Ajutorii anda le jiuvlea cai nachen prin bare pharimata anda codoia că le coaver phiraven-pe jiungales lența

Cadea astarel o articolo „Sar daștin le jiuvlea te simțon-pe andi siguranța – So phenel i Biblia” pa o site-o jw.org. O linko cathar o sfârșito le articolosco mechel tut te descărchis o materialo ando formato PDF. Cado daștil te avel tipărime hai cărdo ande dui caște avel dino sar iech plianto. Iech phei anda Statele Unite cai bușiol Stacy phenel: „Încaladem mai but pliantea hai ande iech than iecha pheiasa, găleam ca iech centro cai jian le jiuvlea cai si ando pericolo”.

Iech jiuvli cai cherelas buchi code, pușlea dacă daștil te lel mai but pliantea caște del le jiuvlean cai beșen code. Cadea că, dine-pe aver 40 pliantea hai 30 cărți de vizită pe save si o site-o jw.org. Cana le pheia găle pale code, i directoarea le centroschi manglea-len te sicaven le jiuvleanghe sar încărel-pe iech studio biblico.

I Stacy hai aver dui pheia găle ca iech aver centro cai dine 5 pliantea hai le jiuvlea de cothar mangle lendar mai but. Iech jiuvli cai cherel buchi code phendea: „Cado plianto va ajutila but le jiuvlean cai beșen cade. Si amen nevoia lendar”. Aver data cana le pheia găle code, le jiuvlea camle te dichen sar încărel-pe iech studio biblico, hai dui anda lende phende că camen te jian ca iech întrunirea cathar o sfârșito le curchesco.

I Stacy phenel: „Samas bucurime cana dichleam chichi de but jiuvlea camenas te citin cado articolo. O articolo tipărime si iech șucar modo caște phenas i vestea lași le jiuvleanghe cai nachen prin bare pharimata, anda codoia că le coaver phiraven-pe jiungales lența. Sas cadea de șucar te dichas chichi de but camenas le jiuvlea te așunen cadal buchia. Abia ajucăras te dichas sar va ajutila amen o Iehova te phenas mai dur i vestea lași cadale jiuvleanghe”.