PA MANGAND mawonsu, mu chisak chawonsu cha antu ni marelijon mawonsu, antu akat kulembilang. Akat kulembil padiau ayinau; ap mu chisak. Akat kulembil mu maegliz, mu ma tempel, mu masinagog, mu mamoske, ni mu yikumbu ya kwifukwil akish. Akutwish kusadin yikang, shapele, rubumbu mufundilau malembil makatau kuchirikin, atupwany, mabuku ma malembil, ap malembil mafundinau pa tuyikunku twa mabay twadingau ni kutek pa ma kabach.

Malembil mayisadil antu ashalijana nich yom yawonsu yikweta mwom pa divu. Chidi chakin anch, tukwet yom yivud yidia chilik chimwing ni yikwetau anam. Mudi anam, tukweting kuswir kwa kudia, rinkind, ni mem. Tukat kuvadik mudi awiy, kushakam aom ni kufa. (Mulej 3:19) Pakwez, antu awiy kusu akata kulembil. Ov, mulong wak?

Pamwing ap chakul chiswapela chidi anch tukweting kuswir kwa kulembil. Chawiy lel, antu avud akumening kulembil mudi mutapu wa kushik mu mwikadil wa muspiritu, ku chom chimenau mudi chitumbila, ni cha chikupu. Bibil ulejen anch atutanga nich rusot ra yom yiney. (Mulej 3:11) Yesu Kristu walonda chisu chimwing anch: “Ayuk kwau antu ija anch: Tukwet kuswir kwa yom ya Nzamb mu michim yetu.”​—Mateu 5:3.

“Kuswir kwa yom ya Nzamb”​—ov, mutapu ik ukwau ukutwishay muntu kurumburil piur pa yikumbu ni yom ya ufun, asaa akad kuchind asutishinau mu malembil? Chakin kamu, antu amwing akat kwichingejin ayinau ap kuyichingejin ambay nau mulong wa kuwanyish maswir ma muspiritu. Pakwez, ov, utonginap anch, antu kakutwishap kuyikwash akwau mu mutapu uwanyidina? Tudi aziyila, akweta mwom wiswimp, akad kuman yom yidia kulemp. Kudi muntu umwing kusu ukweta manangu mapandakenamu, ukweta usu upandakenamu, ujijamena nakash kutupandakanamu ukutwisha kutwinkish yom yituswiridina. Ov, misu maswir minam ma muspiritu matubachikina kulembil?

Tong bil: Ov, usotining umutakel, manangu, ap kwakul ku yipul yimekena mudi yipandakenamu ronganyin ra antu? Ov, wamen kal anch uswiridin dikasikesh pa chisu umena mar makash, kuswir umutakel piufanyidina kukwat chiyul chikash, ap piufanyidina kulikishin piukweta yitongijok ya kufa nich?

Kwambatan nich Bibil, mawiy mayingish mawonsu makin ma kulembil. Bibil udi buku wa kuchingejin nakash pa mutu wa mulong winou, ni ukwet malembil mavud mafundau kudi amakundj ni amband avud ashinshamena. Awiy alembila mulong wa kwit dikasikesh, umutakel, dilikishin, ni yakul ku yipul yikash.​—Kuseng 23:3; 71:21; Daniel 9:4, 5, 19; Abakuk 1:3.

Malembil minam, ap anch mading mashalijadin pakwez mading nich chitongijok chimwing. Malembil ma muntu ni muntu mading nich chom cha usey cha malembil makin, chom chikatau kuvuramen mu mangand nlel unou. Awiy ading ija kudi nany kufanyidinau kulembil.

OV, MALEMBIL mawonsu makat kuyang kwindond yimwing, chikalap nchik muntu ukatau kulembil? Mu mangand ma katat, antu avud atongining mwamu. Chitongijok chinech chiding kudi antu avud akasikeshina yisak ya kwibomb kwa marelijon ni kutong anch marelijon mawonsu madi makin, chikalap nchik kushalijan kudia pakach pau. Ov, chitwishikin kwikal mwamu, ap anch chitongijok chinech chidiap chakin?

Bibil ulejen anch antu avud kakatap kumulembil muntu ufanyidinau kulembil. Pasak pafundau Bibil, antu avud ading ni kuyilembil akish a kusong. Pakwez, Nzamb wayibabesha chisu ni chisu pantaliken nich chisal chinech. Chilakej, Kuseng 115:4-6 ulondin piur pa akish anch: “Akwet matu, pakwez kakuteshangap.” Dizu dined dioviken nawamp. Ov, mulong wak ukutwish kumulembil nzamb wakad kutwish kukutesh dichuku ap dimwing?

Rusangu ra Bibil ramushena rirumburil nawamp piur pa mulong winou. Muprofet wakin Elija wayileja aprofet a Bal anch alembila kudi nzamb wau, kupwa Elija ni ndiy ukez kulembil kudi Nzamb wend. Elija walonda anch Nzamb wakin ukez kwakul ni nzamb wa makasu kakezap kwakul. Pitiyau chiyul chinech, aprofet a Bal alembila chisu chilemp, alembila nich usu wawonsu, ni kudil​—⁠pakwez katwishap! Rusangu rilejen anch: “Pakwez kikwadingap dizu, ap chijingidij.” (1 Ant 18:29) Ov, chom ik chashikena ku mutambu wa Elija?

Kupwa kwa Elija kulembil, Nzamb wend wamwakula kapamp kamwing, watuma kasu kadiokala mwiur ni kwosh mulambu wa Elija watekay pa chintamb. Ov, chom ik chadinga chishalijadina? Kudi chom chimwing cha usey nakash mu malembil aminau ma Elija, mafundau mu 1 Ant 18:36, 37. Madi malembil miswimp nakash​—makweta mazu 39 kusu mu Hebereu wa kusambish. Chikwau kand, mu mazu minam makemp, Elija wamulembila Nzamb tupamp tusatu kusutil ku dijin diend, Yehova.

Baal, dijin dirumburikina “mwin yom” ap “mwant,” wading nzamb wa in Kanan, ni kwading majin mavud madingau ni kusadil mulong wa kumujimbul nzamb winou. Pakwez, Yehova, didi dijin dimwing kusu, dikatau kusadil mulong wa kumujimbul Muntu umwing kusu mu mangand mawonsu. Nzamb winou wayileja antwend anch: “Yam kusu [Yehova] Nzamb wen. Diawiy dijin diam; ni kwikil mukish nikutwisha kwanganijan nend uyaj wam.”​—Isay 42:8.

Ov, malembil ma Elija ni malembil ma aprofet inay a Bal mayil kwi ndond yimwing? Difukwil dia Bal dia yijondisha antu nich yisal ya masandj ni yakupesh ya antu. Pakwez, difukwil dia Yehova dia yiyukishin antwend, in Isarel, ni kuyikol ku yisal yiney yiyimp nakash. Chawiy lel, tongin pa chinech: Anch wamufundil murund ulimishinau nakash mukand, ov, ukez kuchingejin anch aupana kudi muntu mukwau wakad kwikal ndiy ni ukweta chaku chiyimp chakad kwambatan nich yom yawonsu yimenay murund ney kwikal ya usey? Bwat, chakin kamu!

Anch ukat kumulembil Yehova, ukat kumulembil Sakatang, Tatuku wa mangand.a Muprofet Isay walembila anch: “Ey [Yehova] udi Tatukwetu.” (Isay 63:16) Chinech, chawiy Chom chimwing chisambinay Yesu Kristu payilejay in kumulondul anch: “Am nachirik kal kudi Tatukwam, ndiy kamu Tatukwau, ndiy Nzamb wam, udi kand Nzamb wau.” (Yohan 20:17) Yehova udi Tatukwend a Yesu. Ndiy Nzamb walembilay Yesu ni wayifundishay in kwilej end chakwel amulembila.​—Mateu 6:9.

Ov, Bibil utulejin kumulembil Yesu, Mariy, antu atumbila, ap angel? Bwat kwau​—tufanyidin kumulembil ching kusu Yehova. Shinshikin mayingish maad. Chakusambish, kulembil udi mutapu wa kwifukwil, ni Bibil ulondin anch chifanyidin kumwifukwil ching kusu Yehova amwinend. (Kubudik 20:5) Cha kaad, Bibil ulejen anch ndiy ukat “Kutesh kulembil.” (Kuseng 65:2) Ap anch Yehova ukat kuyisadilang antu akwau pakad choy, kutesh malembil chidi chisend cha amwinend kusu ni kakatap kuchipan kudi muntu mukwau. Ndiy Nzamb ukanina kutesh malembil metu muntu ni muntu panrend.

Pakwel anch malembil mey amatesha kudi Nzamb, vurik chiyul cha verse winou: “Pakwez muntu mwawonsu ukez kamutazuk [Yehova] mulong wa kumukwash, ukez kapand.” (Midimu 2:21) Ov, Yehova uteshining malembil mawonsu pakad kwit chom? Ov, kudi chom chikwau tuswiridina kwijik chakwel Yehova atesha malembil metu?

PAK ATAU kulembil, yishankur ya marelijon mavud yikat kukasikeshinang nakash piur pa mikadil yimekena ni mes ya malembil, mudi mutapu wa kushakam ap kwiman, mazu ma kusadil, ni mitapu yikwau ya kwifukwil. Pakwez, Bibil utukwashin chakwel twipuka kwimen pa mikadil yiney yimekena ni mes pakwez tushinshikina pa mikadil yikwau, mikadil ya usey nakash ya chipul ech, “Ov, mutapu ik tufanyidina kulembil?”

Bibil ulejen mutapu ukatau atushalapol a Nzamb ashinshamena kulembil mu jindond ni mutapu wa kushakam ap kwiman. Alembila mu muchim ap nich dizu dia piur kulondulijan nich mikadil yifanyidina. Awiy alembila nich mes mwiur ap kwas manungun. Pa ndond pa kusadin akish, usang, ap mabuku ma malembil mulong wa kuyikwash pakatau kulembil, awiy alembila kwau malembil madiokila mu muchim nich mazu mau. Ov, chom ik chasala anch Nzamb atesha malembil mau?

Mudi mwalondangau mu mutu wa mulong watakelang, awiy amulembila ching kusu Nzamb umwing​—Yehova. Kudi chom chikwau cha usey nakash. Tutangin mu 1 Yohan 5:14 anch: “Chawiy katat ruchingej ritukweta kudi Nzamb rawiy riner, anch twamwit chom, chad tumwit mudi mudia rusot rend, ndiy ukututesh.” Malembil metu mafanyidin kwambatan nich rusot ra Nzamb. Ov, chinech chirumburikin ik?

Chakwel tulembila kwambatan nich rusot ra Nzamb, tufanyidin kwijik bil rusot riner. Chawiy lel, dilejan dia Bibil didi dia usey nakash mulong wa kutukwash kulembil. Ov, chinech chirumburikin anch Nzamb ukulik kututesh anch kand kal twileja nakash Bibil? Bwat, pakwez Nzamb utuchingejidin chakwel twileja piur pa rusot rend, tukimba mutapu wa kutesh nawamp ni kusal yom kwambatan nich rusot riner. (Mateu 7:21-23) Tufanyidin kulembil kwambatan nich yom twilejina.

Pitwilejina piur pa Yehova ni rusot rend, tukez kukul mu ritiy​—⁠chom chikwau cha usey nakash mu malembil. Yesu walonda anch: “Anch ukwetany ritiy, ukez katambulany yom yawonsu ukwitanya mu kulembil.” (Mateu 21:22) Kwikal ni ritiy kurumburikinap kwitiy yom pakad uman wa kashinsh bwat. Pakwez, kurumburikin kwitiyij chom kanang ap anch chimekenap, pakwez chikwet uman ukash. (Hebereu 11:⁠1) Mu Bibil mudi uman ulejena anch Yehova, wakad etu kuman, udaku chakin kamu, udi wa kuchingejin, ni usotin kwakul ku malembil ma antu awonsu akata kutek ritiy mudi ndiy. Chikwau kand, tukutwish kudandamen kumwit chakwel atwinkisha ritiy rikash, ni Yehova ukatishin kutwinkish yituswiridina.​—Luka 17:5; Jakob 1:​17.

Kudi chom chimwing cha usey nakash piur pa mutapu tufanyidina kulembil. Yesu walonda anch: “Kwikil muntu ukutwisha kwiyil kwa Tatuku ching wasutil kudi am.” (Yohan 14:6) Chawiy lel, Yesu udi njil yitukwashina kumushejin Tatuku, Yehova. Chawiy chayilejay Yesu in kumulondul anch alembila mu dijin diend. (Yohan 14:13; 15:16) Chinech chirumburikinap anch tufanyidin kumulembil Yesu. Pakwez, tufanyidin kulembil mu dijin dia Yesu, ni kuvurik anch Yesu udi njil jitukwashina kumushejin Tatukwetu utumbila ni uwanyidina.

In kumulondul Yesu a piswimp nakash amwita kand anch: “Nsalejetu, tulejap niyetwetu mutapu wa kulembil.” (Luka 11:1) Chimeken patok anch, awiy kitap yom yitwisambina kal. Pakwez, awiy asota chakin kamu kwijik yifanyidinau kulembil​—alonda anch, ‘Ov, chom ik chitufanyidina kulembil?’

MALEMBIL minam amatazuka anch malembil makatau kuchirikin kudi antu avud pa malembil mawonsu ma in Kristu. Chikalap chakin ap bwat, malembil ma nsampwil ma Yesu​—matazukinau chisu chimwing anch Malembil ma Nsalejetu ap ma Tatukwetu​—kakatap kumatesh chakin kamu nawamp kudi antu avud. Tutikit twa antu tukat kumachirikin mazu minam pakad kumatesh dichuku ni dichuku, pamwing ap dichuku dia kabuj. Pakwez Yesu kachingejinap anch akez kusadil malembil minam mu mutapu winou. Ov, mutapu ik twija mwamu?

Kurutu kwa kulejan malembil minam, Yesu walonda anch: “Piukulembilanya, kangal walondany mazu mavud.” (Mateu 6:7) Ov, Yesu walejana yom yakad ndiy kufundish kusutil ku kutenchik mazu makezau kulam mu manangu ni kumachirikin? Bwat kwau! Pakwez, Yesu watufundisha yitufanyidina kulembil, ni watuleja patok yitufanyidina kutek pa ndond ya kusambish mu manangu metu pitukata kulembil. Shinshikinany nawamp piur pa yom yalonday. Malembil minam amafundin mu Mateu 6:9-13.

“Tatukwetu udia mwiur, dijin diey aditumbish.”

Chawiy lel, Yesu wayivurisha in kumulondul end anch malembil mawonsu chifanyidin kumalembil kudi Tatukwend, Yehova. Pakwez, ov, wij mulong wak dijin dia Nzamb didi dia usey nakash ni mulong wak chifanyidina kuditumbish?

Kudiosh kwinsambishin kwa rusangu ra muntu, dijin ditumbila dia Nzamb adidimbena makasu. Satan mukankuny wa Nzamb, wamwela Yehova anch ukwet makasu, udi Ntakel wa choy wakad kwikal nich kutentam kwakin pakatay kuyitakel yitang Yend. (Disambishil 3:1-6) Antu avud inunga kudi Satan kusutil ku kulejan anch Nzamb kasadinap chom, udi mwin chisum, ni ulamina rukuny ap kutadik anch Kadiap Sakatang wa yom yawonsu. Antu akwau asambisha kupompat dijin diend adinad, ni kudiosh dijin dia Yehova mu ma Bibil madingau ni kukarumun ni ajidik kudisadil.

Bibil ulejen anch rusot ra Nzamb rikez kudiosh kuburen kutentam kwinoku kwawonsu. (Ezekiel 39:7) Mu kusal mwamu, ndiy ukez kuwanyish maswir mey ni kupwish milong yey? Ov, mutapu ik yikeza kusadik? Mazu malondwilaku madia mu malembil ma Yesu makwil ku chipul chinech:

“Want wey weza.”

Nlel unou, kudi kanvundangesh kakash pakach pa alej a ma relijon piur pa Want wa Nzamb. Pakwez in kumutesh Yesu ading ij anch aprofet a Nzamb abwaka pasak anch Mesia, mwin Kuyikwol antu watondau kudi Nzamb, ukez kutakel mu Want ukeza kaswimp mangand. (Isay 9:6, 7; Daniel 2:44) Ukwez kutumbish dijin dia Nzamb kusutil ku kumekesh patok makasu ma Satan ni kumudiosh Satan ni midimu yend yawonsu. Want wa Nzamb ukez kupwish njit, mayej, nzal​—ni rufu. (Kuseng 46:9; 72:12-16; Isay 25:8; 33:24) Piukata kulembil anch Want wa Nzamb weza, ukat kulembil chakwel ya kushilamu yawonsu yiney yikala yakin.

“Rusot rey arusala pansh mudi mwiur.”

Mazu ma Yesu mamekeshin anch rusot ra Nzamb rikez kusadik chakin kamu pansh mudi mwiur, mudingay Nzamb. Kwikil chom chatwisha kukangesh kusalik kwa rusot ra Nzamb mwiur; parishay Mwan a Nzamb njit ni Satan ni ayilembil end, ni kuyidjibul pansh. (Kujingunik 12:9-12) Chom chinech cha kasatu cha mu malembil ma nsampwil, mudi yom yaad ya kusambish, yitukwashin kudandamen kushinshikin pa yom ya usey nakash​—kangal pa rusot retu, pakwez pa rusot ra Nzamb. Rusot rend rawiy rikeza kuyiletin yitang yawonsu yom yiwamp nakash. Chawiy lel, ap Yesu muntu uwanyidina wamuleja Tatukwend anch: “Kangal chikala mudi munisotila am, pakwez chikala mudi muusotila ey.”​—Luka 22:42.

“Itwinkisha ilel unou yakudia yetu ya pichuku pichuku.”

Yesu walejana kand anch tufanyidinap kwit ching yom yetu ayinetu mu malembil. Chiyipinap kumulembil Nzamb mulong wa maswir metu ma pichuku-pichuku. Pakwez, kusal mwamu, kutuvurishin anch Yehova ndiy kusu ukata “kupan kudi antu awonsu mwom, ni mwiku, ni yom yikwau yawonsu.” (Midimu 17:25) Bibil ulejen anch ndiy udi tatuku wa rukat ukat kusanger kuwanyish maswir ma anend. Pakwez, mudi tatuku muwamp, ndiy kakezap kwitiyij malembil makad kwikal ma ukwash ku mutambu wau.

“Tulikishina milong yetu.”

Ov, ukwet chakin kamu mulong ni Nzamb? Ov, uswiridin dilikishin diend? Nlel unou, antu avud kameningap kand ukash ni uyimp wa chitil. Pakwez Bibil utulejin anch chitil chawiy chikata kulet mar makash, mulong chawiy chikata kuletang rufu kudi antu. Mulong twavadika mu chitil, tusadining chitil chisu chawonsu, chawiy lel ruchingej retu ra mwom wa chikupu mu machuku ma kurutu rimedin pa dilikishin dia Nzamb. (Rom 3:23; 5:12; 6:23) Chidi cha musangar, mulong Bibil ulondin anch: “Nsalejam, ey udi muwamp ukat kulikishin.”​—Kuseng 86:5.

“Tukamunina ku kuyip.”

Ov, umenap mutapu uswiridina swaa, pakad kulab, diking dia Nzamb? Antu avud alikin kwitiyij anch “Sakudimban,” Satan, udingaku. Pakwez Yesu walejana anch Satan udingaku, ni wamutazuka anch “mwin kutakel wa mangand minam.” (Yohan 12:​1; 16:11) Satan wayipisha mangand minam madia mwishin mwa wintakel wend, ni usotin nakash kukudimb niyey, chakwel akukangesha kukasikesh urund wey wa piswimp ni Tatukwey, Yehova. (1 Pita 5:8) Pakwez, Yehova ukwet usu kumupandakanamu Satan ni usangaredin kuyilam antu awonsu amukatina Ndiy.

Kuchirikin kwinoku mu wiswimp kwa yom yijim yidia mu malembil ma nsampul ma Yesu kukutwishap kulejan yom yawonsu yitukutwisha kwit mu malembil. Vurik anch, 1 Yohan 5:14 utulejin piur pa Nzamb anch: “Anch twamwit chom, chad tumwit mudi mudia rusot rend, ndiy ukututesh.” Chawiy lel kangal wakam anch milong yey yidi kwau yakad usey chakwel umuleja Nzamb mu malembil.​—1 Pita 5:7.

Ov, chidi nchik piur pa chisu ni ndond ya kulembil? Ov, kwisu ni ndond ik tufanyidina kulembil?

WAMEN kal chakin kamu anch marelijon mavud matenchikinau nakash makat kukasikeshin kutenchik yikumbu ya malembil ni kupan chisu cha pakampwil piur pa dichuku difanyidinau kulembil. Ov, Bibil utekin mupak piur pa jindond ap pa yisu yitufanyidina kulembil?

Bibil umekeshin anch kudi yisu yifanyidina mulong wa kulembil. Kurutu kwa kudia nich in kumulondul end, chilakej, Yesu wamujikitisha Nzamb mu malembil. (Luka 22:17) Ni pa chisu chakumanganau in kwilej end mulong wa kwifukwil, awiy alembila pamwing. Chawiy lel, awiy adandamena kusal yom yadingau ni kusal mu ma sinagog ma Ayuda ni mu tempel ku Yerusalem. Nzamb walonda anch tempel ukez kwikal “Chikumbu cha kulembil cha antu a michid yawonsu.”​—Marko 11:17.

Pakatau atushalapol a Nzamb kukumangan ni kulembil pamwing, akutwish kutesh malembil mau. Anch chisak chidi mu uumwing muspiritu ni malembil mau makat kumekesh yany yidia mu Bibil, Nzamb ukusangar. Malembil minam makutwish kumubachik chakwel asala yom yela kulik kutwish kusal pamwing ap. (Hebereu 13:18, 19) Atuman a Yehova akat kulembil dichuku ni dichuku mu yikumangan yau. Akutazukin nich chirungul chakwel weza ku Chot cha Want chidia piswimp ney ni witeshinap amwiney malembil minam.

Pakwez, Bibil katekinap mupak ku malembil piur pa chisu ap ndond kanang. Mu Bibil, mudi jinsangu jisambina piur pa atushalapol a Nzamb alembila yisu yawonsu, ni kwindond yawonsu. Yesu walonda anch: “Pakwez ey anch walembil, andam mu kapalakany key, wapat ku chis, chad wamulembil Tatukwey wakad kumekanang ku mes. Chawiy Tatukwey ukata kuman yom yawonsu yiusadila mu ujindj ukez kakuyukish.”​—Mateu 6:6.

Ov, didiap diladikij diamushena? Ukutwish katat kumushejin Mukaleng wa mangand mawonsu yisu yawonsu, pa amwiney, ni ikal nich kashinsh anch ndiy ukez kakutesh. Chidiap chom cha kushimokish, anch twaman anch Yesu wading usotin yisu yivud kushakam amwinend mulong wa kulembil! Chikwau kand, ndiy wasutisha uchuku wawonsu mulong wa kumulembil Nzamb, ni kukimb umutakel chakwel akwat mupak umwing wa usey nakash.​—Luka 6:12, 13.

Amakundj ni amband akwau isambidinau mu jinsangu ja Bibil alembila pasotau kukwat mipak yikash ap kupwish milong yikash. Yisu yimwing alembila ni dizu dia piur ap mu muchim; alembila mu chisak ap muntu ni muntu panrend. Chom cha usey chid anch adinga ni kulembil. Chawiy lel, Nzamb uyitazukin atushalapol end anch: “Lembilany kwakad kulik.” (1 Tesalonik 5:17) Ndiy usotining kudandamen kuyitesh antu awonsu asadina rusot rend. Ov, didiap diladikij dia rukat?

Chakin kamu, nlel unou mu mangand minam mayimp, antu avud akutwish kwiyipul piur pa usey wakin wa malembil. Ov, ukutwish kwiyipul anch, ‘Ov, malembil makez kwinkwash chakin kamu?’

OV, MALEMBIL makutwish kutukwash? Bibil ulejen anch mwaning, malembil ma atushalapol a Nzamb madi chakin kamu ma ukwash kud awiy. (Luka 22:40; Jakob 5:13) Pakwez, kulembil kukutwish kutukwash nakash muspiritu, mu yovil, ap ku mujimbu. Ov, mutapu ik?

Chilakej, anch ukwet mwan utambwila chipan. Ov, ukez kumulej anch chiwapidil kujikitish? Ap ukez kamulej mutapu wa kumujikitish? Pitumekeshina yovil yakin mu mazu, tukat kuyishinshikin ni kuyikasikesh. Ov, chidi chilik chimwing anch chifanyidin kwisamb ni Nzamb? Mwaning! Tal yilakej yilondwila.

Malembil ma kujikitish. Pitukata kumujikitish Tatukwetu mulong wa yom yiwamp yikata kutushiken, tukat kushinshikinang pa yiyukish yetu. Mudi chibudikin, tukutwish kuman anch tufanyidin kujikitish nakash, kwikal nich musangar upandikena, ni kwikasikesh nakash.​—Filip 4:6.

Chilakej: Yesu wajikitisha piur pa mutapu wateshay ni kwakul Tatukwend kwa ku malembil mend.​—Yohan 11:41.

Malembil mulong wa dilikishin. Pitumwitina Nzamb dilikishin, tukasikeshin kom ketu, kujimbish kukarumuk kwetu, ni ronganyin retu piur pa ukash wa chitil. Tukutwish kand kupandakan yovil ya kwifish nich.

Chilakej: David walembila mulong wa kumekesh kukarumuk ni runeng.​—Kuseng 51.

Malembil piur pa Umutakel ni Manangu. Mulong wa kumwit Yehova chakwel atutakela ap atwinkisha manangu tuswiridina kukwat mipak yiwamp yikutwisha kutukwash twikala antu ikepishina chakin kamu. Yikutwish kutuvurish anch tukwet mipak ni kukasikesh ruchingej retu mudi Tatukwetu wa mwiur.​—Jinswir 3:5, 6.

Chilakej: Salomon wita nich kwitudish umutakel ni manangu mulong wa kuyitakel in Isarel.​—1 Ant 3:5-12.

Malembil mulong wa mar. Anch twapan muchim wetu wawonsu kudi Nzamb pitumena mar mu yovil, muchim wetu ukez kutambul dikasikesh ni tukez kumuchingejin Yehova pa ndond ya kwichingejin ayinetu.​—Kuseng 62:8.

Chilakej: Mwant Asa walembila parishay nich akankuny akash.​—2 Jinsangu 14:11.

Kulembil mulong wa kuwap kwa antu akwau aswiridina ukwash. Malembil minam matukwashin kwipuk choy ni kukudish ranaken ni riy.

Chilakej: Yesu walembila mulong wa in kwilej end.​—Yohan 17:9-17.

Malembil ma kushiman. Pitukata kumushiman Yehova mulong wa midimu ni ngikadil yend yamushena, kalimish ketu ni kusanger kwetu piur pend kukez kukul. Malembil minam makutwish kand kutukwash twikal piswimp ni Nzamb wetu ni Tatukwetu.

Chilakej: David wamushimana Nzamb nich chirungul mulong wa chitangil chend.​—Kuseng 8.

Chiyukish chikwau chidiokila ku malembil chidi “chisambu cha Nzamb chisutila ronganyin ra antu.” (Filip 4:7) Kwikal zoong mu mangand minam ma mar chidi chiyukish chimwing chikasikena kwikal nich. Chikutwish ap kwikal ni yiyukish ya ku mujimbu. (Jinswir 14:30) Ov, yiney yikutwish kutushiken mulong wa usu wetu ayinetu? Ov, kudi chom chimwing cha usey nakash chitufanyidina kusal??

CHIPUL chidia piur chikat kulangwish yovil yikash ni ya kusot kwijik. Bibil ulejen anch Yehova ukat kutesh nlel unou ku malembil. Ap anch watesh malembil metu ap walik kumatesh chinech chimedin pa mwikadil wetu.

Yesu walejana patok piur pa antakel a marelijon a pa chirung chend adinga akat kulembil ni rubabek; adinga ameken ku mes kwa antu anch adi antu atentamina. Ndiy walonda anch inay “atambula kal difut diau diawonsu,” chirumburikin anch awiy akez katambul ching yom yisotinau nakash, kuyital kudi antu, chad kakezap kutambul yom yiswiridinau, kuyitesh kudi Nzamb. (Mateu 6:5) Chilik chimwing nlel unou, antu avud akat kulembilang kwambatan nich rusot rau ni pikil ni rusot ra Nzamb. Pakad kwijik yany ya Bibil yitwisambinang, Nzamb kakatap kuyitesh.

Ov, chidi nchik kudi ey? Ov, Nzamb ukez kutesh ni kwitiy ku malembil mey? Chakul chimedinap pa ulombu wey wa chikit, pa muchid wey, ap pa mwikadil wey mu chisak. Bibil utukasikeshin anch: “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.” (Midimu 10:34, 35) Ov, mazu minam misambidin piur pey? Anch umwovil Nzamb wom, ukez kamulimish nakash, ni kwov wom wa kumwovish kuyip. Anch usadin yom yitentamina, chirumburikin anch usotin kusal yom yilondinay Nzamb anch yitentamin pa ndond pa kulondul rusot rey amwiney ap ra ambay ney. Ov, usotin chakin kamu anch Nzamb atesha malembil mey? Bibil ukulejin mutapu wa kulembil chakwel Nzamb akutesha.a

Chakin kamu, antu avud asotin anch Nzamb ayakula ku malembil mau kusutil ku yilay. Ap pa chisu chafundau Bibil, ap anch Nzamb kadingap ni kusal yilay yisu yawonsu. Padinga ni kusut yitot ya mivu pakwel alejana kand chilay chikwau. Chikwau kand, Bibil ulejen anch chisu cha yilay chapwil kupwa kwa machuku ma atwimbuy. (1 Korint 13:8-10) Ov, chinech chirumburikin anch Nzamb kakuteshap ku malembil nlel unou? Bwat! Shinshikin malembil mamwing makulay.

Nzamb ukat kulet manangu. Yehova udi Musul ukash wa manangu mawonsu makin. Ndiy ukwet muchim wa kupan, ukat kwangan kudi antu asotina wintakel wend ni akimbina kushakam kwambatan nich.​—Jakob 1:5.

Nzamb upanining spiritu wend utumbila ni yiyukish yend yawonsu. Spiritu utumbila udi usu wa kusadish wa Nzamb. Kwikil usu upandakenamu winou. Ukutwish kutukwash kujijaman mu yoziu. Ukutwish kutuletin chisambu pa chisu chituvundangeshinau. Ukutwish kutukwash kukudish mikadil yikwau yiwamp nakash ni yamushena. (Galatia 5:22, 23) Yesu wayikasikesha in kumulondul end anch Nzamb ukat kupan chipan chend nich muchim wa kupan.​—Luka 11:13.

Nzamb ukat kupan ronganyin kudi antu amukimbina chakin kamu. (Midimu 17:26, 27) Mu mangand, kudi antu akimbina chakin kamu uyakin. Asotina kumwijik Nzamb​—dijin diend, rutong rend piur pa divu ni antu, ni mutapu ukutwishau kumushejin piswimp. (Jakob 4:8) Atuman a Yehova atanining yisu yivud antu a mutapu winou ni asangaredin kulejan yakul ya Bibil piur pa yipul mudi yiney.

Ov, chawiy chikubachikina kutambul gazet winou? Ov, ukimbin kumwijik Nzamb? Pamwing ap wawiy mutapu ukezay kwakul ku malembil mey.