Daisaras te avas bucurime vi cana phurioas

1, 2. Sar dichel o Iehova pesche manușen loialo cana phurion? (Psalmo 92:12-14; dich vi i imaginea)

ANDE chichiva thana la phuveache, le manușa pachian că si iech șucar buchi te phurioas. Tha ande aver thana, le manușa cheren sea so daștin te na phurion. Sar exemplo, cana dichen că silen iech bal parno, chichiva camen sigo te țârdes-les caște na dichel-les chonic. Tha cadaia ci ajutil-len prea but. Cadea că, hachiaras chichi de pharo si anda but manușa cana phurion.

² Tha, sar dichel o Iehova pesche manușen loialo cana phurion? (Prov. 16:31) Andi Biblia, vo phenel anda lende că sile sar le șucar cașta cai lulughion. (Citisar Psalmo 92:12-14.) Sostar phenel o Iehova cadaia? Butivar, le purane cașta sile zurales șucar anda codoia că silen but patrina hai sile pherde lulughia. Le mai șucar anda lende si le cireși japonezi cai lulughion. Chichiva anda le cireși japonezi silen mai but sar 1 000 bărșa. Cadea sar cadal cașta, le slujitori loialo le Iehovasche cai phurile, sile șucar ande lesche iacha. O Iehova ci dichel numai lenghe bala parne, vo dichel lengo ilo. Vo dichel cuci lenghe șucar calități hai ci băstrel niciechdata că slujisarde lesche loialo but bărșa.

3. Phen iech exemplo cai sicavel sar folosisardea o Iehova pesche phure slujitoren caște pherel pesco scopo.

³ O Iehova dichel amen mai dur cuci, vi cana phurioas.a Vo chiar dea pesche slujitoren phure te cheren buchia zurales importanto. Sar exemplo, chiar cana i Sara sas phuri, o Iehova phendea că voi va avela i dei iecha națiuneachi zurali hai că prin late va avela o Mesia. (Gen. 17:15-19) Vi o Moise sas-lo phuro cana o Iehova dea-les i bari buchi te încalavel le israelițen anda o Egipto. (Ex. 7:6, 7) Hai o apostolo Ioan sas-lo zurales phuro cana o Iehova phendea lesche te scriil panji lila andai Biblia.

4. Cadea sar phenel-pe ande Proverbe 15:15, so daștil te ajutil codolen phure te na mechen-pe cana nachen prin pharimata? (Dich vi i imaginea.)

⁴ Cana phurioas butivar sam nasfale hai cadaia cherel amari viața mai phari. Iech phei cărdea phireasa hai phendea: „Na oricon arăsăl phuro”. Tha o Iehova daștil te ajutil tut te aves fericimeb hai te bucuris tut viațatar chiar cana naches prin pharimata. (Citisar Proverbe 15:15.) Mai dur va avela te dichas chichiva buchia cai daștin te cheren-len le phrala mai phure caște așen bucurime. Pala codoia va avela te dichas sar daștin te ajutin-len le coaver phrala andai congregația. Tha, mai anglal, te dichas sostar daștil te avel amenghe pharo te încăras amari bucuria ando timpo so phurioas.

SOSTAR DAȘTIL TE AVEL AMENGHE PHARO TE ÎNCĂRAS AMARI BUCURIA ANDO TIMPO SO PHURIOAS?

5. Sostar daștin te simțon-pe perade le phrala hai pheia phure?

⁵ Prin so pharimata daștil-pe te nachas anda codoia că phurileam? Daștil-pe că simțos tut perado anda codoia că ci mai daștis te cheres le buchia cai cărdean-len mai anglal, cana sanas tărno hai sastevesto. (Ecl. 7:10) Iech phei cai bușiol Ruby phenel: „Si manghe pharo vi te lav pe mande mânro hureaimos anda codoia că si man ducha hai ci mai daștiv te mișchiv man mișto. Le mai simplo buchia arăsle te aven zurales phare. Sar exemplo, si manghe pharo te vazdav mânre pânre caște șioav manghe le ciorapi. Anda codoia că si man artrita, mânre vasta sile amorțime hai chiar vi le buchia cai cărdem-len ande fiesavo ghies, acana arăsle phare anda mande”. Hai o Harold, cai slujisardea co Betelo, phenel: „Poiechdata som holiardo anda codoia că ci mai daștiv te cherav le buchia cai placialas man te cherav-len. Cana somas tărno, somas zuralo. Ciaiolas man te cherav sporto hai te chelav man baseball. Le coaver phende butivar: «Den le Haroldos i mingea, că vo ci hasarel niciechdata». Tha, acana pachiav că ci daștiv nici te șiudav i mingea”.

6. a) So aver buchia cheren amare phralen cai phurile te simțon-pe perade? b) So daștilas te ajutil-len te alosaren dacă te mai traden i mașina sau nici? (Dich o articolo „Trebulas te na mai tradav i mașina?” anda cado număro.)

⁶ Daștil-pe că simțos tut perado anda codoia că ci mai daștis te cheres but buchia corcoro. Daștil-pe că acana trebul tut iech jeno cai te lel sama tutar sau acana beșes ca iech anda che șiave. Sau daștil-pe că san perado anda codoia că ci mai san cadea de sastevesto, ci mai diches mișto hai ci mai daștis te phires corcoro sau te trades i mașina. So daștilas te ajutil tut cana simțos tut cadea? Si importanto te na bâstres că o Iehova hai le coaver phrala dichen tut cuci vi cana ci mai daștis te cheres le buchia cai cărdean-len cana sanas tărno. Anda o Iehova si cuci o manuș cai san de andral. Vo hachiarel sar simțos tut. O Iehova dichel chichi de bari si chi iubirea anda leste hai anda le phrala hai cadaia cherel tut sumnacuno ande lesche iacha. (1 Sam. 16:7)

7. So daștil te zuriarel tut cana san perado anda codoia că pachias că ci va avela te diches o sfârșito cadale sistemosco?

⁷ Daștil-pe că simțos tut perado anda codoia că gândis tut că ci va avela te diches o sfârșito cadale sistemosco. So daștil te ajutil tut cana simțos tut cadea? An tuche amintea că o Iehova ajucărel te phandavel cado sistemo. (Is. 30:18) Tha, sostar încă ajucărel? Anda codoia că vo camel ca milioanea manușa te avel-len o timpo hai i posibilitatea te prinjianen-les hai te slujin lesche. (2 Pet. 3:9) Cadea că, cana simțos tut perado, gândisar tut chichi de but manușa daștin te arăsăn te prinjianen le Iehovas hai te aven salvime anda codoia că le Iehovas siles răbdarea. Daștil-pe că mașcar lende va avena vi chichiva jene anda chi familia.

8. Sar daștinas te phiraven-pe codola cai sile phure anda codoia că sile nasfale sau duchade?

⁸ Chiar cana sam phure sau tărne, cana sam nasfale sau duchade, daștil-pe că phenas sau cheras buchia hai pala codoia fal amen nasul. (Ecl. 7:7; Iac. 3:2) O Iov, iech manuș loialo le Iehovasche, phendea buchia „bi goghiaco” cana nachlea prin bare pharimata. (Iov 6:1-3) Sa cadea, codola mai phure daștin te phenen sau te cheren buchia cai mai anglal ci cherenas-len anda codoia că sile nasfale sau len draba. Tha ci trebul niciechdata te phiravas amen bi lașimasco hai te na ajucăras prea but le coaverendar numai anda codoia că sam phure sau nasfale. Hai dacă dichleam că duchadeam varecas, te mangas amenghe iertarea. (Mat. 5:23, 24)

TE ÎNCĂRAS AMARI BUCURIA

9. Sostar trebul te mechas averen te ajutin amen? (Dich vi le imagini.)

⁹ Te mechas averen te ajutin amen. (Gal. 6:2) Daștil-pe că ci va avela tuche ușoro co începuto. Iech phei cai bușiol Gretl phenel: „Poiechdata si manghe pharo te mechav averen te ajutin man, anda codoia că darav te na avav iech pharimos anda lende. Tha pala iech timpo hachiardem că ci sas mișto te gândisarav cadea hai că trebul te avav umilo hai te mechav averen te ajutin man”. Cana mechas averen te ajutin amen, daștin vi von te aven fericime anda codoia că den anda sea o ilo. (Fap. 20:35) Mai but, vi amen simțosaras amen mișto cana dichas chichi de but iubin amen amare phrala hai camen te ajutin amen.

10. Sostar si importanto te anas amenghe amintea te sicavas le coaverenghe că dichas cuci so cheren anda amende? (Dich vi le imagini.)

¹⁰ Sicav le coaverenghe că diches cuci so cheren anda tute. (Col. 3:15; 1 Tes. 5:18) Cana aver sicaven amenghe lașimos hai ajutin amen, dichas-len zurales cuci. Tha daștil-pe că bâstras te mulțumisaras lenghe anda so cheren. Poiechdata arăsăl numai te asas hai te phenas lenghe „Mulțumiv tuche!” caște sicavas amare amalenghe recunoștința hai că iubisaras-len. I Leah, iech phei cai lel sama le phralendar phure anda o Betelo, phenel: „Iech phei cai lav sama latar scriil manghe țâne lilorra ande save mulțumil manghe. Scriil manghe chichiva dumes, tha sile șucar hai ciaiol man but te citiv-len. Som fericime cana dichav că anda late si cuci so cherav caște ajutiv-la”.

11. Sar daștis te ajutis averen? (Dich vi le imagini.)

¹¹ De chi zor te ajutis averen. Cana gândis tut mai but averende, hai des-len chio timpo hai chio zuralimos, va avela te na gândis tut cadea de but ca che pharimata. Iech proverbo africano phenel că le manușa phure sile sar iech biblioteca pherdi lila. Cadal lila sile pherde prinjianimos hai goghiaverimos. Tha dacă ci citisaras-len, ci daisaras te sichioas anda lende. Sa cadea, av vi tu „iech biblioteca jiuvindi” hai de sea chi zor te sicaves le tărnen anda chio prinjianimos hai che șucar experiențea. Șiu lenghe pușimata hai așun-len ciaces. Sicav lenghe că dacă așunen le Iehovastar va avena ciaces fericime. Cadea că, cana zuriares che tărne amalen, cadai buchi va anela tuche iech bari bucuria. (Ps. 71:18)

12. Cadea sar phenel-pe ando Isaia 46:4, so promitil o Iehova codolenghe phure? (Dich vi le imagini.)

¹² Mang le Iehovas te del tut zuralimos. Si ciaces, poiechdata daștil-pe că simțos că na-i tut zor hai san chino. Cadaia daștilas te peravel tut. Tha, an tuche amintea că o Iehova silo zuralo. I Biblia phenel că vo „ci chiniol hai nai-lo phagărdo” niciechdata. (Is. 40:28) Cadea că, vo daștil te del tut o zuralimos cai si tut nevoia. (Is. 40:29-31) Mai but, o Iehova promitil că va ajutila tut. (Citisar Isaia 46:4.) Hai o Iehova încărel sea o timpo pesche promisiuni. (Ios. 23:14; Is. 55:10, 11) Cana manghes tut le Iehovasche, vo va dela tut o ajutorii cai si tut nevoia. Atunci va avela te diches chichi de but iubil tut o Iehova, hai cadaia va cherela tut fericime.

13. Cadea sar phenel-pe ando 2 Corinteni 4:16-18, so trebul te anas amenghe amintea? (Dich vi le imagini.)

¹³ Na bâstăr că o phurimos ci încărel anda sea o timpo. Cana anas amenghe amintea că iech pharimos ci încărel anda sea o timpo, si mai ușoro te na mechas amen. Hai i Biblia promitil amenghe că ando viitorii le manușa ci va mai phuriona hai ci va mai avena nasfale. (Iov 33:25; Is. 33:24) Cadea că, daștis te aves bucurime anda codoia că le mai șucar ghiesa anda chi viața si codola cai va avena hai na-i codola cai nachle. (Citisar 2 Corinteni 4:16-18.) Tha, so daștin te cheren vi aver caște ajutin tut?

SAR DAȘTIN TE AJUTIN LE COAVER

14. Sostar si importanto te jias chăre le phralende sau le pheiande phure sau te sunisaras-len?

¹⁴ Jia le phralende hai le pheiande chăre hai sunisar-len mai butivar. (Evr. 13:16) Daștil-pe că chichiva phrala phure simțon-pe corcore. Sar exemplo, o Camille si iech phral cai ci daștil te înclel anda o chăr. Vo phenel: „Trebul te beșav ando chăr sea o ghies hai na-i man chanci so te cherav. Simțosarav man sar iech leo phuro ande iech cușca. Poiechdata, cadai buchi holiarel man”. Cana jias chăre le phralende mai phure, sicavas lenghe că iubisaras-len hai că sile cuci anda amende. Daștil-pe că camleam butivar te jias chăre le phralende sau le pheiande mai phure sau te sunisaras-len, tha ci mai arăsleam te cheras cadaia. Si ciaces, savoren si amen but buchia te cheras, tha i Biblia zuriarel amen te cheras amenghe timpo anda le mai importanto buchia. Iech anda lende si, te jias chăre le phralende mai phure. (Filip. 1:10) So daștil te ajutil amen? Daisaras te scriisaras ande amaro calendarii cadai buchi caște anas amenghe amintea te sunisaras-len sau te bișialas lenghe iech mesajo. Mai but, daisaras te alosaras iech ghies caște jias lende chăre hai te na bâstras te cheras cadaia.

15. So buchia daștin te cheren ande iech than le tărne hai le phure?

¹⁵ Dacă san tărno, daștil-pe că pușes tut anda so te des duma le phralența phure sau so buchia te cheren ande iech than. Ci trebul te daras. De chi zor te aves iech lașio amal. (Prov. 17:17) Cher tuche timpo te des duma lența angla sau pala i intrunirea. Daștis te pușes-len so versetea andai Biblia ciaion-len sau te phenen tuche so cherelas-len te asan cana sas țâne. Sau daștis te achares-len te dichen ande iech than o JW Broadcasting^®. Sa cadea, daștis te ajutis-len cana cheres vareso anda lende. Sar exemplo, daștis te les sama ca lengo telefono sau lenghi tableta te jial mișto hai că silen le mai neve publicații. Iech phei cai bușiol Carol phenel: „Gândisar tut chichiva buchiande cai ciaion tut te cheres hai phen le phralenghe mai phure dacă camen te cheren-len ande iech than tusa. Chiar cana som mai phuri, camav te bucuriv man mai dur la viațatar. Ciaiol man te jiav ca i piața, te hav mânre amalența hai te bucuriv man le buchiandar cai cărdea-len o Iehova”. Iech aver phei cai bușiol Maira phenel: „Si man iech amali cai sila 90 bărșa hai man si man 33 bărșa. Tha butivar bâstrav chichi bărșa si mașcar amende anda codoia că simțosaras amen zurales mișto ande iech than. Asas, dichas co televizorii hai cana si amen pharimata, zuriaras amen iech averea”.

16. Sostar si mișto te jias amare phralența mai phure co medico?

¹⁶ Jia lența co medico. Daștinas te îngăren le phralen phure la mașinasa co medico. Tha daștin vi te beșen lența hai te dichen dacă o medico lel sama mișto lendar. (Is. 1:17) Daștin te ajutin-len dacă scriin so phenel lenghe o medico. Iech phei cai bușiol Ruth phenel: „Butivar cana jiav corcori ca iech programarea o doctoro ci așunel man ciaces. Poiechdata phenel manghe: «I problema si numai ande chi goghi». Tha cana jial varecon manța, o doctoro lel sama mișto mandar. Mulțumiv le phralenghe hai pheianghe cai cheren penghe timpo te aven manța co medico”.

17. Sar daisaras te ajutisaras le phralen phure te jian andi predicarea?

¹⁷ Jia lența andi predicarea. Daștil-pe că chichiva phrala mai phure nai-len i zor te jian andi predicarea chăr chărestar. So daisaras te cheras anda lende? Daisaras te acharas-len te jian amența le standosa, chiar te anas lenghe iech scamin caște beșen pașa o stando. Sa cadea, daisaras te acharas-len te sichioas andai Biblia varecasa ande iech than. Dacă le phralenghe si pharo, daisaras te jias amen lende le manușesa savesa sichioas. Hai le phure de congregație daștin te încăren lende i întrunirea anda i predicarea. Cadea, va avela lenghe mai ușoro te jian vi von andi predicarea. O Iehova bucuril-pe zurales but cana das sea amari zor te sicavas iubirea hai pachiv caring le phrala phure. (Prov. 3:27; Rom. 12:10)

18. So va avela te dichas ando articolo cai avel?

¹⁸ Ande cado articolo dichleam chichi de but iubil o Iehova pesche slujitoren phure hai că anda leste von sile sumnacune. Sa cadea dichas-len vi amen. Cuci phrala hai pheia phure, chiar dacă nachen prin diferime pharimata, o Iehova va ajutila tumen te așen bucurime. (Ps. 37:25) Na bâstren că le mai șucar ghiesa anda tumari viața si codola cai va avena, na codola cai nachle! Tha so daisaras te phenas anda codola cai len sama varecastar phuro andai familia sau ieche șiavestar sau amalestar nasfalo? Sar daștin von te așen bucurime? Va avela te dichas ando articolo cai avel.