Mai anen tumenghe amintea?

Citisardean atento le palutne reviste O Turno de veghe? Dichen dacă jianen o răspunso le pușimatande cai aven:

Sostar das pachiv le Iehovasche?

Cheras cadaia anda codoia că meritil-la hai că iubisaras-les but. Sa cadea, das pachiv le Iehovasche vi anda codoia că camas ca vi aver te prinjianen-les. w25.01, p. 3

So daștil te ajutil amen te iertisaras cana varecon duchavel amen?

Ci trebul te garavas amendar so si ande amaro ilo. Tha, trebul te duriaras amendar i holi hai te na mechas ca le buchia cai cărdea-len amenghe iech manuș te duchaven amaro ilo. w25.02, p. 15, 16

Sostar si o Marcu iech lașio exemplo anda le phrala tărne?

O Marcu cărdea bucurime so sas lesche dino andi buchi le Iehovaschi hai slujisardea le phralenghe. Chiar cana daștil-pe că simțosardea-pe duchado hai perado, vo ci mechlea-pe. Vo cărdea buchi le Pavelosa hai avere phralența zurale ando pachiamos. w25.04, p. 27

So camlea o Isus te phenel cana manglea-pe: „Cărdem lenghe prinjiando chio anav”? (Ioan 17:26)

Le discipoli le Isusosche prinjianenas o anav le Devlesco. Tha, vo ajutisardea-len te prinjianen mai mișto le Iehovas, so camel Vo te cherel la phuveasa hai le manușența, so cărdea hai so calități siles. w25.05, p. 20, 21

So va avela te hachiaras dacă sam umilo?

Amen hachiaras că ci jianas sea le buchia. Sar exemplo, ci jianas cana va avela o sfârșito sau sar va cherela o Iehova le buchia. Ci jianas so va avela tehara amara viațasa sau ci daisaras te hachiaras cu sea chichi de mișto prinjianel amen o Iehova. w25.06, p. 15-18

Sar daștil te ajutil amen iech articolo sau iech cuvântarea cana sicavas le coaveren?

Daisaras te pușias amen: „So phenel-pe caște sicavel-pe că cado sicaimos si ciacio? Si cade iech lași ilustrarea cai ajutil man te sicavav mișto cado sicaimos? Con daștil-pe că camel te jianel mai but anda cadai buchi?”. w25.07, p. 18

So daisaras te sichioas anda sar iertisardea o Iehova le Davidos?

O David cărdea bare păcătea, sar avelas vo sutea iecha jiuvleasa cai ci sas leschi rromni hai mudardea varecas. Tha, cana sicadea că fal-les ciaces nasul anda so cărdea, o Iehova iertisardea-les. (1 Regi 9:4, 5) Pala so iertil amen, o Iehova ci va mai doșarela amen niciechdata anda so cărdeam. w25.08, p. 17

So daștis te cheres dacă ieche jenesche casa sichios andai Biblia si lesche mai pharo te hachiarel iech sicaimos?

Dacă si lesche pharo te hachiarel iech sicaimos, chiar cana dean chi zor te sicaves-les mișto anda so phenel i Biblia, daștin te jian mai dur hai te den duma mai târzio anda codoi buchi. w25.09, p. 24

I Biblia del duma anda o ‘athaimos le păcatosco’. (Evr. 3:13) Sostar?

Anda codoia că sam imperfecto, amaro ilo țârdel amen te cheras buchia nasul. Mai but, amari imperfecțiunea daștil te cherel amen te avel amen îndoieli anda i iubirea le Iehovaschi. w25.10, p. 16

Save si trin buchia cai daisaras te cheras-len caște pașioas mai but le Iehovastar cana das duma lesa?

1) Daisaras te gândisaras amen ca le calități le Iehovasche. 2) Daisaras te pușias amen so pharimata si amen, sar exemplo, daștil-pe că trebul te iertisaras varecas. 3) Daisaras te cheras amenghe mai but timpo te das duma le Iehovasa. Cadea, va avela amenghe mai ușoro te șioras amaro ilo angla o Iehova. w25.10, p. 19, 20

Sar daisaras te ajutisaras codolen phure?

Daisaras te jias lende sau te sunisaras-len. Sa cadea, daisaras te jias lența co medico. Sau daisaras te jias lența andi predicarea, cadea sar daștin von. w25.11, p. 6, 7

Save si chichiva buchia importanto cai trebun te cheren-len ca tumaro abiav te bucuril o ilo le Iehovasco?

Cheren so phenel i legea ande tumaro them anda i căsătoria. Len sama ca tumaro abiav hai i petrecerea tumare abiaveschi te sicavel le șucar calități le spiritosche le Devlesco. Tumaro hureaimos ci trebul te sicavel că den tumen bare hai na len tumen pala le obiceiuri cai ci sile pala sar sicavel i Biblia. Den duma claro hai șucar iech averesa cana pregătin tumaro abiav. w25.12, p. 21-24