• So miștimata anen tuche le întruniri le Martorenghe le Iehovasche?
    Bucurisar-tu viațatar anda sea o timpo! – Iech lil cai ajutil-tu te hachiares i Biblia
    • Lecția 10. Iech murș dichel iech verseto cai iech martoro sicavel-les lesche andi Biblia, ca iech întrunirea le Martorenghi le Iehovasche.

      LECȚIA 10

      So miștimata anen tuche le întruniri le Martorenghe le Iehovasche?

      Sanas vroiechdata ca iech întrunirea le Martorenghi le Iehovasche? Dacă ci sanas, daștil-pe că si tuche lajiav te jias i dintuni data. Daștil-pe că pușes-tu: „Sar si ca le întruniri? Sostar sile importanto? Sostar trebulas te jiav ca le întruniri?”. Ande cadai lecția, va avela te sichios sar le întruniri daștin te ajutin-tu te pașios le Devlestar hai sar daștin te ajutin-tu ande chi viața.

      1. Sostar le Martori le Iehovasche chiden-pe ca le întruniri?

      Iech scriitoro la Bibliaco phendea savo si o mai baro motivo sostar trebul te încăras le întruniri: „Va avela te așarav le Iehovas andi bari congregația”. (Psalmo 26:12) Anda le Martori le Iehovasche si iech bari bucuria te aven ande iech than ca le întruniri. Pe sea i phuv, von jian ca le întruniri ande fiesavo curco caște așaren le Devles, te ghilaban hai te manghen-pe lesche. Mai butivar po bărș, von încăren vi întruniri mai bare caște anen închinarea le Devlesche.

      2. So va avela te sichios ca amare întruniri?

      Ca amare întruniri folosisaras o Cuvânto le Devlesco hai ‘sicavas claro sar trebul hachiardo’. (Citisaren Neemia 8:8.) Dacă aves vi tu, va avela te sichios vi mai but șucar buchia anda o Iehova. Cana hachiares mai mișto ce cuci san ande lesche iacha, va avela te pașios vi mai but lestar. Mai but, va avela te diches sar daștil te ajutil-tu o Iehova te avel-tu iech viața șucar. (Isaia 48:17, 18)

      3. So miștimata va avena-tu cana aves ca le întruniri hai des duma le manușența cothar?

      O Iehova phenel amenghe „te las sama iech averestar caște îndemnosaras-ame ca iubirea hai buchiande lașe hai te na mechas amari întrunirea”. (Evrei 10:24, 25) Ca amare întruniri va avela te prinjianes manușa cai iubin-pe ciaces iech averes hai camen te sichion mai but buchia anda o Del, cadea sar vi tu cames. Va avela te diches sar zuriaren-pe iech averes prin so phenen andai Biblia. (Citisaren Romani 1:11, 12.) Va daștia te des duma mai bute manușența: phure, tărne, murșa hai jiuvlea, cai sile fericime chiar dacă nachen prin pharimata. O Iehova camel te jias ca le întruniri de fiesavi data, caște aven-ame sa cadal miștimata, hai vi mai but.

      HACHIAR MAI MIȘTO

      Va avela te diches sar si le întruniri le Martorenghe le Iehovasche hai ce miștimata va avena-tu dacă des sea chi zor caște jias lende.

      4. Le întruniri le Martorenghe le Iehovasche

      Ando iechto secolo, le creștini chidenas-pe ande iech than sea o timpo, caște anen închinarea le Iehovasche. (Romani 16:3-5) Citisaren Coloseni 3:16 hai pala codoia den duma:

      • Sar anenas închinarea le Iehovasche le dintune creștini?

      Vi aghies, le Martori le Iehovasche chiden-pe sea o timpo ande iech than andel săli le Regatosche. Dichen o MATERIALO VIDEO cai va sicavela sar sile cadal întruniri. Pala codoia, dichen i imaginea cai si iech întrunirea la congregațiachi hai den duma:

      MATERIALO VIDEO: Sar si le întruniri catar i sala le Regatoschi? (2:12)

      • Ce buchia anda save del-pe duma ando Coloseni 3:16, dichlean vi ca le întruniri catar i sala le Regatoschi?

      • Ando materialo video sau andi imaginea, so aver vareso mai dichlean?

      Citisaren 2 Corinteni 9:7 hai pala codoia den duma:

      • Sostar le Martori le Iehovasche ci manghen love ca lenghe întruniri?

      Dichen ande iech than anda so va dela-pe duma ca iech întrunirea cai va avela.

      • Savi partea andai întrunirea fal tuche mai șucar sau pachias că daștil te ajutil-tu?

      Jianglean că?

      Po site-o jw.org, daștis te araches i data hai o than cai încăren-pe întruniri pe sea i phuv.

      Colajo: Scene catar i sala le Regatoschi anglal, ando timpo hai co sfârșito la întrunireaco. Scene cai sile vi ande le imagini catar o A ji co D. A. Ca iech întrunirea, iech martoro încărel pa o podiumo iech cuvântarea bazome pi Biblia. B. Iech jiuvli martora anda sala, del răspunso ca iech pușimos, ca i tema ande savi si pușimata hai răspunsuri. C. Iech martoro del duma iecha familiaia pala i întrunirea. D. Iech martoro încărel o udar pâtărdo ieche murșesche mai phuro, cai avel ca întrunirea.

      1. Ca amare întruniri încăren-pe cuvântări, demonstrații hai dichas materialea video. Co începuto hai co sfârșito iecha întrunireache ghilabas iech ghili hai mangas-ame le Devlesche

      2. Ca unele părți anda o programo, le manușa andai sala daștin te den răspunsuri

      3. Oricon silo mișto primime– familii, manușa corcore, phure hai șiave

      4. Ca le întruniri le Martorenghe le Iehovasche o udar si pâtărdo hai ci chiden-pe love

      5. Caște jias ca le întruniri trebul te des chi zor

      Gândisar-tu ca i familia le Isusoschi. Caște arăsăn ca iech sărbătoarea cai încărelas-pe iech data po bărș, von jianas mai but ghiesa, cam 100 km, catar o Nazareto ji opre co Ierusalimo, pe iech drom cai sas plaina. Citisaren Luca 2:39-42 hai pala codoia den duma:

      • Pachias că sas lenghe ușoro te jian ji co Ierusalimo?

      • Părdal save pharimata trebul te naches caște jias ca le întruniri?

      • Pachias că si mișto anda tute te jias ca le întruniri, chiar cana si tuche pharo? Sostar?

      Colajo: O Iosif, i Maria, o Isus hai iech anda lesche phrala pregătin-pe te tiliaren. 1. O Iosif șiol le bagaje po iech măgaro anda o timpo so i Maria pregătil o haben. 2. Iech harta cai sicavel o drom catar o Nazareto ji co Ierusalimo.

      I Biblia phenel că si zurales importanto te jias ca le întruniri caște anas închinarea le Iehovasche. Citisaren Evrei 10:24, 25 hai pala codoia den duma:

      • Sostar trebul te jias de fiesavi data ca le întruniri?

      UNII MANUȘA PHENEN: „Daștiv te citiv i Biblia vi corcoro, chăre. Ci trebul te jiav cai si vi aver manușa caște cherav cadai buchi”.

      • Ce versetea sau exemplea biblico sicaven so camel o Iehova te cheras?

      SO SICHILEAM

      Dacă jias ca le întruniri, prinjianes mai mișto le Iehovas, zuriares chio amalimos leia hai anes lesche închinarea averența.

      So dichleam

      • Sostar phenel amenghe o Iehova te jias ca le întruniri?

      • So va avela te sichios ca le întruniri le Martorenghe le Iehovasche?

      • So aver miștimata pachias că va anena tuche le întruniri?

      So trebul te cheres

      RODE MAI BUT

      Si tuche lajiav te jias ca le întruniri? Dich so ajutisardea ieche murșes cai sas lajiavuno, te arăsăl te iubil le întruniri.

      Ci va avela te bâstras niciechdata sar primisarde-ame (4:16)

      Va avela te diches so placiaia ieche tărnesche ca iech întrunirea hai so cărdea caște daștil te jial mai dur ca le întruniri.

      Camlem te jiav ca le întruniri! (4:33)

      Va avela te diches so phenen aver tărne anda o fapto că jian ca le întruniri.

      „Sostar te jiav ca le întruniri catar i sala le Regatoschi?” (Articolo pa amaro site-o)

      Va avela te diches sar parudea-pe i viața ieche murșeschi anda iech clano violento, pala so sas ca iech întrunirea le Martorenghi le Iehovasche.

      „Oricai gălem sas mande iech arma” (O Turno de veghe, 1 iulia 2014)