LECȚIA 44
Sea le sărbători sile lașe andel iacha le Devlesche?
O Iehova camel te bucurisaras-ame viațatar hai chiar te încăras sărbători cai placian-les. Tha sile sea le petreceri hai le sărbători lașe ande lesche iacha? Sar daisaras te sicavas le Iehovasche că iubisaras-les vi prin cadai buchi?
1. Sostar but sărbători ci sile lașe andel iacha le Iehovasche?
Daștil-pe că ci jianglean că but sărbători aven anda le sicaimata nebiblico sau silen origini păgâno. Chichivan daștinas te aven len phanglimos la religiaia neciaci, le demonența sau te bazon-pe po sicaimos neciacio că o sufleto ci merel. Ande aver sărbători, le manușa pachian-pe andi baht hai andel superstiții. (Isaia 65:11) O Iehova phenel claro codolenghe cai slujin lesche: „Înclen anda lengo mașcar hai separin-tume . . . hai na mai șion o vast pe soste si neujo”. (2 Corinteni 6:17)a
2. Sar dichel o Iehova le sărbători cai den prea bari pachiv le manușenghe?
O Iehova camel te na mechas-ame athade hai te șioas amaro „pachiamos andel manușa”. (Citisaren Ieremia 17:5.) Chichiva sărbători den pachiv le manușenghe cai conducin hai codolenghe cai sile dichle sar eroi. Aver, den pachiv ca le simboluri naționalo sau încăren o ghies cana lengo them arăslea independento. (1 Ioan 5:21) Hai aver sărbătorin organizații politico sau socialo. So avelas ando ilo le Iehovasco te dichel că amen das pachiv ieche manușesche sau iecha organizațiache, cai si lesche contra?
3. Savo phiraimos daștil te cherel ca iech petrecerea te na avel lași?
I Biblia phenel că ‘le machiarimata, le chefuri hai le pimata’ ci sile lașe. (1 Petru 4:3) Ca chichiva petreceri, le manușa ci mai încăren conto catar lengo phiraimos hai cheren buchia lajiavune. Caște avas mai dur amala le Iehovaia, trebul te avel amen iech phiraimos ujo.
HACHIAR MAI MIȘTO
Va avela te diches sar daștis te sicaves că san goghiaver hai că cames te bucuris le Iehovas cana trebul te alosares dacă te încăres iech sărbătoarea sau te jias ca iech petrecerea.
4. Te na les partea ca niciech sărbătoarea cai ci del pachiv le Iehovasche
Citisaren Efeseni 5:10 hai pala codoia den duma:
Ca so trebul te las sama cana alosaras dacă te jias sau nici ca iech sărbătoarea?
So sărbători sile prinjiande ando than cai beșes?
Pachias că cadal sărbători sile cadea sar camel o Iehova?
Sar exemplo, pușlean-tu vroiechdata sar dichel o Del cana varecon încărel pesco ghies de naștere? I Biblia ci phenel că vroiech slujitoro le Iehovasco încărdea pesco ghies de naștere. Mai but, andi Biblia del-pe duma anda dui manușa cai încărde pengo ghies de naștere, tha cadala ci iubisarde le Devles. Citisaren Geneza 40:20-22 hai Matei 14:6-10 hai pala codoia den duma:
Sar amean cadal dui ghiesa de naștere?
Pala sar sicaven cadal exemplea, sar dichel o Iehova le ghiesa de naștere?
Daștil-pe că pușes-tu: „Chiar si importanto anda o Iehova dacă jiav sau nici ca iech ghies de naștere sau ca iech aver sărbătoarea cai ci si cadea sar phenel i Biblia?”. Citisaren Exodo 32:1-8, dichen o MATERIALO VIDEO hai pala codoia den duma:
Sostar trebul te dichas le buchia cadea sar o Iehova?
Sar daisaras te cheras cadai buchi?
Catar jianas dacă o Del ci dichel mișto iech sărbătoarea
Si pala sar phenel i Biblia sau nici? Caște jianes, rode catar avel.
Del prea bari pachiv ieche manușesche, iecha organizațiache sau ieche simbolosche naționalo? Amen das i mai bari pachiv le Iehovasche hai pachias zurales că numai vo si o corcoro cai daștil te chosel le pharimata le manușenghe.
Sila phaglimos le buchianța cai uștiaren so phenel i Biblia? Amen trebul te așias uje po plano moralo.
5. Ajutisar averen te respectin le buchia ande save tu pachias
Daștil-pe că si tuche pharo te phenes na, cana aver camen te spiden-tu te jias ca iech sărbătoarea cai si nasul andel iacha le Iehovasche. Phen lenghe șucar hai răbdareaia sostar ci jias. Ando MATERIALO VIDEO cai avel, va avela te diches iech exemplo.
Citisaren Matei 7:12 hai pala codoia den duma:
Cadea sar sicavel cado verseto, trebulas te phenes codolenghe anda chi familia cai ci sile co ciacimos, te na mai încăren iech sărbătoarea?
Sar daștis te sicaves codolenghe anda chi familia că sile cuci anda tute, chiar cana tu ci încăres lența iech sărbătoarea?
6. O Iehova camel te avas fericime
O Iehova camel te bucurisaras-ame ande iech than amara familia hai amare amalența. Citisaren Eclesiasto 8:15 hai pala codoia den duma:
Sar sicavel cado verseto că o Iehova camel te avas fericime?
O Iehova camel ca vi lesche slujitori te chiden-pe ande iech than caște han, te pien, te chelen hai te aven bucurime. Sar exemplo, ando MATERIALO VIDEO cai avel, dichen so șucar si ca amare congresea internaționalo.
Citisaren Galateni 6:10 hai pala codoia den duma:
Caște cheras „so si mișto caring sea-l manușa”, trebul te încăras vi amen le sărbători cai încăren-le von?
Cana san mai fericime: Cana des iech cadouo anda codoia că si iech sărbătoarea sau cana des-les anda codoia că tu cames anda ilo?
But Martori ci ajucăren iech ghies specialo caște bucurin penghe șiaven. Von cheren lenghe surprizea hai cadouri cana cadala nici na ajucăren-pe. Dacă si tut șiave, so surprizea daștis te cheres lenghe?
UNII MANUȘA PHENEN: „Na-i importanto catar avel iech sărbătoarea. Importanto si te beșes la familia hai le amalența”.
Tu so pheneias lenghe?
SO SICHILEAM
O Iehova camel te bucurisaras-ame ande iech than la familia hai le amalența, tha ci camel te las partea ca le sărbători cai vo dichel-le nasul.
So dichleam
So pușimata ajutin-ame te hachiaras sar dichel o Iehova iech sărbătoarea?
Sar daisaras te ajutisaras amara familia hai amare amalen te hachiaren sostar ci încăras iech sărbătoarea?
Catar jianas că o Iehova camel te avas fericime, te has, te pias hai te chelas?
RODE MAI BUT
Va avela te diches chichiva sărbători cai le creștini ci încăren-le.
„Sostar ci încăren le Martori le Iehovasche chichiva sărbători?” (Articolo pa amaro site-o)
Va avela te diches ștar buchia cai sicaven amenghe sostar o Del ci dichel mișto le ghiesa de naștere.
„Sostar ci încăren le Martori le Iehovasche le ghiesa de naștere?” (Articolo pa amaro site-o)
Dich sar daștin le șiavorre te bucurin o ilo le Iehovasco cana si sărbători.
Milioanea creștini alosaren te na încăren o Crăciuno. Sar dichen von cadai buchi?
„Von arachle vareso mai lașio” (O Turno de veghe, 1 decembria 2012)
a Caște jianes sar te phiraves-tu cana san mașcar le manușa cai încăren le sărbători dich „Sichio mai but”, o puncto 5.