O Isus si amaro Baro Rașai pherdo mila

1, 2. a) Sostar bișialdea o Iehova pesche Șiaves pi phuv? b) So va avela te dichas ande cado articolo? (Evrei 5:7-9)

ACANA CAM 2 000 bărșa, o Iehova bișialdea pi phuv pesche mai cuci Șiaves. Sostar? Iech motivo sas, caște chosel o păcato hai o merimos hai caște duriarel sea le pharimata cărde le Satanostar. (Ioan 3:16; 1 Ioan 3:8) Mai but, o Iehova jianglea că i viața le Isusoschi sar manuș pi phuv, va pregătila-les te avel iech Baro Rașai pherdo mila cai duchal-les le manușendar. Vo astardea te slujil sar Baro Rașai pala pesco bolimos, ando bărș 29 a.e.a

² Ande cado articolo va avela te dichas sar ajutisarde le Isusos le buchia prin save nachlea, te avel iech Baro Rașai pherdo mila. Si importanto te hachiaras cadaia. Cana jianas cadai buchi, si amenghe mai ușoro te pașioas le Iehovastar hai te mangas amen lesche, vi mai but cana sam perade anda codoia că cărdeam greșeli. (Citisar Evrei 5:7-9.)

O MAI IUBIME ȘIAVO LE DEVLESCO AVEL PI PHUV

3, 4. Sar parudea-pe i viața le Isusoschi cana avilea pi phuv?

³ Daștil-pe că but anda amende cărdeam paruimata bare ande amari viața. Sar exemplo, daștil-pe că trebuisardea te tiliaras anda o than cai ciaiolas amen but hai te mechas amari familia hai amare amalen. Tha niciech paruimos na-i cadea de baro sar o paruimos cai cărdea-les o Isus cana avilea pi phuv. O Isus sas o iechto hai o mai importanto îngero ando cerii. Vo sas-lo iubime le Iehovastar hai sas sea o timpo fericime anda codoia că cherelas buchi pesche Dadesa. (Ps. 16:11; Prov. 8:30) Cu sea cadala, ando Filipeni 2:7 phenel-pe că o Isus „mechlea sea so sas-les” ando cerii, caște avel pi phuv hai te trail mașcar manușa imperfecto.

⁴ Sa cadea, te gândisaras amen ca le dintune bărșa anda i viața le Isusoschi. Leschi familia sas ciori. Jianas cadaia, anda codoia că cana o Isus năștisailo, lesco dad hai leschi dei daisarde te den numai dui țâne ciriclea sar jertfa co templo. (Lev. 12:8; Luca 2:24) Cana o rege Irod așundea că năștisailo o Mesia, vo rodelas te mudarel-les. Caște ferin le Isusos, o Iosif hai i Maria nașle lesa ando Egipto hai traisarde code iech timpo. (Mat. 2:13, 15) I viața le Isusoschi pi phuv sas zurales diferime cathar leschi viața ando cerii!

5. So dichlea o Isus pi phuv hai sar pregătisarde-les cadal buchia caște avel iech Baro Rașai cai sicavel mila? (Dich vi i imaginea.)

⁵ Cana o Isus sas-lo pi phuv, vo dichlea bute manușen cai nachenas prin bare pharimata. Vo simțosardea i duch cai simțol-la iech manuș cana hasarel varecas ando merimos. Daștil-pe că simțosardea cadaia chiar cana mulea lesco dad, o Iosif. O Isus dichlea manușen cai sas-le zurales nasfale, core, banghe sau dada hai deia cai hasarde penghe șiavorren ando merimos. Lesco ilo sas-lo duchado anda lende. (Mat. 9:2, 6; 15:30; 20:34; Mar. 1:40, 41; Luca 7:13) Si ciaces, vo dichelas le pharimata le manușenghe anda o cerii. Tha cana sas-lo pi phuv sar manuș, daisardea te hachiarel mai mișto sar simțon-pe le manușa hai chichi de duchade sile cana nachen prin pharimata. (Is. 53:4) Hai cadea sar aver manușa, vi o Isus sas-lo poiechdata chino, perado sau duchado.

O ISUS SICAVEL CĂ DUCHAL-LES LE MANUȘENDAR

6. So sichioas anda so phendea o profeto Isaia de mai anglal anda i mila cai sicadea-la o Isus le manușenghe? (Isaia 42:3)

⁶ Ande pesco servicio, o Isus sicadea că duchalas-les le manușendar ciore hai codolendar savența le coaver phiravenas-pe nasul. Andel Scripturi ebraico, phenel-pe că le manușa zurale cai jial lenghe mișto, sile sar iech bar chingiardi sau sar le bare hai zurale cașta. (Ps. 92:12; Is. 61:3; Ier. 31:12) Tha codola ciore, codola bi ajutorosco hai codola savența le coaver phiravenas-pe nasul, sile sar iech trestia phaghi sau sar iech fitilo cai thuvarel. (Citisar Isaia 42:3; Mat. 12:20) Prin cadal exemplea, o profeto Isaia phendea de mai anglal că o Isus avelas te sicavel iubirea hai mila caring le manușa simplo, cai sas-le dichle de telal le coaverendar.

7, 8. Sar pherdea o Isus le dumes, cai phendea-len o profeto Isaia de mai anglal?

⁷ O Matei sicadea că o Isus pherdea i profeția cai cărdea-la o Isaia cana scriisardea: „Vo ci va nichiarela i trestia phaghi hai ci va mudarela o fitilo cai thuvarel”. O Isus cărdea but miracolea anda codola cai sas-le dichle de telal averendar, cai simțosarde-pe sar iech trestia phaghi hai anda codola bi speranțaco, cai sas-le sar o fitilo cai thuvarel hai merel. Mașcar cadala sas vi iech murș zurales nasfalo, cai sas-lo pherdo lepra. Daștil-pe că les ci sas-les niciech speranța te avel sastiardo hai te avel pale pașă pesca familiatar hai pesche amalendar. (Luca 5:12, 13) Aver data, o Isus dichlea ieche manușes cașuco cai sas-lo pharo șibaco. Te gândisaras amen so sas ande lesco ilo cana dichelas averen sar den duma iech averesa, tha vo ci daisardea te hachiarel-len. (Mar. 7:32, 33)

⁸ Andel ghiesa le Isusosche, but evrei pachianas că codola nasfale sas-le cadea, anda codoia că trebunas te pochinen le păcatea cărde lendar sau lenghe familiendar. (Ioan 9:2) Anda codoia, von sas-le dichle nasul le coaverendar hai pachianas că ci sile lașe chancesche. Tha, cadea sar phendea vi o profeto Isaia de mai anglal, o Isus sastiardea lenghe nasfalimata hai ajutisardea-len te jianen că o Del lel sama lendar. So sicavel amen cadaia anda so simțol o Isus aghies anda amende?

9. Sar sicavel o verseto anda Evrei 4:15, 16 că amaro Baro Rașai hachiarel ciaces so si ando ilo le manușengo imperfecto?

⁹ Citisar Evrei 4:15, 16. Jianas ciaces, că o Isus hachiarel amen sea o timpo. So însemnol cadaia? I duma grecisco cai si traducime prin „hachiarel”, însemnol te simțos ciaces i duch cai si le coaveren. Dichas că vi o Pavel folosisardea sa codoi duma ando Evrei 10:34, caște sicavel că duchal-les codolendar cai sile phandade anda pengo pachiamos. Cana citisaras andi Biblia sar ajutisardea o Isus le manușen, daisaras te dichas că les duchalas-les but lendar. Vo ci sastiardea-len numai anda codoia că trebulas te cherel cadaia. Les duchalas-les ciaces lendar hai camelas te ajutil-len. Sar exemplo, vo sastiardea ieche manușes zurales nasfalo cai sas-les lepra. O Isus ci trebulas te șiol o vast po manuș caște sastiarel-les, tha cărdea cadaia! Daștil-pe că sas i iechto data cana varecon șiolas o vast pe codo manuș pala but bărșa. O Isus sastiardea vi ieche manușes cașuco. Pherdo iubirea îngărdea-les dur le bute manușendar cai sas code hai sastiardea-les ande iech than liniștime. Daisaras te gândisaras amen vi ca i jiuvli cai cărdea but păcatea tha, pala codoia voi parudea-pe. Cadai jiuvli haladea le pânre le Isusosche pesche asfența hai șiuchiardea-len pesche balența. Cana iech fariseo dea duma nasul anda late, o Isus ortosardea-les hai ferisardea-la la jiuvlea. (Mat. 8:3; Mar. 7:33; Luca 7:44) O Isus ci nașlea le nasfalendar sau codolendar cai cărde bare păcatea. Vo chiar achardea-len peste hai sicadea lenghe peschi iubirea. Cadea că, daisaras te pachias ciaces că o Isus sicavel sa codo lașimos hai iubirea vi caring amende.

SAR TE LAS AMEN PALA AMARO BARO RAȘAI

10. Sar daisaras te ajutisaras codolen cașuche sau core te pașion le Iehovastar? (Dich vi le imagini.)

¹⁰ Anda codoia că camas te las amen pala o Isus, das amari zor te sicavas iubirea hai mila caring aver. (1 Pet. 2:21; 3:8) Si ciaces, ci daisaras te sastiaras codolen cașuche sau core, tha daisaras te ajutisaras-len te sichion anda o Iehova hai te pașion lestar. Sar exemplo, si amen lila biblico ande mai but sar 100 șiba ando limbajo le vastengo. Hai anda codola cai ci dichen mișto, si amen lila ande Braille ande mai but sar 60 șiba. Mai but, si amen materialea video ande save așunel-pe iech vocea cai phenel so întămplol-pe ande lende, ande mai but sar 100 șiba. Cadal buchia ajutin codolen cai sile core sau cașuche te pașion le Iehovastar hai lesche Șiavestar.

11. Sar sicavel i organizația le Iehovaschi că lel sama sea le manușendar cadea sar o Isus? (Fapte 2:5-7, 33) (Dich vi le imagini.)

¹¹ I organizația le Iehovaschi cherel sea so daștil caște ajutil le manușen pa sea i phuv te pașion le Devlestar. Pala so sas-lo uștiado andal mule, o Isus dea o spirito sfânto sea le manușenghe ca i sărbătoarea andai Penticosta, te așunel fiesavo i vestea lași ande „peschi șib”. (Citisar Fapte 2:5-7, 33.) Amari organizația lel-pe pala o Isus hai cherel publicații ande mai but sar 1 000 șiba, chiar vi andel șiba cai den-len duma țâra manușa. Sar exemplo, andi America de Nord hai de Sud si șiba, cai den duma numai chichiva manușa. Tha amari organizația cherel publicații ande mai but sar 160 anda cadal șiba. Hai cadea sea le manușa cai den duma codol șiba, așunen i vestea lași. Amare publicații sile traducime vi ande mai but sar 20 șiba rromani. Cadaia cărdea ca but manușa cai den duma cadal șiba, te slujin le Iehovasche.

12. So aver buchia cherel i organizația le Iehovaschi andal manușa vi aghies?

¹² I organizația le Iehovaschi na numai că ajutil le manușen prin i vestea lași, tha ajutil vi codolen cai nachen prin dezastrea. Mii phrala hai pheia sile pregătime te ajutin codolen cai nachen prin izdraimata phuveache, prin uraganea sau inundații. Sa cadea, i organizația vazdel thana anda i închinarea, ande save le manușa daștin te sichion mai but anda i iubirea le Devleschi caring lende.

AMARO BARO RAȘAI DAȘTIL TE AJUTIL VI TUT

13. Sar daștil te ajutil amen o Isus aghies?

¹³ Anda codoia că o Isus si amaro lașio păstorii, vo lel sama te avel amen sea so trebul amen caște așias pașă le Iehovastar. (Ioan 10:14; Ef. 4:7) Poiechdata, le pharimata prin save nachas, daștin te cheren amen te simțosaras amen sar iech fitilo cai thuvarel sau sar iech trestia phaghi. Sar exemplo, daștil-pe că sam perade anda codoia că sam nasfale, cărdeam iech greșeala sau ci hachiardeam amen varecasa andai congregația. Daștil-pe că si amenghe pharo te na mai avas duchade, te jias mai dur hai te gândisaras amen ca amari speranța anda o viitorii. Tha te na bâstras, că o Isus dichel prin so nachas hai hachiarel so si ande amaro ilo. Mai but, anda codoia că les duchal-les amendar, camel vi te ajutil amen. Sar exemplo, prin pesco spirito sfânto, daștil te del amen zuralimos cana sam perade. (Ioan 16:7; Tit 3:6) O Isus daștil te folosil vi le phuren hai avere phralen andai congregația caște zuriarel amen hai te ajutil amen. (Ef. 4:8)

14. So ci trebul te bâstres cana simțos tut perado?

¹⁴ Dacă san perado, an tuche amintea că o Isus si amaro Baro Rașai hai gândisar tut so însemnol cadaia anda tute. Na bâstăr că o Iehova bișialdea le Isusos pi phuv na numai caște del peschi viața anda amende, tha vi caște ajutil-les te hachiarel mai mișto le pharimata prin save nachen le manușa imperfecto. Cadea că, dacă che covlimata sau che păcatea cheren tut te simțos tut perado, an tuche amintea că o Isus daștil hai vi camel te ajutil tut. (Evr. 4:15, 16)

15. So ajutisardea ieche phrales cai duriardea-pe le Iehovastar te avel parpale andi congregația?

¹⁵ Sa cadea, o Isus ajutil codolen cai duriarde-pe le Iehovastar te aven parpale Leste. (Mat. 18:12, 13) Te dichas prin so nachlea o phral Stefano.b Pala 12 bărșa de cana sas-lo duriardo andai congregația, vo camlea te avel ca iech întrunirea. O Stefano phenel: „Ci sas manghe ușoro, tha camlem te slujiv le Iehovasche ande iech than mânre phralența hai pheianța. Le phure dine duma manța hai cărde man te simțov man mișto. Poiechdata somas vi perado anda codoia că mechlem le Iehovas, tha le phure ande manghe amintea că o Iehova hai o Isus camen te așiav zuralo. Cana avilem parpale andi congregația, le phrala sicade amenghe but iubirea, manghe hai mânra familiache. Pala iech timpo, mânri rromni astardea te sichiol andai Biblia, hai acana slujisaras ande iech than le Iehovasche”. Amaro Baro Rașai silo bucurime cana dichel că le phrala ajutin codolen cai duriarde-pe le Iehovastar te aven parpale andi congregația!

16. Sostar mulțumisaras le Iehovasche că șiutea le Isusos sar Baro Rașai?

¹⁶ Cana sas-lo pi phuv, o Isus ajutisardea bute manușen. Daisaras te pachias anda sea o ilo că vo va ajutila vi amen oricana si amen nevoia. Andi lumea nevi, vo va ajutila amen te avas eliberime cu sea le păcatostar hai cathar i imperfecțiunea. Mulțumisaras amare Devlesche, o Iehova, anda codoia că iubil amen cadea de but că dea pesche Șiaves te avel amaro Baro Rașai cai silo pherdo mila!