So si i neutralitatea

O Isus phendea pesche discipolenghe ‘te na cheren partea andai lumea’. (Ioan 15:19) Cadaia însemnol te așias neutro. I neutralitatea si te na hamisaras-ame andi politica hai ande le războaia anda cadai lumea. Tha jianas că ci si ușoro sea o timpo te așias neutro. Unii manușa daștinas te prasan-ame cana cheras cadaia. Sar daisaras te așias neutro hai loialo le Iehovasche, amaro Del?

1. Sar dichen le ciace creștini le guvernea andai lumea?

Le creștini sicaven respecto caring le guvernea. Amen așunas catar i porunca le Isusoschi cai phenel: „Den le Cezarosche so si le Cezarosco”. Cadaia însemnol te încăras le legi anda o them, sar avenas te pochinas le taxe hai le impozitea. (Marcu 12:17) I Biblia sicavel-ame că le guvernea andai lumea așen ande pânrănde numai anda codoia că o Iehova mechel-le. (Romani 13:1) Hachiaras că lenghi autoritatea si mai țâni sar le Devleschi, hai pachias zurales că numai o Del hai lesco Regato cerisco va lașiarela sea le pharimata le manușenghe.

2. Sar daisaras te sicavas că sam neutro?

Cadea sar o Isus, amen ci hamisaras-ame andi politica. Cana le manușa dichle iech anda le miracolea le Isusosche, von camle te cheren-les rege cade pi phuv, tha o Isus ci mechlea-le. (Ioan 6:15) Sostar? Anda codoia că, cadea sar phendea vo, ‘lesco Regato ci cherel partea anda cadai lumea’. (Ioan 18:36) Sar discipoli le Isusosche sicavas că sam neutro prin mai but buchia. Sar exemplo ci las partea ca le războaia. (Citisaren Mica 4:3.) Sicavas respecto caring le simboluri naționalo sar avelas o drapelo, tha ci das lesche i pachiv cai numai o Del meritil te primil-la. (1 Ioan 5:21) Mai but, ci încăras i partea nici ieche partidosche politico hai nici na das duma nasul anda leste sau anda varecaste anda cado partido. Prin sea cadal buchia hai vi prin aver, sicavas că sam ciaces loialo le Regatosche le Devlesco.

HACHIAR MAI MIȘTO

3. Le ciace creștini sile neutro

O Isus hai lesche discipoli mechle amenghe iech exmplo. Citisaren Romani 13:1, 5-7 hai 1 Petru 2:13, 14. Pala codoia, dichen o MATERIALO VIDEO hai den duma.

MATERIALO VIDEO: Le ciace creștini așen neutro (Partea 1) (4:28)

• Sostar trebul te sicavas respecto caring le autorități guvernamentalo?

• Sar daisaras te sicavas că așunas catar le autorități?

Cana si iech războio, chichiva thema phenen că sile neutro tha von încăren codolența cai len partea co războio. Cadea că, so si i ciaci neutralitatea? Citisaren Ioan 17:16. Pala codoia, dichen o MATERIALO VIDEO hai den duma.

MATERIALO VIDEO: Le ciace creștini așen neutro (Partea 2) (3:11)

• So însemnol te avas neutro?

So trebul te cheras cana le autorități manghen amendar vareso cai si contra so phenel o Del? Citisaren Faptele 5:28, 29. Pala codoia, dichen o MATERIALO VIDEO hai den o răspunso ca le pușimata cai aven.

MATERIALO VIDEO: Le ciace creștini așen neutro (Partea 3) (1:18)

• Dacă iech legea le manușenghi si contra i legea le Devleschi, castar va avela te așunes?

• Aven tuche andi goghi chichiva situații ande save le creștini ci trebun te așunen catar le autorități guvernamentalo?

4. Sicav că san neutro prin sar gândis hai so cheres

Citisaren 1 Ioan 5:21. Pala codoia, dichen o MATERIALO VIDEO hai den duma.

MATERIALO VIDEO: Sostar trebul tromai le ciace creștinenghe – Caște așen neutro (2:49)

• Sostar ci camlea o Ayenge te avel ande iech partido politico sau te hamisarel-pe ande le ceremonii naționalisto, sar avelas te salutil o drapelo?

• Tu pachias că alosardea mișto?

So aver buchia daștin te șion co zumaimos amari neutralitatea? Dichen o MATERIALO VIDEO, hai pala codoia den duma.

MATERIALO VIDEO: Sicaimata anda o Turno de veghe – Te așias neutro ande iech lumea huladi (5:16)

• Sar daisaras te sicavas că așias neutro cana dichas jocuri sportivo savende len partea manușa anda mai but thema?

• Sar daisaras te așias neutro cana le politicieni len decizii cai si sau nici ande amaro miștimos?

• Sar daștin le știri hai le manușa cai den duma anda i politica te cheren-ame te na mai așias neutro?

SO SICHILEAM

Le creștini den sea penghi zor te așen neutro politico prin sar gândin, so phenen hai so cheren.

So dichleam

• So trebul te das le guvernen?

• Sostar trebul te așias neutro po plano politico?

• So daștilas te șiol co zumaimos amari neutralitatea?

RODE MAI BUT

Prin so pharimata daștil-pe te nachas cana alosaras te așias neutro?

O Iehova ci mechlea-ame niciechdata (3:14)

So trebul te cheren le familii, angla te nachen prin vareso cai daștil te zumavel lenghi neutralitatea?

Te așias neutro sea o timpo (4:25)

But phenen că i mai bari pachiv anda iech manuș si te marel-pe anda pesco them. Sostar cadaia ci si ciaces?

„O Del daștil te cherel oriso” (5:19)

Gândisar-tu sar daștis te sicaves că ci cheres partea andai lumea, cana alosares iech than buchiaco.

„Fiesavo va avela te phiravel pesco pharimos” (O Turno de veghe, 15 martia 2006)

Acana sau mai târzio, sea le creștini va trebuna te așen zurale cana le manușa va avena contra lenghe sau cana va nachena prin persecuții. Trebulas te daravel-ame cadai buchi?

1. Sostar ajucăras-ame te avas persecutime?

I Biblia phenel: „Sea codola cai camen te train andi devoțiunea sfânto ando phanglimos le Isus Cristosoia va avena vi von persecutime”. (2 Timotei 3:12) O Isus sas-lo persecutime anda codoia că ci cărdea partea andai lumea le Satanoschi. Nici amen ci cheras partea andai lumea, anda codoia ajucăras-ame te avas persecutime catar le guvernea cadala lumeache sau catar le organizații religioso. (Ioan 15:18, 19)

2. So daisaras te cheras caște avas pregătime andal persecuții?

Trebul te zuriaras amaro pachiamos ando Iehova încă de acanara. Cher tuche timpo ande fiesavo ghies te manghes-tu lesche hai te citisares iech cotor anda lesco Cuvânto. Jia ca fiesavi întrunirea. Sea cadala va dena-tu o zuralimos caște naches pherdo tromai părdal orisavi persecuția, chiar cana cadaia avel catar le jene andai familia. O apostolo Pavel, cai sas-lo butivar persecutime, phendea: „O Iehova si mânro ajutorii; ci va avela te darav”. (Evrei 13:6)

Sa cadea, arăsas vi mai tromane cana phenas i vestea lași oricana daisaras. I predicarea sicavel-ame te șioas amaro pachiamos ando Iehova hai te nachas părdal i dar le manușendar. (Proverbe 29:25) Dacă bariares chio tromai caște phenes i vestea lași acana, va avela te aves gata te predichis vi cana o guverno va camela te așavel amari buchi. (1 Tesaloniceni 2:2)

3. So miștimata si amen dacă ci mechas-ame cana sam persecutime?

Ciaces, ci placial-ame cana sam persecutime. Tha, dacă ci mechas-ame, amaro pachiamos va avela vi mai zuralo. Sa cadea, pașioas mai but le Iehovastar anda codoia că dichas lesco vast cai vazdel-ame cana simțosaras că ci mai si amen zuralimos te jias mai dur. (Citisaren Iacov 1:2-4.) Vi le Iehovas duchal-les cana dichel că sam duchade, tha lesco ilo bariol cana dichel că amen ci mechas-ame. I Biblia phenel: „Cana suportin hai nachen prin ducha anda codoia că cheren so si mișto, cadai buchi si lași andel iacha le Devlesche”. (1 Petru 2:20) Dacă așias zurale ando pachiamos, o Iehova va dela-ame viața veșnico andi lumea nevi, cai chonic ci va mai așela contra i închinarea ciaci. (Matei 24:13)

HACHIAR MAI MIȘTO

4. Daștis te așes zuralo cana chi familia așel tuche contra

O Isus jianglea mișto că na savore anda amari familia va bucurina-pe că amen camas te slujisaras le Iehovasche. Citisaren Matei 10:34-36 hai pala codoia den duma:

• Cana varecon alosarel te slujil le Iehovasche, sar daștinas te phiraven-pe chichiva jene anda leschi familia?

MATERIALO VIDEO: O Iehova lea-ame peste (5:13)

• So va avela te cheres dacă varecon anda chi familia sau iech amal camel te na mechel-tu te slujis le Iehovasche?

Citisaren Psalmo 27:10 hai Marcu 10:29, 30. Pala so citisaren fiesavo verseto, den duma:

• Sar daștil te ajutil-tu cadai promisiunea dacă varecon anda chi familia sau anda che amala așen tuche contra?

5. An mai dur închinarea le Iehovasche chiar cana san persecutime

MATERIALO VIDEO: Te sicavas tromai chiar cana sam persecutime (6:27)

• Sar zuriaren-tu le exemplea anda cado materialo video?

Citisaren Faptele 5:27-29 hai Evrei 10:24, 25. Pala so citisaren fiesavo verseto, den duma:

• Sostar si importanto te anas mai dur închinarea le Iehovasche chiar cana i lucrarea de predicare sau le întruniri sile așade?

6. O Iehova va ajutila-tu te na meches-tu

MATERIALO VIDEO: O Iehova Del va zuriarela-ma (3:40)

• So ajutisardea cadale Martoren te na mechen-pe?

Citisaren Romani 8:35, 37-39 hai Filipeni 4:13. Pala so citisaren fiesavo verseto, den duma:

• Sar daștil te ajutil-tu cado verseto te jianes că daștis te naches părdal orisavo zumaimos?

Citisaren Matei 5:10-12 hai pala codoia den duma:

• Sostar daștis te aves fericime chiar cana san persecutime?

SO SICHILEAM

O Iehova dichel cuci cana das amari zor te slujisaras lesche chiar cana sam persecutime. Vo ajutil-ame te na mechas-ame.

So dichleam

• Sostar daștin le creștini te ajucăren-pe te aven persecutime?

• So daștis te cheres acana caște aves gata cana va avena le persecuții?

• So pachias că va ajutila-tu te așes loialo le Iehovasche chiar cana naches prin pharimata?

RODE MAI BUT

Va avela te diches sar ajutisardea o Iehova ieche tărne phrales te așel loialo chiar cana sas phandado anda codoia că așilea neutro.

Așilea loialo chiar cana sas-lo persecutime (2:34)

Va avela te diches so ajutisardea ieche rromes hai lesca rromnia te slujin loialo le Iehovasche but bărșa chiar cana but jene așenas lenghe contra.

Slujisardeam le Iehovasche ande iech timpo cana sas paruimata (7:11)

Va avela te diches sar daștis te aves pherdo tromai cana san persecutime.

„Te avas gata de acanara anda le persecuții” (O Turno de veghe, iulia 2019)

Sar trebulas te dichas o fapto că codola andai familia așen amenghe contra hai so daștil te ajutil-ame te așias loialo le Iehovasche hai te încăras amari pacea?

„O ciacimos ci anel «pacea, tha sabia»” (O Turno de veghe, octombria 2017)