Sar daștil te ajutil amen o lil Iov cana nachas prin pharimata?

1, 2. Sostar si mișto anda amende te citisaras o lil Iov?

CITISARDEAN acana țâra timpo o lil Iov? Chiar cana cado lil sas scriime cam acana 3 500 bărșa, but manușa phenen că si iech anda le mai șucar lila cai sas scriime ji acana. Le manușa așaren codoles cai scriisardea cado lil, anda codoia că folosisardea dumes ușoro hachiarimasco, șucar hai cai arăsăn co ilo. Chiar cana o Moise sas o manuș cai scriisardea cado lil, o Iehova sas codo cai phendea lesche so te scriil. (2 Tim. 3:16)

² O lil Iov si iech lil zurales importanto andai Biblia. Sostar? Cado lil ajutil amen te hachiaras că le îngeri hai le manușa trebun te alosaren dacă va slujina le Iehovasche, anda codoia că iubin-les hai camen te ujiaren lesco anav. Sa cadea, code del-pe duma anda le șucar calități le Iehovasche sar avelas i iubirea, o goghiaverimos, o ortomos hai o zuralimos. Sar exemplo, ando lil Iov, phenel-pe butivar anda o Iehova că si „Codo O Mai Zuralo”. Sa cadea, o lil Iov del amen răspunso vi ca aver bare pușimata la viațache, sar avelas: „Sostar mechel amen o Del te nachas prin pharimata?”.

3. So daisaras te sichioas anda o lil Iov?

³ Daisaras te phenas că cana citisaras o lil Iov, si sar cana jias opre pe iech ucio plain. Cana sam code opre, daisaras te dichas mai mișto so si pașa amende. Cana citisaras o lil Iov, daisaras te hachiaras mai mișto sar dichel o Iehova amare pharimata. Mai dur, va avela te dichas sar ajutisardea cado lil chichiva israelițen hai sar daștil te ajutil vi amen acana. Sa cadea, va dichasa sar daisaras te folosisaras o lil Iov caște ajutisaras vi le coaveren.

O IEHOVA MECHEL CA O IOV TE NACHEL PRIN PHARIMATA

4. Sostar sas o Iov diferime le israelițendar cai beșenas ando Egipto?

⁴ Andel ghiesa cana le israeliți sas-le sclavi ando Egipto, iech murș cai bușiolas Iov beșelas ando them Uț, cai daștil-pe că sas co nordo la Arabiaco, co esto cathar o Them Promiso. Cana le israeliți sas-le ando Egipto, but anda lende astarde te anen închinarea le devlenghe neciace. Tha o Iov ci cărdea cadaia. Vo slujisardea loialo le Iehovasche. (Ios. 24:14; Ezec. 20:8) O Iehova phendea anda o Iov: „Na-i chonic sar vo pi phuv”.a (Iov 1:8) O Iov sas iech murș zurales barvalo hai dichlo mișto sea le manușendar de cothar. (Iov 1:3) Chichi de but holiardea le Satanos te dichel cadale manușes prinjiando cai savore dichenas-les mișto, că slujilas anda sea o ilo le Devlesche!

5. Sostar mechlea o Iehova le Iovos te nachel prin pharimata? (Iov 1:20-22; 2:9, 10)

⁵ O Satan phendea că dacă o Iov va nachela prin pharimata ci va mai slujila le Iehovasche. (Iov 1:7-11; 2:2-5) Chiar cana o Iehova iubilas zurales but le Iovos, mechlea le Satanos te sicavel dacă so phenelas vo anda o Iov si ciaces sau nici. (Iov 1:12-19; 2:6-8) O Satan lea le animalen le Iovosche hai mudardea lesche deș șiaven. Mai but, vo cărdea le Iovos te avel-les iech pharo nasfalimos cai pherdea sea leschi morci phugnia. Tha, chiar cana o Satan duchadea but le Iovos, vo slujisardea vi mai dur loialo le Iehovasche. (Citisar Iov 1:20-22; 2:9, 10.) Pala iech timpo, o Iehova sastiardea le Iovos, dea-les but barvalimata hai aver deș șiave. Le manușa dichenas pale mișto le Iovos. Mai but, o Iehova pochindea-les bute bărșența, cadea că vo mai traisardea încă 140 bărșa. Cadea vo daisardea te dichel vi le nepoți lesche nepoțenghe. (Iov 42:10-13, 16) Sar daștil-pe că ajutisardea cadai relatarea le manușen andal purane ghiesa hai sar daștil te ajutil vi amen aghies?

6. Sar daștil-pe că zuriardea le israelițen i relatarea anda o Iov? (Dich vi i imaginea.)

⁶ Sar daștilas te ajutil le israelițen i relatarea anda o Iov? Le israeliți îngărde iech viața phari ando Egipto. Sar exemplo, o Iosua hai o Caleb, cărde buchi but bărșa sar sclavi. Pala codoia, bi te aven doșale, beșle ando șuco than 40 bărșa anda codoia că aver israeliți ci așunde le Iehovastar. Dacă le israeliți așunde anda le pharimata prin save nachlea o Iov, cadaia daștilas te zuriarel vi len hai vi codolen cai traisarde mai târzio. Von daștinas te hachiaren că o Satan si codo cai duchavel-len, na o Del. Sa cadea, daștinas te hachiaren sostar o Del permitil ca le manușa te nachen prin pharimata, că Vo iubil codolen cai așen lesche loialo chiar cana si lenghe pharo hai că va pochinela-len parpale.

7, 8. Sar daștil o lil Iov te ajutil codolen cai nachen prin pharimata? Phenen iech experiența.

⁷ Sar daștil te ajutil vi amen i relatarea anda o Iov? Aghies, but manușa hasarde pengo pachiamos ando Del anda codoia că ci hachiaren sostar le manușa lașe nachen prin pharimata. Prin cadaia nachlea vi i Hazelb anda Rwanda. Cana sas țâni voi pachialas ando Del. Tha, ande lachi viața avile but pharimata. Laco dad hai lachi dei divorțisarde. Lachi dei căsătorisardea-pe avere murșesa hai cado phiravelas-pe jiungales lasa. Mai târzio, cana sas tărni șei iech murș violisardea-la. Voi rodea ca lachi religia te machel laco duchado ilo, tha ci sas cadea. Pala iech timpo, voi scriisardea iech lilorro le Devlesche hai phendea lesche: „Devla, manglem man tuche, rodem te cherav so si mișto, tha tu pochindean man nasulimasa anda sea o lașimos cai cărdem-les. De acanara mechav tut hai rodav te cherav numai so cherel man fericime”. Duchal amen o ilo cana dichas manușen sar i Hazel cai sile hohade te pachian că o Del cherel-len te nachen prin pharimata!

⁸ Tha, anda i relatarea anda o Iov amen sichileam că na o Del si doșalo anda amare pharimata tha o Satan. Mai sichileam că cana le manușa nachen prin pharimata, ci trebul te gândisaras că von cărde vareso nasul. I Biblia phenel că „o timpo hai le buchia cai ci ajucăras-len” daștin te întâmplon-pe oricasche hai oricana. (Ecl. 9:11; Iov 4:1, 8) Sa anda i relatarea anda o Iov, sichileam că cana slujisaras loialo le Iehovasche mai dur, das le Iehovas i ocazia te sicavel că o Satan si iech hohamno. (Iov 2:3; Prov. 27:11) Sam recunoscători că sichileam cadal buchia andai Biblia anda codoia că acana jianas sostar amen hai codola cai iubisaras-len nachen prin pharimata. Pala iech timpo, i Hazel astardea te sichiol andai Biblia le Martorența le Iehovasche hai hachiardea că na o Del silo doșalo anda lache pharimata. Voi phendea: „Manglem man pale le Iehovasche hai șiordem mânro ilo angla leste. Phendem lesche că atunci cana phendem că mechav-les, ande mânro ilo ci camlem ciaces cadaia. Phendem cadal buchia anda codoia că ci prinjiandem-les ciaces. Acana hachiarav chichi de but iubil man o Iehova hai simțov man fericime”. Sam recunoscători că jianas sostar o Del mechel amen te nachas prin pharimata! Mai dur va avela te dichas sar o exemplo le Iovosco ajutil amen te na mechas amen cana nachas prin pharimata.

SAR AJUTIL AMEN I RELATAREA ANDA O IOV TE NA MECHAS AMEN?

9. Sar sas o Iov cana nachelas prin pharimata? (Iacov 5:11)

⁹ Te gândisaras amen sar o Iov beșelas corcoro ando uciar, pherdo phugnia hai ande bare ducha. Leschi morci sas sanorri hai perelas pa leste anda o nasfalimos cai sas-les. Le Iovos ci mai sas-les zuralimos. Sea so daștilas te cherel sas te beșel tele, te lel chichiva cioburi anda luto hai te harundel-pe lența. Vo butivar rovardea-pe anda le ducha cai sas-les. Tha o Iov na numai că traisardea mai dur peschi viața ande codol pharimata. Vo așilea mai dur loialo le Iehovasche hai pachiaia-pe mai dur ande leste. (Citisar Iacov 5:11.) So ajutisardea-les te na mechel-pe?

10. So sicavel că le Iovos sas-les iech amalimos chidino le Iehovasa? Explichin.

¹⁰ O Iov pâtărdea pesco ilo angla o Iehova hai phendea lesche sea so simțolas. (Iov 10:1, 2; 16:20) Sar exemplo, cadea sar dichas vi ando capitolo 3, o Iov phendea chichi de duchado sas anda lesche pharimata. Vo pachialas că o Iehova andea-len pe leste. Pala codoia, le trin amala hohamne le Iovosche phende lesche mai butivar că anda codoia că vo păcătuisardea, o Del andea pe leste codol pharimata. Tha o Iov phendea lenghe mai dur că si loialo le Iehovasche. Si ciaces, le dumes le Iovosche sicade că, anda iech timpo, vo pachialas că si mai orta sar o Del. (Iov 10:1-3; 32:1, 2; 35:1, 2) Tha, o Iov dea peschi sama că poiechdata lesche dumes sas-le ‘bi goghiaco’ anda codoia că camlea anda sea o ilo te sicavel că si loialo le Iehovasche. (Iov 6:3, 26) Ando capitolo 31 citisaras că o Iov camlea că o Del te phenel anda leste că si bidoșalo. (Iov 31:35) Si ciaces, o Iov greșisardea cana manglea mai butivar le Devlesche te phenel lesche sostar nachel prin pharimata. Tha, acana cana citisaras i relatarea anda o Iov, hachiaras că o Iov dea duma cadea le Iehovasa, anda codoia că sas-les iech amalimos chidino lesa hai pachialas că o Del va phenela anda leste că si iech manuș orta.

11. So cărdea o Iehova cana o Iov phendea că silo bidoșalo?

¹¹ Ji la urma, o Iehova răspunzosardea le Iovosche, anda iech bari barval, tha ci phendea lesche sostar vo nachelas prin pharimata. Nici na doșardea-les anda codoia că phendea sar simțolas-pe sau că phendea că ci cărdea chanci nasul. Tha, cadea sar iech dad sicavel pesche șiaves, sa cadea o Iehova sicadea le Iovos sar trebulas te gândil. Cado sas o mai lașio modo te ajutil le Iovos! Cadea că, o Iov phendea pherdo umilința că lesco prinjianimos na-i cadea de baro hai că fal-les pharo anda lesche dumes bi goghiaco cai phendea-len. (Iov 31:6; 40:4, 5; 42:1-6) Sar daștilas cadai relatarea te ajutil le manușen loialo andal purane ghiesa hai sar daștil te ajutil vi amen aghies?

12. Sar daștilas te ajutil le israelițen i relatarea anda o Iov?

¹² Sar daștilas te ajutil le israelițen i relatarea anda o Iov? Le israeliți daștinas te sichion but buchia anda so întâmplosardea-pe le Iovosche. Te gândisaras amen, sar exemplo, co Moise. Ci sas ușoro anda leste te conducil o poporo Israel. Butivar von ci așunenas le Iehovastar hai duchavenas vi le Moises. Le israeliți rovarenas-pe contra o Iehova cana nachenas prin pharimata. Tha, o Moise manghelas-pe le Iehovasche te ajutil-les andel phare ghiesa. (Ex. 16:6-8; Num. 11:10-14; 14:1-4, 11; 16:41, 49; 17:5) O exemplo le Iovosco daștilas te ajutil le Moises cana o Iehova ortosardea-les. Sar exemplo, ca țâra timpo angla ca le israeliți te jian andre ando Them Promiso, o Moise holiardea-pe pe lende hai ‘dea duma bi goghiaco’. Vo ci dea le Iehovasche i pachiv cai meritil-la. (Ps. 106:32, 33) Anda codoia, o Iehova ci mechlea-les te jial andre ando Them Promiso. (Deut. 32:50-52) Chiar cana o Moise sas-lo zurales duchado, vo pherdo umilința mechlea-pe ortosardo le Iehovastar. Daștil-pe că i relatarea anda o Iov ajutisardea le israelițen te na mechen-pe andel pharimata prin save nachle vi pala so găle andre ando Them Promiso. Von daștinas te gândin-pe co Iov hai cadea sar vo, te phenen le Iehovasche so silen po ilo. Tha trebulas vi te anen penghe amintea că von ci si mai orta sar o Iehova. Daștinas te sichion că trebul te aven umilo hai te mechen-pe ortosarde le Iehovastar pherde umilința.

13. Sar dastil te ajutil amen i relatarea anda o Iov te na mechas amen? (Evrei 10:36)

¹³ Sar daștil te ajutil amen i relatarea anda o Iov? Aghies traisaras phare ghiesa, cadea că trebul amen zuralimos caște slujisaras mai dur loialo le Iehovasche. (Citisar Evrei 10:36.) Sar exemplo, daștil-pe că sam nasfale, si amen depresia, bari anxietatea sau si amen pharimata andi familia. Daștil-pe că mulea amenghe iech jeno andai familia sau iech amal drago sau nachas prin aver bare pharimata. Mai but, cana nachas prin pharimata, varecon daștil te phenel sau te cherel vareso cai te duchavel vi mai but amaro ilo. (Prov. 12:18) Sar daștil te ajutil amen o lil Iov? Vo sicavel amen te phenas le Iehovasche so si amen ando ilo hai te pachias zurales că vo așunel amen. (1 Ioan 5:14) O Iehova ci holiarel-pe pe amende dacă phenas lesche so simțosaras chiar cana poiechdata phenas dumes ‘bi goghiaco’. Mai but, o Del va dela amen o zuralimos hai o goghiaverimos cai si amen nevoia caște na mechas amen. (2 Cron. 16:9; Iac. 1:5) Anda o lil Iov, mai hachiaras că o Iehova daștil te ortosarel amen „chichi trebul”, cadea sar cărdea le Iovosa. Lestar sichioas că ci trebul te mechas amen cana primisaras iech sfato sau sam ortosarde prin i Biblia, prin iech phuro de congregație sau iech amal zuralo ando pachiamos. (Evr. 12:5-7) Le Iovos sas-les miștimata anda codoia că pherdo umilința mechlea-pe ortosardo hai vi amen daștil te avel amen miștimata cana mechas amen ortosarde. (2 Cor. 13:11) Cadal cuci sicaimata daisaras te sichioas-len anda o lil Iov. Mai dur, va avela te dichas sar daisaras te folosisaras i relatarea anda o Iov caște ajutisaras averen.

SAR DAISARAS TE FOLOSISARAS I RELATAREA ANDA O IOV CAȘTE AJUTISARAS AVEREN?

14. Savo si iech lașio modo caște phenas le manușenghe sostar nachas prin pharimata?

¹⁴ Arachlean varecas andi predicarea cai pușlea tut sostar si amen cadea de but pharimata? So phendean lesche? Daștil-pe că mai anglal, sicadean lesche andi Biblia so întâmplosardea-pe andi bar le Edenoschi. Daștil-pe că phendean lesche anda o Satan, iech îngero nasul, cai hohadea le Adamos hai la Eva hai cărdea-len te vazden-pe contra o Del. (Gen. 3:1-6) Anda codoia că o Adam hai i Eva ci așunde le Devlestar, sea le manușa nachen prin pharimata hai meren. (Rom. 5:12) Pala codoia, daștil-pe că, phendean lesche că o Del mechel te nachel iech timpo caște sicavel că o Satan si iech hohamno. Ande cado timpo, le manușa daștin te așunen i vestea lași că, pa țâra timpo, le pharimata ci va mai avena hai va avela te traisaras veșnico. (Rev. 21:3, 4) Cado si iech lașio modo te phenes le manușenghe sostar nachas prin pharimata hai cadaia ajutisardea bute jenen te arachen răspunso ca pengo pușimos.

15. Sar daisaras te folosisaras o lil Iov caște ajutisaras ieche manușes cai pușel amen sostar nachas prin pharimata? (Dich vi le imagini.)

¹⁵ Iech aver modo caște sicaves varecasche sostar nachas prin pharimata si te phenes lesche anda o Iov. Mai anglal daștis te așares le manușes anda codoia că șiutea cado pușimos. Pala codoia daștis te phenes că o Iov, iech murș cai traisardea andel purane ghiesa, hai nachlea prin but pharimata, șiutea pesche vi vo sa codo pușimos. Cado murș fidelo chiar pachiaia că o Del sas-lo doșalo anda lesche pharimata. (Iov 7:17-21) O manuș casa des duma daștil te avel uimime cana așunel că vi le manușa andal purane ghiesa pușenas-pe sostar nachas prin pharimata. Pala codoia, daștis te phenes lesche, că anda o lil Iov, jianas că o Satan, na o Del cărdea le Iovos te nachel prin codol ducha. O Satan phenel că le manușa slujin le Iehovasche numai anda codoia că Vo del-len miștimata, tha dacă avenas te nachen prin pharimata ci mai avenas te slujin lesche. Mai daștis te phenes lesche că chiar cana o Del ci sas-lo doșalo andal pharimata le Iovosche, Vo mechlea te aven pe leste cadal pharimata, caște sicavel că Vo pachial că le manușa daștin te așen lesche loialo vi cana na-i lenghe ușoro. Cadea, sicavel-pe că o Satan si iech hohamno. Pala codoia, daștis te phenes lesche că o Del dea but miștimata le Iovos anda codoia că așilea lesche loialo. Cadea că, daisaras te zuriaras averen cana phenas lenghe că le pharimata ci aven le Devlestar.

16. Phenen iech exemplo cai sicavel sar daștil te ajutil o lil Iov varecas cai nachel prin pharimata.

¹⁶ Te dichas sar ajutisardea o lil Iov ieche murșes cai bușiol Mario. Ande iech ghies ando bărș 2021, iech phei predichilas co telefono. O iechto manuș cai vazdea o telefono, sas o Mario. I phei citisardea lesche iech verseto cai sicavel că o Del așunel amare manglimata hai că promitil amenghe că va cherela șucar buchia anda amende ando viitorii. Cana voi pușlea-les so pachial anda o verseto cai citisardea-les, o Mario phendea că ande codo momento scriilas pesca familiache ande iech lilorro că iubilas-la hai pala codoia camelas te mudarel-pe. Vo phendea: „Pachiav ando Del, tha simțosarav man sar cana mechlea man corcoro.” Cana i phei sunisardea-les pale, von dine duma anda o Iov. O Mario camlea te citil sea o lil Iov hai i phei bișialdea lesche iech linko cai îngărelas-les ca i Traducerea la lumeachi nevi. Pala codoia, o Mario camlea te sichiol andai Biblia hai sas zurales bucurime te prinjianel mai but anda o Del pherdo iubirea, cai sicadea lesche ciaces că duchal-les lestar.

17. Sostar mulțumis le Iehovasche anda codoia că șiutea i relatarea anda o Iov andi Biblia? (Iov 34:12)

¹⁷ La Biblia sila o zuralimos te paruvel i viața le manușenghi hai te machel o ilo codolengo cai nachen prin pharimata. (Evr. 4:12) Mulțumisaras anda sea o ilo le Iehovasche anda codoia că mechlea amenghe o exemplo le Iovosco ande pesco Cuvânto! (Iov 19:23, 24) O lil Iov sicavel amenghe că „ciaces, o Del ci cherel chanci nasul”. (Citisar Iov 34:12.) Mai sicavel amenghe vi sostar o Del mechel amen te nachas prin pharimata hai sar daisaras te na mechas amen. Sa cadea, daisaras te folosisaras cado lil, caște zuriaras codolen cai sile duchade. Ando articolo cai avel, va avela te dichas sar ajutil amen o lil Iov te das lașe sfaturi averen.