• Daștis te aves le Iehovasco amal
    Bucurisar-tu viațatar anda sea o timpo! – Iech lil cai ajutil-tu te hachiares i Biblia

    • Daștis te aves le Iehovasco amal

      O Iehova camel te prinjianes-les mai mișto. Sostar? Vo pachial că atunci cana tu va avela te prinjianes-les mai mișto, va cameia te aves lesco amal. Tu pachias că daștis te aves le Devlesco amal? (Citisaren Psalmo 25:14.) So trebul te cheres caște arăsăs le Devlesco amal? I Biblia del amenghe o răspunso cadale pușimatande hai sicavel amenghe sostar o Iehova si o mai cuci amal cai daștil te avel-tu.

      1. So acharel-tu o Iehova te cheres?

      „Pașion le Devlestar, hai vo va pașiola tumendar!” (Iacov 4:8) So camel te phenel amenghe cado verseto? O Iehova acharel-tu te aves lesco amal. Unii manușa pachian că ci daștin te aven amala le Devleia, anda codoia că ci dichen-les. Cu sea cadala, ande pesco Cuvânto, i Biblia, o Iehova sicavel amenghe sar silo caște daisaras te pașioas lestar. Cana citisaras andi Biblia so phenel amenghe vo, amaro amalimos le Devleia bariol, chiar dacă ci dichleam-les niciechdata.

      2. Sostar o Iehova si o mai lașio amal cai daștil te avel-tu?

      Chonic ci iubil-tu mai but sar o Iehova. Vo camel te aves fericime hai te manghes lesco ajutorii oricana. Daștis te ‘șudes sea che îngrijorări pe leste, anda codoia că les duchal-les tutar’. (1 Petru 5:7) O Iehova silo sea o timpo pașa pesche amala caște ajutil-le, te zuriarel-le hai te așunel-le. (Citisaren Psalmo 94:18, 19.)

      3. So ajucărel o Iehova codolendar cai camen te aven lesche amala?

      O Iehova iubil sea le manușen, tha „codo orta bucuril-pe catar iech amalimos chidino Leia”. (Proverbe 3:32) O Iehova ajucărel ca lesche amala te den sea penghi zor caște cheren le buchia cai vo dichel-le lașe hai te na cheren le buchia cai vo dichel-le nasul. Unii manușa pachian că ci va daștina niciechdata te train cadea sar manghel lendar o Iehova. Tha, le Iehovas siles iech baro ilo. Vo primil sea le manușen cai iubin-les ciaces hai cheren sea so daștin caște bucurin lesco ilo. (Psalmo 147:11; Faptele 10:34, 35)

      HACHIAR MAI MIȘTO

      Va avela te diches sar daștis te aves le Iehovasco amal hai te hachiares sostar silo vo o mai lașio amal cai daștil te avel-tu.

      4. O Avraam sas le Iehovasco amal

      Cana citisaras so phenel i Biblia anda o Avraam (cai bușiolas vi Avram) hachiaras so însemnol te avas amala le Devleia. Citisaren anda o Avraam andi Geneza 12:1-4 hai pala codoia den duma:

      • So manglea o Iehova le Avraamostar te cherel?

      • So promitisardea lesche o Iehova?

      • So cărdea o Avraam cana o Iehova phendea lesche so te cherel?

      5. So manghel o Iehova catar pesche amala

      Butivar, ajucăras-ame ca amare amala te cheren vareso anda amende.

      • Sar cameias te phiraven-pe tusa che amala?

      Citisaren 1 Ioan 5:3 hai pala codoia den duma:

      • So manghel o Iehova catar pesche amala?

      Caște ascultisaras le Iehovastar, daștil-pe că trebul te na mai cheras buchia nasul hai te paruvas amaro phiraimos. Citisaren Isaia 48:17, 18 hai pala codoia den duma:

      • Sostar manghel o Iehova pesche amalendar te cheren paruimata ande penghi viața?

      Iech manuș cai cherel buchi ande-l construcții del iech casca ieche colegosche caște feril les.

      Iech lașio amal phenel amenghe te cheras buchia cai ferin-ame hai anen amenghe miștimata. O Iehova cherel cadaia anda pesche amala

      6. So cherel o Iehova anda pesche amala

      O Iehova ajutil pesche amalen te nachen părdal le pharimata. Dichen o MATERIALO VIDEO hai pala codoia den duma:

      MATERIALO VIDEO: O Iehova cărdea cadichi de but anda mande! (3:20)

      • Sar ajutisardea o Iehova cadala jiuvlea te na mai gândil-pe ca le buchia nasul cai sas ande lachi goghi hai ilo?

      Citisaren Isaia 41:10, 13 hai pala codoia den duma:

      • So phenel o Iehova că va cherela anda pesche amala?

      • Pachias că o Iehova daștil te avel iech lașio Amal anda tute? Sostar?

      Colajo: Le ciace amala ajutin-pe iech averes. 1. Iech manuș ajutil avere manușes te îngărel iech bari meseli. 2. Iech jiuvli phenel so si ande laco ilo avera jiuvleache. 3. Iech murș ajutil averes cai silo bango.

      Le ciace amala sile pașa tute cana si tut nevoia lendar. Vi o Iehova va avela pașa tute

      7. Caște avas amala le Iehovaia trebul te das duma leia

      Le amala pașion iech averestar cana den duma iech avereia. Citisaren Psalmo 86:6, 11 hai pala codoia den duma:

      • Sar daisaras te das duma le Iehovaia?

      • Sar del duma o Iehova amența?

      Colajo: 1. Iech jiuvli manghel-pe le Devlesche. Opral laco șăro si la iech săgeata caring opre. 2. Iech jiuvli citil anda Biblia. Opral laco șăro si la iech săgeata caring tele.

      Amen das duma le Iehovaia cana mangas-ame lesche; vo del duma amența prin i Biblia

      UNII MANUȘA PHENEN: „Na-i sar te aves amal le Devleia”.

      • So versetea sicaven că daisaras te avas amala le Iehovaia?

      SO SICHILEAM

      O Iehova camel te avel chio Amal hai vo va ajutila-tu te pașios lestar.

      So dichleam

      • Sar ajutil o Iehova pesche amalen?

      • Sostar manghel o Iehova pesche amalendar te cheren paruimata?

      • Tu pachias că si prea pharo anda tute te aves le Iehovasco amal? Sostar?

      So trebul te cheres

      RODE MAI BUT

      Sar daștil te paruvel chi viața o amalimos le Devleia?

      „Iehova, iech Del cai meritil te avel prinjiando” (O Turno de Veghe, 15 februaria 2003)

      Va avela te sichios sar daștis te aves amal le Devleia.

      „Sar daștiv te avav amal le Devleia?” (Le tărne pușen-pe – Răspunsuri cai ajutin-le, O duito lil, capitolo 35)

      Va avela te diches sostar iech jiuvli phenel că o amalimos le Iehovaia cărdea lachi viața but mai lași.

      „Ci camlem te merav!” (O Turno de Veghe, nr. 1 2017)

      Așun so phenen chichiva tărne că si ande lengo ilo cana gândin-pe co Iehova.

      So însemnol te aves amal le Devleia? (1:46)