LECȚIA 22
Sar daștis te phenes vi averenghe i vestea lași?
Acana, că sichios le ciacimata andai Biblia, daștil-pe că phenes tuche: „Sea-l manușa trebun te așunen cadal buchia!”. Si ciaces, sea-l manușen si len nevoia te așunen i vestea lași! Cu sea cadala, daștil-pe că daras te phenes vi averenghe anda so sichilean. Mai dur va avela te dichas so daștis te cheres caște naches părdal che daraimata hai sar te astares te phenes vi averenghe, pherdo bucuria, i vestea lași andai Biblia.
1. Sar daștis te phenes codolenghe cas prinjianes so sichilean?
Le Isusosche discipoli phende: „Anda codoia că amen ci daisaras te na mai das duma anda le buchia cai dichleam-le hai cai așundeam-le”. (Faptele 4:20) Anda lende o ciacimos sas cadea de cuci, că von camle te phenen-les sea le manușenghe. Cames vi tu cadai buchi ande chio ilo? Dacă da, rode ocazii te phenes pherdo respecto anda so sichios codolenghe anda chi familia hai che amalenghe. (Citisaren Coloseni 4:6.)
So daștis te phenes
Cana des duma varecasche anda chi familia, daștis te astares te phenes lesche andai Biblia cadea: „Ande cado curco sichilem vareso zurales șucar”.
Sicav iech verseto biblico cai zuriarel varecas cai si nasfalo sau nachel prin aver pharimata.
Cana san ca i buchi hai le colegi pușen-tu sar mai san, phen lenghe so sichilean ca o studio biblico sau ca i întrunirea la congregațiachi.
Sicav che amalenghe o site-o jw.org.
Achar averen te dichen sar si chio studio biblico sau sicav lenghe sar te manghen iech studio biblico po site-o jw.org.
2. Sostar si mișto te phenes averenghe i vestea lași ande iech than le phralența andai congregația?
Le discipoli le Isusosche phende i vestea lași na numai codolenghe cas prinjiande-le. O Isus „bișaldea-le dui po dui angla leste, ande fiesavo foro”, caște phenen i vestea lași. (Luca 10:1) Anda codoia că von cărde cadai buchi ande cado felo, but manușa daisarde te așunen i vestea lași. Mai but, cana le discipoli jianas ande iech than averența caște den duma le manușenghe anda o Del, len sas len vi mai bari bucuria. (Luca 10:17) Daștis vi tu te șios ande chio ilo cadai buchi, te phenes averenghe i vestea lași ande iech than le phralența andai congregația?
HACHIAR MAI MIȘTO
Va avela te sichios sar daștis te naches părdal che daraimata hai sar te phenes averenghe i vestea lași pherdo bucuria.
3. O Iehova va avela tusa
Chichiva camen te phenen averenghe anda o Del, tha daran te cheren cadai buchi anda codoia că ci jianen so va pachiana le manușa sau so va phenena lenghe.
Si tuche dar te phenes le manușenghe anda so sichilean? Sostar?
Dichen o MATERIALO VIDEO hai pala codoia den duma:
So cărde cadal tărne caște nachen părdal penghe daraimata?
Citisaren Isaia 41:10 hai pala codoia den duma:
Sar daștil te ajutil-tu o manglimos cana si tuche dar te des duma le manușența?
Jianglean că?
But Martori le Iehovasche pachiaie că ci va daștina niciechdata te phenen averenghe i vestea lași. Sar exemplo, anda o Serghei sas zurales pharo te del duma le manușența, anda codoia că sas lajiavuno. Tha pala so studiisardea i Biblia, vo daisardea te cherel cadai buchi. Ita so phenel vo: „Chiar cana sas manghe dar, astardem te dav duma le manușența anda so sichilem. Ci avilea manghe te pachiav că cadai buchi dea-ma o zuralimos te na mai avel-ma lajiav te dav duma le manușența. Cadaia zuriardea vi mânro pachiamos ando Del”.
4. De duma pherdo respecto
Cana des duma averența anda i vestea lași, le sama na numai ca so phenes, tha vi sar phenes codoi buchi. Citisaren 2 Timotei 2:24 hai 1 Petru 3:15 hai pala codoia den duma:
Sar daștis te cheres cadea sar sicaven le versetea, cana des duma averența andai Biblia?
Chichiva anda chi familia sau anda che amala daștinas te pachian ande aver felo, na cadea sar pachias tu. So daștis te cheres? So ci trebulas te cheres?
Sostar avelas mai mișto te șios le manușenghe pușimata cai ci holiaren-le, ando than te phenes lenghe directo so trebul te cheren?
5. Cana das duma anda i vestea lași sam bucurime
O Iehova dea le Isusosche i buchi te phenel le manușenghe i vestea lași. Sar dichlea o Isus cadai buchi? Citisaren Ioan 4:34 hai pala codoia den duma:
Iech hamos sastevesto încărel-ame andi viața hai cherel-ame fericime. Sostar phendea o Isus că o fapto te cheras so camel o Del, sar exemplo te phenas i vestea lași, si sar o hamos?
So bucurii pachias că daștin te aven amen cana das duma anda i vestea lași?
So daștis te cheres:
Ca i întrunirea anda o mașcar le curchesco sichio sar te astares te des duma le manușența.
De duma le phraleia sau la pheia casa studiis te diches dacă daștis vi tu te încăres teme ca i întrunirea anda o mașcar le curchesco. Cadala va ajutina-tu te daștis te des duma averenghe anda so sichios.
Cadale liles siles le secțiuni „Unii manușa phenen” sau „Unii daștinas te pușen-tu”. Anda lende daștis te sichios sar te des răspunsuri ca le pușimata sau so te phenes cana le manușa phenen că pachian ande aver felo.
UNII DAȘTINAS TE PUȘEN-TU: „So cărdean cado curco? Sar san?”.
Sar daștis te folosis-tu catar cadal pușimata, te phenes lenghe so sichilean ca o studio biblico?
SO SICHILEAM
Cana va avela te des duma anda i vestea lași, cadaia va anela tuche bucuria hai va avela te diches că ci si cadea de pharo sar pachiaian.
So dichleam
Sostar si mișto te phenes averenghe i vestea lași?
Sar daștis te sicaves respecto cana des duma averenghe anda i vestea lași?
Sar daștis te naches părdal che daraimata caște des duma averenghe anda i vestea lași?
RODE MAI BUT
Va avela te diches ștar moduri ande save daștis te des le manușenghe o lil de vizită cai sicavel amaro site-o jw.org, cana cames te phenes lenghe i vestea lași.
Sar te das le manușenghe o lil de vizită cai sicavel amaro site-o jw.org (1:43)
Va avela te diches ștar buchia cai daștin te ajutin-tu te des duma anda i vestea lași.
„San gata te cărdios pescarii anda manușa?” (O Turno de veghe, septembria 2020)
Va avela te diches iech exemplo andai Biblia cai va sicavela-tu sar te avel-tu tromai caște phenes i vestea lași, chiar cana san tărno.
Va avela te diches sar daștis te des duma andai Biblia codolența anda chi familia cai încă ci prinjianen le Iehovas.