Ce șucar buchia andea iech zâmbeto!

DUI tărne jiuvlea cai nachle prin iech zona comercialo anda o foro Baguio, Filipine, dichle iech cărucioro pe savo sas literatura biblico, tha ci așile po than leste. I Helen, i phei cai beșelas pașa o cărucioro, sicadea lenghe iech baro zâmbeto. Le tărnea găle mai dur pe lengo drom, tha ci daisarde te băstren o zâmbeto cai sicadea-lenghe i Helen.

Mai târzio, cana jianas chăre le autobusoia, von dichle pe iech sala le Regatoschi iech baro semno cai scriilas jw.org. Von ande penghe amintea că sas sa codoi buchi cai sas scriime vi po cărucioro cai dichle-les mai anglal. Von dine-pe tele anda o autobuso hai găle te dichen o programo andal întrunirea cai sas scriime pi poarta catar i sala le Regatoschi.

Pala codoia, le dui jiuvlea găle ca iech întrunirea. Cas dichle andi sala le Regatoschi? La Helena! Von prijiande-la sigopala laco baro zâmbeto. I Helen phenel: „Cana avile caring mande, darailem iech țâra, pachiaiem că cărdem vareso nasul”. Tha le tărnea phende la Helenache so întâmplosardea-pe.

Le tărne jiuvlean placeaia-le i întrunirea hai simțosarde-pe mișto mașcar le phrala hai le pheia. Cana dichle că, unii phrala cherenas ujimos pala o programo, vi von camle te ajutin. Iech anda le tărnea tilardea anda o them, tha i coaver tărni avel de fiesavi data ca-l întruniri hai studiil i Biblia. Ce șucar buchia andea iech zâmbeto!