Pușimata catar amare cititori

So „gândo” va avela te șiol o Iehova andel ile le națiunenghe pa țâra timpo?

Ande Revelația 17:16, 17 phenel-pe so va avela cana va astarela o baro necazo: „Le deș șinga cai dichlean-le hai i fiara va urâna la prostituata, va pustiina-la, va mechena-la nanghi, va hana lache cotora masesche hai va thabarena-la cu sea andi iag. Că o Del șiutea ande lengo ilo te pheren lesco gândo, da, te pheren pengo corcoro gândo, te den lengo regato la fiarache”. Mai anglal, ande amare publicații phenelas-pe că o „gândo” cai o Iehova va șiola-les andel ile le națiunenghe si codo te distrugin i religia falso.

Cu sea cadala, si nevoia te hachiaras mai mișto cadai buchi. O „gândo” cai o Iehova va șiola-les andel ile le națiunenghe si codo te ‘den pengo regato la fiarache’. Caște hachiaras sar va avela te pherel-pe cadai profeția, te dichas le pușimata cai aven.

Anda caste del-pe duma ande cadai profeția? Anda i „prostituata”, anda savi phenel-pe vi „o Babilono o Baro”, cai reprezentil o imperio mondialo la religiaco neciaci. Del-pe duma vi anda i ‘fiara cai sili zurales loli’ cai si i Organizația Națiunilor Unite. Cadai organizația sas cărdi ando bărș 1919 caște încărel i pacea pa sea i phuv. Mai anglal bușiolas i Liga le Națiunenghi. (Rev. 17:3-5) „Le deș șinga” reprezintin sea le guvernea cai sile pașa i fiara.

Savo si o phanglimos mașcar i prostituata hai i fiara zurales loli? I prostituata ‘beșel’ pi fiara. Avere dumența, voi binecuvântil-la hai del sea peschi zor te cherel so camel lasa hai te încărel-la tela pesco vast.

So va întâmplola-pe la prostituatasa? I fiara, ande iech than le deșe șinghența cai sile pașa late, va „urâna la prostituata”. Va urâna-la cadea de but, că va ciorena lache barvalimata, va sicavena laco nasulimos hai va anena opral late i cris le Iehovaschi. Cadaia însemnol că va distrugina-la cu sea. (Rev. 17:1; 18:8) Cadea, sea le religii falso ci va mai avena. Tha, angla cadaia o Iehova va cherela le națiunen te cheren vareso cai ci mai sas niciechdata pi phuv.

So va șiola o Iehova andi goghi le națiunenghi te cheren? Vo va șiola ando ilo le deșe șinghenghe „pesco gândo”, codo te „den pengo zuralimos hai penghi autoritatea la fiarache” zurales loli, i Organizația Națiunilor Unite. (Rev. 17:13) Cadaia ci însemnol că le guvernea va alosarena corcore te den pengo zuralimos hai penghi autoritatea la fiarache. I profeția sicavel că o Del va șiola ande lenghi goghi te cheren cadaia. (Prov. 21:1; dich vi Isaia 44:28.) Cado paruimos ci va avela țâra po țâra, tha zurales sigo, bi te ajucărel-pe chonic. Pala so i fiara primil i autoritatea, voi va anela i judecata le Iehovaschi opral le religii falso hai va chosela-len cu sea anda sea o timpo.

So ajucăras amen te întâmplol-pe ando viitorii? Ci trebul te ajucăras amen ca le știri te sicaven că le guvernea sile mai but pașa i Organizația Națiunilor Unite. Cadea că, dich so va avela ando viitorii: Cana ci ajucăren-pe, o Iehova va șiola ando ilo le națiunengo o gândo te den pengo zuralimos la fiarache. Cana va avena cadal buchia, va avela te jianas că o baro necazo silo pașă te astarel. Ji atunci, „te așias uștiade hai te avel amen iech gândimos sastevesto” anda codoia că va avena paruimata cai ci ajucăras amen! (1 Tes. 5:6)