Te phenas o ciacimos pherde lașimos

1. So trebul te cheras caște cheras partea andai familia le Iehovaschi?

CANA prinjianas ieche phrales sau iecha pheia, butivar i iechto buchi cai pușas-len si: „Sar prinjiandean o ciacimos?”. Chichiva phenen că barile „ando ciacimos”. Aver daștil-pe că phenen, că avile de țâra timpo „co ciacimos”. Phenas cadaia anda codoia că las amen pala o ciacimos anda o Lil le Devlesco ande sea amari viața. Jianas că, caște cheras partea andai familia le Iehovaschi, trebul te sicavas că iubisaras o ciacimos hai că traisaras amari viața pala leste. Cheras cadaia cana sicavas că sam manușa pachivale prin so phenas hai prin so cheras. (Ps. 15:1-3)

2. a) Sar prinjianenas le manușa le Isusos? b) So cherenas le manușa cana așunenas o mesajo le Isusosco?

² O Isus phendea sea o timpo o ciacimos. Vi lesche dușmani phende cadaia chiar cana ci ciaiolas-len lesco mesajo. (Mat. 22:16) O Isus phendea pesche discipolenghe so avenas te cheren le manușa cai avenas te așunen lesche sicaimata. Vo phendea: „Avilem te cherav holi mașcar o șiav hai o dad, mașcar i șei hai i dei hai mașcar i bori hai i sasui”. (Mat. 10:35) O Isus ci camlea ca le manușa te holiaren-pe cana așunenas o mesajo cai vo hai lesche discipoli avenas te phenen lenghe, tha vo jianglea că va avela cadea. (Mat. 23:37) O Isus jianelas că le manușa avenas te dichen lesco mesajo ande dui moduri diferime: chichiva avenas te iubin o ciacimos anda o Lil le Devlesco, tha aver nici. (2 Tes. 2:9-11)

3. So va avela te dichas ande cado articolo?

³ Cadea sar o Isus, vi amen camas sea o timpo te phenas o ciacimos, vi cana le coaveren ci ciaiol-len. Sa cadea, predichisaras hai sicavas o ciacimos andai Biblia, chiar cana jianas că chichiva ci camen te așunen amaro mesajo. Însemnol cadaia că ci va avela te las sama sar hai cana das duma? Nici. Ande cado articolo, va avela te dichas mai anglal iech pușimos importanto: „Cai daisaras te arachas o ciacimos?”. Pala codoia, va avela te dichas sostar, sar hai cana trebul te phenas o ciacimos. Cadal buchia va ajutina amen te alosaras mișto amare dumes, te das duma pherde lașimos hai co mai lașio timpo cana phenas averenghe i vestea lași.

CAI DAISARAS TE ARACHAS O CIACIMOS?

4. Sostar daisaras te phenas că le Iehovastar avel o ciacimos?

⁴ O ciacimos avel le Iehovastar. Sea so phenel vo si ciaces. Sar exemplo, sea so phenel anda so si mișto hai so si nasul si ciaces. (Ps. 19:9; 119:142, 151) Sea so phenel vo anda o viitorii pherel-pe. (Is. 55:10, 11) Vo cherel sea o timpo so phenel. (Num. 23:19) O Iehova ci daștil te hohavel. (Evr. 6:18) Cadea că, daisaras te hachiaras sostar phenel-pe lesche „o Del le ciacimasco”. (Ps. 31:5)

5. Sostar na-i pharo te arachas ‘le Devles le ciacimasco’? Explichin. (Fapte 17:27)

⁵ Chichiva manușa pachian că na-i ușoro te prinjianas le Iehovas „o Del le ciacimasco”, tha cadaia na-i ciaces. Sea so dichas pașa amende sicavel că si iech Del. (Rom. 1:20) Cana o apostolo Pavel dea duma chichiva manușența sicade andi Atena, vo phendea că o Del camel te arachas-les hai că „na-i dur niciechestar anda amende”. (Citisar Fapte 17:27.) O Iehova țârdel peste codolen cai roden o ciacimos. (Ioan 6:44)

6. So ciacimata arachas andi Biblia hai sostar san recunoscătorii că jianes-len?

⁶ Iech buchi prin savi daisaras te prinjianas le Iehovas si te sichioas andai Biblia. O Del dea pesco spirito sfânto le murșen cai scriisarde i Biblia. (2 Pet. 1:20, 21) Cadea că, sea so citisaras andi Biblia si ciaces hai daisaras te pachias ande late. Sar exemplo, daisaras te pachias anda sea o ilo so phenel i Biblia anda sar sas cărde o universo hai i viața pi phuv. (Gen. 1:1, 26) Daisaras te pachias ciaces so phenel amenghe i Biblia, anda sostar păcătuisaras hai sostar si pharimata hai merimos. (Rom. 5:12; 6:23) Daisaras te pachias amen ande so promitisardea amenghe o Iehova, că prin pesco Șiavo va chosela sea o nasulimos cai cărdea-les o Satan, „o dad le hohaimasco”. (Ioan 8:44; Rom. 16:20) Daisaras te pachias că va pherela-pe vi i promisiunea că o Isus va chosela codolen nasul, va anela parpale viațate codolen cai mule, va cherela i phuv pale iech paradiso hai va ajutila amen te avas perfecți. (Ioan 11:25, 26; 1 Ioan 3:8) So bari pachiv dea amen o Iehova! Vo sicadea amen o ciacimos hai dea amen i posibilitatea te sicavas vi averen. (Mat. 28:19, 20)

SOSTAR TE PHENAS O CIACIMOS?

7, 8. Si importanto sostar phenas o ciacimos? Den iech exemplo. (Marcu 3:11, 12) (Dich vi le imagini.)

⁷ Cadea sar dichleam, trebul te phenas o ciacimos dacă camas te cheras partea andai familia le Iehovaschi. Tha, trebul te cheras mai but sar cadaia. Anda o Iehova si importanto sostar phenas o ciacimos. Te dichas so întâmplosardea-pe iech data cana o Isus sas pi phuv. (Citisar Marcu 3:11, 12.) Ando timpo so predichilas pașa i Marea Galileei, but manușa avile leste. Mașcar cadala sas chichiva manușa cai sas-len demoni cai dine cianga angla leste hai dine cingar: „Tu san o Șiavo le Devlesco!”. Sostar le demoni phende o ciacimos anda o Isus? Daștil-pe că von camle ca le manușa cai așunenas, te pachian-pe ande lende hai pala codoia te duriaren-len le Iehovastar. So phende le demoni sas ciaces, tha von rodenas pengo miștimos. O Isus jianglea sostar cărde cadaia hai ci dichlea-len lașe iachența. Anda codoia, o Isus phendea lenghe te na mai den duma anda leste.

⁸ So sichioas anda cadai relatarea? Anda o Iehova si importanto sostar phenas o ciacimos. Cadea că, si zurales importanto te sicavas averen o ciacimos anda o Iehova anda codoia că iubisaras-les hai cana aver așaren amen anda so cheras, camas te das sea i pachiv le Iehovasche. (Mat. 5:16; dich vi Fapte 14:12-15)

9. So ci trebulas te cheras hai sostar?

⁹ Mai dur, te dichas aver situația cai daștilas te cherel amen te rodas amari pachiv. Te phenas că iech phuro de congregație phenel amenghe chichiva buchia cai ci trebun phende mai dur, tha amen phenas-len vi averenghe. Dacă codola savența deam duma așunen mai târzio că so phendeam si ciaces, daștinas te aven uimime că amen jiangleam codol buchia hai daștinas te pachian că si amenghe phende butivar informații sar cadala. Daștil-pe că cadaia va cherela amen mai bare ande lenghe iacha, tha na andel iacha le Devlesche. (Prov. 11:13) Sostar? Anda codoia că, chiar cana so phendeam sas ciaces, ci sas amari buchi te phenas codol buchia hai cărdeam cadaia caște avas mișto dichle averendar.

SAR TE PHENAS O CIACIMOS?

10. So însemnol te das duma „șucar”? (Coloseni 4:6)

¹⁰ Citisar Coloseni 4:6. O apostolo Pavel phendea le creștinenghe anda Colose că lenghe dumes trebunas te aven „sea o timpo șucar”. So camlea vo te phenel? Andi șib originalo, cadaia însemnol că amare dumes ci trebun numai te ajutin codolen cai așunen amen, tha vi te aven pherde lașimos hai mișto alosarde.

11, 12. Sostar trebul te las sama sar sicavas averen o ciacimos? Den iech exemplo. (Dich vi le imagini.)

¹¹ O sfato le Pavelosco te das duma averența șucar, ajutil amen but cana sicavas averen o ciacimos andai Biblia. I Biblia phenel că le ciacimata cai arachas-len ande late sile sar iech sabia ascuțime, cai daștil te șinel o sufleto le spiritostar. Cadaia însemnol că voi daștil te sicavel so si ando ilo ieche manușesco hai so camel vo te cherel ciaces. (Evr. 4:12) Tha, cana ci folosisaras i Biblia goghiaverimasa, daștil-pe că cheras averen te holiaren-pe hai te han-pe amența. Sar?

¹² Te cheras iech exemplo: Andi predicarea arachas ieche manușes cai camel te așunel o ciacimos. Vo phenel că manghel-pe butivar ca le icoanea hai încărel o Crăciuno hai i Patraghi ande iech than pesca familiasa. Amen daisaras te sicavas lesche la Bibliasa că na-i mișto te mangas amen ca le icoanea hai că o Crăciuno hai i Patraghi si sărbători cai ci aven le Devlestar. (Is. 44:14-20; 2 Cor. 6:14-17) Dacă cheras cadaia de cana das duma i iechto data le manușesa, amen phenas lesche o ciacimos, tha ci folosisaras goghiaverimasa o Lil le Devlesco.

13. Sar daisaras te alosaras dumes „mișto longhiarde”?

¹³ O Pavel phendea vi că amare dumes trebun te aven „mișto longhiarde”. Vo ci camlea te phenel că trebul te paruvas sau te garavas o ciacimos. Mai but, vo zuriarel amen te phenas dumes „mișto longhiarde” caște sicavas o ciacimos ande iech modo cai te ciaiol le manușen. (Iov 12:11) Cadaia na-i sea o timpo ușoro. Sar exemplo, cana amen cheras haben, cheras-les cadea sar ciaiol amen hai daștil-pe că pachias că va ciaiola vi le coaveren. Sa cadea, daștil-pe că pachias că savoren ciaiol-len sar das duma. Tha, cadaia na-i ciaces. Sar exemplo, ande chichiva culturi, le manușa phenen sea so pachian bi te încăren-pe parpale, chiar cana den duma varecasa mai phuro. Tha, ande aver culturi, le manușa daștin te holiaren-pe cana varecon del duma cadea. Anda codoia, o Pavel phendea că ‘trebul te jianas sar te das duma fiesave manușesa’. Cadaia însemnol ca amare dumes trebun te aven „mișto longhiarde”, adică te alosaras-len na pala sar ciaiol amen sau pala amari cultura, tha pala sar ciaiol le coaveren.

CANA TE PHENAS O CIACIMOS?

14. Sicadea o Isus pesche discipolen sea so jianelas cana sas pi phuv? Explichin.

¹⁴ O Isus dea duma sea o timpo șucar pesche manușența hai sicadea-len pherdo lașimos but buchia. (Mar. 6:34) Chiar cana trebunas te sichion but buchia, o Isus ci phendea lenghe sea so jianelas cana sas pi phuv. Vo jianelas so daștinas te hachiaren von. Dea peschi sama că ci sas o momento ca lesche discipoli te jianen chichiva ciacimata hai phendea lenghe că ‘ci daștinas te phiraven-len’. (Ioan 16:12) So sichioas cathar?

15. Trebul te phenas codolenghe casa sichioas andai Biblia sea so jianas de iech data? Explichin. (Proverbe 25:11) (Dich vi i imaginea.)

¹⁵ Anda codoia că prinjianas o ciacimos andai Biblia camas te das duma vi averența anda leste. Tha cadaia ci însemnol că trebul te phenas lenghe sea so jianas de iech data. Sar daisaras te las amen pala o Isus? Trebul te gândisaras amen ca i situația le manușeschi casa das duma. Te gândisaras amen pale le murșeste cai încărel o Crăciuno hai i Patraghi ande iech than pesca familiasa. Amen jianas că cadal sărbători sas cărde caște anel-pe închinarea le devlenghe hohamne hai ci sile mișto dichle le Devlestar. Tha te phenas că astaras te sichioas lesa andai Biblia iech curco sau dui angla o Crăciuno. Avelas te sicavas lașimos cana das duma, dacă sicavas le manușesche so phenel i Biblia anda le sărbători cai ci placian le Devles hai ajucăras amen te na mai încărel anda codo ghies o Crăciuno? Si ciaces, chichiva manușa cheren sigo sea so sichion andai Biblia. Tha averen silen nevoia mai bute timpostar te paruven so gândin hai so cheren. Daisaras te ajutisaras codolen casa sichioas andai Biblia te cheren le paruimata cai trebun dacă phenas lenghe so trebun te jianen co momento potrivime, adică cana daștin von te hachiaren. (Citisar Proverbe 25:11.)

16. Sar daisaras te ajutisaras codolen casa sichioas andai Biblia ‘te phiren mai dur ando ciacimos’?

¹⁶ Iech anda le buchia cai anen amenghe i mai bari bucuria si te ajutisaras averen te prinjianen o ciacimos anda o Iehova. Daisaras te ajutisaras-len ‘te phiren mai dur ando ciacimos’ dacă las amen pala le sfaturi cai aven. Te avas vi mai dur iech lașio exemplo. (3 Ioan 3, 4) Te sicavas prin sar traisaras amari viața că pachias ciaces că sea le promisiuni andai Biblia va pherena-pe. Te gândisaras amen sostar camas te phenas o ciacimos. Hai cana sicavas averen andai Biblia te cheras cadaia pherde lașimos, te das duma șucar hai te phenas lenghe so trebun te jianen co momento potrivime. Sa cadea, si importanto te das sea i pachiv le Iehovasche cana aver așaren amen. Cadea, sicavas că sam le Iehovasche, o Del le ciacimasco.