Te sicavas pachiv averenghe

1. Sostar ciaiol le manușen te sicavel-pe lenghe pachiv? (Proverbe 22:1)

CIAIOL TUT ca le coaver te sicaven tuche pachiv? Sar te na! Sea le manușa camen te sicavel-pe lenghe pachiv. Sam mai fericime cana le coaver sicaven amenghe pachiv. Anda codoia i Biblia phenel: „I pachiv cai sicaven-la tuche aver si mai lași sar o rup hai o sumnacai”. (Citisar Proverbe 22:1.)

2, 3. So va avela te dichas ande cado articolo?

² Daștil-pe că na-i amenghe ușoro sea o timpo te sicavas pachiv le coaverenghe. Sostar? Anda codoia că si ușoro te dichas le defectea averenghe. Sa cadea, traisaras ande iech lumea ande savi le manușa ci mai sicaven pachiv. Tha amen trebul te avas diferime. Sostar? Anda codoia că o Iehova camel te sicavas pachiv „le manușenghe de orisavo felo”. (1 Pet. 2:17)

³ Ande cado articolo, va avela te dichas so însemnol te sicavas averenghe pachiv hai sar daisaras te sicavas pachiv: 1) le jenenghe anda amari familia, 2) codolenghe andai congregația hai 3) codolenghe cai nai-le amare phrala hai pheia. Va avela te dichas sar daisaras te cheras cadaia vi mai but cana si amenghe pharo.

SO ÎNSEMNOL TE SICAVES PACHIV AVERENGHE?

4. So însemnol te sicavas pachiv averenghe?

⁴ So si i pachiv? I pachiv sicavel o modo ande savo dichas ieche manușes hai sar phiravas amen lesa. Cana dichas că ieche manușes siles șucar calități, cherel lașe buchia sau siles iech bari autoritatea, phiravas amen lesa ande iech modo cai te sicavas lesche pachiv. Hai si zurales importanto te cheras cadai buchi anda codoia că amen camas hai avel anda amaro ilo. (Mat. 15:8)

5. So daștil te ajutil amen te sicavas averenghe pachiv?

⁵ O Iehova camel te sicavas averenghe pachiv. Sar exemplo, vo phenel amenghe te sicavas pachiv caring „le autorități mai bare”. (Rom. 13:1, 7) Tha chichiva manușa daștinas te phenen: „Me sicavav pachiv codolenghe cai meritin-la”. Tha si mișto te gândisaras cadea? Sar manușa le Iehovasche, amen hachiaras că i pachiv cai si amen caring le manușa ci avel anda so cheren von. Amen sicavas pachiv le coaverenghe anda codoia că iubisaras le Iehovas hai camas te bucurisaras lesco ilo. (Ios. 4:14; 1 Pet. 3:15)

6. Daștis te sicaves pachiv varecasche cai ci sicavel tuche pachiv? Explichin. (Dich vi i imaginea pa i coperta.)

⁶ Chichiva manușa daștinas te pușen-pe: „Chiar daștiv te sicavav pachiv varecasche cai ci sicavel manghe pachiv?”. Da! Te dichas chichiva exemplea. O rege Saul cărdea pesche șiaves, le Ionatanos, lajiavestar angla le coaver. (1 Sam. 20:30-34) Cu sea cadala, o Ionatan sicadea pachiv pesche dadesche hai așilea pașa leste ando marimos ji ando ghies cana o Saul mulea. (Ex. 20:12; 2 Sam. 1:23) O baro rașai Eli doșardea la Ana că sas machi. (1 Sam. 1:12-14) Cu sea cadala, i Ana dea duma pherdi pachiv lesa, chiar cana sea le manușa jianenas că vo cărdea bare greșeli sar baro rașai, hai vi sar dad. (1 Sam. 1:15-18; 2:22-24) Le murșa andai Atena prasade le apostolos Pavel hai phende anda leste că si iech manuș „bare muiesco”. (Fap. 17:18) Tha o Pavel dea duma șucar lența hai sicadea lenghe pachiv. (Fap. 17:22) Cadal exemplea sicaven amen că iech bari iubirea anda o Iehova hai iech lași dar caring leste va ajutina amen te sicavas pachiv le coaverenghe chiar cana na-i amenghe ușoro te cheras cadaia. Mai dur, te dichas con meritil amari pachiv hai sostar.

TE SICAVAS PACHIV LE JENENGHE ANDA AMARI FAMILIA

7. Sostar daștilas te avel amenghe pharo te sicavas pachiv le jenenghe anda amari familia?

⁷ Sostar daștil te avel pharo? Anda codoia că beșas but timpo amara familiasa, prinjianas mișto vi lenghe lașe buchia, tha vi lenghe defectea. Chichiva daștil-pe că silen anxietatea sau silen iech nasfalimos cai daștil te cherel te avel amenghe mai pharo te las sama lendar. Aver daștin te cheren sau te phenen buchia cai duchaven amen. Trebul te simțosaras amen mișto cana sam amara familiasa. Tha, cana le jene andai familia ci sicaven pachiv iech caring aver, daștin te holiaren-pe iech averesa. Cadea că, le jene andai familia ci mai daștin te cheren mișto buchi ande iech than. Daisaras te phenas că iech familia si sar o corpo. Cana varecon si nasfalo, lesco corpo ci mai jial mișto. Sa cadea, cana le jene andai familia ci sicaven penghe pachiv, von ci mai daștin te cheren buchi mișto ande iech than. Tha, cadea sar but nasfalimata daștin te aven sastiarde, vi iech familia daștil te sichiol te sicaven penghe pachiv iech averesche.

8. Sostar si importanto te sicavas pachiv le jenenghe anda amari familia? (1 Timotei 5:4, 8)

⁸ Sostar te sicavas pachiv? (Citisar 1 Timotei 5:4, 8.) Ande pesco lil caring o Timotei, o Pavel dea duma anda sar le jene andai familia trebun te len sama iech averestar. Vo phendea că trebul te sicavas pachiv codolenghe anda amari familia, na anda codoia că trebul, tha anda codoia că cadea „ciaiol le Devles”. Amen sicavas pachiv anda codoia că iubisaras le Iehovas hai cadaia cherel partea anda amari închinarea cai anas-la lesche. Sostar daisaras te phenas cadai buchi? O Iehova si Codo cai cărdea i familia. (Ef. 3:14, 15) Cadea că, cana sicavas pachiv ieche jenesche anda amari familia, amen sicavas pachiv le Iehovasche, Codo cai cărdea i familia. Cadaia zuriarel amen te sicavas pachiv le jenenghe anda amari familia.

9. Sar daștin te sicaven penghe iech rrom hai iech rromni pachiv iech averesche? (Dich vi le imagini.)

⁹ Sar daisaras te sicavas pachiv? Iech rrom sicavel pachiv pesche rromniache cana sicavel lache că si cuci anda leste, vi cana sile corcore, tha vi cana sile le coaverența. (Prov. 31:28; 1 Pet. 3:7) Vo ci va marela-la niciechdata, ci va cherela-la lajiavestar hai ci va cherela-la te simțol-pe că na-i lași chancesche. O Ariel,a cai beșel andi Argentina, phenel: „O nasfalimos mânra rromniaco cherel-la te phenel buchia cai duchaven man. Cana si cadea, anav manghe amintea că so phenel voi na-i so simțol ciaces. Ande codol momentea, gândisarav man ca le dumes anda 1 Corinteni 13:5. Cadala zuriaren man te dav duma ande iech modo cai te sicavel lache pachiv, na holi”. (Prov. 19:11) Sa cadea, i rromni sicavel pachiv pesche rromesche cana del duma șucar anda leste angla le coaver. (Ef. 5:33) Mai but, voi ci del duma nasul anda leste, ci cherel phirasa cai ci anel lesche pachiv hai ci prasal-les. Voi hachiarel că cadal buchia sile sar i rugina cai daștil te rimosarel lenghi căsnicia. (Prov. 14:1) Iech phei anda Italia, cai laco rrom siles anxietatea, phenel: „Poiechdata pachiav că mânro rrom hal prea but pesco șăro sea le buchianța. Ando trecuto, butivar, prin mânre dumes hai prin sar banghiardemas mânro mui ci sicadem lesche pachiv. Tha dichlem că, cana beșav mai but pașa codola cai den duma pherde pachiv anda aver, cadaia zuriarel vi man te sicavav mai but pachiv mânre rromesche”.

10. Sar daștin le șiave te sicaven pachiv pesche dadesche hai deiache?

¹⁰ Cuci tărne, așunen tumare dadestar hai deiatar. (Ef. 6:1-3) Den duma pherde pachiv tumare dadesa hai deiasa. (Ex. 21:17) Ando timpo so von phurion, daștil-pe că silen nevoia tumare ajutorostar. Cadea că, den sea tumari zor caște len sama lendar. Te dichas o exemplo la pheiaco María, saveaco dad na-i Martoro le Iehovasco. Cana vo pelea nasfalo, la Mariache ci sas ușoro te lel sama lestar anda codoia că vo phiravelas-pe nasul lasa. Voi phenel: „Manglem man le Iehovasche na numai te avel man pachiv caring mânro dad, tha vi te sicavav lesche cadaia. Gândisardem man că, dacă o Iehova phenel manghe te sicavav pachiv mânre dadesche hai deiache, vo va dela man vi o zuralimos te cherav cadai buchi. Pala iech timpo, hachiardem că trebul te sicavav pachiv mânre dadesche chiar cana vo ci va paruvela pesco phiraimos”. Cana sicavas pachiv amara familiache chiar cana na-i amenghe ușoro, sicavas pachiv le Iehovasche, Codo cai cărdea i familia.

TE SICAVAS PACHIV CODOLENGHE ANDAI CONGREGAȚIA

11. Sostar daștil te avel pharo te sicavas pachiv amare phralenghe hai pheianghe?

¹¹ Sostar daștil te avel pharo? Amare phrala hai pheia den penghi zor te train pala so sicavel amenghe i Biblia. Tha, daștil-pe că poiechadata ci sicaven amenghe lașimos, pachian buchia cai na-i ciace anda amende sau holiaren amen. Dacă varecon andai congregația del amen ‘iech motivo te rovaras amen’, daștil te avel amenghe pharo te sicavas lesche vi mai dur pachiv. (Col. 3:13) So daștil te ajutil amen te sicavas lesche pachiv?

12. Sostar si importanto te sicavas pachiv amare phralenghe? (2 Petru 2:9-12)

¹² Sostar te sicavas pachiv? (Citisar 2 Petru 2:9-12.) Ande pesco duito lil, o Petru phendea că, ande codoi vremea, chichiva andai congregația, prin so phenenas, ci sicavenas pachiv caring „codola cai sile angla lende”, adică caring le phure de congregație. Le îngeri dichle so cărde hai so phende codola manușa nasul. Tha so alosarde te cheren le îngeri? „Anda codoia că sicaven pachiv caring o Iehova”, von ci phende niciech duma nasul caring codola manușa. So bari buchi! Le îngeri, creaturi perfecto, ci camle te prasan codole phuchiarde murșen. Von mechle le Iehovas te cherel cris hai te ortosarel le buchia. (Rom. 14:10-12; dich vi Iuda 9.) Daisaras te sichioas vareso importanto le îngerendar. Dacă trebul te sicavas pachiv vi codolenghe cai așen amenghe contra, vi mai but trebul te sicavas pachiv amare phralenghe. Mai but, trebul te avas ‘le dintune’ cana sicavas lenghe pachiv. (Rom. 12:10) Cana cheras cadea, sicavas pachiv le Iehovasche.

13, 14. Sar daisaras te sicavas pachiv codolenghe andai congregația? Den exemplea. (Dich vi le imagini.)

¹³ Sar daisaras te sicavas pachiv? Cuci phure, den tumari zor te sicaven averen pherde iubirea. (Filim. 8, 9) Dacă trebun te den sfaturi varecasche, cheren cadaia pherde lașimos hai na cana san holiarde. Gule pheia, vi tumen daștin te ajutin codolen andai congregația te sicaven penghe pachiv cana ci den duma nasul anda le coaver hai ci phenen dumes hohamne. (Tit 2:3-5) Savore daisaras te sicavas pachiv le phurenghe cana cheras buchi ande iech than lența. Sa cadea, daisaras te phenas le phurenghe că si cuci anda amende i phari buchi cai cheren-la caște încăren le întruniri, te len sama ca i predicarea te avel mișto cărdi hai te ajutin codolen cai cărde „iech paso greșime”. (Gal. 6:1; 1 Tim. 5:17)

¹⁴ Anda iech phei cai bușiol Rocío sas pharo te sicavel pachiv caring iech phuro cai dea-la iech sfato. Voi phenel: „Somas holiardi. Simțosardem că ci sicadea manghe lașimos cana dea man o sfato. Chăre, dem duma nasul anda leste. Chiar cana ci camlem te phenav averenghe, ci camlem te așunav lesco sfato anda codoia că pachiaiem că vo ci camelas te ajutil man ciaces”. So ajutisardea la pheia Rocío? Voi phenel: „Ande iech ghies, cana citisardem i Biblia, arăslem co 1 Tesaloniceni 5:12, 13. Cana hachiardem că ci sicadem pachiv caring codo phral, mânro ilo astardea te doșarel man. Manglem man hai rodem mai but buchia ande amare publicații caște daștiv te paruvav man. Ji la urmă, hachiardem că na o phral sas doșalo, tha me, anda codoia că somas baricani. Acana jianav că trebul te avel man umilința caște sicavav pachiv averenghe. Vi acana dav mânri zor te sicavav mai dur pachiv averenghe, hai jianav că o Iehova dichel man lașe iachența cana cherav cadaia”.

TE SICAVAS PACHIV CODOLENGHE CAI NAI-LE AMARE PHRALA HAI PHEIA

15. Sostar daștil te avel amenghe pharo te sicavas pachiv codolenghe cai nai-le amare phrala hai pheia?

¹⁵ Sostar daștil te avel pharo? Butivar, andi predicarea, arachas manușen cai ci iubin le Devles sau ci camen te jianen mai but andai Biblia. (Ef. 4:18) Chichiva ci camen te așunen so phenas lenghe anda codoia că, încă de țâne, sas-le sicade te pachian aver buchia. Ca i școala sau ca i buchi, daștil-pe că trebul te beșas manușența cai ci sicaven lașimos hai cai ci sile mulțumime amendar sau amara buchiatar. Pala iech timpo, daștil-pe că hasaras amari pachiv caring cadal manușa hai si amenghe pharo te sicavas lenghe lașimos.

16. Sostar si importanto te sicavas pachiv codolenghe cai ci slujin încă le Iehovasche? (1 Petru 2:12; 3:15)

¹⁶ Sostar te sicavas pachiv? Ci trebul te bâstras că o Iehova silo atento sar phiravas amen codolența cai nai-le Martori. O apostolo Petru phendea le creștinenghe că, prin pengo lașio phiraimos, chichiva daștinas te „den pachiv le Devlesche”. Anda codoia, vo phendea lenghe cana den duma anda so pachian, trebun te cheren cadaia „pherde blândețea hai pachiv”. (Citisar 1 Petru 2:12; 3:15.) Chiar cana le creștini trebun te den duma anda so pachian angla iech judecătorii sau angla aver manușa, von trebun te sicaven sea o timpo pachiv le coaverenghe. Von trebun te phiraven-pe lența sar cana sile angla o Del. Ji la jurmă, o Iehova dichel amen hai așunel amen. Vo silo atento ca so phenas hai ca sar phenas le buchia. Cadaia zuriarel amen vi mai but te sicavas pachiv codolenghe cai nai-le amare phrala hai pheia.

17. Sar daisaras te sicavas pachiv codolenghe cai nai-le amare phrala hai pheia?

¹⁷ Sar daisaras te sicavas pachiv? Cana jias andi predicarea, ci camas te cheras le manușen te hachiaren că amen pachias amen mai lașe lendar anda codoia că jianas mai but andai Biblia. Mai but, camas te dichas-len mai bare amendar hai te anas amenghe amintea că von sile sumnacune andel iacha le Devlesche. (Hag. 2:7; Filip. 2:3) Dacă varecon prasal tut anda so pachias, de chi zor te na phenes lesche parpale vareso nasul. Sar exemplo, prin so phenes, ci trebul te sicaves că san mai goghiaver lestar hai cadea te holiares-les. (1 Pet. 2:23) Cu sea cadala, dacă phenes vareso nasul, daștis te manghes tuche sigo iertarea. Tha sar daștis te sicaves pachiv codolenghe savența cheres buchi? Cher mișto chi buchi hai de chi zor te diches lașe iachența le coaveren, chiar cana si che colegi sau chio șefo. (Tit 2:9, 10) Cana san iech manuș pachivalo, harnico hai cheres mișto chi buchi, ci jianes dacă le manușa va dichena tut mișto, tha jianes ciaces că o Del va dichela tut lașe iachența. (Col. 3:22, 23)

18. So miștimata si amen cana das amari zor te sicavas averenghe pachiv?

¹⁸ Si amen but miștimata cana das amari zor te sicavas averenghe pachiv. Dichleam că, cana sicavas pachiv codolenghe andai familia, sicavas pachiv le Iehovasche, Codo cai cărdea i familia. Sa cadea, cana sicavas pachiv le phralenghe hai le pheianghe, sicavas pachiv amare Dadesche cerisco. Hai cana sicavas pachiv codolenghe cai ci slujin le Devlesche, daisaras te pâtras lenghe o drom caște așaren vi von amare bare Devles. Chiar cana chichiva manușa ci va sicavena amenghe niciechdata pachiv, na-i de ivea sea so cheras amen caște sicavas pachiv. Sostar? Anda codoia că o Iehova va dela amen but miștimata. Vo phenel amenghe ciaces: „Codolen cai den man pachiv va avela te dav-len pachiv”. (1 Sam. 2:30)