Av goghiaver cana alosares che amalen

Le lașe amala bucurin-pe amența cana jial amenghe mișto hai zuriaren-ame cana nachas prin pharimata. Tha i Biblia phenel amenghe că na oricon si iech lașio amal. Cadea că, sar daștis te alosares mișto che amalen? Dich le pușimata cai aven.

1. Sar cheren-tu te aves le amala cai si tut?

Butivar arăsas sar le manușa casa beșas. Cadai buchi daștil te avel lași sau nasul. Chiar cana sam lența fizico sau po interneto, trebul te las sama anda codoia că i Biblia phenel: „Con phirel le goghiaverența va avela goghiaver, tha con cherel-pe amal codolența bi goghiaco [codolența cai ci iubin le Iehovas] îngărela nasul”. (Proverbe 13:20) Le amala cai iubin le Iehovas hai anen lesche închinarea daștin te ajutin-ame te pașioas lestar hai te las lașe decizii. Tha le amala pașarde cai ci iubin le Iehovas daștin te cheren-ame te duriaras-ame lestar. Anda codoia i Biblia zuriarel-ame te avas goghiaver cana alosaras amare amalen. Cana amare amala iubin le Devles, si amen but miștimata vi amen, vi len. Cadea, daisaras ‘te zuriaras-ame vi mai dur iech averes hai te vazdas-ame iech averes’. (1 Tesaloniceni 5:11).

2. So si ando ilo le Iehovasco cana dichel so amala alosares?

O Iehova lel sama mișto sar alosarel pesche amalen. „Codo orta bucuril-pe catar iech amalimos chidino Leia”. (Proverbe 3:32) So avelas ando ilo le Iehovasco dacă alosaras amala cai ci iubin-les? Vo avelas duchado. (Citisaren Iacov 4:4.) Mai but, o Iehova va avela bucurime hai va camela te avas lesche amala dacă duriaras amendar le amalen nelașe hai pașioas lestar hai codolendar cai iubin-les. (Psalmo 15:1-4)

HACHIAR MAI MIȘTO

3. Le sama te na cheres tuche amala nasul

Le manușa cai ci iubin le Devles hai so manghel amendar vo, ci sile lașe amala. Dichen o MATERIALO VIDEO hai pala codoia den duma:

MATERIALO VIDEO: Te sichioas te duriaras amendar le amalen nasul (6:17)

• Sar daisaras te arăsas te aven-ame amala nelașe bi te das amari sama?

Citisaren 1 Corinteni 15:33 hai pala codoia den duma:

• So amalimata sile nasul anda tute? Sostar?

Citisaren Psalmo 119:63 hai pala codoia den duma:

• Sar trebul te avel varecon caște avel iech lașio amal anda tute?

4. Vi le manușa cai ci sile sar amen daștin te arăsăn amare lașe amala

I Biblia del duma anda o David hai o Ionatan, dui murșa anda o Israelo purano. O Ionatan sas but mai phuro sar o David hai sas o șiav le regesco. Cu sea cadala, mașcar lende sas iech amalimos chidino. Citisaren 1 Samuel 18:1 hai pala codoia den duma:

• Sostar ci trebulas te cheras amenghe amala numai de amare bărșa sau cai sile sar amen?

Citisaren Romani 1:11, 12 hai pala codoia den duma:

• Sar zuriaren-pe iech averes le amala cai iubin le Iehovas?

Ando materialo video cai avel, va avela te diches sar arachlea iech tărno phral amala code cai ci ajucărdea-pe. Dichen o MATERIALO VIDEO hai pala codoia den duma:

MATERIALO VIDEO: Rode amala code cai ci ajucăres-tu te araches (5:06)

• Sar dichlean, sostar sas-le îngrijorime le dada le tărnesche Akil anda so amala sas-les ca i școala?

• So cărdea-les te camel te avel lența amal?

• So cărdea vo caște na mai simțosarel-pe corcoro?

5. Sar daștis te cheres tuche șucar amalimata

MATERIALO VIDEO: Sar si iech ciacio amal? (4:14)

Citisaren Proverbe 18:24 hai 27:17 hai pala codoia den duma:

• Sar ajutin-pe le ciace amala iech averes?

• Si tut amala sar cadala? Dacă nici, sar daștis te cheres-le tuche?

Citisaren Filipeni 2:4 hai pala codoia den duma:

• Caște avel-tu lașe amala, mai anglal trebul vi tu te aves iech lașio amal. Sar daștis te cheres cadaia?

SO SICHILEAM

Dacă sam goghiaver cana alosaras amare amalen, bucurisaras le Iehovas hai si amen but miștimata.

So dichleam

• Sostar camel o Iehova te jianel so amala alosaras?

• So amalimata ci trebul te aven-ame?

• Sar daștis te cheres tuche ciace amala cai iubin le Iehovas?

RODE MAI BUT

Va avela te diches sar daștin te ajutin-ame le lașe amala cana nachas prin pharimata.

„Te cheras amenghe amalimata chidine angla te avel o sfârșito” (O Turno de veghe, noiembria 2019)

Va avela te diches sar te cheres tuche lașe amala.

„Sar daștiv te cherav manghe lașe amala?” (Le tărne pușen-pe – Răspunsuri cai ajutin-le, volumo 1, o capitolo 8)

So trebul te prinjianes anda le amala pa o interneto?

Av goghiaver cana phires po interneto (4:12)

Andi relatarea „Camlem zurales but te avel-ma iech dad”, va avela te diches so cărdea ieche murșes te avel atento sar alosardea pesche amalen.

„I Biblia paruvel i viața le manușenghi” (O Turno de veghe, 1 aprilia 2012)

1. So trebul te na bâstras cana alosaras te așias liniștime hai te cheras so placial-ame?

So fal-tu te cheres cana cames te bucuris chio ilo hai te simțosares-tu mișto? Cana silen timpo libero, unii manușa alosaren te citin iech lil, te așunen iech ghili, te dichen iech filmo sau te phiren po interneto. Aver alosaren te beșen penghe amalența, te phiren lența, te ghilaban sau te chelen-pe jocuri ande iech than. Oriso alosaras, trebul te las sama ca sea le buchia cai cheras-le te aven „lașe andel iacha le Raiesche”. (Efeseni 5:10) Cadai buchi si importanto, anda codoia că but manușa alosaren te dichen, te așunen sau te cheren buchia cai o Iehova urâl-le, sar avelas o marimos, i imoralitatea sexualo sau o spiritismo. (Citisaren Psalmo 11:5.) Sar daisaras te avas goghiaver cana alosaras so te cheras cana si amen timpo libero?

Cana si amen amala cai iubin le Iehovas, cadala daștin te cheren-ame te avas manușa mai lașe hai te ajutin-ame te alosaras mișto so cheras ande amaro timpo libero. Cadea sar dichleam ande iech lecția de mai anglal, „con phirel le goghiaverența va avela goghiaver”. Tha, dacă beșas but timpo codolența cai ci iubin so o Del manghel amendar, ‘va avela te îngăras-la nasul’. (Proverbe 13:20)