Ov, Eden Yading Ndond Ya Kusambish Ya Antu?

TONGIJOKIN bil amwiney kwikal mu chir. Kwikil kuzuwol, ap masok ma antu amena mar mu musumb movikena piuyingumukina piswimp ni rubumbu. Chir chinech chidi chijim, ni kwikil chom chikangeshina mwikala chisambu. Chikwau kand, manangu mey madi zwang pakad yakamish, mujimbu wey ukwetap mayej, ap kusansan. Yovil yey yikwet want ipau wa kusal yiusotina mwi ndond udia.

Chakusambish ey mes mey makat kusanger kutal ulombu wa yisalamb yilayina, kusut kwa kawit, tunan ni tunan twa mayij ni masuku madia mu muten ma ulombu wa mem ma matamb ni mwizuzwimb. Uteshin rinkind muwamp pa chikit chey ni uteshin res ra malash mawamp. Uteshin kunyikek kwa mayij, masok ma mem mawidila pa mayal, kudil kwa atujil, ni kwa atupwapu asadina midimu. Piutongidina pa yom yiney, ov usotinap kushakam mu jindond mudi jinej?

Antu awonsu mu mangand akat kwitiyij anch antu asambisha mu jindond ja mutapu winou. Pasutin kal yitot ya mivu, yid ya relijon wa Ayuda, ya Kristendom, ni ya Amizilima ayifundisha piur pa chir cha Eden, mwayitekau Adam nenday Ev kudi Nzamb chakwel ashakama. Kwambatan ni Bibil, awiy ading ni chisambu, ni mwom wa musangar. Ading mu chisambu umwing ni mukwau, pamwing ni anam, ni Nzamb, ndiy wayinkisha mu uwamp ruchingej ra kwikal nich mwom wa chikupu mu mashakamin ma rukat.​—Disambishil 2:15-24.

In Hindu niyawiy akwet yitongijok kushalijan piur pa paradis wa pasak. In Buda akat kwitiyij anch ntakel wau mujim wa muspiritu, ap Buda, wasambisha pa chisu chitazukinau anch âge d’or pa chisu chadinga mangand mudi paradis. Ni marelijon mavud madia mu Afrik mafundishin jinsangu jivud jisikena nakash nich jinsangu ja Adam nenday Ev.

Pakwez, chitongijok cha paradis wa kusambish chamekana mu marelijon ni yishankur ya antu. Mwin kufund umwing walonda anch: “Michid yivud yitiyijin jinsangu ja paradis wa kusambish wadinga uwanyidina, ukweta want ipau, chisambu, musangar, yakudia yivud, wakad kuzengol, mar, ni kupwitijan. . . . Yitiyij yiney yisadin anch antu asota kwikal mu paradis washadika ni kwikal nich rusot rikash ra kumuchirish.”

Ov, jinsangu jinej ni yishankur yawonsu yidiokil kwi ndond yimwing? Ov, chitwishikin anch “chitongijok cha antu awonsu” chikala chibachikinau mu manangu kudi chom chimwing chakin? Ov, chakin kamu kwading chir cha Eden pasak ni Adam nenday Ev akin?

Antu akad kwitiyij akat kupipesh chitongijok chinech. Mu chirung chinech cha siyans, antu avud alondining anch jinsangu jinej jading kwau jingany ni ja makasu. Chishimokishina chidi anch, kadiap in kulik kwitiyij awonsu asotininga ching yom yimenau ni mes bwat. Antakel avud a chirelijon akat kukasikesh kulik kwitiyij jinsangu ja chir cha Eden. Akat kulond anch ndond mudi yiney kiyadingakwap. Awiy akat kulond anch rusangu riner ridi kwau ra chifanikesh kusu, ringany, ra makasu, ap chishimu.

Chakin, mu Bibil muding yishimu. Yesu walejana yishimu yimwing yikash pakach pa yiney. Pakwez, Bibil kalejenap rusangu ra Eden mudi chishimu, urilejen mudi rusangu rakin ni riswapela kutesh. Chikwau kand, anch yom yiney yirumburilau kandikal yishikenap, chawiy lel, ov, mutapu ik chikutwishika kuchingejin milong yikwau yidia mu Bibil? Shinshikinany amboku mulong wak antu amwing akat kutadik piur pa chir cha Eden ni tukuman anch mayingish mau madi ma kashinsh. Chawiy lel tukushinshikin mulong wak mulong winou ufanyidin kumutal muntu ni muntu pakach petu.

Ov, Kwading Chakin Kamu Chir Cha Eden?

OV, WIJ rusangu ra Adam nenday Ev ni chir cha Eden? Antu avud mu mangand ij nawamp. Mulong wak ukutwishap kutang amwiney? Ukez katan rusangu riner mu Disambishil 1:26–3:24. Pinap arumburil nawamp rusangu rawonsu:

Yehova Nzamba wamuumba muntu nich rufunfut ra divu, wamupila dijin dia Adam, ni wamuteka mu chir mwi ndond yadingau ni kutazuk anch Eden. Nzamb amwinend ndiy watenchika chir chinech. Wachidimina ku mem ni chading ni mitond ya ufun yibudishina mabuj. Pakach pach pading “mutond wa ronganyin ra kuwap ni kuyip.” Nzamb wayijidika antu anch kangal adia ku mutond winou, ni walonda anch kubwambwil kwau kwela kuyitwal ku rufu. Pa chisu chinicha, Yehova wamusadina Adam murund​—mband Ev—​ndiy wa muumba kusutil ku rubavu rumwing ra Adam. Nzamb wayinkisha mudimu wa kulam chir ni wayileja anch avulijana ni izwisha divu.

Padingay Ev amwinend, nnak umwing wasambisha kwambamb nend, ni kumudimb chakwel adia dibuj diamulikishau kusutil ku kulond anch Nzamb wamudimba ni wamujindjika chom chimwing chiwamp, chom chikeza kumusal ikala mudi Nzamb. Ndiy witiyija ni wadia dibuj diayijidikau. Kupwa, Adam winunga nend mu kumubwambwil Nzamb. Yehova wakula kusutil ku kuyipup Adam ni Ev, ni nnak. Kupwa, antu ayopata mu chir chadinga paradis, ayiteka angel kurutu ku chis cha chir chinech.

Pakach pa in kwilej, in manangu, ni in kulejan jinsangu, kudi antu avud itiyijina anch jinsangu jafundaul mu Bibil mu mukand wa Disambishil jadinga jakin ni jasadika. Nlel unou, kudi ntad jipandaken nakash pa milong yiney yawonsu. Ov, chom ik chiletishina ntad piur pa rusangu ra Adam, Ev, ni chir cha Eden rilejenau mu Disambishil? Shinshikinany amboku yom yinying yikatau kutadik antu avud.

1. Ov, chir cha Eden chadingaku chakin kamu?

Ov, mulong wak kudi kutadikijan pa mulong winou? Chitwishikin pamwing ap mulong wa Filozofi. Mu yitot ya mivu, in teoloji apakisha kulejan anch chir cha Nzamb chadingaku kwi ndond yimwing. Pakwez, mu egliz mwandama malejan ma afilozof in Grek mudi Platon nenday Aristote, alejana anch kwikil chom pa divu chela kwikal chiwanyidina. Kuwanyin kwela kwikalaku ching kusu mwiur. Chawiy lel, in teoloji atonga anch, Paradis wa kusambish wading wa mwiur.b Antu amwing alondin anch chir chading piur nakash pa mukandu ulemp nakash chawiy chasala anch chir chipuka kukwachik nich uyimp wa pa divu; antu akwau alondin anch chading Kwindum ap Kurul kwa divu; ni antu akwau kand, anch chading pa ngond ap piswimp ni ngond. Chidap chom chishimokishina, chitongijok chawonsu piur pa Eden chimeken mudi cha kutongin kwau mu manangu. In kwilej amwing a katat alikin kwitiyij ndond yadinga Eden anch yikwetap usey, ni kulond anch ndond ya mutapu winou kandikal yikalaku.

Pakwez, Bibil kalejenap chir mu mutapu winou. Mu Disambishil 2:8-14, alejen yom yivud yatangau mwinimwa. Chir chinech chading kwingangel mwi ndond yadingau ni kutazuk anch Eden. Wit umwing wading ukat kwichil mem mu chir, ni wiyangana mu tuwit tukwau tunying. Tuwit twawonsu tunying tukwet majin, ni alejen mu wiswimp mutapu tusutina. Yom yiney yayishimokisha in kwilej, avud pakach pau atanga verse winou wa Bibil amana anch jindond jinej ja pasak jidaku ni nlel unou. Pakwez, ashikena ku kwikal nich yitongijok yivud yipwitijadina. Ov, chinech chirumburikin anch mutapu mulejenau Eden, chir chend, ni tuwit twend yidi kwau ya makasu ap ringany?

Shinshikin pa chinech: Yinship ya mu rusangu ra mu chir cha Eden yashikena pasutin kal mivu 6 000. Ayifunda kudi Moses, ndiy wasadina yom yamulejau ap pamwing ap mikand yafundau kurutu. Chikwau kand, Moses wafunda pasutin kal mivu 2 500 kupwa kwa kusadik kwa yinship. Eden wading wikadil kal rusangu ra pasak. Ov, chitwishikin anch nlel unou yijingidij ya ndond yiney mudi tuwit yikarumuka mu kusut kwa yitot ya mivu dikum ni yaad? Divu dikat kukarumukang. Ndond kwadinga Eden yidi ndond yikata kuzal divu nakash​—katat achindin mulong kusu wa ndond yiney uvud wa 17 pa chitot wa kuzal kujim nakash kwasadika mu mangand. Mwi ndond ya mutapu winou, kukarumuk kufanyidin kwikalaku. Chikwau kand, Mabeb ma pa chirung cha Nowa ni mawiy mashikena ku kukarumun ndond yiniya mu mutapu umwing wakad kutwish kujingunin lel unou.c

Pakwez, pinap padi yom yikemp yitufanyidina kwijik: Disambishil ulejen anch chir chading ndond yakin. Tuwit twaad pakach pa tuwit tunying tujimbwilau mu rusangu​—Eferat ni Tigre, ap Tigir—​tusutin ni nlel unou, ni yimwing ya misul ya tuwit twinetu yidi yikwatijadin pamwing nakash. Rusangu rijimbwil ap jingand jasutina tuwit twinitwa ni kulejan mapit ma divu mijikena nawamp mwin ngand. Kudi antu adinga mu Isarel wa pasak, antu akusambish atanga rusangu riner, amana anch malejan minam mading ma usey.

Ov, jingany ap jinsangu ja makasu ela kujifund mwamu? Ov, apakishin kudiosh yom kampand yikutwishau kutang ap kulik? Jinsangu ja makasu jisambishining mwamu: “Pasak mwingand yimwing ya kulemp”. Pakwez, jinsangu ja kashinsh jikat kupakish kulejan kachom pa kachom, mu mulejenau jinsangu ja Eden.

2. Ov, chitwishikin kwitiyij anch Nzamb wamuumba Adam kusutil ku rufunfut ni Ev kusutil ku rubavu?

Siyans wa katat wamekesha anch mu mujimbu wa muntu muding yom kushalijan​—muding hydrogène, l’oxygène, ni carbone—​yiney yawonsu yiding mu divu. Chad mulong wak yom yiney ayiteka mu yitang yikweta mwom?

In Siyans avud alejen anch mwom wasambisha awinau, kudiosh ku tuyom tukemp tuswapela nakash ni pakemp-pakemp, mu tunan twa mivu yikala yijim ni yijim nakash. Pakwez, dizu “tukemp tuswapela” dikutwish kudimban, mulong yitang yawonsu yikweta mwom​—ap tuyitang tukemp nakash tukweta selil umwing kusu tumenau ching ku microscope—​tuding tukash. Kwikil diyingish ap dimwing dimekeshina anch mwom wawonsu wisambishina awinau pakad kuchingejin. Pamwing ap, yitang yawonsu yikweta mwom yiletin uman wakin anch ayitanga kudi muntu ukweta manangu mapandikenamu nakash manangu metu.d​—Rom 1:20.

Ov, ukutwish kutongin piur pa kuyitesh antu awangina, kutal chipich chimwing cha ufun ap kushimok piur pa yibudikin ya milong ya winchij ni kupwa kusambish kulik anch yom yiney yikwetap mwin kuyisal? Bwat, chakin kamu! Pakwez, yom yiney ya ufun yikutwisha ap kushik pa kujimb, ufun ap ukaliweny wasalau nich mujimbu wa muntu. Ov, mutapu ik tukutwisha kutong anch kwikil Sakatang wa yom yiney? Chikwau kand rusangu ra Disambishil rilejen anch pakad pa yitang yawonsu yidia pa divu, ching muntu ndiy watangau mu chifu cha Nzamb. (Disambishil 1:26) Chawiy lel, muntu ndiy ching kusu ufanyidina kumekesh pa divu rusot ra Nzamb ra kutang, mu kuwanyish midimu yamushena ya mizik, mudimu wa makas, ni winchij. Ov, chinech chifanyidin kutukashimwish pa kuman anch Nzamb watanga nawamp nakash kutupandakanamu?

Ov, chela kumukasiken kusadil rubavu pa kumutang mband?e Nzamb wela ap kusadil yom yikwau, pakwez mutapu winou wa kumutang mband wading urumburikina nakash. Ndiy wasota anch ikundj ni mband atijana ni asala chom chimwing, mudi mwadingau “mujimbu umwing.” (Disambishil 2:24) Ov, udiap mutapu ukutwishau ikundj ni mband kukwashijan umwing ni mukwau, ni kusal chom chimwing chikash, chimekeshina patok anch kudi Sakatang wa manangu ni mwin rukat?

Chikwau kand, in kwilej maselil a katat itiyija anch antu awonsu adiokala kudi ikundj ni mband umwing. Ov, jinsangu ja Disambishil jidi chakin kamu ja kutongin?

3. Mutond wa ronganyin ni mutond wa mwom yimeken mudi ringany.

Rusangu ra Disambishil rilejenap anch mitond yiney yading ni usu wa pakampwil ap upandakenamu mitond yikwau bwat. Pakwez, Yehova wateka mitond yiney mudi yijingidij yikweta kurumburik kwa usey.

Ov, antu kakatap kusalang mwamu yisu yimwing? Chilakej, nkalansambu ukutwish kumubabesh mwin chisum anch wasal kal uyimp pantaliken ni dirumburish. Yidiap yom mudi, ma tapis, ap rubumbu ra chikumbu cha dirumburish yisotinay kulam bwat pakwez usotin kulam ditenchik dia kutentam dimenau kusutil chikumbu cha dirumburish. Ant avud asadila mukombu wa Want ni chibangul mudi yijingidij ya ukaleng wau.

Ov, mitond yiney yaad yirumburikin chom ik? Kuding malejan mavud piur pa milong yiney. Chakul chakin, ap anch chiswapel pakwez chirumburikin chom chijim. Mutond wa ronganyin ra kuwap ni kuyip wamekesha chisend chikwetay Nzamb amwinend​—mbil ya kutond chiwapila ni chiyipina. (Jeremiy 10:23) Chishimokishinap pa kuman anch kwiy ku mutond winou chading chakin kamu chisal chiyimp! Ku mutambu ukwau, mutond wa mwom, wading umekeshin chipan chikutwishau kulet ching kusu kudiay Nzamb amwinend​—mwom wa chikupu.​—Rom 6:23.

4. Nnak walonda wamekana kwikal wa mu jinsangu ja makasu.

Kutang chikunku chinech cha Disambishil kukutwish kwikal kwamushena, pamwing ap anch tutanginap yikunku yikwau ya Bibil. Pakwez, Bibil urumburil pakemp-pakemp yom yiney yakad kovikan nawamp.

Ov, nany ap chom ik chasala anch nnak winou amekana mudi ukat kulond? In Isarel a mu mivu ya pasak adinga ija yom yikwau yadingau afanyidin kutokish pa chom chasalay nnak. Chilakej, adinga ija anch anam kakutwishap kulond ap pakemp, muntu wa muspiritu ukutwish kumusal nnam chakwel amekena anch ulondin. Moses niyend wafunda rusangu piur pa Balam; Nzamb wamutuma mwangel chakwel asala anch chimbur wa Balam alonda mudi muntu.​—Kuchind Michid 22:26-31; 2 Pita 2:15, 16.

Ov, aspiritu akwau, ni akankuny a Nzamb, akutwish kusal yilay? Moses wamana in kupesh adinga ni kusadil maji a mu Idjibit akat kulondwish yilay yimwing ya Nzamb, mudi kukarumun mukombu wikala nnak. Usu wa kusal yom mudi yiney wela kudiokal ching kusu kudi akankuny a Nzamb adia mwi ndond ya muspiritu.​—Kubudik 7:8-12.

Chawiy lel, Moses amupepila kand chakwel afunda mukand wa Job. Mukand winou ulejen yom yivud piur pa mukankuny wa Nzamb, Satan, walonda yom ya makasu piur pa ukashinsh wa atushalapol awonsu a Yehova. (Job 1:6-11; 2:4, 5) Ov, in Isarel ading ij anch Satan wamusadina nnak mu chir cha Eden, chakwel amekana mudi ukat kulond, ni kumudimb Ev chakwel akanganya kushal ashinshamena kudi Nzamb? Chimeken kwikal mwamu.

Ov, Satan ndiy wasal anch nnak alonda makasu? Yesu wisambina piur pa Satan mudi “mwin kudimban, ndiy kamu tatuku wa makasu mawonsu.” (Yohan 8:44) “Tatuku wa makasu” ndiy wadinga mwin kusambish makasu mu mangand, kimwawiyap? Makasu ma kusambish madi mu mazu mamulejau Ev kudi nnak. Padingay ni kutadik piur pa kubabesh kwa Nzamb anch kudia dibuj dijidikinay kukushikij ku rufu, nnak walonda anch: “Kiukufanyap kwen.” (Disambishil 3:⁠4) Chimeken patok anch Yesu wading wij anch Satan wasadina nnak. Kujingunik kwapanay Yesu kudi kambuy Yohan kulejen nawamp anch Satan ndiy “nnak mukur.”​—Kujingunik 1:1; 12:9.

Ov, chidi chakin kamu chom chakad kwovakan kwitiyij anch muntu wa muspiritu ukweta usu ukutwish kusadil nnak, ni kumusal mudi ukat kulond? Ap antu, akad kwikal ni usu ukash mudi antu a muspiritu, akutwish kusal yom yilondina mudi muntu ni kumekesh mafilim ku ma televizion ni kudiosh mazu ku ma radio.

Uman Umwing Wakad Kutadik

Ov, ukutwishap kwitiyij anch ntad jinej piur pa rusangu ra Disambishil jikwetap mufulandal wakin? Chikwau kand, kudi uman ukash ulejen anch rusangu riner ridi rusangu rakin.

Chilakej, Yesu Kristu amutazukin anch “kaman wakin wa yom yakin.” (Kujingunik 3:14) Padingay muntu uwanyidina kalondap makasu, kaswimpap uyakin dichuku ap dimwing. Chikwau kand, ndiy walejana anch wadingaku pasak kurutu ikala muntu pa divu​—chimeken anch, ndiy washakama pamwing ni Tatukwend, Yehova, ‘piyading ngand kand kal ayitanga.’ (Yohan 17:5) Chawiy lel, ndiy wadingaku mwom kurutu kwa kusambish kwa mwom pa divu. Ov, uman ik udia wa kashinsh nakash kupandakanamu ma uman mawonsu?

Yesu wisambina piur pa Adam nenday Ev mudi piur pa antu adingaku chakin kamu. Ndiy wisambina piur pa uruw wau parumburilay chany cha Yehova piur pa kwikal ni mband umwing. (Mateu 19:3-6) Anch awiy kadingakwap ni chir mwadingau ni kushakam radinga kusu ringany, Yesu wela kwikal mwin kudimban ap mwin makasu. Chitongijok chinech chitwishikinap! Yesu wading mwiur umen mutapu yadinga yisadikina yom yawonsu mu chir. Ov, uman ik ukutwisha kwikal ukash kupandakanamu winou?

Chakin kamu, kulik kwitiyij rusangu ra Disambishil kudi kulik kutek ritiy mudiay Yesu. Kulik kwitiyij kwinoku kukusal anch chikasikana kutesh mitu ya milong yimwing yijim ya mu Bibil ni ya kushilamu yikasikeshina nakash. Talany amboku mutapu chidia mwamu.

[Mazu madia kwishin kwa paj]

Mulong Wak Milong Ya Eden Yikutadil

CHOM chimwing chishimokishina nakash chatadikau kudi in kwilej amwing chidi anch rusangu ra Eden karikasikeshidinap mu mikand yikwau yidia mu Bibil. Chilakej, Paul Morris Mulej wa Malejan ma Chirelijon wafunda anch: “Kwikil maverse ma Bibil malejena patok rusangu ra Eden.” Mazu minam amitiyija kudi “in kukimbijol” avud, pakwez matadikijadin ni uyakin.

Bibil ukwet maverse mavud misambina piur pa chir cha Eden, Adam, Ev, ni nnak.a Pakwez, kurumbuk kwa in kwilej akemp kudi kwakad usey anch akwisikej ni malejan makwau mavud nakash, ni makash. Kusutil ku kupipej jinsangu ja Disambishil piur pa chir cha Eden, antakel a chirelijon ni in kutadik Bibil awonsu inay akat kwirijek mulong wa kutadik yilondinay Bibil. Ov, mulong wak?

Kwijik yom yashikena mu Eden kudi kwa usey mulong wa kutesh yom yikwau yilejenay Bibil. Chilakej, Dizu dia Nzamb adifunda mulong wa kutukwash chakwel tutana yakul ku yipul yikash ni ya usey nakash yikatau kwiyipul antu. Tupamp tuvud, Bibil wakwil ku yipul yimedina pa yom yashikena mu chir cha Eden. Shinshikin yilakej yimwing.

● Ov, mulong wak tukat kunanap ni kufa? Adam nenday Eve ela kushakam chikupu anch adandamena kumuziyil Yehova. Anch abwambwila ela kushiken ku kufa. Pa dichuku diabwambwilau, awiy asambisha kufa. (Disambishil 2:16, 17; 3:19) Ashadisha kuwanyin ni apalangesha kuburen kuwanyin kudi anau. Chawiy lel Bibil urumburil anch: “Yitil yandamina mu mangand kudi muntu umwing, ndiy kamu Adam, chad yitil yend yaleta rufu. Chawiy rufu riner rashika kudi antu awonsu, mulong antu awonsu asala yitil.”​—Rom 5:12.

● Ov, mulong wak ulikidinay Nzamb uyimp? Mu chir cha Eden, Satan walejana anch Nzamb wadimbana ni kuyikish yitangil yend yom yiwamp. (Disambishil 3:3-5) Chawiy lel, ndiy watadika anch Nzamb kakwetap mbil ya kuyitakel antu. Adam nenday Ev atonda kumulondul Satan; chawiy lel, niyawiy alika ukaleng wa Yehova ni amekesha anch muntu ukutwish kukwat mupak amwinend piur pa uwamp ni uyimp. Kwambatan nich kutentam ni manangu mend mawanyidina, Yehova wijika anch kwading mutapu umwing kusu wa kwakul nawamp ku kutadikij kwinoku​—kulikidil chisu chisuta, chakwel ayinkisha antu chisu cha kuyikel ayinau mudi musotinau. Uyimp usadikina wadiokila ku yibachikin ya Satan, ni wamekesha pakemp-pakemp uyakin winou ukash: Muntu kakutwishap kwitakel amwinend pakad Nzamb.​—Yeremiy 10:23.

● Risu rutong ra Nzamb piur pa divu? Mu chir cha Eden, Yehova wateka chany chimwing cha ufun mulong wa divu. Ndiy wayinkisha Adam nenday Ev mbil ya kwizwish divu ni anau ni ‘kudiziyish,’ chakwel apalangesha chilik chimwing cha ufun winou ni mashakamin mawamp pa divu diawonsu. (Disambishil 1:28) Chawiy lel rusot ra Nzamb mulong wa divu ridi anch divu dikala paradis mukezau kushakam antu awanyidina, dijuku dia an a Adam nenday Ev didia mu uumwing. Yom yivud yisambidinau mu Bibil yidi kurumburik kwa kuwanyin kwa rutong riner ra kusambish.

● Mulong wak Yesu Kristu weza pa divu? Wintombuj mu chir cha Eden waleta rufu piur pa Adam nenday Ev ni pa anend awonsu, pakwez Nzamb waleta ruchingej nich rukat. Ndiy wamutuma Mwanend pa divu chakwel aleta yilejenay Bibil anch difut. (Mateu 20:28) Ov, chinech chirumburikin ik? Chakin, Yesu wadinga “Adam wa kwisudiel”; ndiy waswinkana pa ndond pakanganyay Adam. Yesu walama mwom wend uwanyidina kusutil ku kudandamen kumuziyil Yehova. Chawiy lel, ndiy wapana mwom wend kwa kwisotil mudi chakupesh, ap difut, ni watwishisha kudi antu awonsu ashinshamena kutambul dilikishin ku yitil yau ni kushiken ku kwikal nich mwom wadingau nich Adam nenday Ev mu Eden kurutu kwa kusal chitil. (1 Korint 15:22, 45; Yohan 3:16) Chawiy lel, Yesu wamekesha anch rusot ra Yehova ra kukarumun divu dined chakwel dikala paradis mudi Eden rikwikal rakin kamu.b

Rutong ra Nzamb ridap rakad kwovikan, ap malejan mamwing makad kumekan ma chiteoloji bwat. Ridi rakin. Mudi mwadinga chir cha Eden ndond yakin pa divu dined nich anam ni antu akin, chawiy lel, kushilamu kwa Nzamb mulong wa machuku ma kurutu kudi kwakin, kukez kusadik chakin kamu piswimp ap. Ov, yikez kwikal machuku mey ma kurutu, yom yakin kudi ey? Ukutwish kutambul yivud ya yom yiney. Nzamb usotin antu avud anch chitwishikin ikala ni machuku minam ma kurutu, ap akayitil.​—1 Timote 2:3, 4.

Padingay Yesu piswimp ni kufa, ndiy wambamba ni muntu wadinga uchingedina kumujip. Muntu winou wading mwin chisum; ndiy wading wij anch ading afanyidin kumujip. Pakwez wamwita Yesu dikasikesh, ni ruchingej. Ov, chom ik chamulejay Yesu? “Ukwikal ni yamam mu Paradis.” (Luka 23:43) Anch Yesu wasota anch muntu winou wadinga mwin chisum​—avumbuka ni atambula chiyukish nich ruchingej ra kushakam chikupu mu paradis ukeza kwikal mudi chir cha Eden​—ov, kakusotap anch niyey utambula chiyukish chinech? Mwaning! Tatukwend usotin! Ang usotin machuku ma kurutu mudi minam, sal usu wey wawonsu chakwel wileja piur pa Nzamb wasala chir cha Eden.

[Mazu madia kwishin kwa paj]

[Kamushet/​Chipich chidia pa paj wa 10]

UPROFET UTEKINA BIBIL MU UUMWING

“Am nikez katek rukuny pakach pey [nnak] ni mband, ni pakach pa mbut ya mband. Ndiy ukez kakuchany ku mutu wey, niyey ukez kamusum ku kapolantundu kend.”​—Disambishil 3:15.

Winou udi uprofet wa kusambish wa Bibil walejanay Nzamb mu Eden. Ov, yom yiney yinying: mband, anend, nnak, ni anend, yifanikeshin ik? Ov, mutapu ik ukeza kwikalaku “rukuny” pakach pa yom yiney?

NNAK

Satan Djabul.​—Kujingunik 12:9.

MBAND

Dirijek dia Yehova dia yitang ya mwiur. (Galatia 4:26, 27) Isay walonda anch “mband,” watakelau kulejan ufanyidin kuval muchid wa mu machuku ma muspiritu ma kurutu.​—Isay 54:1; 66:8.

MBUT YA NNAK

Antu atondina kusal rusot ra Satan.​—Yohan 8:44.

MBUT YA MBAND

Wakusambish Yesu Kristu, wadiokala mu ditenchik dia mwiur dia Yehova. Mwi “mbut” yiney mudi kand akadivar enday Kristu a muspiritu, akeza kuyikel nend mwiur. In Kristu azizidilau many inay asadin muchid wa muspiritu, “Isarel a Nzamb.”​—Galatia 3:16, 29; 6:16; Disambishil 22:18.

KUMUSUM KU KAPOLANTUNDU

Kusansan kwovay Mesia kwading kwa chisu chikempkukwatijan nich mausu mend. Satan watwisha pamujipay Yesu pa divu. Pakwez, Yesu wavumbuka.

KUMUCHANY KU MUTU

Kumujip Satan. Yesu ukez kumudiosh Satan chikupu. Ap kurutu kwa yom yiney, Yesu ukez kudiosh uyimp wasambishay Satan mu Eden.​—1 Yohan 3:8; Kujingunik 20:10.

Chakwel wileja mu wiswimp mutu wa mulong ujim wa Bibil, tal broshir La Bible ​— Quel est son message ? Wapalangeshau kudi Atuman a Yehova.

[Chipich chidia pa paj wa 11]

Adam nenday Ev amana mar ma yibudikin yiyimp ya chitil