Încăr ande chi goghi le versetea

Sas tuche vroiechdata pharo te anes tuche amintea ieche versetostar andai Biblia cai ciaiol tut? Daștil te avel iech verseto cai zuriarel tut, aver cai ajutil tut te meches de iech rig le gânduri nasul sau iech cai cames te phenes-les varecasche. (Ps. 119:11, 111) Mai dur, va avela te dichas chichiva buchia cai daștin te ajutin tut te încăres andi goghi le versetea.

• Folosisar le etichetea andai aplicația JW Library^®. Cher iech eticheta le anavesa „Versetea cai ciaion man” hai șiu cade le versetea cai cames te încăres-len andi goghi.

• Șiu o verseto ande iech than cai diches-les butivar. Scriisar varecai o verseto cai ciaiol tut hai șiu-les ande iech than cai daștis te diches-les butivar. Chichiva șion-les pi oglinda, aver po frigideri. Chichiva phrala cheren iech poza le versetosche hai șion-les po ecrano le telefonosco, o calculatoro sau aver vareso.

• Folosisar bilețelea. Scriisar o lil hai o capitolo ande iech partea hai o verseto andi coaver partea. Pala codoia dich iech partea anda o bilețelo hai de chi zor te anes tuche amintea so phenel andi coaver partea.