So daștis te cheres anda chi congregația

Pe sea i phuv, si mii congregații ande save milioanea manușa anen închinarea le Iehovasche pherde bucuria. Anda lende si zurales cuci o sicaimos cai primin-les cade hai anda codoia den sea penghi zor caște cheren vi von mai but buchia anda penghi congregația. Cheres vi tu sa cadea anda chi congregația?

1. Sar daștis te folosis chio timpo hai chio zuralimos anda congregația?

Savore daisaras te cheras vareso andi congregația. Sar exemplo, si ande chi congregația phrala phure sau banghe? Daștis te ajutis-le te aven ca le întruniri? Sau daștis te cheres anda lende vi aver buchia, sar avelas haben sau ujimos? (Citisaren Iacov 1:27.) Mai but, amen daisaras te cheras ujimos ca i sala le Regatoschi hai te las sama pe late. Chonic ci spidel-ame; i iubirea anda o Del hai anda amare phrala ajutil-ame ‘te avas gata anda sea o ilo’ te cheras cadal buchia. (Psalmo 110:3)

Le Martori bolde mai daștin te cheren vi aver buchia anda congregația. Le phrala cai sile cadea sar manghel i Biblia daștin te aven slujitori auxiliari, hai pala iech timpo, phure de congregație. Vi le phrala, hai vi le pheia daștin te cheren mai but buchia andi predicarea cana sile pionieri. Chichiva Martori sile gata te den iech vast cana vazden-pe thana anda închinarea sau aver muchin-pe ande aver congregația cai si bari nevoia ajutorostar.

2. Sar daisaras te ajutisaras i congregația cana das anda amare love hai anda le buchia cai si amen?

Daisaras ‘te das pachiv le Iehovasche sea amare cuci buchianța’. (Proverbe 3:9) Si iech bari pachiv anda amende te das love hai aver buchia cai si amen anda amari congregația hai anda i predicarea pa sea i phuv. (Citisaren 2 Corinteni 9:7.) Le love cai das-le sile folosime vi anda le phrala cai nachen prin dezastrea. But jene ‘șion vareso de iech partea’ ande fiesavo curco, caște daștin te cheren donații. (Citisaren 1 Corinteni 16:2.) Daisaras te șioas love andel cutii de donații anda o than cai încăras i întrunirea sau online po donate.jw.org. O Iehova del-ame i ocazia te sicavas amari iubirea anda leste prin o modo sar alosaras te das anda le buchia cai si amen.

HACHIAR MAI MIȘTO

3. Daisaras te das anda le buchia cai si amen

Codola cai den anda sea pengo ilo sile cuci andel iacha le Iehovasche hai le Isusosche. Sar exemplo, o Isus dichlea iecha phivlea savi, chiar cana sas-li zurales ciori, dea peschi zor te del le țâra love cai sas-la. Citisaren Luca 21:1-4 hai pala codoia den duma:

• Trebul te das but love ca o Iehova te dichel-ame cuci?

• So si ando ilo le Iehovasco hai le Isusosco cana dichen că das anda sea so si amen pherde bucuria?

Caște diches sar sile folosime le love cai das-le, dichen o MATERIALO VIDEO hai pala codoia den duma:

MATERIALO VIDEO: ‘Iech daro anda o Iehova’ (4:47)

• So miștimata țârden le congregații pa sea i phuv anda le love cai das-le?

4. Daisaras te das anda amaro zuralimos

Le închinători le Iehovasche andal puraimata cherenas phari buchi te len sama pe lenghe thana de închinare. Tha anda lende, cadaia sas mai but sar numai te den love. Citisaren 2 Cronici 34:9-11 hai pala codoia den duma:

• So cărdea fiesavo israelito anda o chăr le Iehovasco, o than cai anenas închinarea?

Caște dichen sar le Martori le Iehovasche len-pe pala cado exemplo andai Biblia, dichen o MATERIALO VIDEO hai pala codoia den duma:

MATERIALO VIDEO: Te las sama pe amare thana anda închinarea (3:31)

• Sostar si importanto ca i sala le Regatoschi te avel uji hai te sicavel mișto?

• Sar daștis te ajutis vi tu?

5. Le phrala daștin te den penghi zor caște cheren mai but andi congregația

I Biblia phenel le murșenghe creștini te aven gata te cheren chichi mai but buchia andi congregația. Sar daștin von te cheren cadaia? Dichen o MATERIALO VIDEO hai pala codoia den duma:

MATERIALO VIDEO: Phralale, den tumari zor caște cheren „iech lași buchi”! (5:19)

• So cărdea o phral anda o materialo video caște ajutil mai but i congregația?

I Biblia sicavel so ajucărel-pe le phralendar cai camen te arăsăn slujitori auxiliari hai phure. Citisaren 1 Timotei 3:1-13 hai pala codoia den duma:

• Sar trebun te aven le phrala cai camen te arăsăn slujitori auxiliari hai phure?

• Sar trebulas te avel lenghi familia? (Dich le versetea 4 hai 11.)

• So miștimata si codolen andai congregația cana le phrala den penghi zor te aven cadea sar phenel i Biblia?

SO SICHILEAM

O Iehova dichel cuci sea so cheras anda congregația cana das amaro timpo, amaro zuralimos hai anda le buchia cai si amen.

So dichleam

• Sar daisaras te folosisaras amaro timpo hai amaro zuralimos caște ajutisaras i congregația?

• Sar daisaras te folosisaras le buchia cai si amen caște ajutisaras i congregația?

• Tu sar cameias te ajutis i congregația?

RODE MAI BUT

Va avela te diches sostar o Del ci mai manghel catar pesche închinători zeciuiala.

„So phenel i Biblia anda i zeciuiala?” (Articolo pa amaro site-o)

Va avela te hachiares so însemnol te cames te cheres mai but buchia anda congregația.

„«Rodes» te cheres mai but andi congregația?” (O Turno de veghe, 15 septembria 2014)

Va avela te prinjianes chichiva Martori tromane cai îngăren publicații biblico penghe phralenghe, chiar cana ci si lenghe ușoro.

Le publicații biblico sile îngărde ca le phrala anda Congo (4:25)

Va avela te diches catar si le Martoren le Iehovasche love caște cheren penghi buchi hai so diferența si mașcar lende hai aver religii.

„Catar si le Martoren le Iehovasche love caște cheren penghi buchi?” (Articolo pa amaro site-o)