Ov, Chitwishikin Kwikal ni Ditenchik dia Milong ya Nfalang Ditentamina?

Mu jingand jivud, antu akat kusal ma marsh mu jinjil mulong amen anch ditenchik dia milong ya nfalang ditentaminap. Milong yiney yapandaken kand nakash mulong wa chipupu cha Covid-19, chayijimeshina antu avud mulong konfinema, kuburen yom ya usey, ni kuburen mitapu ya kwiyokish yiwanyidina kwamekeshin patok kushalijan kujim kudia pakach pa ampich ni atuzwend.

Ov, milong ya nfalang yiyimeshina antu mar nlel yikez kapwa? Mwaning. Bibil ulejen yom yikusalay Nzamb mulong wa kupwish milong turishina nich.

Milong ya nfalang yikupwishay Nzamb

Mulong: An a antu katwishinap kutek ditenchik dia milong ya nfalang dikutwisha kuyisangaresh antu awonsu.

Mutapu ukupwa: Nzamb ukuswinkesh pa mant ma antu Want wend, utazukinau anch Want wa Nzamb. Ukuyikel pa divu diawonsu kudiokal mwiur.—Daniel 2:44; Mateu 6:10.

Yibudikin: Mulong ukuyikel pa mangand mawonsu, Want wa Nzamb ukutenchik milong yawonsu nawamp nakash. Kwikil kand muntu ukwikala kazwendj ap ukumana mar madiokila ku milong ya kuburen nfalang. (Kuseng 9:8-10, 19) Pakwez, akusanger midimu ya makas mau ni akwikal ni mashakamin mawamp, ma musangar mu majuku mau. Bibil ukanin anch: “Akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau. Awiy kakez katungap chakwel muntu mukwau ashakamamu, ap kakez kadimap chakwel muntu mukwau adia.”—Isay 65:21, 22.

Mulong: Antu kakutwishap kwiyep yishiken yikata kuletish mar.

Mutapu ukupwa: Kusutil Want wend, Nzamb ukupwish yom yawonsu yiletishina yakamish ni wom.

Yibudikin: Mu umutakel wa Nzamb, kukusadikap kand chom chikutwisha kuyisheshin antu yom yau ap ya majuku mau. Chilakej, kukwikalap kand njit, kamungun, ap yipupu. (Kuseng 46:10; 72:16; Isay 33:24) Nzamb ulondin anch: “Antu a Nzamb akez kashakam wakad kwakam, ni yikumbu yau yikez kikal ndond ya kwikangil nich chisambu.”—Isay 32:18.

Mulong: Antu kakuyimeshap kand mar kud antu in kwitongin ni in ris.

Mutapu ukupwa: Antu akutakelau kud Want wa Nzamb akwilej kutek maswir ma akwau pa ndond ya kusambish kusutamu ma ayinau.—Mateu 22:37-39.

Yibudikin: Mu Want wa Nzamb, antu awonsu akwimburij rukat ra Nzamb, rakading “kwitong.” (1 Korint 13:4, 5) Bibil ulondin anch: “Kukez kikalap chom cha ubaj ap chom chiyimp ku Sion, wawiy mukandu utumbila wa Nzamb. Ngand yikez kizul nich ronganyin ra [Yehova]a, mudi mukata kwizul mem mu karung.”—Isay 11:9.

Bibil ulejen anch tushich mu machuku mansudiel ma mangand minam, ni piswimp ap Nzamb ukuwanyish kushilamu kwend piur pa kupwish milong yidiokila ku kuburen nfalang.b (Kuseng 12:5) Pituchingedina yom yiney, mbil ja Bibil jikutwish kukukwash kurish ni milong ya nfalang ukweta katat. Chilakej, tang mitu ya milong “Comment vivre avec moins” ni “L’argent et vous”

Yitongijok ya makasu piur pa Bibil ni milong ya nfalang

Chitongijok cha makasu: Uzwendj ukez kapwap, mulong Yesu walonda anch: “Ushichany nau atuzwendj machuku mawonsu.”—Mateu 26:11.

Uyakin: Yesu wading wisambidin kwend yom yisadikina: Padandamedina mangand minam, uzwendj ukupwap. Pakwez Yesu walejana “rusangu ruwamp kudi atuzwendj,” kuwejaku ni kushilamu kulondina anch Nzamb ukupwish uzwendj chikupu.—Luka 4:18, 43.

Chitongijok cha makasu: Muntu ukimbina kumusangaresh Nzamb ufanyidin kwikal kazwendj, mulong Yesu walonda anch: “Yang ukalandish yom yawonsu yiukweta, upan nfalang jinej kudi atuzwendj.”—Mateu 19:21.

Uyakin: Palonday mazu minam, Yesu kadingap kayitekidina in kwilejend mbil ja kulimish. Wading umuyudin nsand umwing mpich wading mu kampuw mulong wa mapit. Yesu wading umukasikeshin ikundj winou kupipej mwom wend ni kwitiy kutazuk kwa Yesu mulong wa kwikal mwin kwilej wend.

Chitongijok cha makasu: Nzamb ukat kuyiyukish antu mu kuyipitish, mulong Bibil ulondin anch: “Chiyukish cha [Yehova] chawiy chikat kulet dipit.”—Jinswir 10:22.

Uyakin: Mu Bibil, dizu “Chiyukish cha [Yehova]” yisu yivud akat kudisadin mu chifanakesh, mulong wa kwisambin yom mud mwom uwamp, urund uwamp ni Nzamb, ni ruchingej ruwamp ra machuku ma kurutu. (Kuseng 25:14; Yohan 17:3) Ap anch Nzamb wayiyukisha atushalapol end amwing kusutil kuyinkish mapit, pakwez in Kristu avud kadingap kwau ampich. (Disambishil 24:34, 35; Jakobu 2:5) Ap Yesu Kristu kadingap kwend nich yom yivud ya ku mujimbu.—Mateu 8:20.

Chitongijok cha makasu: Bibil ufundishin anch tufanyidin kubombin yom (communisme), palondinay piur pa in Kristu a mu mivu chitot yakusambish anch: ‘abomba yom yau pamwing; alandosha uswan wau ni yom yau.’—Midimu 2:44, 45.

Uyakin: Maverse minam misambidin yom yasalau in Kristu akusambish mu chisu chikemp mulong wa kuwanyish maswir ma in Kristu ading adiokidinap kutambul dibatish. Antu inay eza ku Yerusalem ku musambu wa in Yuda wa Pentekot. (Midimu 2:5) Pakwez, kupwa kwa kwikal in Kristu, asala machuku mavud ku Yerusalem mulong wa kwilej yom yivud piur pa ritiy rau risu, ap anch kadingap katongidina anch akusal machuku mavud mwamu. Chawiy, ambay nau in Kristu apana kwa kwisotil yom yau mulong wa kuyiwanyishin maswir.—Midimu 2:41, 42, 46, 47.

a Yehova diawiy dijin dia Nzamb dilejenau mu Bibil.—Kuseng 83:18, NWT.

b Jingunin mulong wak ukutwish kumuchingejin Bibil, mu mutu wa mulong “Bibil Udi Musul wa Kuchingejin wa Uyakin.”