O Iehova daștil te zuriarel tut cana san perado

1, 2. Sar simțolas-pe poiechdata o Pavel hai sostar daisaras te hachiaras mișto prin so nachlea vo? (Romani 7:21-24)

CANA gândisaras amen co apostolo Pavel, daștil-pe că anas amenghe amintea că vo phendea i vestea lași le manușenghe ande but thana, că scriisardea but lila andai Biblia hai că sas iech lașio sicaitorii. Si ciaces, o Pavel sas iech manuș pherdo tromai hai zuralo ando pachiamos. Tha, cadea sar but anda amende aghies, vi vo simțosardea-pe poiechdata perado hai sas-les phare gânduri.

² Citisar Romani 7:21-24. Cana scriisardea o lil Romani, o Pavel phendea so sas ande lesco ilo. But mașcar amende simțosaras amen sar o Pavel. Vo sas iech creștino zuralo ando pachiamos hai camelas ciaces te așunel le Devlestar, tha anda codoia că sas imperfecto, sas lesche pharo te cherel sea o timpo so camel o Del. Mai but, cana o Pavel gândilas-pe ca so cărdea angla te avel creștino, simțolas-pe doșalo. Hai anda codoia că sas-les iech pharimos cai ci nachelas, poiechdata simțolas-pe perado.

3. So va avela te dichas ande cado articolo? (Dich vi i nota de telal.)

³ Chiar cana poiechdata simțosardea-pe peradoa, o Pavel dea peschi zor te na așel leschi goghi prea but le buchiande cai duchavenas-les. Ande cado articolo va avela te arachas o răspunso cadale pușimatande: Sostar simțosardea-pe o Pavel poiechdata perado? So cărdea o Pavel cana simțosardea-pe perado? So daștil te ajutil vi amen cana simțosaras amen perade?

SOSTAR SIMȚOSARDEA-PE O PAVEL POIECHDATA PERADO?

4. Sostar sas le Pavelos poiechdata phare gânduri?

⁴ Vo andea pesche amintea le buchia nasul cai cărdea-len angla te avel creștino. O Pavel, angla te avel creștino, cărdea but buchia nasul cai pala codoia falea-les pharo anda lende. Sar exemplo, vo sas code cana o Ștefan, iech creștino loialo, sas-lo mudardo hai dichlea cadaia lașe iachența. (Fap. 7:58; 8:1) Sa cadea, vo phirdea te cherel nasulimos bute creștinenghe hai phiradea-pe jiungales lența. (Fap. 8:3; 26:9-11)

5. Sar simțolas-pe o Pavel anda le buchia nasul cai cărdea-len angla te avel creștino?

⁵ Pala so cărdilo creștino, o Pavel poiechdata simțolas-pe doșalo anda le buchia nasul cai cărdea-len mai anglal. Chichi mai but nachelas o timpo, cadichi mai nasul simțolas-pe anda sea so cărdea. Sar exemplo, cana bișialdea pesco iechto lil caring le corinteni, cam ando bărș 55 a.e., vo phendea: „Ci som lașio te avav numime apostolo, anda codoia că phiradem man jiungales la congregațiasa le Devleschi”. (1 Cor. 15:9) Cam pala panji bărșa, cana scriisardea pesco lil caring le efeseni, o Pavel phendea anda peste că si ‘o mai țâno sar o mai țâno anda sea le sfinți’. (Ef. 3:8) Hai ande pesco iechto lil caring o Timotei vo phendea anda peste că sas ‘iech manuș cai meliarelas o anav [le Isusosco], iech persecutorii hai iech cai prasalas’. (1 Tim. 1:13) Daștis te imaginis tuche sar simțolas-pe o Pavel cana jialas ca iech congregația hai dichelas-pe le phralența hai le pheianța cai cărdea lenghe nasul sau lenghe neamurența?

6. So aver buchi peradea but le apostolos Pavel? (Dich vi i nota de telal.)

⁶ Le Pavelos sas-les iech pharimos cai duchadea-les but. O Pavel phendea că lesco pharimos duchavelas-les cadea de but că sas sar „iech canro ando mas”. (2 Cor. 12:7) Vo ci phendea claro savo sas lesco pharimos. Daștil-pe că sas iech nasfalimos sau iech aver buchi cai duchavelas-les but.b

7. Sostar le Pavelosche sas pharo te cherel sea o timpo so si mișto? (Romani 7:18, 19)

⁷ O Pavel simțosardea-pe perado cana cărdea greșeli. Vo cărdea sea so daisardea caște paruvel pesco phiraimos. (Citisar Romani 7:18, 19.) Chiar cana vo camlea te cherel so si mișto, ci daisardea te cherel cadaia sea o timpo, anda codoia că sas imperfecto. O Pavel phendea că delas sea peschi zor te na cherel le buchia nasul cai țârdelas-les lesco ilo te cherel-len hai te cherel so si mișto. (1 Cor. 9:27) Cu sea cadala, vo cărdea greșeli. Daisaras te gândisaras amen chichi de perado simțosardea-pe o Pavel cana delas sea peschi zor te na mai phenel sau te na mai cherel vareso nasul tha sa arăsălas te cherel cadaia!

SO CĂRDEA O PAVEL CANA SIMȚOSARDEA-PE PERADO?

8. Save si chichiva buchia cai ajutisarde le Pavelos te paruvel pesco phiraimos?

⁸ Cadea sar sicaven vi lesche lila, o Pavel gândisardea-pe but sar o spirito le Devlesco daștil te ajutil le creștinen te na mai gândin-pe ca le buchia nasul cai țârdel-len lengo ilo te cheren-len hai te paruven pengo phiraimos. (Rom. 8:13; Gal. 5:16, 17) O Pavel sicadea so buchia trebun te încalaven le creștini anda pengo ilo hai so trebun te duriaren pendar caște aven mișto dichle le Iehovastar. (Gal. 5:19-21, 26) Cadaia sicavel că o Pavel gândisardea-pe save si lesche covlimata. Vo rodea ando Lil le Devlesco sfaturi cai te ajutin-les te jianel so paruimata trebul te cherel hai sar te cherel cadaia. Cadea că, cana citisaras so phenel o Pavel le coaverenghe te cheren caște aven dichle lașe iachența le Devlestar, daisaras te pachias că vi vo cărdea cadaia.

9, 10. So ajutisardea le Pavelos cana simțosardea-pe perado? (Efeseni 1:7) (Dich vi le imagini.)

⁹ Chiar cana o Pavel poiechdata simțolas-pe perado, sas chichiva buchia cai cherenas-les te avel fericime. Sar exemplo, vo bucurilas-pe cana așunelas lașe buchia anda le congregații. (2 Cor. 7:6, 7) Vi o amalimos cai sas-les le phralența hai le pheianța anelas lesche but bucuria. (2 Tim. 1:4) Hai o Pavel sas bucurime anda codoia că sas-les iech amalimos chidino le Iehovasa hai jianelas că Vo dichelas-les lașe iachența. (2 Tim. 1:3) Chiar cana sas phandado andi Roma, o Pavel zuriardea pesche phralen ‘te bucurin-pe ando Rai’. (Filip. 4:4) Cana citisaras le dumes le Pavelosche hachiaras că vo ci gândilas-pe sea o timpo ca pesche pharimata sau ca pesche greșeli. De fiesavi data cana avenas ande leschi goghi buchia cai peravenas-les, o Pavel paruvelas-len sigo buchianța cai cherenas-les fericime.

¹⁰ Iech aver buchi cai ajutisardea le Pavelos te așel bucurime sas te gândil-pe ca i jertfa le Isusoschi. Vo gândisardea-pe că o Iehova iubil-les hai dea pesche Șiaves anda leste. (Gal. 2:20; citisar Efeseni 1:7) Cadea că, vo daștilas te pachial anda sea o ilo că prin o merimos le Isusosco, o Iehova iertisardea lesche păcatea hai va cherela cadaia vi mai dur. (Rom. 7:24, 25) Sea cadal buchia ajutisarde le Pavelos te slujil le Iehovasche vi mai dur bucurime. (Evr. 9:12-14)

11. Sostar zuriarel amen o exemplo le Pavelosco?

¹¹ Cadea sar o Pavel, daștil-pe că simțosaras că trebul te das sea o timpo amari zor caște na gândisaras, te na phenas sau te na cheras vareso cai ci ciaiol le Iehovas. Poiechdata daștil-pe că simțosaras amen perade anda codoia că ci daisaras te cheras sea so si mișto andel iacha le Iehovasche. Iech phei cai bușiol Elizac phenel sar simțol-pe: „Ci mai som cadea de peradi cana gândiv man co Pavel. Zuriarel man te jianav că vi o Pavel trebuisardea te cherel paruimata cadea sar me. Le dumes le Pavelosche anen manghe amintea că o Iehova jianel prin so nachen lesche manușa”. Cadea sar o Pavel, so daisaras te cheras ca o Iehova te dichel amen lașe iachența hai te avas bucurime chiar cana poiechdata simțosaras amen perade?

SO DAȘTIL TE AJUTIL VI AMEN CANA SIMȚOSARAS AMEN PERADE?

12. So trebul te cheras ande fiesavo ghies caște avas mai fericime?

¹² Trebul te cheras mai dur le buchia cai ajutin amen te avas mai pașă le Iehovastar. Gândin tumen: Cana has haben sastevesto, cheras sporto hai sovas chichi trebul, simțosaras amen mai mișto. Sa cadea, cana citisaras anda o Lil le Devlesco ande fiesavo ghies, jias andi predicarea, pregătisaras amen anda le întruniri hai das răspunsuri cana sam code, simțosaras amen zuriarde. Dacă cheras cadal buchia mai dur, von va ajutina amen te gândisaras amen buchiande lașe, na buchiande cai peraven amen hai cadea va avela te avas mai fericime. (Rom. 12:11, 12)

13, 14. Sar simțosarde-pe chichiva phrala hai pheia cana cărde mai dur le buchia cai ajutin-len te așen pașa o Iehova?

¹³ Te dichas o exemplo le phralesco John, cai așundea că siles cancero cana sas-les 39 bărșa. Cana așundea cadaia, vo darailea zurales hai simțosardea-pe perado. Vo gândisardea-pe: „Sostar nasfailem cadea de tărno?”. Ande codo timpo, lesche șiaves sas-les numai trin bărșa. So ajutisardea le phrales te na simțol-pe cadea de perado? Vo phenel: „Chiar cana somas zurales chino, lem sama că amari familia te jial ca sea le întruniri, te jial andi predicarea hai te sichioas sar familia andai Biblia ande fiesavo curco. Cărdeam cadal buchia vi cana sas zurales pharo”. Vo mai phenel: „Cana nachlea i dar cai astardea man mai anglal, i zor hai i iubirea le Iehovaschi ajutisarde man te duriarav mandar le phare gânduri. O Iehova daștil te zuriarel tut, cadea sar zuriardea vi man”.

¹⁴ I Eliza, anda savi deam duma mai anglal, phenel: „De fiesavi data cana jiav ca le întruniri hai sichioav corcori anda o Iehova, zuriarav mânro pachiamos că o Iehova așunel man hai iubil man ciaces. Hai cadaia cherel man fericime”. O Nolan, iech phral cai vizitil le congregații andai Africa, phenel so ajutil les hai lesca rromnia, i Diane: „Mangas amen mai dur, sichioas andai Biblia ande iech than, hai jias ca le întruniri hai andi predicarea vi cana simțosaras amen perade. Cadea o Iehova ajutil amen sea o timpo te avas mai fericime. Cana simțosaras amen perade, anas amenghe amintea că o Iehova va ajutila amen hai va pochinela amen. Ci jianas sea o timpo sar va cherela cadaia, tha jianas ciaces că va avela pașa amende”.

15. So mai daisaras te cheras cana simțosaras amen perade? Den iech exemplo.

¹⁵ Tha so daisaras te cheras dacă simțosaras amen vi mai dur perade? Poiechdata trebul te cheras vi aver buchia. Te dichas iech exemplo. Te phenas că astardea te duchal tut o dumo. Daștil-pe că ajutil tut dacă phires ande fiesavo ghies tha caște nachel i duch trebul te cheres mai but. Mai anglal, daștil-pe că trebul te rodes te hachiares sostar si tut cadai duch hai chiar te manghes iech sfato cathar iech medico. Sa cadea, cana simțosaras amen perade, daștil-pe că trebul te rodas mai but andi Biblia hai ande amare publicații caște hachiaras sostar simțosaras amen cadea hai te dichas so daștil te ajutil amen te simțosaras amen mai mișto. Daisaras vi te mangas o sfato ieche phralesco sau iecha pheiaco cai si zurale ando pachiamos. Te dichas mai dur chichiva buchia cai daștin te ajutin amen.

16. So daștil te ajutil tut te hachiares sostar si tut phare gânduri? (Psalmo 139:1-4, 23, 24)

¹⁶ Daisaras te mangas amen le Iehovasche te ajutil amen te hachiaras so trebul amen ciaces. O Rege David jianelas că o Iehova prinjianelas-les mișto. Cadea că, manglea le Iehovasche te ajutil-les te hachiarel sostar siles ‘phare gânduri’. (Citisar Psalmo 139:1-4, 23, 24.) Vi tu daștis te manghes le Iehovasche te ajutil tut te hachiares sostar si tut phare gânduri hai sar daștis te simțos tut mai liniștime. Sa cadea, daștis te șios tuche chichiva pușimata, sar avelas: „Cathar aven cadal phare gânduri ande mânri goghi? Si chichiva buchia cai cheren man te avav perado? Cana ande mânri goghi aven phare gânduri, dav mânri zor te gândiv man buchiande cai cheren man fericime?”.

17. So buchia andai Biblia daștis te sichios cai te ajutin tut te aves zuriardo? (Dich vi i imaginea.)

¹⁷ Te sichioas buchia andai Biblia cai te ajutin amen ande amari situația. Poiechdata, daisaras te sichioas anda iech calitatea le Iehovaschi cai daștil te zuriarel amen. Sar exemplo, o apostolo Pavel simțosardea-pe zuriardo cana gândisardea-pe ca i iertarea le Iehovaschi hai ca i jertfa le Isusoschi. Vi tu daștis te cheres sa cadea. Daștis te citis articolea anda amare publicații cai den duma anda le calități le Iehovasche sar si i mila, i iertarea hai i iubirea loialo. Pala so araches le articolea cai daștin te ajutin tut, daștis te cheres tuche iech lista lența. Șiu i lista varecai cai daștis te diches-la sea o timpo hai cana astares te simțos tut perado daștis te mai citis iech anda cadal articolea. Cana citis le versetea cai si ande cadal articolea, gândisar tut sar daștis te les tut pala o Iehova hai sar le buchia cai citisardean-len daștin te ajutin tut te simțos tut mai mișto. (Filip. 4:8)

18. Anda soste alosarde te sichion chichiva phrala hai pheia?

¹⁸ I Eliza, anda savi deam duma mai anglal, sichilea mai but anda o Iov. Voi phenel: „Vi me som sar o Iov. Vo nachlea prin bare pharimata. Cu sea cadala, vi andel mai phare ghiesa, vo ajucărdea ca o Iehova te ajutil-les, chiar cana ci jianelas cathar avenas lesche pharimata”. (Iov 42:1-6) I Diane, anda savi deam duma mai anglal, phenel: „Me hai mânro rrom sichioas anda le calități le Iehovasche anda amare publicații. Mulțumisaras le Iehovasche anda sea o ilo că ajutil amen te las amen pala leste. Cana simțosaras amen perade anda amare greșeli, anas amenghe amintea că o Iehova sicavel amen hai ajutil amen te avas manușa mai lașe hai cadaia zuriarel amaro amalimos lesa”. (Is. 64:8)

PACHIAS CIACES CĂ O IEHOVA VA AJUTILA AMEN HAI VA POCHINELA AMEN

19. Sar daștil-pe că simțosaras amen poiechdata tha so daisaras te pachias ciaces?

¹⁹ Chiar dacă va avela te cheras so sichileam ande cado articolo, va avena vi chichiva ghiesa cana ci va avela te simțosaras amen mișto. Poiechdata daștil-pe că chiar va avela te simțosaras amen zurales perade. Cu sea cadala, o Iehova daștil te ajutil amen te na mai gândisaras amen le buchiande cai peraven amen hai te avas mai liniștime. Daisaras te pachias ciaces că va avena amen mai but ghiesa ande save va avela te bucurisaras amen viațatar hai te avas fericime, anda codoia că si amen iech amalimos chidino le Iehovasa hai jianas că vo dichel lașe iachența sea so cheras anda leste.

20. So cames te cheres mai dur?

²⁰ Te cheras mai dur sea so daisaras caște na mechas ca le pharimata, le buchia prin save nachleam hai amare greșeli te cioren amari bucuria. Cana astaras te simțosaras amen perade, o Iehova daștil te ajutil amen te așias liniștime. (Ps. 143:10) Abia ajucăras i lumea nevi cana sea le buchia cai va avena ande amari goghi va cherena amen ciaces fericime. Atunci va avela te ușteas ande fiesavo ghies hai ande amari goghi ci va avela niciech gândo cai te peravel amen. Va avela te slujisaras fericime amare Dades iubitorii, o Iehova!