LECȚIA 56
Te încăras i congregația chidini ande iech than
Cana beșas amare phralența ando pachiamos, simțosaras-ame cadea sar o rege David, cai phendea: „So mișto hai so șucar si ca le phrala te beșen chidine ande iech than!”. (Psalmo 133:1) O chidimos de mașcar amende ci avel bi te cheras chanci. Fiesavo jeno andai congregația trebul te cherel vareso caște încărel-les.
1. So si o mai șucar ando poporo le Devlesco?
Cana jias ca iech întrunirea ande aver them, daștil-pe că ci hachiares lenghi șib, tha cu sea cadala, daștis te simțos-tu mișto hai iubime. Sostar? Anda codoia că amen studiisaras i Biblia hai folosisaras sa codol publicații ande orisavo than pa i phuv hai das vi amari zor te sicavas iubirea iech caring aver. Chiar cana beșas ande thana diferime, savore ‘acharas o anav le Iehovasco caște anas lesche închinarea chidine ande iech than ’. (Țefania 3:9, n.t.)
2. So daștis te cheres vi tu ca i congregația te avel chidini?
„Iubin tumen zurales iech averes, anda ilo”. (1 Petru 1:22) Sar daștis te cheres cadaia? Avelas mai mișto te diches le lașe buchia cai cheren-le che phrala, ando than te diches le buchia nasul cai von cheren-le. Na beș numai codolența cai sile sar tu. De chi zor te prinjianes phrala hai pheia cai sile diferime tutar. Te das sea amari zor te țârdas avri anda amaro ilo orisavi prejudecata cai daștil-pe te avel-ame. (Citisaren 1 Petru 2:17.)a
3. So va avela te cheres dacă mașcar tute hai iech aver creștino va avela iech nehachiarimos?
Amen sam chidine, tha sam vi imperfecți. Poiechdata peravas averen sau chiar duchavas-le. Anda codoia, o Cuvânto le Devlesco zuriarel-ame ‘te continuisaras . . . te iertisaras-ame anda sea o ilo iech averes’ hai pala codoia mai phenel: „Cadea sar iertisardea tumen o Iehova anda sea o ilo, cadea te cheren vi tumen”. (Citisaren Coloseni 3:13.) Amen duchavas butivar le Iehovas. Cu sea cadala, vo iertil-ame. Cadea că, vo ajucărel amendar ca vi amen te iertisaras amare phralen. Dacă des chi sama că duchadean varecas, cher tu o iechto paso caște lașiares o nehachiarimos. (Citisaren Matei 5:23, 24.)b
HACHIAR MAI MIȘTO
Va avela te diches so daștis te cheres vi tu caște încăres i pacea hai o chidimos de mașcar amende andi congregația.
So va avela te cheres caște avel pale pacea?
4. Nach părdal le prejudecăți
Camas te iubisaras sea le phralen. Cu sea cadala, poiechdata daștil te avel amenghe pharo te beșas varecaia cai si diferime amendar. So daștil te ajutil-ame? Citisaren Faptele 10:34, 35 hai pala codoia den duma:
O Iehova camel ca manușa de orisavo felo te aven lesche Martori. Sar daștis vi tu, cadea sar vo, te diches sea le manușen lașe iachența chiar cana sile diferime tutar?
So prejudecăți cai tu ci cames te avel-tu, si le manușen ando than cai beșes?
Citisaren 2 Corinteni 6:11-13 hai pala codoia den duma:
Sar daștis te sichios te iubis sea le phralen hai pheian sea mai but, vi codolen cai sile diferime tutar?
5. Iertisar anda sea o ilo hai cher pacea
O Iehova iertil-ame anda sea o ilo, chiar cana amen ci va trebula niciechdata te iertisaras-les. Citisaren Psalmo 86:5 hai pala codoia den duma:
Chichi de bari si i iertarea le Iehovaschi?
Sostar si cuci anda tute leschi iertarea?
Cana daștilas te avel amenghe pharo te avas andi pacea averența?
Sar daisaras te las-ame pala o Iehova caște așias chidine amare phralența hai pheianța? Citisaren Proverbe 19:11 hai pala codoia den duma:
So daștis te cheres cana varecon holiarel-tu sau duchavel-tu prin so phenel?
Poiechadata amen holiaras averen. Cana si cadea, so trebul te cheras? Dichen o MATERIALO VIDEO hai pala codoia den duma.
So cărdea i phei anda o materialo video caște avel pale pacea?
6. Rode so si lașio ande che phrala hai pheia
Cana pașioas amare phralendar hai pheiandar, arăsas te prinjianas na numai so si lașio ande lende, tha vi lenghe covlimata. So daisaras te cheras ca ando than te dichas lenghe covlimata, te dichas mai but so si lașio ande lende? Dichen o MATERIALO VIDEO hai pala codoia den duma:
So daștil te ajutil-tu te diches so si lașio ande che phrala hai pheia?
Ando than te dichel amare covlimata, o Iehova dichel mai but so si lașio ande amende. Citisaren 2 Cronici 16:9a hai pala codoia den duma:
So si ande chio ilo cana jianes că o Iehova dichel mai but so si lașio ande tute?
Ande iech șucar diamanto arachen-pe vi defectea, tha cu sea cadala, vo așel cuci. Sa cadea, chiar cana amare phrala hai pheia sile imperfecto, von sile cuci andel iacha le Iehovasche
UNII MANUȘA PHENEN: „Caște daștiv te iertiv varecas, codo manuș trebul te meritil mânri iertarea”.
Sostar trebul te camas te iertisaras anda ilo le coaveren?
SO SICHILEAM
Vi tu daștis te ajutis i congregația te așel chidini cana san iertătoro hai sicaves iubirea caring sea le phrala hai le pheia.
So dichleam
Sar daștis te naches părdal le prejudecăți?
So va avela te cheres dacă mașcar tute hai iech aver creștino va avela iech nehachiarimos?
Sostar cames te les-tu pala o exemplo le Iehovasco cai iertil anda sea o ilo?
RODE MAI BUT
Va avela te diches sar iech ilustrarea phendi le Isusostar va ajutila-tu te na judechis averen.
Trebul te mangas amenghe iertarea chiar cana pachias că ci cărdeam chanci nasul?
„Cana mangas amenghe iertarea, cheras pacea” (O Turno de veghe, 1 noiembria 2002)
Va avela te diches sar sichile chichiva phrala hai pheia te phiraven-pe averența bi te cheren diferențea.
Va avela te diches so daștis te cheres cana va avela-tu nehachiarimata le coaverența mai anglal ca i pacea andai congregația te avel hasardi.
„Lașiar le nehachiarimata pherdo iubirea” (O Turno de veghe, mai 2016)
a O puncto 6 catar i secțiunea „Sichio mai but” sicavel sar i iubirea cherel le creștinen te na den mai dur iech nasfalimos cai lel-pe.
b O puncto 7 catar i secțiunea „Sichio mai but” sicavel amenghe sar daisaras te lașiaras le problemea comercialo hai juridico.