Sar cheren-pe le buchia andi congregația

Le Iehovas placial-les ca sea le buchia te aven ca lengo than. (1 Corinteni 14:33) Anda codoia, ajucăras-ame ca vi ande lesco poporo le buchia te aven sa cadea. Sar cheren-pe le buchia andi congregația? So trebul te cherel fiesavo anda amende ca le buchia te jian mișto andi congregația?

1. Con si o șăro la congregațiaco?

„O Cristos si o șăro la congregațiaco.” (Efeseni 5:23) Andal ceruri, vo sicavel le poporos le Iehovasco pa sea i phuv sar te cherel i buchi cai sas lesche dini. O Isus alosardea „o sclavo fidelo hai prevăzătorii”, cai si iech țâno grupo phralența cai sile phure de congregație de but bărșa. Von mai sile prinjiande vi sar o Corpo de Guvernare. (Citisaren Matei 24:45-47.) O Corpo de Guvernare sicavel le congregațien pa sea i phuv, cadea sar cărde vi le apostoli hai le phure anda o iechto secolo anda o Ierusalimo. (Faptele 15:2) Tha cadal murșa ci sile mai opral sar amen. Von cheren cadea sar sicavel-le o Iehova prin lesco Cuvânto hai o Isus si lengo șăro.

2. Con si le phure de congregație hai so cheren von?

Le phure de congregație sile murșa zurale spiritualo cai sicaven le slujitoren le Iehovasche andai Biblia, ajutin-le hai zuriaren-le. Von ci sile pochinde anda i buchi cai cheren-la, tha von ‘camen te cheren cadaia angla o Del, na că iubin o câștigo neciacio, tha anda sea o ilo’. (1 Petru 5:1, 2) Le phure sile ajutime catar le slujitori auxiliari cai, pala iech timpo, daștin vi von te pheren le manglimata caște arăsăn phure de congregație.

O Corpo de Guvernare alosarel chichiva phure de congregație caște aven supraveghetori de circumscripție. Cadala jian andel congregații caște sicaven hai te zuriaren le phralen. Mai but, von alosaren phure hai slujitori auxiliari mașcar le phrala cai pheren le manglimata andal Scripturi. (1 Timotei 3:1-10, 12; Tit 1:5-9)

3. So trebul te cherel fiesavo Martoro?

Sea-l Martori anda congregația ‘așaren o anav le Iehovasco’ cana len partea ca le întruniri la congregațiache hai den duma le manușența anda o Del, fiesavo pala o zuralimos cai siles. (Citisaren Psalmo 148:12, 13.)

HACHIAR MAI MIȘTO

4. O Isus si iech lașio șăro la congregațiaco

O Isus acharel-ame peste anda sea o ilo. Citisaren Matei 11:28-30 hai pala codoia den duma:

• Sar camel o Isus te simțosaras-ame tela leschi conducerea?

MATERIALO VIDEO: Le phure sile gata te ajutin pala o izdraimos phuveaco anda o Nepal (4:56)

I Biblia phenel claro sar trebul te cheren le phure penghi buchi.

Citisaren Isaia 32:2 hai 1 Petru 5:1-3 hai pala codoia den duma:

• So si ande chio ilo cana jianes că le phure den penghi zor te zuriaren averen, cadea sar o Isus?

• Ande so aver buchia len-pe le phure pala o Isus?

5. Le phure sile iech lașio exemplo

MATERIALO VIDEO: Phure, aven iech lașio exemplo! (7:39)

Prin le buchia cai cărdea-le, o Isus sicadea codolenghe cai sile angla amende sar te phiraven-pe. Citisaren Matei 23:8-12 hai pala codoia den duma:

• Sar phenel i Biblia că trebul te phiraven-pe le phure andai congregația? Tu so pachias, le rașaia hai le pastori anda aver religii cheren cadea?

1. Le phure len sama ca lengo amalimos le Iehovaia te avel zuralo hai ajutin penghe familien te cheren sa cadea

2. Le phure len sama pe sea-l phrala anda congregația

3. Le phure jian te phenen vi averenghe i vestea lași

4. Le phure sicaven averen. Mai but, von den pengo vast vi cana cherel-pe ujimos sau aver buchia

6. Daisaras te cheras buchi ande iech than le phurența

I Biblia phenel amenghe sostar si mișto te cheras buchi ande iech than le phurența. Citisaren Evrei 13:17 hai pala codoia den duma:

• Sostar phenel i Biblia că amen trebul te camas te așunas le phurendar? Si tuche phari cadai buchi?

Citisaren Luca 16:10 hai pala codoia den duma:

• Sostar pachias că si mișto te așunas le phurendar vi andel buchia cai sile mai țâne?

SO SICHILEAM

O Isus si o șăro la congregațiaco. Amen cheras buchi ande iech than le phurența cai cheren le buchia cadea sar phendea o Isus. Sam bucurime te cheras cadaia anda codoia că von zuriaren-ame hai den amenghe iech lașio exemplo.

So dichleam

• Con si o șăro la congregațiaco?

• So trebul te cheren le phure andi congregația?

• So trebul te cherel fiesavo manuș cai anel închinarea le Iehovasche?

RODE MAI BUT

Va avela te diches sar o Corpo de Guvernare hai aver phure len sama le phralendar anda congregația.

Sar sile zuriarde le phrala andal thana cai i predicarea sili așadi (4:22)

Va avela te diches i buchi cai cheren-la le supraveghetori de circumscripție.

I viața ieche phraleschi cai silo supraveghetorii de circumscripție andel gava (4:51)

Va avela te hachiares chichi de cuci si i buchi cai cheren-la le jiuvlea andi congregația.

„Daștin le jiuvlea cai sile Martoria le Iehovasche te sicaven averen?” (O Turno de veghe, 1 septembria 2012)

Va avela te diches so phari buchi cheren le phure caște zuriaren le phralen.

„Le phure de congregație cheren buchi ande iech than amența caște avas fericime” (O Turno de veghe, 15 ianuaria 2013)