4. Mech-tu catar le buchia nasul

Dacă țârdes țigări sau les droguri, daștil-pe că jianes chichi de pharo si te meches-tu cadalendar. So daștil te ajutil-tu? Beș hai gândisar-tu so de nasul cheren tuche cadal buchia. Citisaren Matei 22:37-39 hai pala codoia den duma sar daștin le țigări hai le droguri te . . .

• rimosaren chio amalimos le Iehovaia.

• cheren nasul codolenghe andai familia hai codolenghe de pașa tute.

Cher tuche iech plano anda sar te meches-tu catar le buchia nasul.a Dichen o MATERIALO VIDEO.

MATERIALO VIDEO: Sichio te încăres-tu parpale (2:47)

Citisaren Filipeni 4:13 hai pala codoia den duma:

• Sar daștin te ajutin-tu o manglimos, o studio la Bibliaco hai le întruniri te meches-tu catar le buchia nasul?

5. De sea chi zor caște meches le gânduri hai le buchia melale

Citisaren Coloseni 3:5 hai pala codoia den duma:

• Catar jianas că le materialea pornografico, o sextingo hai i masturbarea si buchia zurales melale andel iacha le Iehovasche?

• Pachias că si ande amaro miștimos că o Iehova manghel amendar te avas uje? Sostar?

Va avela te diches sar daștis te meches le gânduri melale. Dichen o MATERIALO VIDEO.

MATERIALO VIDEO: Te cheras sea so daisaras caște așias uje (1:51)

O Isus dea amen iech exemplo caște sicavel că trebul te avas gata te cheras oriso caște avas uje andi goghi hai ande amaro phiraimos, chiar cana si amenghe pharo. Citisaren Matei 5:29, 30 hai pala codoia den duma:

• O Isus ci camlea te phenel că trebul te încalavas ciaces amari iach sau te șinas amaro vast. Vo camlea te phenel că, o manuș cai cherel buchia neuje, trebul te del sea peschi zor te duriarel pestar le gânduri neuje, chiar cana ci si lesche ușoro. Sar daștil vo te cherel cadaia?b

O Iehova dichel-tu zurales cuci cana des sea chi zor caște meches le gânduri melale. Citisaren Psalmo 103:13, 14 hai pala codoia den duma:

• Dacă des sea chi zor caște na mai cheres iech buchi melali, sar ajutil-tu cado verseto te na meches-tu perado?

Na mech-tu dacă pelean; daștis te vazdes-tu pale!

Dacă cărdean pale vareso cai na-i lașio, daștil-pe că phenes tuche: „Ci som lașio, mai mișto ci mai cherav chanci”. Tha gândisar-tu: cana iech sportivo cai nașel malavel-pe hai perel, cadaia ci însemnol că hasardea i cursa hai că trebul te lel-la pale catar o începuto. Sa cadea, cana cărdean pale iech buchi nasul, ci însemnol că hasardean i lupta hai nici o fapto că o progreso cai cărdean-les ji acana sas de ivea. Te peres poiechdata, si vareso normalo. Tha cana vazdes-tu pale, sicaves că san po drom caring i victoria. Cadea că, na mech-tu! Cana si tut o ajutoro le Iehovasco, daștis te meches-tu catar orisavi buchi cai na-i lași.

6. Sar daștis te meches-tu dacă pies prea but

MATERIALO VIDEO: „Ci mai daștisardemas te continuiv cadea” (6:32)

• Sar phiravelas-pe o Dimitri cana pielas prea but alcoolo?

• Sas lesche ușoro te mechel-pe catar o pimos?

• Sar daisardea te mechel-pe catar o pimos hai te na mai matiol?

Citisaren 1 Corinteni 6:10, 11 hai pala codoia den duma:

• Chichi de nasul si ca varecon te matiol?

• Sar sicaven cadal versetea că varecon cai piel prea but daștil te mechel-pe catar o pimos?

Citisaren Matei 5:30 hai pala codoia den duma:

• Cana o Isus phendea te șinas amaro vast, vo camlea te hachiaras că, poiechdata, caște avas plăcuți le Iehovasche trebul te mechas amendar vareso, chiar cana cadai buchi duchal-ame zurales. So daștis te cheres dacă cames te meches-tu catar o pimos?a

Citisaren 1 Corinteni 15:33 hai pala codoia den duma:

• Sar arăsăs dacă phires codolența cai pien prea but?