Te dichas cuci o daro la viațaco

Si but buchia cai daștin te cheren amari viața șucar. Vi cana si amen pharimata, daisaras te arachas but buchia cai anen amenghe fericirea andi viața. Sar daisaras te sicavas le Iehovasche că o daro la viațaco si cuci anda amende? Hai sostar trebul te cheras cadaia?

1. Sostar trebul te dichas cuci i viața?

Trebul te dichas cuci i viața anda codoia că si iech daro catar amaro lașio Dad, o Iehova. Vo „si i haing la viațachi”, cadea că vo cărdea sea so si jiuvindo. (Psalmo 36:9) „Vo corcoro del viața savoren, phurdimos hai sea-l buchia”. (Faptele 17:25, 28) O Iehova del amen sea so trebul-ame caște așias andi viața. Mai but, vo cărdea amari viața cadea caște bucurisaras-ame latar. (Citisaren Faptele 14:17.)

2. Sar daisaras te sicavas le Iehovasche că dichas cuci o daro la viațaco?

Încă de cana chi dei așilea phari tusa, chi viața sas zurales cuci andel iacha le Iehovasche. O Iehova mechlea andi Biblia o manglimos ieche slujitoresco po anav David, cai phendea: „Che iacha dichle-ma chiar cana somas ando păr mânra deiaco”. (Psalmo 139:16) Chi viața si zurales cuci andel iacha le Iehovasche. (Citisaren Matei 10:29-31.) O ilo le Iehovasco silo zurales duchado cana varecon mudarel-pe sau mudarel averes.a (Exodo 20:13) Mai but, holiaras le Iehovas vi cana șioas amari viața hai vi averenghi ando pericolo de ivea. Cana las sama pe amari viața hai pe averenghi, sicavas că dichas zurales cuci o șucar daro la viațaco.

HACHIAR MAI MIȘTO

3. Le sama pe chio sastimos

Iech creștino cai dea peschi viața le Iehovasche sicavel că slujil lesche prin sea so cherel. Cana cherel cadaia, si sar cana del pesco corpo sar jertfa le Devlesche. Citisaren Romani 12:1, 2 hai pala codoia den duma:

• Sostar trebulas te les sama pe chio sastimos?

• Sar daștis te cheres cadaia?

4. Le sama te na cheres nasulimos chanicasche hai te na mudares chanicas

I Biblia phenel amenghe te na cheras chanci cai daștil te șiol amari viața sau averenghi ando pericolo. Dichen o MATERIALO VIDEO caște jianes so daștis te cheres anda chi siguranța.

MATERIALO VIDEO: I siguranța si zurales importanto (8:34)

Citisaren Proverbe 22:3 hai pala codoia den duma anda sar daștis te aves andi siguranța . . .

• chăre.

• ca i buchi.

• cana cheres sporto.

• cana folosis iech utilajo, cana trades iech mașina sau cana san pasagero.

5. Te na cheres chanci nasul ieche șiavorresche cai silo ando păr

O David cărdea iech ghili ande savi sicadea chichi de cuci si andel iacha le Iehovasche i viața ieche șiavorresche nenăștime. Citisaren Psalmo 139:13-17 hai pala codoia den duma:

• Cana astarel i viața ieche manușeschi andel iacha le Iehovasche: cana silo năștime sau cana leschi dei așel phari leia?

Ando purano Israelo, o Iehova dea legi cai ferinas le deian hai lenghe șiaven nenăștime. Citisaren Exodo 21:22, 23 hai pala codoia den duma:

• Sar dichelas o Iehova ieche manușes cai mudarelas ieche șiavorres nenăștime bi te camel?

• So si ande Lesco ilo cana varecon camel te cherel cadaia?b

• So pachias anda sar dichel o Iehova cadal buchia?

Dichen o MATERIALO VIDEO.

MATERIALO VIDEO: Dichen i viața cuci cadea sar o Del (5:00)

Poiechdata, chiar vi cana iech rromni hachiarel chichi de cuci si i viața, daștil te pachial că i corcori buchi cai daștil te cherel-la si o avorto. Citisaren Isaia 41:10 hai pala codoia den duma:

• Cana iech jiuvli si spidime te cherel avorto, castar trebul te manghel ajutoro? Sostar?

SO SICHILEAM

Anda codoia că i viața si iech daro catar o Iehova, i Biblia sicavel-ame te iubisaras, te respectisaras hai te las sama pe amari viața hai pe averenghi.

So dichleam

• Sostar si cuci i viața le manușenghi andel iacha le Iehovasche?

• So si ando ilo le Iehovasco cana varecon lel i viața varecaschi?

• Sostar si cuci anda tute o daro la viațaco?

RODE MAI BUT

Sar daisaras te sicavas le Iehovasche că i viața si cuci anda amende?

I ghili 141 – I viața, iech miracolo (2:41)

Daștil te iertil o Del iecha jiuvlea cai cărdea avorto?

„So phenel i Biblia anda o avorto?” (Articolo pa amaro site-o)

Cana hachiares sar dichel o Iehova i viața, daștis te les sama so distracții te alosares.

„Avelas mișto te cheras «sporturi extremo»?” (Ușten!, 8 octombria 2000)

Va avela te diches sar daștil te ajutil i Biblia ieche manușes cai siles andi goghi te mudarel-pe.

„Camav te merav: Daștil i Biblia te ajutil-ma dacă si ande mânri goghi te mudarav-ma?” (Articolo pa amaro site-o)