÂNDISAREN tumen că: Iech baro chăr perel hai iech manuș silo astardo andre tela le barra. Vo trail, tha ci daștil te înclel corcoro cothar. Sea so daștil te cherel si te del cingar ca varecon te ajutil-les hai te ajucărel te avel încalado de othar.

² Fiesavo mașcar amende silo ande iech situația cai ameal cadalasa. Cana o Adam ci așundea le Devlestar, arăslea te păcătuil. Anda codoia că savore țârdas amen anda leste, vi amen sam păcătoși. Sea le manușa sile astarde cathar o păcato cadea sar o manuș anda o exemplo silo astardo tela le barra. Cadea sar codo manuș, vi amen si amen nevoia varecastar cai te încalavel amen anda o păcato. Ande pesco lil caring le romani o apostolo Pavel phendea sar simțosaras amen anda codoia că sam păcătoși. (Citisar Romani 7:22-24.) Vo pușlea con va salvila-les anda leschi situația. O Pavel sas „[astardo] tela i legea le păcatoschi” cai avel le Adamostar hai anel o merimos. (Rom. 6:23) Vi amen sam ande sa codoi situația phari. Si amen nevoia varecastar cai te salvil amen le păcatostar hai le merimastar.

3. Sar daștil te salvil amen i răscumpărarea?

³ O Pavel phendea că amari situația ci si bi speranțaco. Pala so pușlea: „Con va scăpila man catar cado corpo cai îngărel man co merimos?”, o Pavel del răspunso: „Mulțumisarav le Devlesche prin o Isus Cristos, amaro Rai!”. (Rom. 7:25) O Pavel camlea te phenel că o Iehova salvisardea amen prin o merimos le Isusosco. Anda codoia că o Iehova dea pesche Șiaves anda amende: 1) Vo daștil te iertil amare păcatea, 2) si amen i speranța te avas perfecți ando viitorii hai 3) daisaras te avel amen iech amalimos chidino le Iehovasa. Va avela te dichas mai but anda cadal buchia ande cado articolo. Hai pachias anda sea o ilo că cadal sicaimata va ajutina amen te iubisaras vi mai but le Iehovas, „o Del cai del speranța”. (Rom. 15:13) Sa cadea, va avela te dichas vi mai cuci le Isusos cai „prin savo sam hastrame hai amare păcatea sile iertime prin răscumpărarea”. (Col. 1:14)

PRIN O MERIMOS LE ISUSOSCO O IEHOVA DAȘTIL TE IERTIL AMARE PĂCATEA

4, 5. Sostar si amen nevoia savoren cathar i jertfa le Isusoschi? (Eclesiasto 7:20)

⁴ Anda codoia că savore sam imperfecți hai păcătuisaras, si amen nevoia cathar i jertfa le Isusoschi caște avas iertime. (Citisar Eclesiasto 7:20.) Chichiva păcatea sile mai bare. Sar exemplo, i Legea mozaico phenelas că cana iech israelito sovelas varecasa cai ci sas laco rrom sau leschi rromni sau mudarelas varecas, vo trebulas te avel mudardo. (Lev. 20:10; Num. 35:30, 31) But păcatea nai cadea de bare, tha sile sa păcatea. Sar exemplo, o psalmisto David phendea: „Va avela te lav sama sar phirav caște na păcătuisarav mânra șibaia”. (Ps. 39:1) Cadaia sicavel că vi prin so phenas daisaras te cheras iech păcato. (Iac. 3:2)

⁵ Daștil-pe că gândis tut ca chichiva buchia cai cărdean-len sau phendean-len ando trecuto. Phendean vroiechdata vareso cai ci camlean te phenes? Sau cărdean buchia cai fal tut nasul anda lende? Savore phendeam hai cărdeam buchia cai ci trebulas te cheras-len. I Biblia phenel: ‘Dacă phenas: «N-ai amen păcato», athavas amen corcore hai o ciacimos na-i ande amende’. (1 Ioan 1:8)

6, 7. Sostar daștil o Iehova te iertil amare păcatea? (Dich vi i imaginea.)

⁶ Caște iertil amare păcatea, o Iehova bișaldea le Isusos te merel anda amende. (Ef. 1:7) Tha cadaia ci însemnol că le Iehovas ci duchal-les dacă păcătuisaras. Anda o Iehova, o păcato na-i iech țâni buchi. (Is. 59:2) Anda codoia că le Iehovas siles iech baro ortomos, vo trebuisardea te cherel vareso caște daștil te iertil amare păcatea pe ciacimaste.

⁷ I Legea mozaico manghelas ca le israeliți te anen jertfe animalea caște aven iertime lenghe păcatea. (Lev. 4:27-31; 17:11) Cadal jertfe sicavenas că sas amen nevoia iecha jertfatar mai bari. O merimos le Isusosco sas i jertfa cai avelas te anel le mai bare miștimata le manușenghe. Numai prin o merimos le Isusosco o Iehova daștilas te iertil amare păcatea. O Pavel hachiardea so miștimata anelas i jertfa le Isusoschi le manușenghe. Cana scriisardea le phralenghe anda o Corint, vo phendea le buchia nasul cai von cărde-len mai anglal hai pala codoia phendea lenghe: „Tha sanas halade, sanas sfințome, sanas arachle orta ando anav le Raiesco Isus Cristos hai prin o spirito amare Devlesco”. (1 Cor. 6:9-11)

8. Ca so daștis te gândis tut angla te jias ca i Comemorare anda cado bărș?

⁸ Angla te jias ca i Comemorarea ande cado bărș, cher tuche timpo te gândis tut so însemnol i iertarea le Iehovaschi anda tute. Sar exemplo, anda codoia că o Iehova dea pesche Șiaves anda amende, ci mai trebul te simțos tut doșalo anda le păcatea cai cărdea-len mai anglal hai cai sicadean că fal tut nasul anda lende. Tha so daștis te cheres dacă si tuche pharo te pachias că o Iehova iertisardea tut? Daștil-pe că phendean tuche: „Hachiarav că o Iehova daștil te iertil man, tha me ci daștiv te iertiv man”. Cu sea cadala, an tuche amintea că o Iehova si codo cai iertil amen, hai vo mechlea pesche Șiaves te judechil amen. O Iehova ci dea nici tut, nici avere manușes i buchi te alosarel con va avela iertime Lestar hai con nici. I Biblia phenel: „Dacă phiras andi lumina, cadea sar vi [o Iehova] silo andi lumina, . . . o rat le Isusosco, lesco Șiav, ujiarel amen catar orisavo păcato”. (1 Ioan 1:6, 7) Daisaras te pachias anda sea o ilo cado sicaimos, cadea sar pachias orisavo sicaimos andai Biblia. I jertfa le Isusoschi, cărdea posibilo ca o Iehova te iertil amen, hai ande pesco Lil vo phenel că si ‘gata te iertil’. (Ps. 86:5)

PRIN O MERIMOS LE ISUSCO SI AMEN I SPERANȚA TE AVAS PERFECȚI

9. So însemnol i duma „păcato” andi Biblia? (Psalmo 51:5)

⁹ Andi Biblia, i duma „păcato” ci însemnol numai că varecon cherel iech buchi nasul tha camel te sicavel vi i imperfecțiunea cai si amen de cana năștisaras amen. (Citisar Psalmo 51:5.) Anda codoia că sam imperfecto, poiechdata gândisaras hai phenas buchia nasul. Tha vi amaro corpo ci daștil te avel cadea sar cărdea-les o Iehova hai peras nasfale, phurioas hai meras. Cadaia ajutil amen te hachiaras sostar vi le șiavorre, chiar cana ci cărde chanci nasul, daștin te peren nasfale hai chiar vi te meren. Sa cadea, hachiaras vi mai but sostar sea le manușa, vi codola lașe hai vi codola nasul, nachen prin pharimata hai meren. Anda codoia că o Adam păcătuisardea savore arăsleam te avas păcătoși.

10. Sar simțosarde-pe o Adam hai i Eva pala so păcătuisarde?

¹⁰ Te gândisaras amen sar simțosarde-pe o Adam hai i Eva pala so păcătuisarde hai arăsle imperfecți. O păcato cărdea te avel-len iech baro pharimos ando ilo. Ca țâra timpo pala so păcătuisarde, o Adam hai i Eva astarde te simțon-pe nasul anda codoia că ci așunde cathar so phendea lenghe o Iehova. (Rom. 2:15) De iechdata simțosarde-pe zurales diferime. Simțosarde că trebun te hureaven-pe hai te garaven-pe Codolestar cai cărdea-len, sar garaven-pe le manușa nasul. (Gen. 3:7, 8) Sas i iechto data cana o Adam hai i Eva simțosarde-pe doșale, lajiavune hai darade. Hai von îngărde cado pharimos ande pengo ilo sea lenghi viața. (Gen. 3:16-19)

11. Sar simțosaras amen anda codoia că sam imperfecți?

¹¹ Anda codoia că savore sam imperfecți, vi amen simțosaras amen poiechdata doșale, lajiavune hai darade. Amari imperfecțiunea anel amenghe but pharimata hai duch. Orichichi camas te lașiaras amari viața hai te na aven amen pharimata, sea o timpo va avena buchia cai ci daisaras te lașiaras-len corcore. Sostar? Anda codoia că i Biblia phenel că de cana o Adam hai i Eva păcătuisarde, le manușen va avela-len sea o timpo pharimata. (Rom. 8:20) Cadai buchi ci simțosaras-la numai amen corcore, tha simțon-la sea le manușa. Sar exemplo, but manușa aghies camen te len sama la phuveatar, te na mai aven marimata, te na mai avel ciorâmos hai te anen i pacea. Chiar cana von lașiarde chichiva buchia, ci daisarde te chosen cadal pharimata. Tha, prin i jertfa le Isusoschi si amen iech ciaci speranța. Savi si cadaia?

12. So speranța si amen anda codoia că o Isus mulea anda amende?

¹² Anda codoia că o Isus mulea anda amende si amen i speranța că sea i creația „va avela scăpime anda i sclavia le rimosarimaschi”. (Rom. 8:21) Cadaia însemnol că pala so va avela te avas perfecți ando paradiso, ci va mai avela te peras nasfale sau te avas duchade. Ci va mai avela te simțosaras amen niciechdata doșale, lajiavune sau darade. Sea le eforturi cai va avela te cheras-len caște las sama la phuveatar hai te traisaras andi pacea, ci va avena de ivea, anda codoia că o Isus cai mulea anda amende va raila sar ‘o Prințo la paceaco’. (Is. 9:6, 7)

13. Ca so aver buchia daștis te gândis tut angla te jias ca i Comemorarea anda cado bărș?

¹³ Gândisar tut sar va avela chi viața cana ci va mai avela te aves imperfecto. Va avela te uștes ande fiesavo ghies hai va avela te simțos tut mișto, bi te daras că tu sau codola drago tuche va merena bochatar, va perena nasfale sau va merena. Chiar vi acana daștis te simțos pacea ando ilo cana gândis tut ca chi speranța anda o viitorii. (Evr. 6:18, 19) Cana gândis tut butivar ca chi speranța, chio pachiamos va avela mai zuralo hai ci va avela te meches tut cana naches prin pharimata. Daștis te pachias ciaces că o Iehova cărdiol „o pochinitorii codolengo cai roden-les anda sea o ilo”. (Evr. 11:6) Prin o merimos le Isusosco si amen iech ciaci speranța anda o viitorii hai cadai speranța machel amaro ilo vi aghies.

PRIN O MERIMOS LE ISUSOSCO DAISARAS TE AVEL AMEN IECH AMALIMOS CHIDINO LE IEHOVASA

14. Sar rimosardea o păcato amaro amalimos le Iehovasa hai sostar?

¹⁴ De cana o Adam hai i Eva păcătuisarde, le manușa ci mai daisarde te aven amala le Devlesa. I Biblia chiar phenel că le manușa arăsle dușmani le Devlesa. (Rom. 8:7, 8; Col. 1:21) Sostar? Anda codoia că o Iehova si perfecto hai vo ci daștil te dichel mișto o păcato. Anda o Iehova phenel-pe: ‘Che iacha sile prea uje caște diches so si nasul hai tu ci daștis te diches angla che iacha o nasulimos’. (Hab. 1:13) De cana le manușa arăsle imperfecți, lengo amalimos le Iehovasa rimosardea-pe. Niciech manuș ci daștilas te avel amal le Iehovasa bi te avel lașiardi cadai buchi. O merimos le Isusosco, lașiardea so sas rimosardo hai daisardeam te avas pale amala le Devlesa.

15. Sar daisarde le manușa prin o merimos le Isusosco te aven pale amala le Devlesa?

¹⁵ I Biblia phenel că o Isus ‘si iech jertfa anda amare păcatea caște daisaras te avas pale amala le Devlesa’. (1 Ioan 2:2) Sar daisarde le manușa prin o merimos le Isusosco te aven pale amala le Devlesa? Prin o merimos le Isusosco, o Iehova daisardea te încărel ca pesche norme ciace hai te cherel pacea le manușența. (Rom. 3:23-26) O Del chiar daisardea ‘te dichel orta’ pesche manușen cai traisarde angla te merel o Isus. (Gen. 15:1, 6.) Sostar? Anda codoia că o Iehova pachialas anda sea o ilo că lesco Șiavo, o Isus va dela peschi viața anda le manușa. (Is. 46:10) Prin o merimos le Isusosco le manușa daisarde te aven pale amala le Devlesa.

16. Ca so mai daștis te gândis tut ande le curche angla i Comemorarea? (Dich vi i imaginea.)

¹⁶ Gândisar tut chichi de lași si chi viața aghies, anda codoia că si tut iech amalimos chidino le Iehovasa. Sar exemplo, daștis te phenes le Iehovasche „Dade”, cadea sar sicadea amen o Isus. (Mat. 6:9) Aver data daștil-pe că phenes lesche „Amal”. Cana phenas le Iehovasche „Dade” sau „Amal”, trebul te cheras cadaia pherde umilința hai pachiv. Sostar? Anda codoia că sam imperfecți, ci daisaras te pașioas corcore le Devlestar. Tha, o Iehova dea pesche Șiaves anda amende hai cadea daisaras te pașioas lestar hai te avas andi pacea lesa. (Col. 1:19, 20) Cadea că, vi aghies daisaras te avel amen iech amalimos chidino le Iehovasa, chiar cana sam imperfecți.

O MERIMOS LE ISUSOSCO SICAVEL CĂ O IEHOVA IUBIL AMEN

17. Sar sicavel o merimos le Isusosco, chichi de but iubil amen o Iehova? (Efeseni 2:4, 5)

¹⁷ O merimos le Isusosco sicavel că o Iehova silo „barvalo andi mila”. Vo „cărdea amen jiuvinde . . . cana samas mule andel greșeli”. (Citisar Efeseni 2:4, 5.) Cadea sar iech manuș silo astardo tela le barra cana perel iech chăr hai ci daștil te înclel cothar corcoro, vi codola umili hachiaren că sile astarde le păcatostar hai ci daștin te salvin-pe corcore anda o păcato. (Fap. 13:48) O Iehova ajutil cadale manușen te așunen i vestea lași anda o Regato. Cadea von daștin te arăsăn te prinjianen le Iehovas hai lesche Șiaves, le Isusos. Cadaia ajutil-len te hachiaren că o merimos le Isusosco va salvila le manușen anda o păcato. (Ioan 17:3) Dacă o Satan pachiaia că o păcato le Adamosco hai la Evaco, avelas te așiavel le Devles te pherel pesco scopo, athadea-pe corcoro.

18. So ci trebul te bâstras cana gândisaras amen ca i jertfa le Isusoschi?

¹⁸ Cana gândisaras amen ca le miștimata cai anel-len amenghe i jertfa le Isusoschi, ci trebul te bâstras o mai baro motivo cai sas le Iehovas te cherel cadaia. O Iehova ci cărdea cadaia numai caște salvil amen. Prin i jertfa le Isusoschi, o Iehova sicadea că so phendea o Satan andi bar le Edenoschi sas iech hohaimos. (Gen. 3:1-5, 15) Sa prin cadai jertfa, o Iehova ujiarel pesco anav cathar sea le bare hohaimata cai sas phende anda Leste. Sa cadea, salvil amen cathar o păcato hai o merimos, hai sicavel că si iech Del pherdo iubirea. Hai, prin lesco baro lașimos, chiar cana sam păcătoși, o Iehova mechel amen te sicavas că so phendea o Satan anda Leste, si iech hohaimos. (Prov. 27:11) Sar daisaras te sicavas recunoștința le Iehovasche că dea pesche Șiaves anda amende? Va avela te dichas cadaia ando articolo cai avel.