So daștil te ajutil tut te pâtres chio ilo angla o Iehova cana des duma lesa?

1, 2. a) So daștilas te așavel amen te phenas le Iehovasche so si ande amaro ilo? b) Cathar jianas că o Iehova așunel amare manglimata?

DEAN CHI SAMA că poiechdata phenes sa codol buchia cana des duma le Iehovasa hai si tuche pharo te pâtres chio ilo angla leste? Dacă da, ci san o corcoro. Anda codoia că si amen but buchia te cheras, poiechdata daștil-pe că sighiaras cana mangas amen le Iehovasche. Sau daștil-pe că si amenghe pharo te pâtras amaro ilo angla o Iehova anda codoia că pachias că ci sam cadea de lașe caște das duma lesa.

² I Biblia sicavel amen că anda o Iehova na-i importanto amare dumes. Anda leste si importanto te das duma lesa anda sea o ilo hai te cheras cadaia pherde umilința. Andi Biblia phenel-pe că vo așunel „le manglimata codolenghe umili”. (Ps. 10:17) Vo așunel sea so phenas lesche anda codoia că duchal-les amendar. (Ps. 139:1-3)

3. So va avela te dichas ande articolo?

³ Mai dur, va avela te arachas o răspunso cadale pușimatande: Sostar daisaras te phenas le Iehovasche bi te daras sea so si ande amaro ilo? Sar daisaras te pașioas mai but le Iehovastar cana das duma lesa? Sar daștin te ajutin amen le manglimata cai arachas-len andi Biblia? Hai so daisaras te cheras cana sam cadea de perade că ci jianas so te phenas le Iehovasche?

SOSTAR DAISARAS TE PHENAS LE IEHOVASCHE BI TE DARAS SEA SO SI ANDE AMARO ILO?

4. So daștil te ajutil amen te phenas le Iehovasche bi te daras sea so si ande amaro ilo? (Psalmo 119:145)

⁴ Cana dichas le Iehovas sar iech lașio amal cai camel amaro miștimos, va avela amenghe mai ușoro te pâtras amaro ilo angla leste, hai te phenas lesche sea so simțosaras hai gândisaras. Codo cai scriisardea o Psalmo 119 dea peschi zor te dichel le Iehovas cadea. Vo nachlea prin pharimata ande leschi viața. Sas manușa cai camenas te cheren lesche nasulimos. (Ps. 119:23, 69, 78) Mai but, poiechdata simțolas-pe perado anda codoia că cherelas greșeli. (Ps. 119:5) Tha, o psalmisto daisardea te phenel le Iehovasche bi te daral sea so sas ande lesco ilo. (Citisar Psalmo 119:145.)

5. Sostar ci trebul te mechas ca i doș cai simțosaras-la te așavel amen te das duma le Iehovasa? Den iech exemplo.

⁵ O Iehova camel te manghen-pe lesche vi le manușa cai cărde bare păcatea. (Is. 55:6, 7) Cadea că, ci trebul te mechas ca i doș cai simțosaras-la te așavel amen te das duma le Iehovasa. Gândisar tut că gălean andi vacanța ande aver them hai hasardean tut, tha iech manuș de cothar daștilas te ajutil tut te araches o drom. Va avela te na des duma lesa numai anda codoia că si tuche lajiav că hasardean tut? Na! Nici amenghe ci trebul te avel amenghe lajiav te das duma le Iehovasa cana cărdeam iech greșeala sau simțosaras amen hasarde. (Ps. 119:25, 176)

SAR DAISARAS TE PAȘIOAS MAI BUT LE IEHOVASTAR CANA DAS DUMA LESA?

6, 7. So daștil te ajutil amen te pâtras amaro ilo angla o Iehova cana das duma lesa? Phenen iech exemplo. (Dich vi i nota de telal.)

⁶ Dacă das duma le Iehovasa hai phenas lesche so si amen ciaces andi goghi hai ando ilo, va avela te pașioas mai but lestar. Tha sar daisaras te cheras cadaia?

⁷ Gândisar tut ca le calități le Iehovasche.a Cana anas amenghe amintea chichi de șucar si le calități le Iehovasche, va avela amenghe mai ușoro te pâtras amaro ilo angla leste. (Ps. 145:8, 9, 18) Te dichas o exemplo iecha pheiaco, cai bușiol Kristine. Laco dad phiravelas-pe nasul lasa. Voi phenel: „Cana demas duma le Iehovasa, sas manghe pharo te dichav-les sar iech dad iubitorii. Darailem că o Iehova ci va mai iubila man anda codoia că cherav greșeli”. So ajutisardea la pheia? Voi phenel: „Gândisardem man ca i iubirea loialo le Iehovaschi hai cadaia ajutisardea man te hachiarav că o Iehova iubil man. Acana jianav că vo lel man sea o timpo vastestar. Chiar cana cherav greșeli vo iubil man hai ajutil man. Cana gândiv man chichi de but iubil man o Iehova, si manghe mai ușoro te dav duma lesa anda le buchia cai cheren man fericime tha vi anda le buchia cai peraven man”.

8, 9. Sostar si importanto te gândisaras amen ca so camas te phenas le Iehovasche angla te das duma lesa? Phenen iech exemplo.

⁸ Gândisar tut ca so cames te phenes. Angla te des duma le Iehovasa, daștis te pușes tut chichiva buchia, sar avenas: „So pharimata si man? Trebul te iertiv varecas? Parudea-pe vareso ande mânri viața hai si man nevoia le ajutorostar le Iehovasco?”. (2 Regi 19:15-19) Mai but, daisaras te anas amenghe amintea sar sicadea amen o Isus te das duma le Devlesa hai te mangas amen anda o anav le Iehovasco, anda lesco Regato hai anda leschi voința. (Mat. 6:9, 10)

⁹ Te gândisaras amen prin so nachlea iech phei cai bușiol Aliska. Voi așundea că lache rromes siles cancero hai că ci mai siles but ghiesa te trail. Ande codo timpo sas lache pharo te del duma le Iehovasa. I Aliska anel pesche amintea: „Somas cadea de peradi, că cana dem duma le Iehovasa, ci jianglem so te phenav lesche”. So ajutisardea-la? Voi phenel: „Angla te dav duma le Iehovasa beșav iech țâra hai gândisarav man ca so camav te phenav lesche. Cadaia ajutil man te na dav duma numai anda mande hai anda o nasfalimos mânre rromesco. Cadea, som mai liniștime hai daștiv te dav duma le Iehovasa anda mai but buchia”.

10. Sostar trebul te cheras amenghe mai but timpo te das duma le Iehovasa? (Dich vi le imagini.)

¹⁰ Cher tuche mai but timpo te des duma le Iehovasa. Si ciaces, vi cana das duma țâra timpo le Iehovasa, daisaras te pașioas lestar. Tha, cana cheras amenghe timpo te das duma mai but lesa, daisaras te șioras amaro ilo angla leste.b O Elijah, o rrom la pheiaco Aliska, phenel: „Dav mânri zor te mangav man le Iehovasche mai butivar po ghies, tha cana dav duma lesa mai but timpo, simțosarav man mai pașă le Iehovastar. Jianav că o Iehova ci hasarel peschi răbdarea manța, cadea că ci trebul te sighiarav”. De chi zor te cheres so phenel-pe mai dur: Rode iech than cai te beșes liniștime hai iech lașio momento caște des duma mai but timpo le Iehovasa, chiar voceasa zurali. Cher cadaia de fiesavi data cana daștis.

SAR DAȘTIN TE AJUTIN AMEN LE MANGLIMATA CAI ARACHAS-LEN ANDI BIBLIA

11. Sar daștin te ajutin amen le manglimata cai arachas-len andi Biblia? (Dich vi o chenarii „Simțos tut vi tu sa cadea?”)

¹¹ Andi Biblia arachas but manglimata hai ghilea cai phende-len le manușa le Iehovasche, cai daștin te ajutin amen. Cana citis anda lende, daștis te diches sar pâtărde cadal manușa penghe ile angla o Iehova hai te gândis tut sar daștis te cheres vi tu cadaia. Mai but, daștis te araches neve dumes cai așaren le Iehovas hai daștis te phenes-len vi tu. Sa cadea, daștil-pe că araches manglimata ande save le manușa le Iehovasche simțosarde-pe cadea sar tu.

12. So daisaras te pușias amen cana gândisaras amen ca iech manglimos cai citisaras-les andi Biblia?

¹² Cana gândis tut ca iech manglimos cai citis-les andi Biblia, daștis te pușes tut: „Con phendea cadal dumes hai sar sas leschi viața? Si vi man sa codol gânduri hai sentimentea? So daștiv te sichioav anda cado manglimos?” Caște araches o răspunso cadale pușimatande, daștil-pe că va trebula te rodes te jianes mai but, tha meritil te cheres cadaia. Te dichas mai dur ștar manglimata cai phende-len chichiva manușa loialo le Iehovasche.

13. So daisaras te sichioas anda o manglimos cai phendea-les i Ana? (1 Samuel 1:10, 11) (Dich vi i imaginea.)

¹³ Citisar 1 Samuel 1:10, 11. Cana phendea cado manglimos, la Ana sas-la dui buchia cai duchavenas-la. La ci daștilas te avel-la șiave hai i Penina, i coaver rromni lache rromesche, cherelas lachi viața phari. (1 Sam. 1:4-7) Dacă vi tu naches prin iech pharimos cai duchavel tut, so daștis te sichios la Anatar? Cana manglea-pe le Iehovasche hai phendea lesche sea so duchavelas-la, anda late sas sar cana lea-pe iech barr pa laco ilo. (1 Sam. 1:12, 18) Vi amen daisaras te simțosaras amen mai mișto cana șioras amaro ilo angla o Iehova hai phenas lesche sea so simțosaras hai gândisaras. (Ps. 55:22)

14. a) So aver vareso sichioas la Anatar? b) Sostar ajutil amen te citisaras hai te gândisaras amen ca le manglimata cai arachen-pe andi Biblia te cheras vi amen manglimata mai șucar le Iehovasche? (Dich vi i nota de telal.)

¹⁴ Pala chichiva bârșa de cana năștisailea laco șiavo o Samuel, i Ana îngărdea-les co baro rașai Eli. (1 Sam. 1:24-28) Atunci voi manglea-pe le Iehovasche hai phendea lesche că pachial anda sea o ilo că vo feril pesche manușen hai că lel sama lendar.c (1 Sam. 2:1, 8, 9) Chiar cana lache pharimata de chăral ci nachle cu sea, voi alosardea te gândil-pe ca le miștimata cai primisardea-len le Iehovastar. So sichioas anda o manglimos cai phendea-les i Ana? Va avela amenghe mai ușoro te așias zurale andel pharimata cana gândisaras amen sar ajutisardea o Iehova pesche manușen andel purane ghiesa hai sar ajutisardea vi amen ji acana.

15. Sar daștil te ajutil amen o manglimos le Ieremiasco cana nachas prin iech neciacimos? (Ieremia 12:1)

¹⁵ Citisar Ieremia 12:1. O Ieremia sas-lo perado cana dichlea că le manușa nasul îngărenas-la mișto. Mai but, vo sas-lo duchado anda codoia că aver israeliți prasanas-les. (Ier. 20:7, 8) Daștil-pe că vi amen sam duchade cana aver manușa prasan amen hai cana dichas că codolenghe nasul jial lenghe mișto. So cărdea o Ieremia? Vo phendea le Iehovasche că cadal buchia duchaven-les, tha ci doșardea le Iehovas că na-i orta. Daștil-pe că cana dichlea sar ortosardea o Iehova codolen nasul, o pachiamos le Ieremiasco ando Iehova sas-lo mai zuralo. (Ier. 32:19) Vi amen daisaras te pâtras amaro ilo angla o Iehova hai te phenas lesche chichi de but duchaven amen le manușa nasul. Tha, ande sa codo timpo te phenas lesche vi că pachias amen ande leste că va ortosarela le buchia co timpo alosardo lestar.

16. So daisaras te sichioas anda o manglimos cai phendea-les iech levito cana amari situația ci mechel amen te cheras sea so camas anda o Iehova? (Psalmo 42:1-4) (Dich vi le imagini.)

¹⁶ Citisar Psalmo 42:1-4. Cado psalmo scriisardea-les iech levito cai sas-lo îngărdo ando Babilono hai ci daștilas te anel închinarea le Iehovasche ande iech than pesche phralența. Leschi ghili sicavelas so sas ande lesco ilo. Daștil-pe că vi amen simțosaras amen sar cado levito cana ci daisaras te jias avri anda o chăr anda codoia că sam nasfale sau sam phandade anda amaro pachiamos. Poiechdata daștil-pe că simțosaras amen mișto hai poiechdata sam perade. Tha, orisar avenas amare sentimentea si mișto te das duma le Iehovasa anda lende. Cadaia daștil te ajutil amen te hachiaras so si ande amaro ilo hai te anel amenghe amintea so si ciaces importanto. Sar exemplo, o levito hachiardea că va daștila te așarel pale le Iehovas. (Ps. 42:5) Sa cadea, vo gândisardea-pe vi sar o Iehova lel sama lestar. (Ps. 42:8) Cana das duma anda sea o ilo le Iehovasa, daisaras te hachiaras mai mișto amare sentimentea, te avel amen pacea hai o zuralimos te jias angle.

17. a) So sichioas anda o manglimos cai phendea-les o Iona? (Iona 2:1, 2) b) Sar daștin te ajutin amen chichiva psalmi cana nachas prin pharimata? (Dich i nota de telal.)

¹⁷ Citisar Iona 2:1, 2. Cana o Iona sas ando păr le mașesco, vo pâtărdea pesco ilo angla o Iehova. Chiar cana vo ci așundea le Iehovastar, o Iona jianglea că o Iehova așunelas-les. Ande pesco manglimos vo folosisardea but dumes andal Psalmi.d Daștil-pe că vo prinjianelas mișto codol psalmi. Vo gândisardea-pe mișto lende hai încărdea-len andi goghi. Cadaia ajutisardea-les te pachial ciaces că o Iehova va ajutila-les. Anda o exemplo le profetosco Iona sichioas vareso importanto. Cana vi amen încaras andi goghi chichiva versetea, daisaras te anas amenghe amintea lendar cana nachas prin pharimata hai cadala daștin te machen amaro ilo cana das duma le Iehovasa.

TE PAȘIOAS MAI DUR LE IEHOVASTAR CANA DAS DUMA LESA

18, 19. Dacă poiechdata ci jianas so te phenas cana mangas amen, sar daștin te ajutin amen le versetea anda Romani 8:26, 27? Phenen iech exemplo.

¹⁸ Citisar Romani 8:26, 27. Poiechdata daștil-pe că sam cadea de perade, că ci jianas sar te phenas le Iehovasche so si ande amaro ilo. Tha si amen iech ajutorii. I Biblia phenel că ande codol momentea, o spirito le Devlesco ajutil amen. Sar? Prin pesco spirito, o Iehova ajutisardea codolen cai scriisarde i Biblia te șion code vi șucar manglimata. Cadea că, cana ci daisaras te phenas so si amen po ilo, o Iehova dichel le manglimata cai sile scriime andi Biblia sar cana sile amare dumes hai așunel-len.

¹⁹ Cadaia ajutisardea vi iecha pheia andai Rusia, cai bușiol Elena. Voi sas phandadi anda codoia că manghelas-pe le Devlesche hai citilas andai Biblia. Ande codo timpo, voi sas peradi hai sas lache pharo te del duma le Iehovasa. I Elena phenel: „Pala codoia, andem manghe amintea că cana si man prea but buchia po ilo hai ci jianav anda soste te mangav man, o Iehova dichel le manglimata lesche manușenghe andal purane ghiesa . . . sar cana sile phende mandar. . . . Cadaia zuriardea man but ande codol phare ghiesa”.

20. Cana sam perade so daștil te ajutil amen te pregătisaras amari goghi angla te mangas amen?

²⁰ Poiechdata cana sam perade hai camas te mangas amen le Iehovasche daștil-pe că ci așel amari goghi ca so camas te phenas lesche. So daștil te ajutil amen? Daisaras te așunas le versetea andal Psalmi audio angla te mangas amen. Sau daisaras te scriisaras so si ande amaro ilo, cadea sar o rege David. (Ps. 18, 34, 142; antete) Si ciaces, ci si reguli anda sar trebul te pregătisaras amen anda o manglimos. (Ps. 141:2) Cher so jianes că si mai mișto anda tute.

21. Sostar daisaras te mangas amen le Iehovasche anda sea o ilo?

²¹ Tachiarel amaro ilo te jianas că o Iehova hachiarel mișto so simțosaras, chiar angla te phenas lesche amen. (Ps. 139:4) Cu sea cadala, vo camel te pâtras amaro ilo angla leste. Cadea că, vo camel te phenas lesche bi te daras so si ande amaro ilo. Te sichioas anda le manglimata cai phende-len le manușa le Iehovasche andal purane ghiesa. Te das amari zor te pâtras cu sea amaro ilo angla o Iehova hai te phenas lesche vi so cherel amen fericime tha vi so duchavel amen. Na bâstăr că o Iehova si o Amal cai va avela sea o timpo pașa tute!