Alosar te diches, te așunes hai te cheres buchia cai placian le Iehovas

O Iehova si ‘o fericime Del’. (1 Timotei 1:11) Vo camel te bucurisaras-ame viațatar. Anda codoia, vo camel na numai te cheras buchi, tha vi te cheras amenghe timpo caște beșas liniștime hai te cheras so placial-ame. Ande cadai lecția, va avela te dichas sar daisaras te folosisaras amaro timpo libero ande iech modo cai te anel amenghe bucuria hai ande sa codo timpo te așias cuci andel iacha le Iehovasche.

1. So trebul te na bâstras cana alosaras te așias liniștime hai te cheras so placial-ame?

So fal-tu te cheres cana cames te bucuris chio ilo hai te simțosares-tu mișto? Cana silen timpo libero, unii manușa alosaren te citin iech lil, te așunen iech ghili, te dichen iech filmo sau te phiren po interneto. Aver alosaren te beșen penghe amalența, te phiren lența, te ghilaban sau te chelen-pe jocuri ande iech than. Oriso alosaras, trebul te las sama ca sea le buchia cai cheras-le te aven „lașe andel iacha le Raiesche”. (Efeseni 5:10) Cadai buchi si importanto, anda codoia că but manușa alosaren te dichen, te așunen sau te cheren buchia cai o Iehova urâl-le, sar avelas o marimos, i imoralitatea sexualo sau o spiritismo. (Citisaren Psalmo 11:5.) Sar daisaras te avas goghiaver cana alosaras so te cheras cana si amen timpo libero?

Cana si amen amala cai iubin le Iehovas, cadala daștin te cheren-ame te avas manușa mai lașe hai te ajutin-ame te alosaras mișto so cheras ande amaro timpo libero. Cadea sar dichleam ande iech lecția de mai anglal, „con phirel le goghiaverența va avela goghiaver”. Tha, dacă beșas but timpo codolența cai ci iubin so o Del manghel amendar, ‘va avela te îngăras-la nasul’. (Proverbe 13:20)

2. Cana alosaras te cheras so placial-ame, sostar trebul te las sama chichi timpo cheras cadaia?

Chiar cana alosaras te cheras lașe buchia ande amaro timpo libero, ci trebul te mechas-le te cioren prea but timpo amendar. Dacă ci las sama, daștilas te na mai avel amen timpo te cheras le buchia mai importanto. I Biblia phenel amenghe te folosisaras ‘chichi mai mișto amaro timpo’. (Citisaren Efeseni 5:15, 16.)

HACHIAR MAI MIȘTO

Va avela te diches sar daștis te alosares goghiaver so te cheres ande chio timpo libero.

3. Aș dur catar so si nasul

Sostar trebul te las sama so dichas, so așunas hai so cheras ande amaro timpo libero? Dichen o MATERIALO VIDEO hai pala codoia den duma:

MATERIALO VIDEO: So buchia te alosarav te cherav cana camav te simțosarav-ma mișto? (4:39)

• Sar amean le marimata cai sas mașcar le gladiatori andal timpuri purane le buchianța cai cheren-le sau dichen-le le manușa de aghies?

• So sichilea o Danny anda sar te folosil pesco timpo libero?

Citisaren Romani 12:9 hai pala codoia den duma:

• Sar ajutil-ame cado verseto te alosaras mișto so te cheras ande amaro timpo libero?

Save si chichiva buchia cai o Iehova urâl-le? Citisaren Proverbe 6:16, 17 hai Galateni 5:19-21. Pala so citisaren fiesavo verseto, den duma:

• So buchia anda save del-pe duma ande cadal versetea, arachen-pe ande so dichen hai așunen le manușa de aghies?

Alosar goghiaver so cames te cheres ande chio timpo libero

Puș-tu:

• So? So phanglimos si mașcar cadaia hai le buchia cai o Iehova urâl-le?

• Cana? Ciorel mânro timpo catar le buchia mai importanto?

• Casa? Cherel-ma te beșav le manușența cai ci iubin le Iehovas?

Si mișto te beșas chichi mai dur catar le pericolea. Cadea că, te așias dur catar orisavi buchi cai cheras-la ande amaro timpo libero, tha anda savi pachias că ci si lași anda amende

4. Folosisar goghiaverimaia chio timpo

MATERIALO VIDEO: Sar folosisares chio timpo? (2:45)

• Chiar cana o phral ci dichelas vareso nasul, savi sas leschi problema?

Citisaren Filipeni 1:10 hai pala codoia den duma:

• Sar ajutil-ame cado verseto te jianas chichi timpo trebul te cheras amenghe anda le buchia cai placian-ame?

5. Alosar te diches hai te cheres buchia lașe

Na sea le buchia cai le manușa alosaren te cheren-le cana camen te simțosaren-pe mișto sile lașe andel iacha le Iehovasche. Cu sea cadala, si but buchia lașe cai daisaras te alosaras te cheras-le. Citisaren Eclesiasto 8:15 hai Filipeni 4:8 hai pala codoia den duma:

• So lașe buchia alosares te diches, te așunes sau te cheres ande chio timpo libero?

SO SICHILEAM

O Iehova camel te alosaras te cheras buchia lașe, cai te bucurin-ame, ande amaro timpo libero.

So dichleam

• So buchia ci trebunas te dichen, te așunen hai te cheren le creștini?

• Sostar trebul te las sama chichi timpo len amendar le buchia cai placian-ame?

• Sostar cames te alosares te diches, te așunes hai te cheres buchia cai placian le Iehovas?

RODE MAI BUT

Con trebulas te alosarel anda tute so te diches hai te așunes?

„Si filmea, ghilea sau lila cai le Martori le Iehovasche phenen că ci sile lașe?” (Articolo pa amaro site-o)

Va avela te diches sar daștis te alosares goghiaverimaia so te cheres ando timpo libero.

„Cherel tuche mișto so alosares te cheres ando timpo libero?” (O Turno de veghe, 15 octombria 2011)

Andi relatarea „Nachlem părdal mânre prejudecăți” va avela te diches so ajutisardea ieche murșes te paruvel le buchia cai cherelas-le ande pesco timpo libero.

„I Biblia paruvel i viața le manușenghi” (O Turno de veghe, 1 februaria 2010)

Va avela te diches so ajutisardea iecha deia te alosarel te na mai dichel buchia ande save si spiritismo.

Te na dichas buchia ande save si spiritismo (2:02)